|
حکومەت چ کارەیە؟!
- سەبارەت بە خۆکوشتنى گەنجێکى تر
- .
بەشدار
عه‌لی
گەندەڵى و رۆتین و بێبەرنامەیى و بێ پلانى و فەوزایەک کە ئیستا لە
کوردستاندا هەیە،لە هەڕەمەکانى سەرەوە هاتۆتە خوارەوە و هەر ئەوان
کردویانە بە دیاردە و هەموو خەڵکیان تێئاڵاندووە بۆ ئەوەى هەڵوێست و
کردەوەکانى خۆیان تیایدا وون بێت،بۆیە ئەگەر بمانەوێت ئەو وەزعیەتە
بەرەو باشتر بەرین دەبێت لە سەرى مارەکەوە دەست پێبکەین،کاتێکى زۆر
تێپەڕى و دەرفەتێکى باش لەبەردەستا بوو لەماوەى ئەو چەند ساڵە ئەگەر
عەقڵێکى حکیم هەبوایە دەتواندرا زۆر بە ئاسانى کۆمەڵێک کێشە چارەسەر
بکرایە کە ئیستا لە گەردنى خەڵک بۆتە تەوق و رۆژانە قوربانى
لێدەکەوێتەوە.
دەسەڵاتى سیاسى بۆچى لەماوەى دەسەڵاتیان توانیان مەحسوبیەتى حیزیاتى بۆ
ناو هەموو کون و کەلەبەرەکانى ئەو مەملەکەتە رۆبچوێنن،خوێندن و
پەروەردە و فێرکردن و فەرهەنگ و کەلتور و مێژوو ورەنگ و ووشە و...،سەراپایى
جوڵە و هەڵسوکەوتى کائینەکانیان تەژى کرد لە حیزبایەتى،بەڵام بۆچى
خورافیات و توندوتیژى و چیرۆکە ئەفسانەییەکانى نێو پرۆگرامەکانى
خوێندنیان لە کۆڵ مناڵان و لاوان نەکردەوە؟ کە بۆتە هۆى یەخسیرکردن و
کۆیلە و بێدەسەڵاتى تاک و دورستکردنى مرۆڤێکى ئیفلیج!رۆژانە
قوربانیەکانى دەبینین و (هەژاریش)قوربانیەکى ترە.
(هەژار ئەسعەد)قوربانیەکى ترى دەسەڵاتى بەرێوەبردنى ئەو
مەملەکەتەیە،لەکڵاورۆژنەیەکى مانگى ئابدا بە پەتێک لە گەرەکى سەرکارێزى
شارى هەولیر بەهۆى دەرنەچوونى لە قوتابخانە و دورست کردنى کێشە لەلایەن
ماڵەوەیان خۆى خنکاند و بۆ هەتایە چاوەکانى لێکنا و حکومەت و دەزگا
پەیوەندیدارەکانیش بۆ ئەبەد بە فەرامۆشیان سپارد!دەبێت ئەو رووداوانە
کە ئەرشیف ناکرێت دەبێت ببێتە پەڵیەکى رەش و بۆ مێژوو تۆمار بکرێت.
راستە کوردستان نزیکەى نیو سەدە بە دەست جەللادترین رژێمەوە بوو،هێز و
ئیرادە و تواناى مرۆڤەکان وورد و خاشکرا و هەموو جومگەکانى ژیان
لەبەریەکترازا و تاکەکان لەسەر سیستەم و بیرکردنەوە و عەقڵیەتێک گۆش
کران، خاڵى لە هەموو مەنتق و بیرکردنەوەیەکى دورست،بەڵام دوایى دوو
دەیە لە بەرێوەبردنى حکومەتى کوردى،دەسەڵاتى سیاسى نەک هەر کارى نەکرد
لەسەر کاڵبوونەوەى ئەو ئاسەوارە خراپە لەسەر ژیان و بیرکردنەوە و
چارەنووسى خەڵکى کوردستان ،بەڵکو بە هەمان عەقڵیەت و بیرکردنەوە و
سیستەم و پرۆگرامەوە خەڵکى نقومى نێو مەرگ و سەرگەردانى و دڵەراوکێ و
دەیان دەرد و بەڵا و نەخۆشى دەروونى و جەستەیى کردەوە و درێژەى بە
ژیانێک دا کە تەنها قابیلى بەشەر نیە.
دوایى هەموو هەوڵەکان و چاوەروانیەکى زۆر ئومێدێک نەماوە بۆ باشتر
بوون،بۆیە رۆژانە دەیان هەواڵى خۆکوژى و کوتایهێنان بە ژیان بە شێوازى
جیاواز لە شار و شارۆچکە و گوندەکانى کوردستان گوێچکە و چاوەکانمان
ئازار دەدەن،بەبێ ئەوەى کەسان و لایەن و دەزگایەکیش لێپرسینەوە و
بەدواداچوونى بەدوادا بکەن.
دەمێکە گوتومانە سیستەمى پەروەردە و فێرکردن لەم مەملەکەتە دارزیوترین
و ئیفلیجترین سیستەم و پرۆگرامە و دەبێت بخرێتە زبڵدانى مێژووەوە،بەڵام
دەسەڵاتدارانى کوردستان گەرەکیانە لەرێگاى کۆنى و دواکەوتویى ئەو
سیستەمانە درێژە بە تەمەنى خۆیان بدەن و خەڵک بۆ هەمیشە لە تاریکى و
نەزانیدا بژین و دەرگاى هۆشیارى و زانست و مەعریفەیان بەسەردا دابخەن
تەنها بۆ ئەوەى خۆیان بمێنن.
باشە حکومەت چ کارەیە؟ کاتێک پرۆگرامێکى خوێندن نەگۆرێت و نەتوانێ خەڵک
لەم جەنگە ترسناکە رزگار بکات،شانى خۆى لە هەموو پێداویستى و
خزمەتگوزارییەکى خەڵک خاڵى کردۆتەوە و خەڵکى بە قەدەر سپاردوە،دەزگایەک
دانەمەزرێنێ بۆ بەدواداچوون و لێکۆڵینەوە،خۆ لە رووى بەرهەمهێنانیشەوە
لە خوار هێڵى سفرەوەیە تا ئیستا(لاستیک و تور و مەسینەش)لە دەرەوە
ئاودیو دەکرێ،ئیتر مانایەک نەماوەتەوە بۆ حکومەت بوون.
8/9/2008
Bashdar_net@yahoo.com
|
