|
|
|
١\٢\٢٠١٣ هونەرمەند (نازک) قوربانییەکى دیکەی دەستى کەلتوور.
تەکنیکەکانى خۆکوژیی ژنان جۆراوجۆرن؛ (خۆ سوتاندن، خۆ هەڵواسین، خۆ خنکاندن، خۆ کوشتن بە فیشەک و... هتد) کە ئەو کەلتوورە ژنان ناچار دەکا بە بەکارهێنانى ئەو تەکنیکانە.. ئەو کەلتوورەى کە ژن بێ ئیرادە دەکا کە ژن کۆیلە دەکا کە ژن بێ را و بێ دەنگ دەکا کە ژن دەکاتە پاشکۆى پیاو کە ژن دەکاتە کاڵا و کەلوپەل کە ژن دەکاتە کۆیلە و کە نیزە کە ژن دەکاتە نێچیرێکى بێ باڵ و دەستەمۆ و ئاسانکوژ؛ ئەو کەلتوورە تیرۆرى ژنانى کردۆتە دەرمانى هەموو دەردێکى کۆمەڵایەتى.. کەلتوورێک کە هەموو شتێک بۆ ژن بە شوورەیی دەزانێ تەنانەت ژنبوونیش شوورەییە لاى، لە ئاوەها کەلتوورێکداا کە پڕە لە داهۆڵ و سانسۆر بۆ ژن کە پڕە لە چەقۆ و فیشەک بۆ ژن.. ئیتر ژن چۆن دە توانێ ئازادانە بژی و بڕیار بدا و قسەى خۆى هەبێ.. کەلتوورێک کە پرچ و خەونى ژن پێکەوە ببڕێ.. کەلتوورێک کە ژن دەکوژێ لە سەر نووکە و زەنگى موبایلێک لە سەر هاتنە بەردەرگایەک لە سەر بزە و نیگا و پێکەنینێک لە سەر.. لە سەر .. نازانم لە ئاوەها کلتوورێکدا ئیتر ژن چۆن دەسرەوێ و ئارام دەگرێ.
بە داخەوە ئەو هونەرمەندەشمان تەکنیکێکى لە تەکنیکەکانى کەلتوور هەڵبژارد وەک هەر ژنێکى دیکەی ستەمکێشى کوردستان ئەویش پەناى بردە بەر مەرگ و ئەو تەکنیکەى بەکارهێنا، راستە ئەو ژنە خۆى کوشت و زۆر ژنى تر چەشنى ئەو ژنە خۆیان کوشتوە بە تەکتیکى جیاوازتر لە یەک بەڵام پێش ئەوەى ئەوان خۆیان بکوژن کەلتوور ئەوانی کوشتوە و بڕیارى کوشتنیانى داوە.. پێش ئەوەى ئەوان خۆیان بکوژن کەلتوور گیان و هەست و سۆز و ئیرادەى ئەوانی کوشتوە و جەستەیەکى بێ گیان و بێ ژیانى هێشتۆتەوە بۆ ئەو ژنانە.. بۆیە بێزاربوون لە گیانى خۆیان و بێ ئومێد بوون و سەرەنجام خۆیان لەو گیانەش رزگار دەکەن کە بووەتە بار بە سەریانەوە و بووەتە سەرچاوەى ئێش و ئازار بۆیان و نایانەوێ چیتر ئەو گیانەش بەردە وام بێ لە ژیان هەر بۆیە پەنا دەبەنە بەر خۆکوشتن.. ئەوە لە رووە سایکۆلۆژیی و گیانییەکەیەوە دەکەونە ئەو کەش و بارە لە بیرکردنەوە و ژیانکردن و لە رووە کۆمەڵایەتیەکەشەوە کەشێکی خراپتر.. بە داخەوە بۆیە تەنیا ئەلتەرناتیفێک کە پەناى بۆ دەبەن خۆکوژییە چونکە ئەو کەلتوورە مەحکومى کردوون بە خۆکوشتن.
بەڵام لە راستییدا دەبێ ژنان پەنا نەبەنە بەر خۆکوژیی و بەکارهێنانى توندوتیژیی بەرامبەر بە گیانى خۆیان بەڵکە دەبێ ژن بەهێزتر بێ لە کێشە و لە مەرگ و خاوەن ئیرادەیەکى پۆڵایین بێ و هیوا و ئومێدێکى گەورەى هەبێ بە ئازادیی و رزگاریی ژنان.. دەبێ لە دژى هە موو جۆرە توندوتیژیی و ستەم و چەوسانەوە و جیاوازیی و سووکایەتى و... هتد بوێرانە بوەستێ و بێ دەنگ نەبێ.. دەبێ ژنان ستەم قبووڵ نەکەن و خەبات و تێکۆشان بکەن و بێنە مەیدان و رووبەڕووى سیستەم و کەلتوورى کۆنى پیاوسالاریی ببنەوە و خەباتن بکەن بۆ نەهێشتن و سڕینەوەى ئەو کەلتوورە و دانانى کەلتوورێکى مرۆییانە لە جێگەیدا.. دەبێ چیتر ژن ئاگر لە جەستەى خۆى بەرنەدا و چیتر تە کنیکەکانى خۆکوژیی بەکارنەهێنێ کە کەلتوور ئامادەى کردوە بۆى.. دەبێ ژن ئاگر لە جەستەى کەلتوور و سیستەمى پیاوسالاریی بەربدا و دەبێ کەلتوور و سیستەم بکوژێ لە خۆیدا و لە خێزاندا و لە کۆمەڵگەدا.. دەبێ دەسەڵاتداران و حکومەتى ئەو هەرێمە ناچار بکا کە گیانیان بپارێزێ و مافیان دابین بکا و سزاى قورس بە سەر پیاوانى خێل َ و هۆز و بنەماڵە و خێزان بدا ئەگەر بیریان لە ئازاردانى ژن کردەوە.. دەبێ ژن بیر لەو جۆرە هەڵوێست و خەباتە بکاتەوە و کۆششی بۆ بکا و قوربانیی بۆ بدا و بیکاتە کەلتوورى کۆمەڵگە و خێزان و بیکاتە یاسا و دەستووری ئەو هەرێمە.. ئەوەش کارێکى تاک نییە بەڵکو کارێکى بەکۆمەڵە و خەباتێکى هاوبەشە لەگەڵ لەشکرێک لە ژنانى ئازادییخواز و ستەمکێش و لەگەڵ پیاوانى ئازادییخواز و یەکسانییخواز و بۆ ئەو مەبەستەش دەبێ ژنان و پیاوان رێکخراو بن لە یەک رێکخراوى گەورەدا تا ببنە گوشارێکی گەورە چونکە مەسەلەى ژنان بە تەنیا مەسەلەى ژنان نییە بەڵکو مەسەلەى هەموو کۆمەڵگە و هەموو مرۆڤەکانە بە بێ جیاوازیی رەگەزى نێر و مێ - لێرە دا بە پێویستى دەزانم بێمەوە سەر بابەتەکەم - بەڵێ ئەو هونەرمەندەشمان بە داخەوە ئەڵتەرناتیفێکى هەڵەى هەڵبژارد.. نەدەبوو خۆى بکوژێ بەڵکە دەبوو ئازایانە رووبەڕووى کێشەکان بووایەتەوە.
لێرەدا بە گرنگ و پێویستى دەزانم رەخنە ئاراستەى سەندیکاى هونەرمەندان و وەزارەتى ڕرۆشنبیریی بکەم کە لە ئاست مەرگى ئەو هونەرمەندەدا بێ دەنگ و بێ هەڵوێست بوون، ئەوا چلەى ئەو هونەرمەندەش تەواو بوو کەچى هەر بێ دەنگ و بێ هەڵوێست بوون.. نە بەیاننامەیەکیان دەرکرد نە یادێکى ئەو هونەرمەندەیان کردەوە...
سەندیکاى هونەرمەندان خۆ ئەم ژنە هونەرمەند بوو و مرۆڤ بوو گۆرانى بۆ ژیان بۆ مرۆڤ بۆ خۆشەویستیی دەگوت؟! خۆ ئەو ژنە خەونى گەورەى هونەرى هەبوو.. خۆ کۆمەڵێک گۆرانى جوان و نازکى هەبوو لەگەڵ کورتیی تەمەن و ئەزموونى هونەرییدا بەڵام هەنگاوى باشى نابوو پێش تەمەن و ئەزموونى خۆى کەوتبوو و گۆرانیەکانى بەرچاو دیار و جێکەوتە بوون ئیتر بۆچى یادێکتان لەو هونەرمەندە نەکردەوە کەواتە ئێوە بۆ هەن؟!! بۆ ئەو ناوەتان لە خۆ ناوە؟!! بۆ ئەو ناوە هونەرییە لە خۆتان ناکەنەوە.. بە راستیی نەبوونتان لە بوونتان باشترە، گەر مەرگى هونەرمەندێکى ژن فەرامۆش بکەن من نازانم ئاخر ئێوە کەى دەبنە سەندیکاى راستەقینەى هونەرمەندان و بەرگى تەوافق و حیزبایەتى فڕێ دەدەن..
وەزارەتى رۆشنبیریی و لاوان خۆ ئەو ژنە
هونەرمەند بوو.. مرۆڤ بوو.. لاو بوو.. خەون و بەرهەم و پرۆژەى هونەریی
هەبوو.. گەر بمابایە رەنگە ئەویش (سى ڤى)ی پڕکردایەتەوە بۆ ڤیستیڤاڵى
لاوى ساڵ.. ئەى ئێوە بۆ مەرگ و چلەى ئەم هونەرمەندەتان فەرامۆش کرد..
ئایا ئەم هونەرمەندە لاوێکى ئەو هەرێمە نەبوو.. • هەڤپەیڤینەک لەگەل (نازک)، لە ٤\١٠\٢٠٠٩ لە ئەمڕۆ بڵاوکرایەوە: هونه‌رمه‌ندا ده‌نگخۆش نازک ''هه‌ر ئه‌ڤینێ'' پێشکه‌ش دکه‌ت. ئاماده‌کرنا: سه‌میر نزاری http://www.emrro.com/hunermendnazik.htm
|
|
|
ئەو
هونەرمەندە ئازیزە بە مەرگێک جێى هێشتین کە مەرگى ئەو نەبوو مەرگێکى
تاڵ مەرگێکى گەورە وەک زێى گەورە.. ئەو هونەرمەندە هەموو خەم و ئازار و
نەهامەتییەکانى لەگەڵ گیانى خۆیدا بە ئاو سپارد و لەگەڵ ئاودا رۆیشت و
نەگەڕایەوە، مەرگى ئەو هونەرمەندە گۆرانیەکى غەمبار بوو لە دواڕۆژەکانى
کۆتایى ساڵى ٢٠١٢دا.. هەمووان گوێبیستى بووین کە ئاوازەکەى خۆکوژیی بوو
و مۆزیکاکەشى سەمفۆنیاى ئاو بوو.. مەرگى بووە گۆرانیەکى زیندوو کە
هەرگیز لە یادمان ناچێ.. هەموو هەواڵ و زانیارییەکان پێیانگوتین نازکى
هونەرمەند خۆى کوشتوە بەڵام من دەڵێم نازک خۆى خۆى نەکوشت بەڵکو
کەلتووری دواکەوتووانە کوشتى و سیستەمى گڵاوى پیاوسالاریی کوشتى و
قوربانیەکى دیکەی دەستى سیستەم و کەلتوورى دواکەوتووانەى کۆمەڵگەیە کە
نازک یەکەمین ژن نییە و دواین ژنیش نابێ.. نموونەکان زۆرن.. چیڕۆکەکان
زۆرن لە سەر خۆکوژیی ژنان لە ژێر هەڕەشە و گوشاری سیستەم و کەلتوورى
دواکەوتووانەى خێزان و کۆمەڵگە.. 