په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٢٢\٦\٢٠١١

حیزبەکانمان شەرمنن، یان نازانن سیاسەت بکەن؟!


رابەر رەشید    


زۆر بە لاپەڕەکانی مێژوودا شۆڕنابینەوەو هەر لە کاتوساتی دوای رووخانی دیکتاتۆرە سەرشێتەکەی رۆژهەڵاتی ناوینەوە دەست پێدەکەین و لە چەند دێڕێکدا شەرمنی، یان سیاسەتنەزانی حیزبە باڵادەستەکانمان شرۆڤەو شەنوکەو دەکەین، بەو ئومێدەی چیتر هێندە وەکو نەتەوەیەک پابەندی بڕیاری حیزبییانە نەبین و ئەو سنوورە تەلبەندکراوە حیزبایەتییە ببەزێنین و واقیعیانەو لۆژیکیانە هەنگاو بەرەو ئاسۆیەکی گەش بهاوێژین، کە دڵنیام ئەمەی دەیڵێم: نە زێدەڕۆییەو نە خەیاڵپڵاوییەو نە ناسیۆنالیستییەکی توندڕەوانەی دەرەوەی بۆنوبەرامەی مافی مرۆڤ و سیاسەتی نێودەڵەتییشە، بەڵکو دنیابینییەکی دیالێکتیکانەی هاوچەرخانەی نێودەوڵەتی و یاخیبوونە لە کۆتوبەندی خێڵ و ناوچەگەرێتی، چونکە پێموایە ئەمەی ئێستا لە باشووری کوردستاندا دەگوزەرێت، خواستی تێکڕای کورد نییە، بەڵکو تەنها خواستی دوو حیزبی دەسەڵاتداری باشووری کوردستانە، کە بەداخەوە هێشتا لە چاویلکەیەکی تەڵخی حیزبایەتییەوە لە پرسی کورد دەڕوانن و بەرژەوەندیی حیزبەکانیان لەسەرووی بەرژەوەندییە باڵاکانی نەتەوەی کوردو هەتا ئاساییشی نەتەوەییشەوە دادەنێن)، شەنوکەوکردنی ئەو شەرمنی، یان سیاسەت نەزانینەش لە چوارچێوەی خەمخۆریماندایە بۆ ئاییندەی پرسی نەتەوەکەمان، بۆیە ئەوانەی بە بۆچوون و باری سەرنجەکانمان ختووکەیان دێت، یان قەڵس و نیگەران دەبن، با بە نووسین وەڵام بدەنەوە، ئەگەرنا بێدەنگی باشترین هەڵوێستە کە ئەویش نیشانەی رازی بوونە. کە دەڵێم شەرمنی، یان سیاسەتنەزانی لەو کڵاوڕۆژنەیەوە سێرە نیگاو سەرنجم دەگرمە دۆخێک کە زۆر بەداخەوە- رۆژ لەدوای رۆژ لەبەرچاوی دۆست و دوژمن و دەرودراوسێ، بچووک و بچووکتر دەکرێتەوەو هێندە بە پەرۆش و تامەزرۆییەوە هەوڵی زیاتر لکاندنی بە عێراقی عەرەبییەوە دەدرێت، وەک ئەوەی ئەم کوردە لەم باشووری کوردستانەدا، بە درێژایی تەمەنی ئەم دەوڵەتی عێراقە لەوپەڕی خۆشگوزەرانی و پێشکەوتندا بووبێت و لە سایەی دەسەڵاتی رژێمە یەک لەدوای یەکەکانی نەتەوەی سەردەستدا تاڵاوی مەرگی بە گەروودا نەکرابێت و کوردۆسایدو رەشەکوژی نەکرابێت. سەرکردایەتیی سیاسیی کورد لە جیاتی ئەوەی پرس بە جەماوەری گەلەکەی بکات و گوێ لە خواست و پێشنیاری رووناکبیران و دڵسۆزانی کورد بگرێت، کەچی تا ئێستاش پێیوایە: (دەوڵەتی کوردی خەونێکی شاعیرانەیە)ء ئەگەر لەم دۆزەخی عێراقی عەرەبییەدا هەوڵی خۆ رزگارکردن بدەین، ئیدی کورد وتەنی: (گورگ دەمانخوات!!) و ئاوەکی دەکەوین!!


کاتێ باس لە شەرمنی، یان سیاسەتنەزانیش دەکەین، پێویستیمان بە هێنانەوەی بەڵگەی زیندوو هەیە، بۆ ئەوەی دەروێشە دەف بەدەستەکانی تەکییەی حیزب، لە دژمان حاڵ نەیانگرێت و بەر شمشێرو خەنجەری ئەفسووناوییان نەدرێین. یەکێک لەو بەڵگە زیندووانە، نەبوونی بڕیارێکی تۆکمەی نوێنەرانی بە حیساب کوردە لە پەرلەمانی بەغدا کە بەداخەوە ئەوانیش بەدەر لە جێبەجێکردنی سیاسەتی حیزبەکانیان بەولاوە، بۆیان نییە هەنگاوێک ئەولاتر بچن، لەوەی کە لەم گەمە سیاسییە قێزەونەی دەسەڵاتدارانی بەغدا بە شیعەو سوننەوە کە دەرهەق بە کورد پەیڕەوی دەکەن، بەتایبەتی لە بەڕێوەبردنی گەمەی (شەڕی کات لەگەلڕ کورد) کە بە دڵنیاییەوە لەم شەڕەدا کە شەڕی لۆژیک و هۆشە، ئەگەر سەرکردایەتی سیاسی (کورد) زوو فریای خۆی نەکەوێت، ئەوا بێگومان بێ هەڵهێنانی هیچ هەنگاوێک، دەبێ ئاڵای سپی خۆبەدەستەوەدان بەرز بکاتەوەو چۆن هەمیشە داشی دامەی دەستی دەرودراوسێ و زڵهێزە جیهانییەکان بووین، هەر دەبێ لەو چوارچێوەیەدا بە دیار (دۆی رژاوی دادە)ەوە بگرین و بۆیشمان کۆ نەکرێتەوە. پێویستەو دەبێ پەرلەمانتارانی (کورد!!) لە بەغدا لە هەمبەر ئەو شەڕی کاتەدا یەکدەنگانە هەڵوێست وەربگرن و بۆ چارەسەرکردن و کۆتایی هێنان بەو گەمە قێزەونەی کە هەر دەڵێی حیکایەتی مێشەیەو عەرەب بە شیعەو سوننەوە لەگەڵ کوردی دەکەن، بگەڕێنەوە هەولێرو کاتێکی دیاریکراوی بۆ دابنێن و هەڕەشەی هەڵوێست وەرگرتنێکی نێودەوڵەتی لە بەغدا بکەن، بەوەی ئەگەر لەو ماوە دیاریکراوەدا بەغدا لە گەمەی (دەستوورو خۆ گنخاندن لە جێبەجێکردنی مادەی 140و قەرەبووکردنەوەو گەڕاندنەوەی زەویوزاری جووتیارانی کوردو خانوە دەستبەسەرداگیراوەکانی کورد لەلایەن حکومەتەکانی پێشووی عێراقەوەو گەڕاندنەوەی قەزاو ناحیە بەزۆر دابڕێنراوەکان بۆ سەر کەرکوک و کۆمەڵێک پرسی چارەنووسسازی دیکە کە زیاتر پەیوەستن بە درێژەدانی ئەم برایەتییە نا شەرعی و نەخوازراوەی نێوان باشووری کوردستان و عێراقی عەرەبی)، ئەگەر بەغدا لە گەمەکانی خۆی بەردەوام بوو، ئەوا خۆئەگەر هەر وەکو ناڕەزایەتی دەربڕینێکیش بێت، هەفتەی خۆپیشاندانی جەماوەری لە سەرتاسەری باشووری کوردستان بە کەرکوکیشەوە بخاتە رۆژەڤەوەو کارێک بکات، سەرنجی کۆمەڵگای نێودەوڵەتی و رای گشتی بۆ پرسی کورد لە باشووری کوردستاندا رابکێشێت و وەڵامێکیش بێت بۆ ئەو گەمە سیاسییەی کە بەغدا لەگەڵ پرسی کورددا دەیکات.


شەرمنی، یان سیاسەتنەزانییەکی دیکەی دەسەڵاتدارانی باشووری کوردستان، لێخۆشبوون و دەستهەڵگرتنە لە مافی کورد لە کەرکوک، ئەو مافەی کە بە (ئیستیحقاقی هەڵبژاردن) ناودەبرێت، کەچی سەرکردایەتی سیاسیی کورد دێت و وەک ئەوەی زەکات لە خەرمان دەربکات، گەمەیەکی دۆڕاوی (32 بە 32) پێشنیار دەکات و ئەوانەی بە قەوارەو شەڕو هەڕەشەی دەرودراوسێوەش نەیانتوانیوە دەنگ بهێنن، دێن و لە پشکی کورد برابەشیان دەکەن - کە ئەمەیان نووسینی زیاتر هەڵدەگرێت -. هەر بەوەندەشەوە ناوەستن، دوای (8) هەشت ساڵ لە گەمەی دۆڕاوی یەک لەدوای یەک، تازە بە تازە دێن و بەشێکی هەستیار لە پێکهاتەی فەرمانداری لە کەرکوک وەکو کاڵەک و شووتی دەبەخشنە بەرەی تورکمانی کە من بۆ مێژوو لێرەوە دەیڵێم: کورد لەم هەنگاوەیدا چۆن لە (32 بە 32)ـەکە شکستی خوارد، لەمەشیان زیاتر دەدۆڕێت و شکستی گەورەتر دەخوات. ئەرێ گەلۆ هەقی خۆمان نییە، بەم دەسەڵاتەی بەناو خۆماڵییە بڵێین: ئیتر بەسە هەڕاجکردنی پۆست و بێدەنگبوون لە ئاست دژ و دوژمنەکانمان؟.. سەیرە زۆریش سەیرە هێندەی لیستی حەدبای موسڵیشمان بۆ نەکرێت!!!

 

کەرکوک
ماڵپەڕی رابەر رەشید

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک