|
٥\١\٢٠١٧
حکومەت جەستە و
ناخمان دەسوتێنی؟!
شەماڵ عادل سەلیم
 ٢٥
ساڵە لە سایەی حکومە تی ھەرێمی بەتەمای خودا، ڕۆژ لە دوای ڕۆژ کێشەکانی
کوردستانیان زەبەلاحتر دەبن و،وەک مۆتەکە تەنگ بە خەڵکی بێنازی ھەرێم
ھەڵدەچنن و خەریکە خەفەو لەناویان دەبەن.
کێشەی نەبوونی کارەبا ، خراپی کەرتی تەندروستی ، نەبوونی ئاسایشی ئاو،
خۆراک ، نەبوونی سیاسەتی گونجاو بۆ ئابووری، باری کۆمەڵایەتی و سیاسی و
نەوت و وزە ، سەقەتی سیستەمی پەروەردەو خوێندن و تەلقین دان ، بێکاری
وگرانی و گەندەڵی ، قەیرانی داریی و بی مووچەییش سەرباری ھەموو کێشەکان
وای لەخەڵک کردووە لەگیانی خۆی بێزار بێت و ئاوات بەمردن بخوازێت...!!
باش دێتەوە یادم لە مانگی ١٢ی ساڵی ٢٠١٤ حکوومەتی ھەرێمی بەتەمای خودا
، لە کۆبوونەوەی ئاسایی خۆیدا فەرمانێکی دەرکرد بە ژمارە( ٨١٧٤ ،ریک لە
١٤/١٢/٢٠١٤) کە لە بڕگەی سێ ئاماژە بەوە دەکات کە سەرجەم وێستگەکانی
بەرھەمھێنانی کارەبا بە غازی سرووشتی کار بکەن و پێویستە لە ماوەی دوو
ساڵدا ئەم پرۆژەیە جێبەجێ بکرێت و پێویستە وەزارەتی سامانەکانی سرووشتی
ئەم کارە جێبەجێ بکات تا کۆتایی ساڵی ٢٠١٦).
کەچی لەبەختی کەچمان نەک تەنھا فەرمانی حکومەت جێ بەجێ نەکرا ، بەڵکو
ھاتنی کارەبا بووە ئەوخەونەی کە ھەموو تاکیکی ئەم ھەرێمە بێ نازە خەونی
پێ دەبینێت...
ئەوەی لێرەدا مەبەستمە باسی لێ وەبکەم ، کێشەی کارەبا و بەڵێنە
پووچەکانی ( حکومەتی فاشیلی ھەرێم ) و قەیرانی داریی و باری نالەباری
دەروونی کوردستانیان نییە ، بەقەدەر ئەوەی باسکردنە لە گیان لەدەستدانی
خاتوونێکی دیکەی بێ نازانی ھەرێمی بەتەمای خودا ( سەروینی قوتابی
زانکۆی ئیشق ) کە بەسووتان گیانی لەدەست دا.
دوای دەنگدانەوەیەکی زۆر و بڵاوبوونەوەی دەنگۆی سووتاندنی ئەو خاتوونە
بێ نازە لەھەرێمی تاریکستان لەلایەن باوکییەوە، بەڕێوەبەری راگەیاندنی
پۆلیسی سۆران دوێنی ڕایگەیاند (سەروین) ی جوانە مەرگ بەھۆی
ئاگرکەوتنەوە لە موەلیدەی ماڵەوەیان سووتاوە.
بەڵێ ، لەھەردوو حالەتدا ، ئەگەر سەروینی خێرلەخۆنەدیو، بەھۆی
ئاگرکەوتنەوە لە موەلیدەی ماڵەوەیان سووتابێت ، یان لەلایەن باوکییەوە
سووتنێندرابێت ، ئەوا حکومەتی بێ خەمی کوردستان تاوانباری سەرەکییە لە
زەبەلاح بوونی ئەو کێشانەی کە یەخەو بەرۆکی خەڵکی بی نازی ھەرێمی
گرتووە ، ئاخر ئەگەر کارەبا ھەبوایە ،( سەروین)ی جوانەمەرگ بۆ بەئاگری
(موەلیدەی چینی) گیانی لەدەست دەدا ؟ ئەگەر یاسا سەروەر بوایە و ،حکومەت
پارێزەری گیانی ھاووڵاتیان بوایە ، ئەوا پێشێلکردنی مافی مرۆڤ و کوشنتی
ئافرەت لە ھەرێمی تاریکستانی بەتەمای خودا لە زیادبوون دا نەدەبوو و ،(سەروین
و سەروین)ە نازدارەکانی دیکەش بەدڕندەترین شێوە نەدەسوتێنران.
زۆر بە کوردی و بەکورتی:
خوێنی (سەروین و سەروین)ە بێنازەکانی دیکە لەئەستۆی ئەوحکومەتە بێ
خەمەیە کە وای کردووە خەلکی بینازی ھەرێمی بەتەمای خودا ، ھیوا بە مردن
بخوازن بۆ رزگار بوونیان لەم ھەموو قەیرانە دروستکراوەی کە باجەکەی
تەنھا ھاووڵاتییان دەیدەن!
ھەربۆیە ئەمرۆ لەھەرێمی بەتەمای خودا ، کە ھاووڵاتییەکی بێناز گیانی
لەدەست دەدات ، خەڵکی دەڵێن : (خۆزگە بەخۆی ، لەم ژیانە بێ ژیانە
ئیسراحەتی کرد)؟!
ئەوەی جێگای داخە ، ئەو ئاوات وخۆزگە بەمردن خواستنەی خەلکی ھەرێمی
بەتەمای خودا ، رۆژ لە دوای رۆژ گەورەتر دەبێت لەسایەی بێ پلانی و بێ
خەمی حکومەتی فاشیلی حزبە خۆخۆرەکانی کوردستان ، کە مرۆڤیان کردۆتە بێ
نرخترین سەرمایە و خۆشەویستیشیان کردۆتە کالایەک ،لەکالاکانی وڵاتی چین
ھەرزانترو بێ نرخترترو سەقەتترە.
لە کۆتاییدا بە حکومەتە پۆشتەکەمان دەڵێم:
بەڵێنت دابوو ھەرێممان بۆ بکەیتە (دووبەی عیراق) ،بەڵام دوای ٢٥ ساڵ لە
حوکمی خۆماڵی نەک ھەر ھەریم نەبووە (دووبەی) ، بەڵکو ئەمرۆ( سەروین)ە
بێنازەکانی ئەو دەڤەرە تینوو بەخوێنە لەتاریکستان و لەژێر یاسای جەنگەڵ
ژیان دەگوزەرێنن؟!
ماڵپەڕی شەماڵ عادل سەلیم
|
