٢٣\٥\٢٠١١

عەمید سەرحەد قادر، گوتى: هیچ شتێک کارمان تێ ناکا.

هیوا رەش     

ئەمە تەنها وتەى جەنابى سەرحەد قادر نیە و بەس ، بەڵکو لێدوانى هەموو بەرپرسە حیزبى و ئەمنییەکانى شارى کەرکوکە لە دواى لەتوپەت کردنى دەیان جەستەى کوڕ و کچ و مناڵ و بەتەمەنە سڤیلە بێتاوانەکانى شارەکەم لە ئاکامى تەقینەوە خۆکوژییەکانى تیرۆریستان ، منیش بەدگومان نیم لەو وتە سواوە ئێکسپایەرانەى ئەو جۆرە زاتە خۆهەڵکێش و هیچ لەبارانەبووانە ، منیش دڵنیام هیچ شتێک کاریان تێ ناکات لەوەى ڕۆژانە نەک دەیان بگرە هەزاران تەرمى دەست و لاق تێکەڵاوى کەرکوکییەکان ببێتە سوتەمەنى سیاسییە ساختەچییەکانى کەرکوک کە بە سەخاوەتەوە لە قوربانیدانى ڕۆڵەکانى کەرکوک ئەنۆڕن و بە سەخاوەتیشەوە داڵى دەنوک خوار و ئەستێرەى بێڕەونەق دەبەخشنەوە و دەیخەنە سەرشانى ژەنەڕاڵە ناوبۆشەکان .

بەبارتەقاى هەموو تیرۆرستان ، پارتى و یەکێتى لەو دۆخە نائارامەى کەرکوک بەرپرسیارن ، کەرکوکى خاوەن سێ ئیدارە لە هەموو دامودەزگاکاندا ، کەرکوک لەبەر ئەوەى فرە داهاتە ، سیستمى فرەکوێخاى تێدا بەرقەرارە ، کەرکوک لە دوو دەزگاى ئاسایشى کوردیدا ، جگە لە پاراستن و زانیارییەکان ، جگە لە پیاوە گرگنە حیزبییە کوردەکان ، تا دێت زیاتر خڵتانى خوێن دەکرێت .

کەرکوک لە سایەى دوو حیزبەکەدا بۆتە کەلاکێکى مردارەوەبووى سیاسەتە نەگریسەکانى پارتى و یەکێتى ، داڵ و داڵاش و کەچەڵە و گورگ و چەقەڵە حیزبییەکان دەمیانیان تێوە ناوە ، ئیرهابى و بەرپرسى حیزبى و پۆلیس و ئاساییش هەمویان وەکو یەک لێى ئەخۆن و لێى ئەدزن و گیرفانى لێ پڕ ئەکەن ، سەرۆکەکان موزایەدەى پێوە ئەکەن ، دواى هەشت ساڵ لە ڕزگار کردنى هەر باسى قەرەبووى 10 ملیۆن دینار بۆ خەڵکەکەى ئەکەن ، یەک خانوویەکى داگیرکراو بۆ خاوەنەکەى نەگەڕێنراوەتەوە ، یەک گوند ، ناحیە و قەزاى جارانى سەر بەو شارە نەخراوەتەوە جێگەى خۆى ، کەچى منەتى 10 ملیۆن دینار بەسەر خەڵکى زوڵم لێکراودا ئەفرۆشنەوە و دواى ئەوەى دوو هێندەى ئەو بڕە پارەیە پێشکەشى برا چاوڕەشە داگیرکارەکان دەکەن کەچى تا دێت ئەڵقەى تەعریب هەر فراوان و فراوانتر دەبێتەوە ! ئەمە کێ لێى بەرپرسیارە ؟ !

کەسێک لە ڕزگار عەلى سەرۆکى ئەنجومەنى پارێزگاى نەپرسییەوە ئەم چەند ساڵە کارەکانت چۆن بوو ، چەندێک خزمەتت بەو شارە کرد ، خزمەتى خۆت بەلاوە گرنگتر بوو یان کەرکوک ؟ ! عەبدولڕەحمان مستەفا کارەکانى چۆن هەڵسەنگێنرا ؟ ئەمانە وەکو ئەو کەسانەى گوایە لە دواى مردن هەق و حیسابیان بۆ ڕۆژى حەشر و نەشر هەڵدەگیرێ ئاوها خۆیان و کردەوەکانیان بێ لێپرسینەوە ڕاپێچى دنیاى سیاسەتى پارتى و یەکێتى کران ، دەبوو هیچ نەبوایە داهاتەکانیان بخرایەتە بەر لێپرسینەوە ، بەڵام خواستى سەرۆکەکانمان لە ئەزەلەوە وایە ( کل من یجیب نقش عوافی ) !

کەرکوکییە بازرگانى پێوەکراوەکان ، کەرکوکییە بێ پشت و پەناکان ، کەرکوکییە ستەملێکراوەکان ، ئیدى کاتى ئەوە هاتووە سەردەقى مت بوون بشکێنن و بێنە دەنگ ، هیچ نەبێت ڕازى مەبن شارەکەتان بکرێتە مەیدانى جریت بازى سیاسییە دۆڕاوەکان ، بایکۆتى بوون بە سوتەمەنیى ڕۆڵەکانتان بکەن ، هیچ نەبێت با کوڕەکانتان واز لە پۆلیسیى بهێنن ، دەسبەردارى دەزگا ( ئاساییش ) ییەکانى پارتى و یەکێتى بن و تڕۆیان بکەن ، با حیزبییە ترسنۆکەکان خۆیان پارێزگاریى لە دزى و بە تاڵان بردنى داهاتى شارەکەمان بکەن ، مان بگرن ، دوکان و بازاڕ داخەن ، هاتوچۆ ڕاگرن ، هەموو کردەوە قێزەونە گریسەکان ڕیسوا بکەن ، بارەگا حیزبییەکان چۆڵ بکەن با بزانین بەرپرسە ناکردەکان توشى شۆک و ڕامان و میزەچۆڕکێ نابن ! دەورى ترسنۆکەکان مەدەن و مەبن بە زرێ بۆ پاراستنیان ، با سەرحەد و مەرحەد ، جەمال و مەمالەکان ئەوسا بوێرن و بتوانن لە شاسشەى تەلەفزیۆنەکانەوە بفشکێنن و بڵێن هیچ شتێک کارمان تێ ناکات ، دڵنیا بن ئێوە نەبن ئەوان ئەو پیاوە نین سنگ دەرپەڕێنن ، ئەرێ کەى ئەمە لۆژیکە شارێک زۆرترین داهات و نزمترین ئاستى خزمەتگوزاریی هەبێت ؟ ئەگەر ئەمەتان قبوڵە ! دەبێت چاوەڕوانى ئاییندەیەکى خراپتریش بکەن و هەموو بەیانیان و ئێوارانێکیش وەکو حیمایە ، بەرپرسە تۆقیوەکان لە شارەکانى سلێمانى و هەولێرەوە بهێننەوە شارەکەتان و ئێوارانیش بەڕێیان بکەنەوە بۆ کۆشک و ڤێللاکانیان و ئەو ئەرزانەى ئەوان داگیرى دەکەن ئێوە بە پارە لێیان بکڕنەوە و ئەو نەوتەى لە خاکەکەتان دەرئەهێنرێت پارەکەى لووش بکرێت .

شەوى دواى تاوانى تەقینەوەکەى ئەم دواییە کە لە پرسەى ئەفسەرێکى لاو بووم ، کاتژمێر یەکى دواى نیوەشەو ویستمان بە ئۆتۆمۆبیل لە گەڕەکێکەوە بۆ گەڕەکێکى تر بڕۆین ، هاوڕێکانم وتیان : با نەڕۆین چونکە ئێستا بارودۆخەکە شێواوە و پۆلیس هەموو ناوشارى گرتووە و توشى لێپرسینەوە و سەرئێشە دەبین ، پێم وتن : کاکە سوار بن و مەترسن ، بەخوا ئێستا پۆلیسێک لەسەر ڕێگا نابینین لە ترسى تەقینەوە ، بەڕاستى وا دەرچوو ، نەک مەفرەزەیەک ، بەڵکو ڕێکەوتى پۆلیسێکیشمان نەکرد ، بەتەوسەوە پێم وتن : ناڵێم ( عەمیدە ) کانمان شەو ڕۆژیان ناوەتە سەریەک بۆ پاراستنى شارەکە !

بە هیوام بۆ لەمەودوا سەرۆکى هەرێم ڕێگە نەدات بە ڕادەست کردنى ئەو تیرۆریستانەى لە کەرکوکدا دەگیرێن و جەخت لەوە بکاتەوە کە لە دادگاکانى کوردستان بە سزاى یاسایى خۆیان بگەیەنرێن ، چونکە کورد سەرەکیترین ئامانجى تیرۆریستان و یەکەمین زیانمەندە لە شارەکەدا ، ئەگەر نەکرا با سەرۆکى کۆمار سڵ نەکاتەوە لە ئیمزاى لە سێدارە بۆ تیرۆریستان ، هەروەها پێویستە بەدواداچوون بۆ کەیسى ئەو تیرۆریستە گیراوانە بکرێت کە لەو شارەدا دەگیرێن و ئەگەر هەریەکێک لەوانە ئازاد کران ، لە چاوگەى ئازاد بوونەکەى بکۆڵنەوە و لەبرى تاوانباران سزا بدرێن ، چونکە بە ئامارى ( عەمید ) ەکان بێت بەقەد ژمارەى تاڵى توکە سەریان تیرۆریستیان گرتووە کەچى بە پێچەوانەوە لەباتى کەم ، زیاد دەکەن و تاوانى گەورەتریش ئەنجام دەدەن ، ئەمەیان پێویستە وێستەى جددى لەسەر بکرێ ، با بە ناوى بوونى ( شانەى نوستوو ) ەوە چى تر ( ژەنەڕاڵ ) ەکانمان خۆڵ نەکەن بەچاوماندا ، هەموو کەس دەزانێت ئیرهابییەکان نەک شانە ، تەنزیمێکى نوستوون ، مارێکى پەپکە خواردوون و لە سایەى ئەو ژەنەڕاڵە عەجایەبانەوە ، هەر کاتێک بیانەوێ پێمانەوە دەدەن .
 

ماڵپه‌ڕی هیوا ره‌ش