په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٢٦\٧\٢٠١٨

کاك ئارام سدیق وا نابێ!

 

خدر حسێن

- ١ -


کاك ئارام سدیق کە زیاتر بە ڕانانی پەرتووکی رۆمان لە رۆژنامەی هەولێردا ناسراوە، لێگا لێگا بە پێخاوس وەناو بەرهەمەکان دەکەوێت و سەرو کلکی زۆر شیعر و چیرۆکیشی هەڵپاچیوەو دەیهەوێت بڵێت (ئەنجا لە تەیر دەچن!).


میللەتی کورد هێند کەسی تێگەشتووی تێدایە بەکاك ئارام بڵێ تکایە بوەستەو کەمێك بیر لە نووسینەکانت بکەوە، بەس مەگەر نووسەری زۆر بە توانا و مەوسوعی بتوانێت لە یەك کاتدا رەخنەی ئەکادیمی لە رۆمان و چیرۆك و شیعر بگرێت- چونکە سێ دنیای جودان، پاشتریش زۆر نەنگییە سەرپێی خۆدان لە دەقی قوڵ و بشڵێت ئاگاداری وردو درشتی شیعری دوای ڕاپەڕینم، وەکو قەشەکانی سەدە تاریکەکانی رۆژئاوا کلیلی مەزنی بە هەندێك شاعیر و شیعر بدات و هەندێکیش بە رەو دۆزەخی نەفرین بەڕێبکات و لە دیدی کاڵوکرچی خۆیەوە بە (توڕەهات!) ناویان بێنێت.


ئەو ئێستا دەیهەوێت پەرتووکێکی نەبەکامی تر بخاتە سەر خەرمانەی ڕاو بۆچوونە ناشیعرییەکانی و دنیایەك هەڵەو حوکمی نابەجێ بەسەر کاری وێژەیی هەندێك نووسەرو شاعیردا بدات، پەرتووکەکەشی نەك ناوی رەخنەیە بەڵکو رەتکردنەوە واتە رەفزکردن.


پێویستە سەرەتا بزانین وتەو بنەماکانی کاری رەخنەیی و تێگەشتنی کاک ئارام بۆ شیعر چییە؟ ئەی بۆچی وەکو کاری رۆژنامەگەریی بە شێوەیەکی سەرپێی خۆی دەدات لە دنیای ئاڵۆزو پڕ بایەخی رەخنە؟


فەلسەفەی کاک ئارام ئەم وتەیەی (حەمەی مەلا)یە کە لە ژمارە ٤ی شیعردا نووسیویەتی و کاک ئارام لە چەند جێیەکدا ئاماژەی پێداوە:


((ئەرکی شیعری ڕاستەقینە سەرەتا خۆڕزگارکردنێتی لەو پاسیڤیزمەی وەک تانە دێت بەسەر بیناییدا و دواجار ئیشکردنێتی بە ئاڕاستەی ڕزگارکردنی سوبێکێت لە ئالودەبوونی بەو پاسیڤیزم و سستییەی ئەمڕۆ کۆی ڕەهەندەکانی ژیانی تەنیوەتەوە)).


((شاعیرە ڕاستگۆو خاوەن بەهرەکان ئەوانەن کە ڕیتم و ئیقاعی شیعرییان زایەڵەی لەرزەی عەرشی ئیمپڕاتۆرەکانە)).


هەر لە سۆنگەی ئەم وتەوەیە کاک ئارام دەربارەی پەرتووکە نوێکەی دەنووسێت:


((ئەم پڕۆژە ڕەخنەییەم هەوڵێکە بۆ ڕەتکردنەوەی جۆرێک لە تێکست کە مرۆڤی پاسیڤ و ئینسانی بوودەڵە دروست دەکەن و نەک مرۆڤێک کە خاوەنی بڕوا و متمانە و ئیرادەیەکی بەهێز بێت)).


پێویستە لێرەدا بە کاک ئارام و حەمەی مەلا بڵێین ئەو تێڕوانینە بۆ شیعر دەگەڕێتەوە بۆ قۆناغی (ڕیالیزمی شۆڕشگێڕانە) کە ئایدۆلۆژیاو شۆڕشیان دەدایە پاڵ شیعر و دەبوو رۆڵی هەبووایە وەکو چەکێکی گۆڕانکاری ڕادیکال و حیزبیی، بەڵام شیعر کە گیانی هەموو سەردەمەکانی مرۆڤ و هەموو بوارە جیاوازەکانی دنیای فیزیك و میتافیزیکە زۆر لەو پێناسە سەقەتە فراوانترە کە شیعر وەك هۆکارێکی (بژی و بڕوخێ) بەکاربهێنرێت و تەماشا بکرێت، تەنانەت زۆر لە رەخنەنووسان و شاعیرانی جیهانی رۆڵ لە شیعر دادەماڵن، بگرە ئەوانەی کاک ئارام بە شیعریان دەزانێت بەس شیعری چەپڵە و قەرەباڵغیین. پاشان کاک ئارام و کاک حەمە زۆر واقیعیتر دەبوون گەر لەسەر شاخی ئەو یۆتۆپیا هەڵخەڵەتێنە بهاتنایەتە خوارەوەو بیانزانیایە تیشکخستنە سەر پاسیفیزم کە بە داخەوە لە %٨٠ی تاکی کورد ئاوهایە، بەرجەستەکردنی لە وێنەیەکی شیعریی نایابدا داهێنانە، یان ئاماژەپیدانێکی هونەری ئەو حەقیقەتە رەنگە گۆڕانکاری بەرپا بکات، جا لەم رووەوە نموونە زۆر هەن: بۆ نموونە ئەوانەی کە بێ بەرهەمن و بە پاسیفزمی لەسەر سۆشیال دەژین لە وڵاتان ، یان ئەو هەموو پاسیفیزمە موچەخۆرەی بن دیوارو کارمەندی بێ بەهرەو بێ ئیش و تا سەدان نموونەی تر.


من بوومایە لە جیاتی کاک ئارام دوو ساڵ هیچم نەدەنووسی و هەوڵمدەدا دیراسەی ئەوە بکەم ئایا رەهەندو کرۆکی شیعری باش چییە، چی گوتراوە لەمبارەوە؟ بەڵگە زانستییەکان چین بۆ سەلماندن؟ بە زمانی جیاو لە سەرچاوەی جیاوە زۆر تێشووم کۆ دەکردەوە تا خۆم پڕ چەك بکردایە بە باکراوندێکی مەعریفی و ڕاکانم بە بەڵگە پشت ڕاست بکردایەتەوە، ئەوسا خوێندنەوەکانیشی پڕ بەهای ڕاماناوی دەبوون.


بەڵکو شیعری باش زۆر بە پێچەوانەی ڕای کاک ئارام و کاک حەمەوەیە، هەمیشە ئەو شیعرانە دەمێننەوە لە دەرەوەی شوێنکاتەوەن، بەو مانایەی سنووری شوێنکات کەلەپچەی دنیای شیعرەکان ناکات، تا هەر بە تازەیی بمێننەوەو ببینرێن، یەکێکیش لەو کۆتانە کە شیعر دەمرێنێت سیاسەتە، لە کاتێکدا شیعر زوبانی ژیانە بە هەموو پێچو پەناکانیەوە، هی هەموو سەردەمەکان و هەموو مرۆڤەکان.


لەسەرێکیشەوە گلەییش لە کاک ئارام ناکەم، چونکە لە حاڵێکدا گەر لای مرۆڤەکان نووسین وەك بژێوی ژیان بەکاربهێنرێت، هەوڵدەدرێت نووسین هروژێنەر بێت و شتی زەق و سەرپێی دەرببڕێت.


لە جێیەکدا کاك ئارام دەفەرمێت:


((نووسەریی پیشەیەکە مرۆڤ ئازادانە هەڵی دەبژێرێت)) جێی خۆیەتی لە کاک ئارام بپرسین ئایا نووسین بۆ کەسی داهێنەر پیشەیە؟ ئایا دەتوانێت لەسەری بژی؟ تا چەند ئەمە هاندەرە بۆ داهێنان؟


لە کۆتاییدا وەك خاڵێکی گشتی بۆ هەمووان ئەو یادە دەهروژێنم؛ یەکێك لە نیشانەکانی نێرگزییەتی مرۆڤ حەزکردنە بە بینینی وێنەکانی خۆی بە جۆرەها شێوەو لە زۆربەی شوێنە جیاجیاکاندا، ئەمە رەنگە سەربکێشێت بۆ خودپەرستی ، لە بیرمە لە چاوپێکەوتنێکدا لە رۆڵان بارت دەپرسن تۆ بۆچی لە مێژە وێنەی تازەی خۆت بڵاوناکەیتەوە؟ ئەویش لەوەڵامدا دەڵێت سەردەمێکی زوو لەمەوپێش وێنەی خۆم بڵاوکردەوە ئیتر هەر ئەوە بەسەو من ئەو قۆناغەم تێپەڕاندووە.


ڕێزو حورمەتی زۆرم بۆ کاکە ئارام سدیق و هیوادارم ئەم بیروبۆچوونانە بە سنگێکی فراوانە تاوتوێ بکات و لەسەریان بوەستێت، دەستخۆشی بوێریی دەکەم. با هیچ لێکدانەوەیەکی هەڵەی بۆ نەکات چونکە من لە دەڤەری پشدەر دەژیم و هەرگیز کاك ئارامم نەبینیوە.


خۆزیا کاک ئارام و کاک حەمەی مەلا وەڵامی ئەم خالانەیان دەداینەوەو گوتوبێژەکەیان زیاتر دەوڵەمەند دەکرد بە را و بۆچوونەکانیان.
 


- ٢ -

 


ئەم نووسینە درێژکراوەی بەشی یەکەمە کە تیایدا باسمان لەو وتەیەی کاک ئارام سدیق کرد کە رەفزی هەموو دەقێك دەکات بە پاسیڤ لە قەڵەمیان بدات، منیش لێرەدا چەند نموونەیەك لە شیعری شاعیرانی جیهانی دەهێنمەوە کە بە پێی پۆلێنکردنەکانی کاک ئارام پاسیڤن و نابێت خوێنەر بیانخوێنێتەوە.


ئەگەر چاوێك بخشێنین بە شاکارە جیهانییەکاندا دەبینین زۆربەی هەرە زۆری شیعرەکان لە جوغزی موعانەتەکانی مرۆڤ و گیانی ئەشکەنجەدراو و ویژدانی زیندووەوە دەخولێنەوەو هەڵدەقوڵێن، ئەمەش لەبەر هیچ هۆیەك نییە جگە لەوەی شیعر زمانی ئەو گیانە راستگۆیەیە لە دەرەوەی زمانی ئاسایی کە حاڵەتگەلێکی مرۆییمان بە شێوەیەکی هونەریی بۆ وێنا دەکات.


دەبوو کاك ئارام زوو لەوە بگەشتایە کە شیعر چییە؟ مەگەر نەنگی و شورەیی نییە رەخنەگر رووبەرووی ئەم راستکردنەوە سەرەتاییانە بێتەوە؟ ئەگەر ئەو وای ببینێت دەبێ شیعر ئەکتیڤ بێت نەك پاسیڤ ئەوا سەرەتا تەنگ بە ئازادی شاعیران هەڵدەچنێت و خۆی بە مامۆستاو ڕێنموونیکاریان دەزانێت ، پاشان ئەو ڕاستیەشی لە بیر دەچێت ئێمەی میللەتی کورد ئێستاش هێلکە لە توکیاوە هاوردە دەکەین و دەرزی و دەزووش لە چین و زەرفی عەلاگەو سفرەش لە ئێرانەوە.


ئێستا با بە خێرایی چەند نموونەیەك لە شیعری شاعیران بهێنینەوەو بزانین بۆچی بە پێی پێوەرەکانی کاک ئارام سدیق هەموویان بوودەڵەن؟


١- شاعیری کورد قانع لە سەرەتا شیعری دیوانەکەیدا دەڵێت:
دەستەکانم هەر بە ئــــــــاهو ناڵەوە ئەمدان لە یەك
گەهـ لە تەپڵی سەرمەدان و گاهێ سینەی پڕ جەخار


٢- ئەگەر لای کاک ئارام، بەختیار عەلی شاعیری دڵخوازی ئەو بێت ئەوا با گوێ لەم کۆپلەیە بگرێت لە شیعری (ئومیدو پیاوکوژان)دا و بزانین سەبارەتی چی دەڵێت:
چ ساردە ئەم بیرکردنەوەیە لە تۆ
کە من لە دوا دەرگای پوچیی هاتمە دەرێ و جگە لە سێوێکی تاڵ،
هیچی ترم بە ستوونی ئەو درەختە رەشانەوە نەدی


٣- ژنە شاعیری بەناوبانگی ئێرانی فروخ فروخزاد (١٩٣٤-١٩٦٧) لە شیعری (رمیدە) دەڵێت:
خودایە
نازانم چم دەوێ
نازانم چاوم لە چ دەگەڕێ
و بۆچ ئەم دڵە خەمبار بوو
دەمەوێ دوور بکەمەوەو لە وانەی دەیانناسم
تا گوێ لە ناڵەی ئەم دڵە نەخۆشە بگرم
کاتێ گوێیان لە شیعرەکانم گرت
گوڵبارانیان کردنم
کە رۆیشتم
بە شێت تاوانباریان کردم


٤- لە ئەدەبی کلاسیکی عەرەبیشدا دەتوانین نموونەی شاعیری ناودار (ئەبولعەتاهییە) و شیعرە بەناوبانگەکەی بهێنینەوە بە ناونیشانی (بە فرمێسکی چاو بۆ لاویی گریام) کە هەمووی ئاخو ئۆفەو تیایدا دەڵێت:
بكيت على الشباب بدمع عيني فلم يغن البكاء ولا النــــحيب
فيا أسفا أسفت على شباب نعاه الشيب والرأس الخضيب
عريت من الشباب وكنت غضا كما يعرى من الورق القضيب
فيا ليت الشباب يعود يوما فأخبره بما فعل المشـــــــيب


٥- یان نموونەی شیعری شاعیری هاوچەرخی عەرەب (حسن المرواني) کە کازم ساهیریش شیعرەکەی کردووە بە گۆرانی و تیایدا دەڵێت:
لە میحرابی چاوانتا مرد لاڵانەوەکانم
و تەسلیمی بێهیوایی بوو ئاڵاکانم


٦- هەرچی (موتەنەبیی)یە لە شیعرێکدا باسی کورهاندنی ژیان دەکات و هۆکارەکەشی دەردەبڕێت؛ کە هەمیشە تینووی کردووەو لە بری ئاو موسیبەتی بۆ باراندووە:
أظمتني الدنيا, فلما جئتها مستسقيا مطرت علي مصائبا


٧- هەرچی شاعیری ناوداری فەرەنسییە (پۆل ڤالیرین) بە دڵشکاوییەوە لە زیندان ئەم شیعرە جوانە دەنووسێت و تەنانەت پاش چەندان ساڵ چاوی بە دنیای بڵاوکردنەوە هەڵهێنا:
فرمێسك لە دڵم دەچۆڕێ
وەك چۆن باران دەڕژێ بەسەر شاردا
چەند خۆشە دەنگی باران
لەسەر دڵێك بێهیوایی دایگرتبێ
هەمیشە فرمێسکی بێ هۆ دەچۆڕێ


٨- هەروەها شاعیری ناوداری فەرەنسی سەدەی نۆزدە (رامبۆ) لە شیعری (دوای تۆفان)دا دەڵێت:
دوای ئەوەی نیشتەوە بێتاقەتی باڵی کێشا
بەردە بەنرخەکان شاردراوەن و گوڵەکان کراوە
لەوکاتەوەی نیشتەوە بێتاقەتی باڵی کێشاوە


٩- هەروەها شەکسپیری شاعیری ناوداری ئینگلیز کاتێك لە تراژیدیای هاملێتدا خۆشەویستەکەی هاملێت کە(ئۆفیلیا) بوو بە خنکان لە رووباردا کۆتایی بە ژیانی خۆی دێنێت، ئاوها (رامبۆ) کاریگەر دەبیت بە ئەم دیمەنە تراژیدیایەو دەیکاتە شیعرو سەرچاوەی ئیلهامی و دەڵێت:
هەزار ساڵە ئۆفیلیا خەمبارە
خێوێکی سپییە لەسەر رووبارێکی رەشی درێژ
هەزار ساڵە شێتییە سازگارەکەی
دەچرپێنێ گۆرانییەکەی بۆ شنەی ئێواران


١٠- دووبارە (رامبۆ) لە شیعری (برسێتی) دا ئاوها ژیانی کولەمەرگی دەهۆنێتەوەو ئەوپەڕی لانەوازەیی تیا رەنگدەداتەوە دەڵێت:
گەر ئیشتیهام هەبێ ئەوا نیمە.
بۆ جگە لە خۆڵ و بەرد.
هەمیشە لە هەوا دەخۆم،
و لە تاوێرو ئاسن و خەڵوز.


١١- جارێکی تر نموونەی (رامبۆ) لە شیعری (خۆرو لاشە)دا دەهێنینەوە و بۆیە جەختی لەسەر دەکەینەوە دەڵێین رەنگە ئاگاداری شیعرەکانی بن، وا وێنەی رامبۆیان خستووەتە سەر گۆڤاری شیعری ئاستلاواز:
ئای چ بێنەواییەکە! ئێستا دەڵێ "شتەکان دەزانم"
دەشڕوات بە چاو قوچاوی و گوێ داخراوی.... تا ئەو شوێنەی دەڵێت:
ئاخ ئەگەر جارێکی تر کات بگەڕێتەوە! ئەو کاتانەی بوونیان هەبوو
مرۆڤ کۆتایی هاتووە، مرۆڤ هەموو رۆڵەکانی بینی


١٢- هەرچی شاعیری بەناوبانگی شیللییە (پابلۆ نیرۆدا) لە دیوانی (بیست خۆشەویستی و گۆرانی بێنەوا)دا و لە شیعری (لەشی ژن) دا ئەو لەشی ژن دەکاتە سیمبوڵێك بۆ جیهان کە چۆن مرۆڤایەتی لە زەلیلی و ئازاردا دەتلێتەوەو تیایدا دەڵێت:
ئەی عەشقم، ئەی حەزە بێکۆتاییەکان، ئەی ڕێگا سەختەکەم
ڕێگا تاریەکانی ئاو ، تینویەتی هەمیشەیی بەردەوام دەبێ
چەرمەسەریی بەردەوام ئەبێ، ئازاریش بێکۆتا


وا بزانم لە زۆربەی شیعری شاعیراندا لەگەڵ ئەم هەناسە خەمگینانەدا بەرکەوتنمان دەبێت و ئەمەش نەنگی نییە، بەڵکو هەوێنی شیعری سەرکەوتووە ... جا کەسێك زۆر کەم شارەزای دنیای شیعری شاعیران بێت ئەم راستییە دەزانێت.


لە کۆتاییدا لە کاک ئارام دەپرسین دەکرێت هەموو ئەو شاعیرو شیعرانە رەفز بکەینەوە بە پاسیڤ لە قەڵەمیان بدەین؟!


من بەش بە حاڵی خۆم گەشتمە قەناعەتێك نووسین و بابەتەکانی ئەو بەڕێزە بایکۆت دەکەم، چونکە هیچ بەهای زانستییان نییەو ئەوەش بیانخوێنێتەوە بە لاڕێدا دەچێت و بە هەڵە شتەکان فێر دەبێت، ئەمەش نەهامەتییەکی بەشێك لە قەڵەم بەدەستەکانی بەرهەمی ٢٧ ساڵی رابردووی ژیانی کۆمەڵهایەکی بێ سەروبەرەی پڕ فەوزایە، هەروەها ئەو میدیایانەش بابەتی کاڵوکرچی وا بڵاو دەکەنەوەو ئەو کەناڵانەش چاوپێکەوتنی ئەو جۆرە تێگەشتنە ناتەواوانە پەخش دەکەن بە دڵنیاییەوە لە بەهای کاری میدیاییان دادەبەزێت.
 

 

 

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک