٢٥\٣\٢٠١٢
حکومەتی
ھەرێم بەرپرسە لە گیانی کرێکاران و کارمەندانی کوردستان.
رووداوەکانی شوێنی کار بەرەنجامی
بێدەربەستیە بە گیانی مرۆڤ، تاوانە و پێویستە ڕابگیرێ!
جارێکی
تر شاری سلێمانی لە ڕۆژی ئاھەنگ و جەژندا، دەبێتەوە شانۆی ڕوداوێکی
دڵتەزێنی تری شوێنی کار. دوێنێ لە ڕۆژی نەورۆزدا، لە ڕۆژی جەژن و
شادیدا، کاروفەرمان لە کۆڵ ئەندازیاری جوانەمەرگ تاریق محەمەد کەریم
نەبۆوە. نەک تەنھا بواری حەسانەوەی پێ نەدا، بەڵکو لە جیاتی شادی و
سەیران ڕاپێچی بۆسەیەکی کرد کە بێ باکی و ناسەلامەتی کار لە پاڵێوگەی
نەوتی سلێمانی بۆ ژیانی ئەوی دانابوو. ڕۆژی نەورۆز بۆ کاک تاریق و بۆ
خێزانی کۆستباری ئەو، بۆ ھاوڕێیان و دۆستانی، بۆ ھەموو ھاوکارانی لە
پاڵێوگەدا بووە ڕۆژی ماتەمینی و ڕەشپۆشین. ئێمە لە کاتێکدا خۆمان لە
خەم و پەژارەی خێزان و دۆست و ھاوڕێ و ھاوکارانی کاک تاریقی
جوانەمەرگدا بە ھاوبەش دەزانین، ھۆکارەکان و بەرپرسەکانی پشت ئەو جۆرە
کاراساتانە بە توندی ئیدانە و تاوانبار دەکەین.
بەداخەوە لە سایەی بێ دەربەستی بە گیانی کرێکاران و کارمەندانی
کوردستان و مرۆڤ بە گشتی، شوێنکارەکانی کوردستان بونەتە کوشتارگا.
ئەگەر ئامارێکی وردی ئەو ڕوداوانە بڵاوبکرێتەوە، ئەوا دەردەکەوێت کە
ھیچ ڕۆژێک لە کوردستاندا ئاوا نابێت تاکو گیانی کارگەرێک و کارمەندێک و
موچەخۆرێک نەبێتە قوربانی بێباکی و بێدەربەستی بە سەلامەتی کار و ژیانی
کرێکاران. تەنھا یەک ھەفتە لەمەوبەر لە یەک ڕوداودا سێ کرێکار بە
یەکەوە ژیانیان بووە قوربانی ھەمان بێدەربەستی و قەزاوگێڕی سەروەت و
سامانی سەرمایەداران. ئێمە لە رێکخراوی کرێکارانی بیناسازیی لە نزیکەوە
ئاگاداری ئەو ڕوداوانەین کە ڕۆژانە ژیان و سەلامەتی ھاوڕێکانمانی تیادا
دەکەوێتە مەترسیەوە.
ئەم جۆرە ڕووداوانە کە بەشی ھەرەزۆریان بە پەیڕەوکردنی سادەی
ڕێنماییەکانی سەلامەتی کار دەکرێت ڕوونەدەن، نە قەزا و قەدەرن و نە
ڕووداوی ئاسایی، بەڵکو دەکرێت بە کوشتاری دەستی ئیھمال و بێ باکی بە
ژیانی مرۆڤ و چاوچنۆکی و قازانجپەرستی سەرمایەداران ناوببرێن. ئێمە لە
کاتێکدا سەرنجی ھەموو لایەک بۆ ئەم مەترسیە ڕادەکێشین و خوازیاری کاری
دەمودەستی لایەنە بەرپرسەکانین بۆ چاودێریکردنی ژینگەی کار و
پێوانەکانی سەلامەتی کار، داوای لێپێچینەوەی یاسایی لە ھەموو
کەمتەرخەمەکان دەکەین.
بەرپرسی یەکەمی ئەم جۆرە ڕوداوانە و ژیانی کرێکار و کارمەندەکانی
کوردستان بەگشتی بە پلەی یەکەم حکومەتی ھەرێم و وەزارەتەکانێتی. جێگای
پرسیارە کە وەزارەتی سامانە سروشتیەکان لە حاڵێکدا ساڵانە تەنھا لە
پاڵێوگەی نەوتی سلێمانی چەندین ملیارد دیناری دەستگیر دەبێت بۆچی و
لەپای چی بەم جۆرە کەرەستە و دامەزراوەکانی خۆی فەرامۆش دەکات و تانکیە
ژەنگ گرتوو و عەمارەپۆکانی خۆی چاک ناکاتەوە و دەیانکاتە چاڵی مەرگی
کارمەندانی؟ حکومەت و وەزارەتێک کە بەم جۆرە فەرامۆشکار و بێدەربەستە و
ھیچ ھەنگاوێک بۆ زەمانەتکردنی سەلامەتی کار ھەڵناھێنیتەوە دەبێت
لێپرسینەوەی یاسایی لەگەڵ بکرێت و بخرێتە بەردەم بەرپرسیارێتی یان لە
ڕاستیدا نابەرپرسیارێتیەکانی.
ئێمە لە رێکخراوی کرێکارانی بیناسازیی داواکارین کە دەستبەجێ لیژنەیەکی
لێکۆڵینەوەی تایبەت لە لایەنە پەیوەندیدارەکان، بە بەشداری نوێنەری
ھەڵبژیردراوی کرێکاران و کارمەندانی پاڵێوگەکە و نوێنەری خیزانی کاک
تاریق پێک بھێنرێت و لێکۆڵینەوەیەکی شەفاف و ھەمەلایەنە سەبارەت بەم
کارەساتە بکرێت و تەواوی پەرەسەندن و ئەنجامەکانی بۆ ڕای گشتی ئاشکرا
بکرێت، سەرەنجامیش کەسانێک کە ئاشکرا دەبێت بە کەمتەرخەمیان بوونەتە
ھۆکاری ئەم کارەساتە پێویستە بە پێی یاسا سزا بدرێن.
ئێمە جارێکی تر ھاوخەمی خۆمان بۆ خێزان و دۆست و ھاوکارانی کاک تاریق
محەمەد کەریم دەردەبڕین و لەم کارەساتە دڵتەزێنەدا لە تەکیان دەوەستین.
رێکخراوی کرێکارانی بیناسازیی کوردستان
krekar.binasazi@gmail.com
|