ئیسلامیەکان بۆ واز لە خەڵک ناهێنن؟!

بەشدار عه‌لی   

دوایى وەڵامدانەوەى خەڵکى کوردستان و نووسەران و رۆشنبیران و رۆژنامەنوسان بە پرۆژەى مەلا و حیزبە ئیسلامیەکان بۆ زیاتر بەرتەسک کردنەوەى ئازادییەکان و سانسۆر و کۆنترۆڵى زیاترى نووسن و بڵاوکردنەوە و راگەیاندن،ئیسلامیەکان رووە راستەقینەکەى خۆیان دەرخست و بە هەموو شێوەیەک کەوتنە هەرەشە و پەلاماردان بۆ جێ خستنى بەدیلەکانى خۆیان و بە شێوەیەکى زۆر نامەدیانە و دوور لە هەر فەرهەنگێکى ئینسانى و سیاسى هێرش دەکەن و ئیهانە و سوکایەتى بە خەڵک و نووسەران و رۆژنامەنووسان دەکەن،لە سەرەتادا دەستیان بۆ ئەو کەسانە بردوە کە رووبەڕوویان بوونەتەوە و وەڵامیان داونەتەوە و خەڵکیان لە تاریکى و مەترسیەکانى ئاگادار کردۆتەوە،بەهەرحاڵ خۆزگە هەر لە نووسین و بڵاوکردنەوە تێپەڕى نەکردایە و بەمەش نەوەستان راستەوخۆ و ناراستەوخۆ و بە ئاشکرا و بە نهێنى وەکو پیشەى هەمیشەییان هەرەشە دەکەن تۆمەت و سوکایەتیان پێ دەکەن،گەیشتۆتە ئاستێک لەسەر شاشەى تەلەفزیونى نەورۆز محمد بازیانى کۆنە بزووتنەوەى ئیسلامى بە هەموو ئەو نووسەر و رۆژنامەنوس و خەڵکى نارازى دەڵێت: ( ئەوانە گێل و نەخۆش و نەفام و سەرلێشێواون!)،تەنها لەبەر ئەوەى داوایان کردووە تەنها وەکو کاک محمدەکان گفتوگۆبکەن و بنوسن و راکانیان دەربڕن،بەمەرجێک کەس نەیانکوژێ!

بەراستى ئێمە نازانین ئیسلامیەکان و مێجەر و عەمامە بەسەرەکان و رەوتە ئیسلامیەکانى کوردستان چیان دەوێت؟!بۆ لێناگەرێن سەربارى هەزار و یەک کێشە و گرفت و کەمووکوڕى پێداویستى رۆژانەدا ،خەڵک ژیان بکات و لە هەوڵدابێت بۆ دەست راگەیشتن بە ژیانێکى بێ چین و چەوسانەوە؟ بە ئارەزووى خۆیان لە لە مینبەرى مزگەوتەکاندا ووتارى ئاگرین بڵاودەکەنەوە و خەڵکى دەترسێنن و هەرەشەیان لێ دەکەن و فتواى کوشتنیان دەردەکەن و سەرى مانگانیش مووچەیەکى چەور و نەسریەکى باش لە دەسەڵاتداران وەردەگرن و لە هیچ شتێکیان کەم نیە،ئازادانە دەنووسن و بڵاودەکەنەوە و دەکوژن و لەت و پەت دەکەن و دەخنکێنن و دەتەقێننەوە و سەر دەبڕن و زیندەبەچاڵ دەکەن و .....،کەچى لەبەرامبەر رەخنە و نووسین و بڵاوکردنەوەى لێکۆڵینەوەیەکى زانستى و مێژووى هیستریا دەیانگرێت،ئەى بۆچى وەڵامێکى مەنتقى و بە بەلگە نادەنەوە و هەرەشە دەکەن و لەلایەکى تریش هاوار بۆ سەرۆکى هەرێم دەبەن بۆ ئەوەى فرییان بکەوێت و ئەو کۆمەڵگا تاریکتر بکەن و بە یاسا و دەستوور کەس زات نەکات و هێڵى سوور نەبەزێنێت.زیاتر لە هەزار ساڵە ئێوە ئەو کار و کردەوەتان بووە و دەتانەوێت لە سەدەى بیست و یەکیش لە سەردەمى پێشکەوتنى زانشت و هۆشیارى و چاوکراوەى بە هەمان شێوە بۆتان بچێتە سەر و خەڵک بڕواتان پێ بکات؟!

دەمێکە سامیە لابیدى نووسەر گووتویەتى(شتێک کە بەبێ دەلیل و مەدرەک،بەچاوبەستراوى قبوڵکرابێت،بەبێ دەلیل و مەدرەکیش دەخرێتە کەنارە و دەردەکرێت...)ئیسلامیەکان لەبەر ئەوەى ناتوانن وەڵامێکى قانعکەر و دورست بە خەڵک و نووسەران بدەنەوە و بەڵگە و دیکۆمێنتەکانیان هێندە لاوازە تەنانەت جێگاى پێکەنین و گاڵتەجارییە،بۆیە دەیانەوێت وەکو هەموو جارەکانى پێشووتر ئەمجارەیان لە (کەمترین باوەڕ)دەرچێت و هێرش دەبەن.
ئەوان پێویستە بخرێنە ژێر چاودێرى چاکسازییەوە یارمەتیان بدرێت و هاوکارى بکرێن،چونکە بە هەموو شێوەیەک لە هەوڵدان بۆ دژایەتى کردنى حەز و خۆزگە و هیواو ئاواتەکانى خەڵکى کوردستان و لاوان و گەنجان و ژنان و مناڵان بە تایبەت، ئێمە دەڵێین ژنان و ئافرەتانیش وەکو هەر مرۆڤێکى دیکە و پێویستە یەکسان بن و ئازادانە مامەڵەبکەن،پێمان دەڵێن ئێوە لە بەڕەڵایى دەگەرێن و بەد ئەخلاقى بڵاودەکەنەوە!!!ئێمە دەڵێین دەبێت مناڵان و هەرزەکاران کە مێشک و بیر و هۆشیان کامڵ نیە و لەهەموو جۆرە توندوتیژى و هەر پەروەردەیەکى مەزهەبى و قەومییەوە بەدووربن بۆ ئەوەى نەوەیەکى تەندورست دوورست بێت،ئێمە دەڵێین یاسا و دەستوور نابێت بکرێتە تەوقێک و گەردەنى مرۆڤەکانى پێ زنجیر بکرێت و دوور بێت لە سەپاندنى هەر بیروباوەر و ئایدلۆژیایەک بۆ ئەوەى ئینسانەکان خاوەنى ئیرادەى و تواناکانیان بن،ئەوان دەڵێن بەهیچ شێوەیەک نابێت یاسا و دەستوور سەربەخۆبن و دەبێت دین و بیروباوەرە ئاینیەکان سەرچاوەى سەرەکى بن لە دارشتنى،ئێمە دەڵێین دەبێت هەموو شتەکان قسەى لەسەر بکرێت بۆ ئەوەى گومانەکان نەمێنن،بەڵام ئەوان هێڵى سوورمان بۆ دیار دەکەن و بەزاندنى ئەو هێڵانەش بە سزایى مەرگمان دەگەیەنن تاکو هەمیشە لەنێو دوودڵى و گومڕاییدا بژین... .

هەموو ئەمانە بە شوێنى خۆى،بەڵام نەبوونى دەسەڵاتێکى مەدەنى و لێواو لێو لە گەندەڵى و خاوەن هێزێکى میلشیایى دەرفەتى بۆ ئەو کۆلکە مەلایانە رەخساندووە تا بریار و راسپاردە شەرمهێنەرەکانیان بەسەر نەوەى سەدەى بیست و یەک،کوڕان و کچانى سەردەمى رۆبۆت و تەکنەلۆجیادا تاقیبکەنەوە،ئەگەر دەسەڵاتى لەرزۆک و بەرژەوەندیخوازانەى پارتى و یەکێتى نەبێت،ئەگەر سات و سەودا و سیاسەتى نان بەنرخى رۆژى ناسیونالیستى کوردى نەبێت،هەرگیز ئەو رەوتە ئیسلامیانە و پرۆژەکانیان لەبەردەم نارەزایەتى پڕ لە توڕەیى گەنجان و لاوانى کچ و کوڕ و ژنان و مناڵانى کوردستان،ناتوانێ بوەستێ،ئەگەر پاڵشتى و هاوکارى دەسەڵاتدارانى کوردستان نەبێت بە بیست و چوار سەعات ئەم نوێنەرانەى تاریکى ئاسەوارێکیان لە کوردستان نامێنێت.

Bashdar_net@yahoo.com