١٩\٨\٢٠١٢

عیرفان ئەحمەد، مرۆڤی رۆژی تەنگانە بوو!
 

لە کۆتاییەکانی ساڵی ١٩٩٤ و لە گەرمەی شەڕی کۆنەپەرستانەی نێوخۆی حیزبە تۆتالیتارییەکانی کوردستان.. ئێمە تازە چەند ژمارەیەکی رۆژنامەی ئازاد و ناحیزبیی (ئەمڕۆ)مان دەرکردبوو، لەو سەردەم بە هۆی ژیانی قاتوقڕیی و هەژموونی حیزبەکان کەم نووسەر و رۆژنامەنووس هەبوون بتوانن سەربەخۆیی خۆیان بپارێزن و ملکەچی حیزب و لایەنەکان نەبن و بتوانن بە ئازادانە گوزارشت لە خۆیان و بکەن و پابەست بن بە ویست و ئامانجەکانی خەڵکی نەدار و زەحمەتکێش.

لە کاتێکدا کە هێشتا خەڵکی کوردستان بە تەواویی نێوەرۆکی حیزبە دەسەڵاتدار و عەسکەرتارییە خێڵەکییەکانیان لە لا رۆشن نەبوو و هێندە بە کارە دزێو و دژەمرۆییەکانیان ئاشنا نەبوون.. ئێمە لە گەڕانمان بە دوای کەسانی بە هەڵوێست و چاونەترس کە لە بواری نووسین کاریان دەکرد (عیرفان ئەحمەد)ی خوێنگەرم و هێژامان و لە رێگەی (ئاکۆ کەریم مەعرووف)ەوە ناسی، پاش ئەوەی رۆژنامەکەمانی دیت زۆر زیرەکانە هەر زوو هەستی بەوە کرد کە ئەو رۆژنامەیە دەنگی ئەو و خەڵکانی ئازاد و زەحمەتکێشە بۆیە زۆر پێی شاگەشکە بوو و زۆریش هانی داین کە بتوانین بەردەوام بین و گەشەی پێ بدەین.. لە لای خۆشیەوە هەر دەمودەست بڕیاری دا بەوپەڕی تواناوە کارمان لەگەڵ بکا، ئەوە لە کاتێکدا ئێمە لەژێر هەڕەشە گوڕەشە و ترس و تۆقاندنی حیزبەکاندا بووین و نەک هەر نووسەران و رۆژنامەنووسان لە ترسی سەرکوتکردن و کوشتن و بڕین نەیاندەتوانی لە پڕۆژەیەکی رۆژنامەگەریی لەو بابەتە بەشدارییمان بکەن بەڵکە هەر لێشمان نزیک نەدەبوونەوە.

عیرفان ئەحمەد مرۆڤی رۆژی تەنگانە بوو، بەڵام بە داخەوە لەودەم هیوا و ئامانجەکانی نەهاتنە دی و هەر زوو لە هەموو لایەکەوە هێرشیان کردینەسەر و نەک هەر رۆژنامەکەیان پێ داخستین بەڵکە بە خوێنی سەریشمان تینوو بوون، ئیدی ئەو پێڕانەگەیشت بە نووکی پێنووسە جوانەکەی (ئەمڕۆ) گەشاوە و گەشاوەتر بکا و هەر یەکەمانیان بەلایەکدا پەرتەوازە کرد، پاشانیش بە هۆی دروستبوونی هەردوو ئیمپراتۆریەتە خێڵەکیی و ناوچەگەرییەکەی هەولێری بارزانی و سلێمانیی تاڵەبانی کوردستان بووە دوو لەت و ئێمەشیان لە یەک دابڕی و ئاگامان لە یەک نەما.

بە داخ و پەژارەیەکی زۆرەوە کە ئێستا چەقۆکێشە پاسەوانەکانی دەسەڵات بۆ هەتاهەتایی لە (عیرفان ئەحمەد)ی جوامێر و شاعیری نوێخواز و پێگەیشتوویان دابڕین، بەڵام بێگومان دەبێ دەسەڵاتدارە مرۆکوژەکان باش ئەوە بزانن کە جگە لەوەی کاکە عیرفان بە هۆی بەرهەمە بە بڕستەکانی چەندین عیرفانی دیکەی لە هەناوی کۆمەڵگەمان چاندووە و هەرگێز رێبوارانی رێی کاکە عیرفانیش لە خوێنە گەشەکەی خۆش نابن و نا‌هێڵن ئەو سیستەمە داپلۆسێنەر و دڕندە و ژیانکوژە تاسەر بەردەوام بێ کە ئەوەش ویست ئامانجی کاکە عیرفان و تێکڕای عیرفانەکانی ئەو کۆمەڵگەیەن.

سەری رێز و نەوازشمان بۆ کاکە عیرفانی هەمیشە زیندوو.

ماڵپەڕی ئەمڕۆ - ١٧\٨\٢٠١٢