٢١\٧\٢٠١٢

   هیچ.

هێمن عوسمان عەبدوڵا

-١-
ھەردوو دەستم بە سەرمەوە گرتووە
دەبێ وای بقوپێنم
ھیچ تەنەکەچییەک بۆی راست نەکرێتەوە.

-٢-
ھەناسەم تووند بووە
پێدەچێ گرێ درابێ.

-٣-
خەیاڵم
بە بزمارێکەوە ھەڵواسراوە
دەستم پێی راناگا
تا بیکەمەوە ناو سەرم.

-٤-
وێنەی خۆم بە دیواری ژوورەکەمەوە دەکێشم
جارێک بێ چاو
جارێک بێ پێیەکانم و
جارێک بێ دەستەکانم
جارێک بێ خەونەکانم و
جارێکیش بە بێ خەیاڵەکانم
جارێک دەم بەپێکەنین و
جارێکی دیکە بە دەم و چاوی چرچاویی و
نیگەرانییەوە
دواجار تەماشایان دەکەمەوە
ھیچیان من نیم.

-٥-
لە ناو خۆمدا بۆ شوێن دەگەرێم
من پڕم
پڕ
پڕ
شوێن دەست ناکەوێ تا دڵێکی لێ دابنێم.

-٦-
گەورەترین گرفتم ئەوەیە ناتوانم
لەگەڵ کەسانێک ژیان بکەم
وەک من بیردەکەنەوە
وەک من خەون دەبینن
وەک من خەیاڵ دەکەن
وەک من کات تێدەپەڕێنن.

-٧-
تەپەی پێی پیاوێک لە ناو سەرمدا
ئارامی لێھەڵگرتووم و
بە مایکێکەوە پڕ بە کووچە خامۆشەکانی سەرم
ھاوار دەکا
''بەختەوەریی ئەوەیە مرۆڤ لەدایک نەبێ
ئەگەر لەدایکیش بوو
دەستبەجێ بمرێ*''.

-٨-
منداڵیمم بدەنەوە
لە ئینجانەیەکی دەخەم و
نزیک گەورەبوونم دایدەنێم.

-٩-
کتێب دەکڕم و نایخوێنمەوە
لاپەڕەکانی دەکەمە کەشتی و
لە نێو سەرنشینەکانی بە شوێن کچێک دەگەڕێم.

-١٠-
ھیچم لێ ون نەبووە و
بە شوێن شتێکدا دەگەڕێم و نایدۆزمەوە.

-١١-
ھەناوم گەرمە
پشکۆیەک لە گەدەم دایە.

-١٢-
بە کارکردن لە ناو خۆمدا سەرقاڵم
سەرەڕای ئەوەش نامپەرژێ
پرچم شانە بکەم
پێڵاوەکانم خاوێن بکەمەوە.

-١٣-
سەبەتەی رەنگەکانم لێ ون بووە
تا ھێندێک
لە خەونەکانمی پێ بنەخشێنم
پێدەچێ ھی ئەوەبێ ڕەشبینبم.

-١٤-
دەنووسم
تا وەڵامی ئەو پرسیارە بدەمەوە
بۆ دەنووسی؟

_______________________
* وتەیەکی "ئەمیل سیۆران"ە.

کۆتایی زستانی ٢٠١٢
hemineabdulla@yahoo.com