|
١٦\٢\٢٠١٦
ھەڵوێستمان
بەرانبەر رۆژاوا
دەبێ ھەڵوێستی
رەخنە و ھاریکاریی بێ.
زاھیر باھیر
- بەشی
پێنجەم -
• ھەڵەکانی ئەم دواییەی پەکەکە و کەوتنەداوی
حکومەتەکەی ئاکەپەوە:
گەر لەسەرەتاشدا لامان ڕووننەبووبێت، کە دەوڵەتی تورکیا و ئاکەپە نیازی
ئاشتییان لەگەل کوردانی باکوردا نەبووبێت و ئەوەی کە کردیان ھەر وەکو
تاکتیکێک بەکاریانھێنابێت بۆ بەڕێکردنی وەخت ، ئیدی ھۆیەکانی
چاوەڕوانکردنی وەخت چیبێت زۆربەیان لای ئێمە نەزانراوە. بەڵام لە
سەرەتای ساڵی ڕابوردووە ئەم دەستە دەرکەوتووە و کەشفە کە پرۆسەی
ئاشتی تەنھا لەو ڕێگایەوە سەرکەوتوو دەبێت کە ئۆجەلان و چەند کەسێکی
کەمی پەکەکە باوەڕیان پێی ھەیە کە ڕاوەستانی شەڕی ماڵکاولانەی شاخ و
شارە ، ھەتا ئەگەر ئەم شەڕڕاگرتنە یەکلایەنانەش بێت و ھەر بۆ بەڕیکردنی
وەختیش بێت.
ئۆجەلان لەم بوارەدا کە ھەوڵێکی یەکجار زۆر و ھەنگاوی گەورە گەورەی
ناوە ، کە لە زۆر شوێنی دیکەدا باسمکردون ، تا مانگی تەموزی ساڵی
ڕابوردوو توانی تاکتیکەکانی دەوڵەت و ئاکەپە یەک بە یەک پوچبکاتەوە ،
توانی کێشەی کورد لە کێشەیەکی داخراوی نێوخۆی تورکیاوە بکاتە کێشەی
سەرمێزی وڵاتان و دەسەڵاتدارەکانییان، توانی بزوتنەوەی پەکەکە لە
بزوتنەوەیەکی نەتەوەیی چەکدارانەی چەقبەستتوەوە بگوێزێتەوە بۆ
بزوتنەویەکی کۆمەڵایەتی زیندوی نموونەیی ، بۆ بزوتنەوەی دژە دەوڵەت و
دژە دەسەڵات لە ھەر شێوە و ناوەرۆکێکدا بێت ، شۆڕشی سیاسی پارتیانەی
گۆڕی بۆ شۆڕشێکی کۆمەڵایەتی لە ھەموو بوارێکدا بەمەش توانی بە
ملوێنەھا خەڵکی لە سەرانسەری ئەم دونیایەدا لە کوڕان و کچانی گەنج
بکاتە ھاوکار و کۆمەککار بە ڕۆژاوا و بە باکور ... توانی گەلێکی دیکە
لەمانە بکات.
بەڵام مەخابن، ھەموو ئەم ھەوڵ و کۆششانەی ئۆجەلان ، گەر ئەم بارودۆخە
وابڕوات، بە دڵنیاییەوە بە زایە دەڕوات و دەبێت بگەڕێینەوە بۆ ساڵانی
ھەشتا و نەوەدەکانی سەدەی پێشوو، ئەمە جگە لەوەی کە ھەنگاوی یەکەمیش
دەبێت بۆ تێشکانی بزوتنەوەی ڕۆژاواش.
وەستانی شەڕ، گواستنەوەی بزوتنەوەکە لە شاخەوە بۆ شار و شارۆچکە و
لادێکان کردنی بە شۆشێکی کۆمەڵایەتی قۆڵی شەڕخوازانەی دەوڵەت و ئاکەپەی
لە بندا بڕی و خستنییە ژێر فشارێکی ناوخۆی تورکیا و سەراپای دەرەوە و
سیاسەتیی ناوەوە و دەرەوەی تورکیای خستە ژێر چاودێریەکی یەکجار وردەوە.
لە کاتێکدا کە دەوڵەت و ئاکەپە ھەرگیز نێتی ئاشتەواییان نەبووە و نییە
و بەڵام کەوتبوونە بەردەم واقیعێکەوە کە نەیاندەتوانی ھەر بەو ئاسانییە
بگەڕینەوە بۆ شەڕکردن. دەیانزانی ئەم ڕێگایەی کە پەکەکە گرتویەتییەبەر
تاکە ڕێگەی سەرکەوتنتی ئەوانە و تێشکانی ئەمانە ، دەزانن کە دەروازەی
ھاتنەناوەوەی یەکێتی ئەوروپای لێدادەخرێت، دەکەوێتە بەر لۆمە و
گازەندەیەکی زۆرەوە ، ئەمانە و سەرکەوتنی پارتی ھەدەپە و کەمکردنەوەی
دەسەڵاتی ئاکەپە لە دەوڵەتدا....... لەبەر ئەمانە ئاکەپە بە یارمەتی
دەزگە سیخوڕییەکەی ' میت ' تاکە چارەیەک لای ئەوان گەڕانبوو بە دوای
ڕیزێک تاکتیکدا کە ھەرچۆن ھەیە پەکەکەی پێبخەنە داوەکەوە و
بزوتنەوەکەی ڕۆژاواشی پێلاواز بکەن تاکو ڕۆژاواش ڕێڕەوی سازشکارییەکی
وا بگرێتە بەر کە ببێتە وانەیەک بۆ ھەموو چەپ و کۆمۆنیست و سۆشیالیت و
ئازادیخوازانێک کە بەو ئاسانییە ئیدی پشتگیری ھیچ بزوتنەوەیەک نەکەن.
بەداخەوە دەقاو دەق پەکەکە ئەوەی کرد کە ئاکەپە ویستی کە لە کوشتنی دوو
پۆلیسەوە دەستیپێکرد و ( گەرچی پەکەکە ئەو ھەواڵەی بەدرۆ خستەوە)
بیانوی دایە دەست دەوڵەت نەک لە گرتنی دەیەھا کەسدا و ھەڵوەشاند‌نەوەی
پرۆسسەی ئاشتی و کردنی ھەڕەشە و گوڕەشە ، ھێڕشکارییەکانی بەندبکات،
بەڵکو بۆ ماوەی چەند ڕۆژێکیش کوردستانی باشوریشی بۆمببارانکرد و
چەندەھا گوند و چەندەھا خەڵکانی سیڤڵ لەگەڵ ھەندێک لە گەریلاکانی
پەکەکەشدا، کوشت.
دوای عەمەلییە تیرۆرریستییەکەی داعش لە ئەنقەرە و گیانلەدەستدانی زیاتر
لە ١٣٠ کەس و بەکارھێنانی سیاسەتی توندوتیژانەی دەوڵەت دژی شارەکانی
کوردستان ، پەکەکە لەبری گرتنەبەری سیاسەتی یاخود چالاکی دیکە، ھاتن
داوای جۆرێک بەرخۆدانیان لە خەڵکی کرد و بانگەشەی خۆبەڕیوەبەری
گەلیییان کرد . ئاخر لە کەشوھەوای جەنگ و لەژێر سێبەری دەبابە و تەنک و
تەقەدا چۆن خۆبەڕێوەبەریی گەلی دروستدەکرێت؟!! گەر خۆبەڕیوەبەری گەلی
لە حەقەتدا خۆبەڕێوەبەریی گەلی بێت، دەبێت ھەم خودی گەل خۆی بڕیار بدات
و دروستی بکات ھەمیش دەبێت لە ئاووھەوایەکی ئاشتی و بەگرتنەبەری پرۆسەی
دیمۆکراسی ڕاستەوخۆبێت نەک بە بڕیاری گەریلا یا دەستەیەکی چەکدار و لە
کەش و ھەوای شەڕدا!! ئەمە جگە لەوەی کە کارێکی نادیمۆکراتیانەیە و
کۆمەڵێکی کەم بڕیار بۆ سەرجەمی ھاووڵاتیان لەو شوێنەدا دەدەن ،
دیسانەوە بیانویەکی باشیشە بۆ ئاکەپە بۆ کوشتن و بڕینی خەڵکی و
خولقاندنی بارودۆخێک کە بە تەنھا لە بەرژەوەندی ئەوە بۆ چڕکردنەوە و
گەورەکردنی شەڕەکە و دانی پەیامێکی وا بەتایبەت لە کاتێکیشدا کە پرۆسەی
ھەڵبژاردان بەڕیوە دەچوو بە خەڵکانی تورکیا کە زۆربەیان تورکن و
چەندەھا پارتی ڕاستڕە و ڕایسستی تیادایە و بڵێت " بڕوانن پەکەکە
دەیەوێت کە خاکی تورکیا بەشبەش بکات".
لەمەش خراپتر لە ڕۆژانی ٢٤/١٢ و ٢٥/١٢/١٥ لە شارەکانی وەکو
نوسەیبین و بۆتان و جزیرە " پارتی سیڤل" لە لایەن ھەندێک کەسەوە
ڕاگەینرا ھەر دەمودەستیش ھێزی یەکینەکانی پاراسنتنی شاریان لە گەنجان
ڕاگەیاند و وێنەی ھەندێک لەو گەنجانە بە چەک و نارنجۆکەوە کەوتە سەر
ڕوی ماڵپەڕە کوردییەکان و فەیسبوک و بە مژدەیەکی خۆش و بەرخۆدان ،
ڕاگەیەنرا ، کە لە ڕاستیدا گەورەترین ھەڵەیە و دەوڵەتی تورکیا بە
ملوێنەھا دۆلار ئەم ھەلە دەکرێت.
لە لایەکی دیکەشەوە دەبینین کە تاکە کەسێک دەیەوێت فرمانێکی گەورە بۆ
گەلێک، دەربکات ، بێ لەبیرکردنەوە لە ئاکامی بڕیارەکەی و نەگەڕانەوە
تەنانەت بۆ ئەو کەسانەشی کە ھەڵیانبژاردووە. ڕۆژنیوزی ٣٠/١٢/٢٠١٥
پەیامێکی گوڵتان کشانک بڵاەدەکاتەوە،دەڵێت:
کشاناک رایگەیاندبوو:" ئەگەر دەوڵەت ھاوسەرۆکی شارەوانیەکەمان
دەستبەسەر دەکات ئەوە منیش خۆبەرێوەبەری رادەگەیەنم".
لە ئێستاشدا باس لەوە دەکرێت کە بەردەوامی بدرێت بەم جۆرە بەرخۆدانە و
لە ئایندەنیەکی نزیکیشدا گەریلا بێتەوە ناوشارو جەنگ بگوێزرێتەوە بۆ
قوڵایی شارەکانی تورکیا . سەبارەت بەمەش بە گوێرەی ڕۆژنیوزی ٠٢/٠١/٢٠١٦
فەرمانداری بڕیارگەی ناوەندی پەژا ستار ، دەلال ئامەد، لە بەرامبەر
ھێرشەکانی ساڵی ٢٠١٥ .دەڵێت ....." ئەگەر لە ساڵی ٢٠١٦ دا ھێڕشەکان
زیاتر بن، ئێمە دەستتێوەردان لە شارەکان دەخەینە ڕۆژەفەوە " دەلال
ئەمەی لە چاوپێکەوتنێک لەگەڵ ئاژانسی فورات ساڵی نوێ لەگەڵ کورد و
بەتایبەتی ژنانی کورد، وت.
لای من گرتنەبەری ئەم تاکتیکانە زۆر مەترسیدارن و تەنھا کەسێکیش
بتوانێت ئەم تاکتیکانە پوچەڵبکاتەوە ، ئۆجەلانە و ئەویش ڕێگای پێنادرێت
کە ببینریت و ئەمەش بە ئەنقسەستە و نەوەکو ئۆجەلان پەیامێک بنێرێت بۆ
دەرەوە و یارییەکەی ئاکەپە کۆتایی پێبھێنێت و بزوتنەوەکەش بخاتەوە
سەر ڕێگا ڕاستەکەی خۆی، پێشئەوەی ھەموو شتێکمان لە دەست بچێت.
_________________________________
بەشی
چوارەم:
www.emrro.com/helwestmanb4.htm
بەشی
سێیەم:
www.emrro.com/helwestmanb3.htm
بەشی
دووەم:
www.emrro.com/helwestmanb2.htm
بەشی
یەکەم:
www.emrro.com/helwestmanb.htm
٣٠\١\٢٠١٦
- لەندەن
ماڵپەڕی زاهیر باهیر
|
