|
١١\٣\٢٠١١
هزر و دەسەڵاتی
تەکنۆکراتی بێلایەن، تاوانبارە!
- هزر و دەسەڵاتی
تەکنۆکراتی لە دیدی فەیلەسوفان پۆپەر، مارکۆزە و بۆدیو -
سهلام
عه‌بدوڵا
کاڕل پۆپەر پێیوایە دەسەڵات و هزری تەکنۆکراتی، (دیموکراسی تۆتالیتر)ەو
فەیلەسوفی فەرەنسی بۆدیو کە لیبڕالیزم بە دڕندە ناودەبات،
دەڵێ(لەچوارچێوەی هەوڵی گەڕاندنەوەی داهێنان و خزمەتگوزارییە گشتییەکان
پێمانوایە هەر رۆشنبیر، نووسەر، هونەرمەندو زانایەک...هتد رۆڵی
چارەنووسازیان هەیە کە دەبێ بیگێڕن و دەتوانن یەکەمجار بەرێگای پەخش و
بڵاوکردنەوەوە بەشداری بکەن لە وردوخاشکردنی قۆرخکردن وباڵادەستی
تەکنۆکراتە ئەرتەدۆکسەکان...). هەروا دەڵێ: بەڕاستی من لەو بڕوایەم کە
ئێمە ناتوانین بەرگرییەکی کاریگەر بکەین دژ بە تەکنۆکراتی نیشتمانی و
جیهانی تەنها بە رووبەڕووبوونەوەیان لە گۆڕەپانی خوازراوەکەیان نەبێت،
واتە لەبواری زانست و بەتابەتی لە بوارە ئابوورییەکەی و دەبێ لەهەمبەر
ئەو مەعریفە موجەرەد و شێواوە کە شانازی پێوە دەکەن، مەعریفەی رێزگرتنی
زیاتر لە مرۆڤ و راستییەکان دابنێین...هتد-کتێبی: دژ بە ئاگر-).
بە بۆچوونی (هیربەرت مارکۆزە)، ئەکسپێرتۆکراتی تێکەڵەکەیە لە
بەڕیوەبردن و شارەزایی کە لەبارەیەوە بەبێ ماندووبوون لاپەڕەیەکی
ستراتیژی و ئەو زانیارییانە دەنووسن کە بە بڕوای خۆیان دەبێ
سیاسەتمەدارەکان بیزانن. هاوڵاتیان لەم پرۆسەیەدا بەتەواوەتی
پەراوێزدەکرێن. عاقیبەتە ترسناکەکەی ئەوەیە کە لەئاستی تەکنیکدا هەموو
شێوەکانی بزاوتە پەرلەمانییەکان رادەگیرێت-هاوکات پرۆسەی پلاندانان
بەبەردەوام نادیموکراسانە،بڕیاریان لەسەر دەدرێ، چونکە تەنها لە
دوالیتێتی نێوان تەکنیک و سیاسەتی سیاسەتمەداران تێدەپەڕێن. لەدواییدا
دەڵێن: ئەوەی لەبارەیەوە بڕیارمان، ئەڵتەناتیڤ نەبوو).
بە کورتییەکەی ئەوە بۆچوونی کەسانێکی سەر بە رەوتی جیاجیان کە لەوانەیە
رۆشنبیرە لیبڕاڵ و"سەربەخۆ" کوردزمانەکان و دەڵاڵەکانی لیبڕالیزم لێی
فێر ببن و بزانن تەکنۆکراتەکان چ رۆڵێکی دڕندە و نامرۆیی دەبینن لەم
قەیرانە جیهانگیرە کە کوردستانیشی گرتووەتەوە. دەبێ ئەو بەڕێزانە بزانن
کە بە هوشیارییەوە دەیانەوێ بە رێگای تکنۆکراتکردنی دەسەڵات، گەلەکەمان
لە هەڵدێرەوە بۆ هەڵدێرێکی تر دەبەن: شۆڕەسوارەکانی لیبڕالیزمی
نوێ(تاتشەر و ریگانیزم)وا دەگەنە مەنزل! !
هەینییەکی شووم و دگان تیژەکان:
لەلایەکەوە هەینی شووم تێپەڕی، ئازادی پیاوچاک و بێوەیەکان و هوشیارییە
ئاوژووەکەیان، ئازادی ئێمەی هەتک کردو بۆنی بخور و حیکایەتەکانی جنۆکە
و پەری و جیهادی پیرۆز و(قەپانی یەکسان)شانبەشانی بانگەشەی بزووتنەوەی
گۆڕان بۆ حکومەتی تەکنۆکراتی سەربەخۆ، تەمومژی بەدەور تێکەیشتنی ئەم
بارودۆخە درووستکردووەو لەهەوڵی ئەوەن تەواوی ناڕەزایەتییەکان بخەنە
ناو سەبەتەکانیان و بۆ سەوداکارییەکی ئاشکرا بەکاریانبهێنن. لەلایەکی
ترەوە دوێنێ رۆژێکی رەش بوو بۆ خودی حکومەت: سوتاندنی خێوەتەکانی
بەردەم سەرا و لێدانی مانگرتووان تا لێدانی پەرلەمەنتارێک و تێکدانی
رادیوی دەنگ لە کەلار. بەم شێوەیە کەشوهەوای کۆنەپەرەستی دژ بە ئازادی،
کەناڵەکانی راگەیاندن داگیرکرد.
ئێمە چی ده‌کەین؟!
هێزە بەرهەڵستکارەکانی دەرەوەی پەرلەمان نە بە هێزە بەرهەڵستکارەکانی
ناو پەرلەمان رازین ونە خۆشمان گوێ لە یەکتری دەگرین و پەرتەوازین و
بەم شێوەیە خۆمان لە ئەرکەکانمان دزیوەتەوەو لە شوێنی"گونجاو"ی خۆمان،
واتە لە پەراوێزی رووداوەکان خۆمان دەبینین: بەشێکمان بەشەرمەوە لە
دوای هەمووانەوە بەدەنگ دێت، ئەمەش پاش رێگەپێدانی فەرمی و ناراستەوخۆ
تا هاوپەیمانەکانیان زوێر نابن و پڕۆژەیەکی شەرمنانە پێشکەش دەکەن.
گروپی وا هەیە لە سەر ئاستی رووداو و سەنگدا بە زەڕەبینیش نابینرێن
کەچی خۆیانیان لێ بووە بە پاڵەوانی گۆڕەپانەکە و رۆشنبیرەکانیشمان
خەویان لێکەوتووە. ئەوانە نموونەی نەزانی و دواکەوتوویی ئێمەیە لەسەر
ئاستی گۆڕانکارییەکان و دواکەوتنی ئەم بانگەواز بۆ یەکگرتنەوەمان لەسەر
پلاتفۆرمێکی لایەنی کەم، گەواهی ئەم رەخنەیە لەخۆمان!
ئێمە هێشتا لەنێوان داخوازی رەوای خەڵک و بەکارهێنانیان لەلایەن
ئۆپۆزیتسیونی ناو پەرلەمان و حکومەتی تێگلاو لە گەندەڵی، ناعەدالەتی
کۆمەڵایەتی و بازارگرانی، بە چەند بەیاننامەیەکەوە بە بۆڵەبۆڵکردنەوە
تەراتێن دەکەین.
لە هەموو نووسینەکان نەک هەر تەنها بە وشەیەکیش ناوی دوژمنی
مرۆڤایەتی(سەندوقی دراوی جیهانی، بانقی جیهانی و سیاسەت و ئابووری
لیبڕلیزمی نوێ و دەسەڵاتە تەکنۆکراتەکانیان)ناهێنرێت، بەڵکو بەهۆی
گەمژەیی ئاشکرا، پشتیوانی لە پڕۆژەکانیان دەکرێت.
ئێمە لەبەرامبەر سیناریۆیەکی سەیر و پێکەنیناوین: بە چەپڵە رێزانەوە
پێشوازی لە دەسەڵات و ئەقڵی بکوژو برسیکەرو چەوسێنەران دەکرێت: دەسەڵات
و ئەقڵی خودی تەکنۆکراتی گەندەڵ، شەڕەنگیز ودەزگاکانی شکستی هێناوەو
لەسەر ئاستی جیهان رسوابوون، کەچی بزووتنەوەی گۆڕان بە سەڵەواتدانی
ئیسلامییەکان، بانگەواز بۆ ئەم مۆدێلە دژە ئینسانییە رزیوە دەکات، واتە
مرۆڤ دەتوانێ بڵێ: بەراستی ئەقڵ لەم دەڤەرە باری کردووە، بۆیە گردبوونی
هەموو حزب و لاین و گروپ و رێکخراوە پەیەکان لە بەرەیەکدا تاقە
ئەڵتەرناتیڤە بۆ باروودۆخی ئیمرۆ!
سەرمایە ئەڵتەرناتیڤی مرۆیانەی پێ نەماوە کە تۆسقاڵێک خەڵک دڵی پێ خۆش
بکات و ئیمڕۆ لە قۆناغی پۆستدیموکراتی(باڵادەستی تەکنەلۆژیا،
دیکتاتۆرییەتی دەزگا نیونەتەوەییەکان، بەرفراوانکردنی کۆنتڕۆڵ و
جاسووسیکردن، پەکخستنی(گەل سەرچاوەی بڕیارەکانە)و لەشوێنیدا"تەکنۆکرات
سەرچاوەی بڕیارەکانە"و بەشێوەیەکی زۆر دڕاندە و دیکتاتۆریانە
فەرمانەکانی دەردەکات و دەبێ حکومەتەکان بەخۆشی یان بە ناخۆشی
جێبەجێیان بکەن-بۆ نموونە لاوازکردنی کەرتە گشتییەکان-، گرانی بازاڕ و
لەگەلیدا هەرزانکڕینی رەنجی مرۆڤی کارکەران، دووبارە بەرپاکردنی جەنگ
لە کۆلۆنەکان و سەرلەنوێ دابەشکردنیان و درێژەدان و بەهێزکردنی ئابووری
جەنگ و گەرمکردنی کاڵاکەی، زیادکردنی رێژەی بێکاری، وێرانکردنی ژینگە،
بە کاڵاکردنی بەرفراوانتر بۆ هەست و سۆزی مێیینە-نموونەیەک بۆ
کویلایەتی هاوچەرخ-، رەوەی بەکۆمەڵ و کۆچبردن، لەناوبردنی دامەزراندنی
جێگیر...هتد)ە و نموونە باڵاکەیشی(پەرلەمانی نوێنەرایەتی)شکستی هێناوە.
ئەمە بەری دەسەڵاتی"شارەزایانە"لەدنیا بە وڵاتانی ئۆروپاشەوەو ئەوەی
بەلایانەوە گرنگ بێت: بازاڕ دەچەرخێ!
نا ئێمە هەوڵدەدەین بەشداری بکەین لە هەڵوەشاندنی بنەماکانی هۆشیاری
ساختە و تەپوتۆزەکانی و بیانووە حەقیرەکان بۆ درێژەپێدان بە سیستێمی
چەوسێنەری سەرمایە!
درۆ شاخدارەکان بۆ گێلکردنی هاوڵاتیان!
1- لیبڕالەکان جاڕی(حزب باوی نەماوە)لێدەدەن، بەڵام راستییەکان ئەوەمان
پێدەڵێن کە تەواوی دەسەڵات و دەزگاکان لەم پەڕی دنیا بۆ ئەوپەوپەڕی لە
لایەن حزبەکانەوە بەڕێوە دەبرێن، بۆ نموونە لەهەر یەک لە ئەڵمانیا یان
هۆڵەندا زیاتر لە 60حزب لایەن هەیە(بڕوانە ڤیکیپیدیا)!
2- هەمیشە راستی شۆڕشگێڕە: پاڵەوانەکانی گێلکردنی جەماوەر
هاواردەکەن(شوعییەت باوی نەماوە...روخا). ئەوانە نازانن کە دوژمنانی
مارکسیزم لەسەرەمی مارکسەوە تا ئێستا هەر دووبارەی نا عیلمییەت و
بەتاڵی مارکسیزم دەکەنەوە، بەڵام بەبەرچاوی هەمووانەوە بەدرێژایی ئەو
مێژووە لە خۆپیشاندان و ناڕەزایەتییەکان بە ئیمرۆیشەوە، ئاڵای سوور و
داس وچەکوش لە کشورەی ئۆروپا و جیهان دژ بە گرانی بازاڕ، هەژاری،
بێکاری و گەندەڵی و جەنگ دەشەکێتەوە. ئایا ئەو رۆشنبیرانە لەگەل خۆیان
و خەڵک درۆی شاخدار دەکات؟ ئەی ئەگەر لەهەر بۆنەیەک بێنە گۆ و دووبارەی
درۆکانیان بکەن، چییان پێ بڵێین؟!
سەرمایەداری لەناو بۆگەنی و تاوان نغرۆبووە، کەچی هەندێ لایەن و
بەناو"رۆشنبیر" ئێستا بە خەڵک ناڵێن(ئەمە قەیرانی سەرمایە و
بازاڕەکەیەتی).
3- بەدرێژایی مێژوو عەدالەتی کۆمەڵایەتی تەنها و تەنها بە مێژوو و
خەبات و بەرگری سۆسیالیستەکان و ژیانی هەرەوەزی هاوبەش بەستراوەتەوە)،
کەچی قیژەو هاواری حزب و لایەنە ئاینییەکان و گۆڕان بۆ تەفرەدانی خەڵک
باسی عەدالەتی کۆمەڵایەتی دەکەن، بەبێ ئەوەی بڵێن چۆن! لێرەدا هیچ بە
پێویستی نازانم تاکە وشەیەک لەبارەی عەدالەتەکەی پارتی و یەکێتی
بدۆڕێنم!
خەمی خاک و خەمی نان؟!
هەموو وشە، وتارو هاوارێک بەناوی ئازادییەوە بەتاڵە ئەگەر مەبەست و
ماناکەی دەقاودەق گوزارشت لە شێوەی ژیانی رۆژانەی تاکەکانی کۆمەڵگە
نەکات و لێرەشدا هەڵویستی روون و ئاشکرا لەبارەی موڵکایەتی تایبەت و
کاریگەرییەکانی نەداتەبەر رەخنە و ئەڵتەرناتیڤەکەی رانەگەیەنرێت. ئەمە
هەموو مەسەلەکەیەو لەدەرەوەیدا تەنها سحر و دوعا و فرتوفێڵی جانبازە
بێمروەت و کەڵەکەبازەکانە.
لێرەدا پرسیار دەکەین: ئایا بەرپرس و کۆمپانیا و تۆرە بانناسیونالەکانی
خۆراک، پۆشاک، بیناسازی، تێلیکۆمۆنیکاتسیون، نەوت و گاز، فرۆکەوانی...هتد
چ رۆڵێک دەبینن لە ژیانی رۆژانەی هاوڵاتیان دەبینن؟ ئەی رێکخراوە
جیهانگیرەکان چ نەخشەیەکیان بۆ ئێمە دیاریکردووە؟
شێوەی رێکخستنی ئابووری ئێستا وای کردووە زۆربەی خەڵک هەست بە
ناعەداڵەتی بکەن و لەئەنجامدا هەست بە نامۆیی دەکات و ئینتماکەی بۆ
هەموو شتێکە، تەنها نیشتمان نەبێت، بۆیە خەمی نان و تەندرووستی و
نیشتەجێبوون و دوارۆژ جێگای(خەمی خاک و نیشتمان)ی گردۆتەوە،
بەڵام"موستەفیدکان" بەڵێندەرەکان، خاوەنەکانی کەرتی تایبەت، مودیر
عامەکان و بۆ سەرەوە، وەزیر و بەرپرسە حزبی و پەرلەمانییەکان و نووسەر
و رۆژنامەنووسەکانیان زیرەکانە باسی خەمە هاوبەشەکان دەکەن!
ئێمە بەئاشکرا لەگەل داخاوزییەکانماندا پەیاممان پێیە، پەیامی
هاومرۆڤبوونمان لەسەر ئاستی پێکەوەژیان و کار چارەنووسی هاوبەشمان
رادەگەیەنن، حاکمان، گۆڕان و رەوتە ئیسلامییەکان دژمانن!
ئەزموونەکانی دوێنێ و ئیمڕۆ دووپاتی وەحشیگەری هزر
و دەسەڵاتی تەکنۆکراتی دەکەن و گەندەڵی، گرانی بازاڕ،
ناعەدالەتی کۆمەڵایەتی بەچەی شەرعی سەرمایەداری هاوچەرخن لەهەموو
شوێنێکی دنیا، بۆیە ئێمە ئەڵتەرناتیڤی ژیانی هاوبەشی کوردستانیان
بەشێوەی هەرەوەزی لەبەردەم بزووتنەوەی جەماوەر دەخەینەروو کە تاقە
زەمانەتە بۆ بەدیهێنانی عەدالەتی کۆمەڵایەتی ولەگەلیدا ئازادی و ئاشتی
و ئاسایشی تاک و تەواوی گەلەکەمان مانای پڕاوپڕی خۆی دەبێت.....تۆش
وەرە لەم بەرەیە شوێنی خۆت بگرە!
ماڵپه‌ڕی سهلام عه‌بدوڵا
|
