٥\٥\٢٠١١

ئیسلامییەکان پاشکۆ لاوازەکەى گۆڕان.

راپۆرتى شیکارى: شاخەوان برایم عەبدوڵا

ئەگەرچى بزوتنەوەى ئیسلامى بەر لەراپەڕین تاکە حیزبى ئیسلامى بوو، دواتریش یەکگرتووى ئیسلامى دروستبوو بەڵام دواتر لەئەنجامى ئینشیقاقى ناوخۆى بزوتنەوەى ئیسلامى، ئەنسارلئیسلام و جوندولئیسلام و کۆمەڵى ئیسلامى لێ جیابۆوەو ، ئەو حیزبە ئیسلامییانە هەر یەک لەقۆناغ و بارودۆخی جیاوازى کوردستاندا دەرکەوتن و تارادەیەکى بەرچاویش ناکۆکیان لەنێواندا هەبووەو هیچ کاتێکیش هێندەى ئەم دوو ساڵەى کەئۆپۆزسیۆن بوونى خۆیان راگەیاندووە وەک مەترسییەکى گەورە باسیان لێوە نەکراوە چ لەلایەن دەسەڵات و بەشێکى زۆرى رۆشنبیرانیش هاوڕان لەسەر ئەوەى کەوا ئیسلامییەکان مەترسین بۆ سەر ئایندەى کوردستان.

ئیسلامییەکان بۆچى دژایەتى دەسەڵات دەکەن.

بەوپێیەى پارتى و یەکێتى دوو حیزبى عەلمانین و بەپاڵپشتى چەند لایەنێکى سیاسى حکومەتیان پێکهێناوەو بەجۆرێکیش عەلمانیبوون بەئەداى کارکردنى حکومەتەکەوە دیارەو ئەمەش کۆمەڵ و یەکگرتووى نیگەران کردووە، دەرئەنجامیش دوو حیزبە ئیسلامییەکە لەگەڵ دەرکەوتنى حیزبى گۆڕان کە ئەویش لەئەنجامى ئینشیقاقى ناو یەکێتییەوە دروستبووە خۆیان وەک ئۆپۆزسیۆن ڕاگەیاندو زۆرێک لەچاودێرانى سیاسیش پێیانوایە ئیسلامییەکان بوونەتە پاشکۆى گۆڕان و هەر کاتێک گۆڕان پاشەکشە بکات لەکارى ئۆپۆزسیۆنییەوە، ئیدى ئەوانیش دەگەڕێنەوە دۆخى جاران و هەوڵى بەشداریکردن لەحکومەتەکەى پارتى و یەکێتى دەدەنەوە.

ئیسلامییەکان و سیاسەتى نێودەوڵەتى .

ئیسلامییەکان دواى بەکارهێنانى هەرچى توانایەکى هەیانبووە10 کورسى پەرلەمانیان مسۆگەرکردووە لەکۆى 111 کورسى، ئەمەش ئەگەرێکى زۆر لاوازە بۆ گەیشتن بەدەسەڵات، سەرەڕاى ئەوەى هاوپەیمانە ئۆپۆزسیۆنەکەى لەرووى فیکری و شێوازى حوکمڕانییەوە جیاوازى بەرچاو لەنێوانیاندا بەدى دەکرێت و لەکاتێکیشدا ئەمریکییەکان و ئەوروپا بەجیدى ئیش لەسەر لاوازکردنى پێگەى ئیسلامییەکان دەکەن لەرۆژهەڵاتى ناوەڕاستدا بەو پێیەى مەترسین بۆ سەر ئاسایشى نێودەوڵەتى و هەر بۆ ئەم مەبەستەش هەواڵگرى ئەمریکى(سى ئاى ئاى)و موسادى ئیسرائیلى زۆرترین توانا ماددى و هەواڵگرییەکانیان بەگەڕخستووە. ڕاوەدوونانى بزوتنەوەى تاڵیبان لەئەفغانستان و لەکوردستانیشدا ئەنسارلئیسلام و جوندولئیسلام و گرتنى عەلى باپیرو فشارخستنە سەر مەلا کرێکار، بەڵگەى زیندوون کە گرتنەدەستى دەسەڵات لەلایەن ئیسلامییەکانەوە خەونێکى یۆتۆبیاییەو نابێتە راستى، ئەمەش بەوپێیەى ئەمریکییەکان بەوردى چاودێرى ڕەوشى سیاسى و حکومڕانى عێراق و کوردستان دەکەن و هەر بارگرژییەک لەم ناوچەیەدا لەبەرژەوەندییەکانى ئەمریکا دەدات و ئەمریکییەکانیش تەنیا تەماشاچى نابن، بەڵکو بەکردەیی هەڵوێست دەنوێنن.

خۆپیشاندانەکانى سلێمانى و یەکگرتوو و کۆمەڵ.

هەرکە خۆپیشاندان شارى سلێمانى و بەشێکى ناوچەکانى ئەو پارێزگایەى گرتەوە، ئیدى ئیسلامییەکان بەپاڵپشتى گۆڕان، هەرچى تواناى فیکرى و ئایینى و حیزبییان هەبوو خستیانەگەڕ بۆ لاواز کردنى دەسەڵاتى پارتى و یەکێتى بەمەبەستى گرتنەدەستى دەسەڵات لەگەڵ گۆڕانى هاوپەیمانە عەلمانییەکە، ئەمەش لەکاتێکدایە ئیسلامییەکان بیریان لەوە نەکردۆتەوە کاتێک پارتى و یەکێتى رووبەرووى شکستى حکومڕانى دەبنەوە ئیدى چۆن و لەسەر چ بنەمایەک لەگەڵ گۆڕاندا هەڵدەکەن کە تەواوى هەڵسوڕاوەکانى عەلمانین و خاوەن25 کورسى پەرلەمانى و میدیایەکى زەبەلاحیان هەیە، لەبەرانبەریشدا کۆمەڵى ئیسلامى 4 کورسى و یەکگرتووى ئیسلامیش 6 کورسى پەرلەمانیان هەیەو کۆى کورسییەکانیشیان دەکاتە 10 کورسى. کەواتە ئەوان تەنیا بیریان لەرووخانى دەسەڵات کردۆتەوەو پلانى ستراتیژیان نییەو دیسانەوە دواى شکستى پارتى و یەکێتی ناتوانن بگەنە دەسەڵات، بەڵکو دەبنەوە پاشکۆى گۆڕان و ڕەنگە ببنەوە ئۆپۆزسیۆنێکى شەرمن، ئەم ئەگەرانەش لەکاتێکدایە پارتى و یەکێتى زۆرینەى دەنگەکانى جەماوەریان مسۆگەرەو ئەزموونى حکومڕانی و پێگەى نێودەوڵەتیان هەیەو بەئاسانى کورسى دەسەڵات بەجێ ناهێڵن بەپێى شەرعییەتى هەڵبژاردنى پەرلەمانی.

ئیسلامییەکان و رۆشنبیرانى عەلمانى.

لەئێستاکەدا کۆمەڵ و یەکگرتوو بەجۆرێک خۆیان لەرۆشنبیرانى عەلمانى و چالاکوانانى کۆمەڵى مەدەنى نزیک کردۆتەوە، ئەوەى ئاگادارى قۆناغە سیاسى و فیکرى و کۆمەڵایەتی و پەروەردەییەکانى ئەو دوو حیزبە ئیسلامییە نەبووبێت، بێ ئاگایە لەوەى ئەوە ئیسلامییەکان بوون فەتواى کوشتنیان بۆ رۆشنبیران و چالاکوان و کارەکتەرە عەلمانییەکان دەردەکردو مەلاو مینبەرى مزگەوتیان بەکاردەهێنا بەمەبەستى سووکایەتیکردن بەرۆشنبیران، چەند مانگێکیش بەر لە خۆپیشاندان و رووداوەکەى17ى شوباتى ئەمساڵ، ئەوە ئیسلامییەکان بوون دەرگەى دادگەکانیان دەکوتى و رۆشنبیرانیان لەسەر ئازادى قسەکردنەوە دەدایە دادگەو بەدژە ئیسلامییان لە قەڵەم دەدان، ئاخر کەى جێگەى مەنتیقە لەئێستاکەدا ئاوا رۆشنبیران و کارەکتەرە عەلمانییەکان لەو کەناڵانەى کە سووکایەتیان تێدا ئاراستەکراوە لەبەرژەوەندى ئیسلامییەکان قسە بەدەسەڵاتێک بڵێن کە خۆیان بەشێکى گەورە بوونە لەگەندەڵییەکانى ئەو دەسەڵاتە. بەدیوەکەى تریشەوە بەو پێیەى ئیسلامییەکان هێزگەلى شمولى و سەلەفین لەهەر دەرفەتێکدا رۆشنبیرانى عەلمانى دووچارى پەراوێزبوون دەخەنەوە، ئەمەش بەهۆى بڕوانەبوونى ئیسلامییەکانە بەئازادى قسەکردن و فیکرى عەلمانییەوە، بەوپێیەى فیکرى عەلمانییەت لەگەڵ جیاکردنەوەى دەوڵەتە لەئایین و ئیسلامییەکانیش ئەمە بە هێلى سوور دەزانن، کەواتە پێکەوە هەڵکردنى ئیسلامییەکان و رۆشنبیرە عەلمانییەکان ئەو هیستریایە کردونێتى بەهاوپەیمان ئەویش خەونى گەیشتنە دەسەڵاتە بێ بیکردنەوە لە دەرئەنجامە مەترسیدارەکانى.

یەکگرتوو و کۆمەڵ هاوپەیمانە لاوازەکەى گۆڕان.

ئەوەى کۆمەڵ و یەکگرتووى ئیسلامى و گۆڕانى وەک سێ رەوتى جیاواز کردۆتە هاوپەیمان، ئەوە تەنیا هیستریاى گەیشتن بەدەسەڵاتەو دواتریش دابەشکردنى پۆست و داهاتەکانى کوردستانە، نەک نزیکایەتى و بڕوابوونیان بەهاوپەیمانێتى، مەترسییەکەش لێرەوە سەرهەڵدەدات کاتێک سێکوچکەکەى ئۆپۆزسیۆن بگەنە دەسەڵات و ئیدى ناکۆکییەکانیان دەردەکەوێت و کوردستان رووبەڕووى مەترسى شەڕى ناوخۆیی کۆمەڵ و یەکگرتوو لەلایەک کە ئەمانەش وەک دوو رەوتى ئیسلامى لەجەوهەردا لەگەڵ یەکدا ناکۆکن و بەرژەوەندى سیاسى کۆى کردونەتەوە، لەلایەکەى تریشەوە شەڕى گۆڕان لەگەڵ هەردوو لایەنەکە، کەواتە لەوەها رەوشێکدا کوردستان دووچارى سێ جۆر لەشەڕى ناوخۆیی دەبێتەوە لەناو خودى دەسەڵات و لەولاتریشەوە پارتى و یەکێتى کەخاوەن رابردووى خەبات و شۆڕشگێرین، بەئاسانى گۆڕەپانەکە چۆل ناکەن و ئیدى کوردستان دەکەوێتە بەردەم مەترسییەوەو بۆیەش ئەرکى پارتى و یەکێتییە رێگە لەدروستبوونى ئەو مەترسییە چاوەڕوانکراوە بگرن بەوپێیەى لەدەسەڵاتدان و ڕێگەیەکى مەدەنیانە بگرنەبەر، ئەمەش لەکاتێکدایە ئۆپۆزسیۆن زمانى دیالۆگى نەهێشتۆتەوە، بەڵکو سووڕن لەسەر رووخانى حکومەت و ئەمەش لاى پارتى و یەکێتى هێلى سوورە.
 

هەولێر

ماڵپه‌ڕی شاخه‌وان برایم عه‌بدوڵا