حەزرەتى فەساد و دەرگاى بەختەوەرى.

پێشڕەو حەمید  

(هەرچى دەرگاى بەختەوەرى هەیە داخراوە تەنها دەرگاکانى دۆزەخ نەبێت).

بەختەوەرى هەمو مرۆڤێک بەبێ جیاوازى نەتەوە و ڕەگەز و ڕەنگەوە یەکێکە لەو ئومێدانەم کەهەمیشە لەگەڵیدا دەژیم و کاتێک بەختەوەریش دەبم کەتەواوى ژیانى مرۆڤایەتى پڕبێت لەبەختەوەرى ، بەڵام مرۆڤى کورد یان مرۆڤەکانى ئەو پانتایە مەزنەى کەناوى ( کوردستان ) ە تاچەند بەختەوەرن و ئەو دەرگایانەى بەناوى بەختەوەریەوە هەوڵى کردنەوەى بۆئەدرێت ، تاچەند مرۆڤى کوردى توانیوێتى لێیان نزیک ببێتەوە ؟

لەوەتەى کورد هەیە خیانەتى لێدەکرێت و خیانەت لەخۆى دەکات ، لەوەتەى کورد هەیە دەکوژرێت و ئاوارەدەکرێت و هێندەى ئەوەش هەرخۆیان ، یەکتریان دەکوشت و یەکتریان ئاوارەدەکرد ، جارێ بەناوى پاککردنەوەى نیشتمان لە ( خائن ) و جارێکیش بەناوى ( پاراستنى ئازادى و دیموکراتى لە ( هێزى تاریکى ) جارێکیش هەربۆخۆشى و بۆبەکات بەسەربردن و حەزکردن لە دەنگى کوللە و مەست بون بە بۆنى خۆین ، هەر شەڕبو لەدەرگاى ماڵەکانى ئەدا و حەزێکى شێتانە هەبو ، بۆ خۆشەویستى کردن لەگەڵ تفەنگدا ، هەمیشە وایان پەروەردەدەکردین کە مردن و لەدایک بون تەنها بەچەکەوە پیرۆزەو هەرماڵێک تفەنگێکى تێدا نەبێت ، ماڵ نیەو دەبێت بە نەفرەتبکرێت ، دواى ئەو هەمو ئەزمونە تاڵە لەتەنیشت ئەو خۆ کوشتنانەدا ، هێشتا ئومێدێک لەدڵى مرۆڤەکاندا بەسەوازى چاوەڕوانى گەیشتنى بەختەوەرى بون .

ئێستاش هەرچى دەرگاى بەختەوەریە داخراوە و کلیلەکانى لە گیرفانى ( حەزرەتى فــەساد ) دایە ؟! هەمو کون و قوژبنەکانى ئەم مەملەکەتە هەروەک ئەندامەکانى لەشم شارەزام ، بەڵام هێشتا نازانم بۆهەرچى خەونمان هەیە دەکرێتە کەلاوە ؟

بۆچى سەرخوان هەیە پڕە لەنان و پێکەنین ، سەرخوانیش هەیە پڕە لەبرسێتى ؟ ئێرە مەملەکەتێکە پرە لەو کەسانەى هێشتا نازانن کوڕى کامیانن ، جەلــلاد یان قوربانى ، ئێرەمەملەکەتى ( تەورە ، تەور ) تەورەکانیان دەخەنە سەرملمان و پێمان دەڵێن : بەهەشتى ئێمە هەڵدەبژێرن یان دۆزەخى خۆتان ؟! ئەگەردۆزەخى خۆمان هەڵببژێرین ، تەور بە دەستەکان بەشێت بە مناڵانى شار دەمان ناسێنن و لەبەردەم دەرگاى مزگەوتەکان ، لە سەر بۆردى فەرماگەکان ، لەسەر دیوارەکانى شار ، لەبەردەم هۆڵەکاندا وێنەکەکانمان بڵاو دەکەنەوە لەژێرەوە بەخەتێکى تۆخ دەنوسن ( هێشتا نازانن کێ باوکییانە ) ؟!

لەسایەى ئەم ڕەوشەى ئێستاى کوردستاندا ئەوە گەیشتنە بەدڵنیایى ، ئیدى کەى ئەوە دەبەنگیى و کاڵ فامییە ؟

شۆڕش لە دژى شۆڕش لە تەپۆڵکە وشکەکاندا تەڕ تەڕدەکرانەوە ، ئـــاخر شۆڕش نابێت جەنگاوەرى لێببڕێت ؟! ئەوە حیکمەتێکە تەنها شۆِرشگیڕەکان دەیزانن ، هەموو شۆڕشێک هەروایە ، تەڕو وشک پێکەوە دەسوتێنێت، ئیدى دیارە ئەوە حیکمەتى شۆڕشەو من نازانم بۆچى دەبێت وەهابێت .

بەڵام ئەوەى هەرگیز لەیادم ناچێت ، جەنگاوەرەکان ، فریشتەکانى شۆڕش بون کە کۆڵە پشتەکانیان پڕکردبو لە ڕق و مردن و بەرەو جەنگ ملیان دەنا ، ئاى چیى دیمەنێک بو هەرچى کۆڵانەکانى شاربو جمەى دەهات لە کاسبکارو قوتابیى و فەرمانبەرو مامۆستاو هونەرمەند ، هەر وەک سواڵکەر لە دەرگاى ماڵەکانیان ئەداو داواى نانیان دەکرد بۆ جەنگاوەرە برسیى و ماندوەکانى شۆڕش ؟! تەنها چەند هەفتەیک بو دواشۆڕشى تەپۆڵکە وشکەکان دەستى پێکردبو ، هەرچەند هەفتەیک بوو ( منداڵە بۆیاخچیەکانى شار ) چونە بەردەم بارەگاى شۆڕشگێرەکان وبەدەم نزاو هاوارکردنەوە دەیان وت " شەڕەکانتان ، پێڵاوى لاستـیکـى کردە پێى هەموومان ، ئیدى ئێمە چـى بۆیاخ بکەین " چى وەزعێکە تائێستاش ، مردنى کەسێک ، ئیهانەکردن و سوککردنى کۆمەڵگایەک شۆڕش گێرەکان ڕاناچەڵەکێنێت ، ئیدى چ بکەم لەچێژى ئەو ماڵەى پڕبێت لەشەهوەت ؟ ئەوە بێ ویژدانیە وێنە کاڵەکانى ژیان بەڕەنگى ئەو ( مۆم ) انە تۆخ بکرێنەوە کە بەگـڕى شەهوەت پێکرابن ، تەنها ووشە شک ئەبەم ، ئەگەر ئەوم نەبێت ، وەک ( ئێوە ) دەبمە چەرمێکى ئاوساو لەخەونى پیس .

تیبینى: بۆ نووسینی ئەم بابەتە سود لە توێژینەوەیەکى بەڕێز ( ئاراس عەبدولکریم ) وەرگیراوە