٢٧\١\٢٠١٤

کابینه‌ی هه‌شته‌م و زۆر شتی تریش.

شاخه‌وان برایم عه‌بدوڵا

بۆ هه‌رێمێکی بچووکی وه‌ک باشووری کوردستان، پێکنه‌هێنانی کابینه‌یه‌کی لۆکالی له‌ ماوه‌ی نزیک له‌ چوار مانگدا‌ شتێکی نا ئاساییه‌و جێگه‌ی پرسیاره‌، چونکه‌ پێکهاته‌ی باشوور له‌رووی ئاینزاییه‌وه‌ زۆرینه‌ سوننه‌ مه‌زهه‌ب و مه‌سیحی و تورکانه‌کانیش که‌مینه‌ن و به‌ربه‌ست نین له‌و باره‌یه‌وه‌، هاوکات له‌رووی نه‌ته‌وه‌ییشه‌وه‌ حیزبه‌ براوه‌کانی هه‌ڵبژاردنی په‌رله‌مان کوردستانین(کوردن) که‌واته‌ بۆخۆی ئه‌مه‌ جێگه‌ی هه‌ڵوه‌سته‌ له‌سه‌رکردنه‌ که‌ بۆچی ئه‌و ماوه‌ زۆره‌ حکومه‌ت پێکنه‌هات و په‌رله‌مانیش‌ گوایه‌ شوێنی یاسادانان و لێپرسینه‌وه‌یه‌ تاهه‌نووکه‌ نه‌یتوانیوه‌ سه‌رۆکایه‌تییه‌ک بۆ خۆی ده‌ست نیشان بکات، که‌واته‌ ئه‌مه‌ ئه‌وه‌مان پێده‌ڵێت په‌رله‌مان به‌راستی نوێنه‌رایه‌تی راسته‌قینه‌ی خه‌ڵک نییه‌و ده‌سته‌مۆی حیزبه‌کانه‌و ئه‌ندامه‌کانی وه‌ک رۆبۆتوان له‌ ده‌ستی به‌رپرسه‌ حیزبییه‌کانه‌وه‌، هاوکات ململانێی دوو حیزبه‌ دووه‌م و سێیه‌مه‌که‌ی براوه‌ی هه‌ڵبژاردنیش له‌سه‌ر پۆستی جێگری سه‌رۆکی حکومه‌ت ئه‌مه‌ش خوێندنه‌وه‌یه‌کی تری ده‌وێت که‌ به‌راستی ئه‌و دوو حیزبه‌ واته‌ گۆڕان و یه‌کێتی به‌ر له‌وه‌ی له‌ خه‌می هاونیشتمانیاندابن له‌ خه‌می وه‌رگرتنی پۆستدان بۆ به‌رپرسه‌ حیزبییه‌کانیان، ئه‌گه‌رچی به‌پێی ئه‌نجامه‌کانی هه‌ڵبژاردن بێت ئه‌و پۆسته‌ هی گۆڕانه‌، چونکه‌ جیاوازی له‌ نێوان کورسییه‌کانی گۆڕان له‌گه‌ڵ یه‌کێتیدا شه‌ش کورسییه‌و ئه‌مه‌ش هێنده‌ی کۆی کورسییه‌کانی کۆمه‌ڵی ئیسلامییه‌‌ که‌ ئه‌ویش داوای شتی زۆر له‌وه‌ گه‌وره‌تر ده‌کات که به‌پێی ئه‌نجامی هه‌ڵبژاردنه‌کان به‌ری ده‌که‌وێت.

به ‌پێی ده‌نگۆی میدیاییش بێت پارتی داوای زیادکردنی دوو جێگری تری بۆ سه‌رۆکی حکومه‌ت کردووه‌ بۆ یه‌کلایی کردنه‌وه‌ی ئه‌م قه‌یرانه‌ی له‌ نێوان دوو حیزبه‌که‌دایه‌ له‌سه‌ر وه‌رگرتنی جێگری حکومه‌ت، به‌ڵام ئه‌مه‌ پێشنیارێکی تائه‌وپه‌ڕی ناواقعییه‌و ناکرێت بۆ رازیکردنی حیزبی سیاسی پۆستی کارتۆنی به‌سه‌ر خه‌ڵکه‌وه‌ زیاد بکرێت، چونکه‌ ئه‌مه‌ له‌ دواییدا ده‌بێت شوێن و بودجه‌و فه‌رمانبه‌رو پاسه‌وان و ئیمتیازی جۆراوجۆر بۆ دوو جێگره‌ تازه‌که‌ زیاد بکرێت و ئینجا له‌رووی میدیاییشه‌وه‌ هه‌ر رۆژه‌ و جێگرێک دێته‌ سه‌ر شاشه‌و به‌ شان و باڵی حیزبه‌که‌یدا هه‌ڵده‌دات، به‌مه‌ش حکومه‌ت له‌بری ئه‌وه‌ی هی خه‌ڵک بێت ده‌بێته‌ هی حیزبه‌کان و به‌های نامێنێت له‌به‌رچاوی تاکی هاونیشتمانیدا، که‌واته‌ پرۆژه‌ی زیادکردنی دوو جێگر به‌ یه‌کێک له‌ پرۆژه‌ پێشنیارکراوه‌ فاشیله‌کان هه‌ژمار ده‌کرێت و ته‌نیا هاونیشتمانی باجی ئه‌و هه‌ڵه‌ ستراتیژییه‌ ده‌دات، چونکه‌ ناکرێت له‌ هه‌رێمێکی لۆکالی بچووکی وه‌ک باشوور حکومه‌ت سێ جێگری هه‌بێت و هه‌ر یه‌که‌شیان له‌ حیزبه‌ سیاسییه‌کان خاوه‌ن مێژووی رکابه‌رایه‌تیبن له‌گه‌ڵ یه‌کتریدا، ئه‌گه‌ر ئه‌مه‌ روویدا به‌بێ هیچ ئه‌ملاوئه‌ولایه‌ک کابینه‌یه‌کی کارتۆنی ده‌بێت و ته‌نیا مه‌به‌ست لێی کپ کردنی ده‌نگه‌ ناره‌زاییه‌کانه‌.

خودی حکومه‌تی بنکه‌فراوان له‌گه‌ڵ بنه‌ماکانی دیموکراسیدا یه‌ک ناگرێته‌وه‌، چونکه‌ له‌وه‌ها حکومه‌تێکدا رۆحیه‌تی ئۆپۆزسیۆن بوون ئاماده‌گی نابێت و دیموکراسیش به‌بێ ئۆپۆزسیۆن وه‌ک کارگه‌یه‌کی بێ کارمه‌ندو سوته‌مه‌نی وایه‌، چونکه‌ به‌رهه‌می نابێت و ته‌نیا ناوی ده‌بێت، که‌واته‌ ئۆپۆزسیۆن تاوانباری سه‌ره‌کین له‌وه‌ها دۆخێکی بێ ئۆپۆزسیۆن بووندا، چونکه‌ ده‌یانتوانی نه‌چنه‌ ناو حکومه‌ته‌وه‌ مادام به‌ته‌نیاو به‌بێ ده‌سه‌ڵات ناتوانن حکومه‌ت پێ بهێنن، ئاخر هاونیشتمانییه‌کی یه‌کجار زۆر ده‌نگی بۆ ئه‌وه‌دا ئۆپۆزسیۆن ژیانیان باشتر بکات، به‌ڵام کاتێک ده‌چنه‌ ده‌سه‌ڵاته‌وه‌ هیچ جیاوازیان نابێت له‌گه‌ڵ حیزبه‌ ده‌سه‌ڵاتداره‌کانی تره‌وه‌و ئه‌وانیش برابه‌ش داهات و پاره‌ی میلله‌ت له‌ نێوان خۆیاندا به‌ش ده‌که‌ن و هاونیشتمانیش با بۆ خۆی هه‌ر ناره‌زایی ده‌ربڕێت و که‌سیش نابێت روومالی نائومێدییه‌کانیان بکات، چونکه‌ له‌وه‌ها حکومه‌تێکدا به‌رهه‌لستکاری نامێنێت و چاوپۆشی له‌ یه‌کتری ده‌که‌ن.

کاره‌ساتێکی تری ئه‌و حکومه‌ته‌ بنکه‌فراوانه‌ ئه‌وه‌یه‌ که‌ ئیسلامییه‌کان وه‌ک هێزی براوه‌ ده‌چنه‌ ناو حکومه‌ته‌وه‌و به‌مه‌ش پلان و به‌رنامه‌ی کۆنه‌په‌رستی داده‌ڕێژن له‌ ناو هه‌ناوی حکومه‌تدا، بۆ نموونه‌ ئه‌گه‌ر کۆمه‌ڵ وه‌زاره‌تی ئه‌وقافی به‌ر بکه‌وێت هه‌رچی مه‌لا هه‌یه‌ ئاڕاسته‌ ده‌کرێن بۆ ئه‌وه‌ی به‌ر به‌ ئازادی و مافی قسه‌کردنی خه‌ڵکی بگرن له‌رووی رۆشنبیری و ئازادی قسه‌کردنه‌وه‌و هاوکات ئیش له‌سه‌ر به‌ ئیسلامی کردنی کۆمه‌ڵگه‌ ده‌که‌ن له‌ پێناوی به‌رژه‌وه‌ندی ته‌یاری فێنده‌مێنتالی ئیسلامیدا، خۆ ئه‌گه‌ر وه‌زاره‌تی گه‌شت و گوزاریش بدرێته‌ یه‌کگرتوو ئه‌وکات ره‌وشی گه‌شتیاری په‌کی ده‌که‌وێت، چونکه‌ ئه‌وه‌نده‌ سانسۆر له‌سه‌ر ئازادی گه‌شتیاری خه‌ڵکی داده‌نێت‌ تا‌ به‌هۆیه‌وه‌ ئازادی گه‌شتیار ده‌که‌وێته‌ مه‌ترسییه‌وه‌.

ئاخر ئه‌گه‌ر یه‌کگرتوو پرۆسه‌ی به‌ گه‌شتیاری کردنی کوردستانی بکه‌وێته‌ ده‌ست، چۆن رێگه‌ به‌وه‌ ده‌دات له‌ سه‌یرانگه‌یه‌کدا یان شوێنگه‌یه‌کی گه‌شتیاریدا، کوڕ و کچێک ماچی یه‌کتری بکه‌ن یان پێکێک مه‌شروب بخۆنه‌وه‌، به‌دڵنیاییه‌وه‌ ئه‌مه‌ قه‌ده‌غه‌ ده‌بێت، چونکه‌ بینیمان ئیسلامییه‌کانی کوردستان چ فه‌وزایه‌کیان دروست کرد کاتێک دوو هاوسه‌ر له‌ سلێمانی ماچی یه‌کتریان کرد، بۆیه‌ من باسی وه‌زاره‌تی ئه‌وقاف و گه‌شت و گوزارم کرد، چونکه‌ وه‌زاره‌ته‌ سیادییه‌کان بۆ سێ حیزبه‌که‌ی تر ده‌رۆن، که‌واته‌ هه‌ر له‌سه‌ره‌تاوه‌ من زۆر گه‌شبین نیم به‌و کابینه‌ بنکه‌ فراوانه‌، چونکه‌ ئه‌وکات رۆڵه‌کان و به‌رپرسیاره‌تییه‌کان بزر ده‌بن و که‌س هه‌ڵه‌ی که‌س ناخاته‌ ملی خۆیه‌وه‌، بگره‌ ئیش له‌سه‌ر شکست پێ هێنمانی پرۆژه‌کانی یه‌کتریش ده‌که‌ن بۆ ئه‌وه‌ی به‌ هاونیشتمان بڵێن ئها ئه‌وه‌ فلانه‌ حیزبه‌ ناتوانێت ئه‌دای وه‌زاره‌ته‌که‌ی بکات بۆ خزمه‌ت کردنی هاونیشتمانی!

ئه‌وه‌ی من له‌و کابینه‌یه‌ بیخوێنمه‌وه‌ ده‌رئه‌نجامی ئه‌وه‌ ده‌بێت ئیسلامیه‌کان به‌هێزترده‌بن و به‌وپێیه‌ی داهاتی زه‌به‌لاحیان ده‌که‌وێته‌ ده‌ست و به‌مه‌ش ئیش له‌سه‌ر به‌ ئیسلامیزه‌کردنی کۆمه‌ڵگه‌ ده‌که‌ن و ته‌نگ به‌ ئازادی و مافی خه‌ڵکی تر و دیموکراسی هه‌ڵده‌چنن، هاونیشتمانی زیانی به‌رده‌که‌وێت به‌وپێیه‌ی شوێنێک لایه‌نێکی سیاسی به‌هێز شک نابات ده‌نگی به‌رز بکاته‌وه‌، هاوکات ململانێ حیزبییه‌کان ده‌چنه‌ ناو حکومه‌ته‌وه‌و هه‌ر حیزبه‌و هه‌وڵ ده‌دات به‌ خێرایی پێگه‌ی خۆی و کادیره‌کانی له‌ ناو حکومه‌تدا به‌هێزتر بکات و زۆر که‌سیش به‌بێ هۆ له‌ پۆسته‌کانیان دوور ده‌خرێنه‌وه‌ له‌به‌ر ئه‌وه‌ی سه‌ر به‌ حیزبی ئه‌و نییه‌و له‌سه‌رووی هه‌موویانه‌وه‌ش خاڵه‌ هه‌ره‌ دره‌وشاوه‌که‌ی دیموکراسی که‌ ئۆپۆزسیۆنه‌ بوونی نامێنێت و به‌مه‌ش دیموکراسی باجی گه‌وره‌ ده‌دات.

ماڵپه‌ڕی شاخه‌وان برایم عه‌بدوڵا