١٤\١٠\٢٠١٤

هەر یەک لە ئێمە بەرپرسیارین

لەو ستەمکارییەی لە کوردستان دەکرێ.

تاڤگە سابیر      

دیارە لای زۆربە و بۆ زۆربە داواکاریی سەختە لەوەی داو ابکەین کە مرۆڤەکان هەمیشە پرسیار بکەن لە هەلومەرجی ژیان و بوونیان بە تایبەتی لە کاتی ڕووبەڕووبونەوەی بارودۆخێکی ئاڵۆزو نەگونجاوی سیاسی و کۆمەڵایەتیدا، یاخود قەیرانێک یان تەڵەزگەیەکدا کە ڕەهەندێکی گەردوونی هەیە، داوا بکەین لە خۆیان بپرسن" ڕۆڵی من و بەرپرسیارێتی من چیە؟" هەر چەندە ئەم داواکارییە بەپێی هەرە پرنسیپە سەرەتاییەکان ئەخلاق و سیاسەت ڕەوایە و مانای بوونەمرۆڤ دەگەیەنێت یاخود داواکردنە بۆ بوون بە مرۆڤ ،وێڕای ئەمەش ئەگەر ئەمە لەم ڕۆژگارەدا سەخت بێت ئەوا خۆ بە لانی کەمەوە دەشێ و بگرە ڕەوایە چاو لە بوونی چرکەساتێک ببڕین ، چرکەساتێک بەڕاستی لەگەڵ خۆ ڕاسگۆبوون کە تێدا هەر کەسەو لە خۆی پرسیار بکات " ئایا ڕۆڵ و بەرپرسیارێتی من چیە و دەتوانم چی بکەم؟".

دیارە مەسەلەکە بەم شێوە ئاسان نییە چونکی چاوبڕین لە چرکەساتی لەو جۆرە چرکەساتی پرسیارکردن لە بوونی خۆو لە دەوروبەرو لە لێپرسراوێتی خۆی چاوبڕینە لە چرکەساتێکی هۆشیاری یان هۆشیاربوونەوە کە، خۆی لە خۆیدا پشتبەبوونی کۆمەڵە هەڵومەرج دەبەستێت لەوانە بوونی هەڵومەرجێکی مەدەنی و عەقڵی و ئاستێکی هۆشیاری و بوونە خاوەنی هەندێ فەزیڵەتی مەدەنی کە ، کارێکدەکەن پرسیارکردن بەگشتی و پرسیارکردن لە ڕۆڵی کەس و لێپرسراوێتی ئەو لە بەرانبەر کێشەو مەسەلەکاندا شیاوبێت ، غیابی ئەو هەڵومەرجانە کارێک دەکات کە ، کەس لە بڕی پرسیارکردن لە لێپرسراوێتی خۆ سەرقاڵی بەهانە داتاشین بێت بۆ کەم ئیرادەیی خۆی و ڕۆڵی و لێپرسراوێتی خۆی لەبەرانبەر گشت ڕووداو و کێشەو بگرە هەلومەرجی و جودیانەی خۆی بەهانە داتاشینێک کە، خۆی ڕاکردنە لە لێپرسراوێتی و کردنی هەموو ئەوانی دیکەیە بە لێپرسراو ئەمەش ئاسانترین شتە کە، کەسێک بتوانێ بیکاو هەر ئەمەشە کە مرۆڤ بەشێوەیەکی گشتی و بە بەرادەوامی خووی پێوەگرتووە.

هەر یەک لە ئێمە دەزانین کە، مرۆڤ بە شێوەی جۆراوجۆرو لە دیدی جیاوازجیاوازەوە پێناسەکراوە جارێک وەک ئاژەڵێکی عاقڵ " و جارێکی تر وەک ئاژەڵێکی درۆزن" یاخود ئەوەی کە، مرۆڤ بەسروشت " بوونەوەرێکی تەمبەڵە" و چەندان پێناسەی تر ، بەڵام لەم ڕەوتی قسەکردنمدا زیادەڕۆیی نییە بڵێم " مرۆڤ ئاژەڵێکە بەهانەداڕێژە" ئەو بوونەوەرێکە سەرقاڵی داڕشتنی بەهانەکانە بەهانە هێنانەوە بۆ هۆو هەلومەرج و چییەتی و چۆنێتی شتەکان و دواجایش بەهانە داتاشین بۆ ڕۆڵ و لێپرسراوێتی خۆ و ئەو هەلومەرجەی کەتێدا دەژی " هەموو کەس لێپرسەاوە جگە لە من".

ئەوە چەند ساڵێکە کوردستان بە دەردەسەرییەکی گەورەدا تێدەپەڕێت وڵاتێکی هەڵوەشاوەو جەستەیەکی خوێن لێڕۆیشتوو لە لایەکەوە تیرۆرو شەڕی تایەفەگەری نێوان یەکێتی و پارتی بەردەوامە و لەلایەکی تر ووڵاتەکە داگیرکراوە لە لایان ئەو پارتە دەسەڵاتدارە کە، ئەمە هۆ سەرەکییەکەی ئەو پەشێویی و تیرۆرەیە، نەک ژنەکانی لاقەدەکرێن ، بەڵکو ووڵاتەکە خۆی بە بەردەوامی لاقەدەکرێت ئاخر داگیرکردن چیە جگەلە لاقەکردن سەروەت و سامانی دەدزرێ لا لایەن دزەکان دەرەوە کۆمەڵێک کۆمپانیاو کەسایەتی و ئیدارەی خۆیەکی دزو جەردەکانی ناخۆ کە، وەک نمونەی یوفیمیزم پێیان دەڵێن " سیاسەتمەدار" ئامانەو هەزاران کارەساتی و تراژیدیای تربە بەرچاومانەوە ڕوودەدەن و ویژدانمان تەکانناخوات و ڕۆڵ و بەرپرسیارێتی خۆمان پرسیارناکەین ، نەک ئەوەندە بەڵکو زۆرمان سەرقاڵی بەهانەهێنانەوەین.

هەموو دەزانین کە لەو رۆژانەدا نا ئارامییەک و پەشێویەکی "سیاسی" و ئینجا گیروگرفتی ژیانی نەبوونی یان کەمبوونی پێداویستییە هەرە سەرەتایی و بنەڕەتییەکانی ژیان و هەڵسوکەوتی پڕ لە توندوتیژیی دامودەزگا پۆلسی و ئاسایشییەکان کە، خۆی لە گرتن و لێدان و کۆشتن و ڕوانانی خەڵکی نەیار و ناڕەزا لە بەرانبەر بەم دەسەڵاتە پۆلیسییەدا دەبینێتەوە باڵی بەسەر ئەم ناوچەیەدا کێشاوە تارماییەک کە، مانیفێستی ستەمکارییە ، ستەمکارییەک کە، بە شێوەی جیاواز جیاواز هەمیشە لێرە خۆی مانیفێست دەکات.

با لە سەرەتاوە هیچ گومانێکمان نەبێت لە بینینی ئەو ڕاستییەی کە، ئەم هەلومەرجە نە نا سروشتییەو نە نا لۆژیکی و نەنۆێ ئەم حاڵەتە لە لایەکەوە ڕیشەکەی وا لە مێژووداو لە لایەکی تر درێژکراوەی بیستویەک ساڵە لە "حوکم" کردنێکی تێکشکاوی نا مەدەنییانەی بە دوور لە سادەترین پرنسیپەکانی حوکمکردن و بەدوور لە هەرە پرنسیپە سەرەتاییەکانی سیاسەت بیستویەک ساڵە ئەزموونێکی پڕ لە ئیشکالیەت ئەو باردۆخە یان هەلومەرجە " سیاسی" یە پڕ لە ئیشکالیەت و ستەم و غەدرو فەسادە سروشتییەو لۆژیکییە لەبەر دوو هۆی سەرەکی ، هۆی یەکەم دەگەرێتەوە بۆ ماهیەتی ئەو هێزە بەناو "سیاسیانە" ی کە، لەمەیدانەکەدان ئەوەی لە کوردستان ڕوو دەدات ئەکچوەڵایزکردن و بەواقعیکردنی ئەگەرەکانی ئەو هێزانەیە لەماهیەت و ئیمکانیەتی یان " جود بالقوە" ی ئەو هێزانەدا نە ئەگەرێکی تر پێچەوانەی واقیعی حاڵ" ماهو موجود" بوونی هەیە و نەچاوەڕوان دەکرێت ، ئەگەر چاوەڕوانیش بکرێت ئەوە وەهمی ڕووتە ئەوەی ڕوویداو ڕوودەدات تەحقیقکردنی ئەگەرەکانی ئەو هێزانەیە کە، لە دواجاردا وەک بینیمان و دەیبینین خۆی لە فەسادو ستەم و ناعەدالەتی و دروستکردنی ئاژاوەیەکی " سیاسی" و کەیاسێکی ئابووری و کەلتووریدا بینیەوە دەبینێتەوە.

ئیستا کاتی خۆیەتی باس لە لێپرسراوێتی جەماوەر بکەم بەرانبەر بە ئەو ستەمکارییەی کە، لە کوردستانی باشور باڵادەستە لێپرسراوێتی جەماوەر بەرانبەر ئەو هێزانەی کە، هۆکاری ئەو هەموو فەسادو ناعەدالەتییەن کە بەرکەماڵە، خاسیەتێکی ناسینەوەی جەماوەر بریتیە لەبێ یادەوەری یان کورتیی یادەوەری لەوەدا کە، دوێنێی لە بیرنیە بەڵێ دوێنێ بەمانای حەرفی نەک دوێنێیەکی دوور ، بەڵکو هەر دوێنێی لە بیر نیە دوێنێ ڕووداوەکان و هەواڵەکان و کێشەکان و دەردەسەری و عەزابەکان ، هەڵسوکەوتی دوێنێی بە ناو حیزب و دەسەڵات و لێپرسراوان و بەناو سیاسییەکان دوێنێ هەڵسوکەوتی خۆی و ڕۆڵی خۆی و لێپرسراوێتی خۆی لە پەروەردەکردنی ئەو هێزانەدا کە، ئەمرۆ لێیدەخوڕن دیارە ئێمە بەمانای وشە " سیاسی" یان " سیاسەتمەدارمان " نیە ، بەڵام دەبێت زۆر هۆشیاربین ئەوانەی لە ژێر ئەم ناوادا و بەم ناواوە کار دەکەن زۆر زۆرزانن و پەییان بەم خەسڵەتەی جەماوەری بردووەو بێباکانە کاردەکەن و گوتە دەدەن چونکە دەزانن سبەی لە بیردەچێتەوە یاخود کەسێک نییە بڵێت " ئەم وتەیەی ئەمرۆت ئەم بەرنامەیەت ئەم گوتەیەت جیاوازە لەوەی دوێنێ.

ماڵپەڕی تاڤگە سابیر