١٠\٦\٢٠١٣

کازیوە ساڵح لە شەش مانگی رابردوودا سێ پەرتووکی بە چاپ گەیشتن.

• لە هەموو شوێنێک ئاسمان شینە.

''لە هەموو شوێنێک ئاسمان شینە'' کۆمەڵێک دیدار لە لایەن کۆمەڵێ ڕۆژنامەنووسی جیاوازەوە لە گەڵ نووسەر سازدراوە ، لە دوو تۆی ٢٨٠ لاپەرەدا دەزگای سەردەم چاپی کردوە.

• خطیبی الطینی.

''خطیبی الطینی'' کۆمەڵە چیرۆکێک بە زمانی عەرەبی دەزگای چاپ و پەخشی ' الجمل' لە بەیروت/ لوبنان بە چاپی گەیاندوە ، قەوارەی ئەم پەرتووکە ١٨٠ لاپەڕەیە، ئەم چیرۆکانە لە لایەن جمعە جبارییەوە وەرگێرادراوەتە سەر زمانی عەرەبی.

• دەزگیرانە قوڕینەکەم:

''دەزگیرانە قوڕینەکەم'' کە پێک هاتووە لە ٢٨ کورتە چیرۆک ، لە دوو توێ پەرتووکێکی ٢٠٨ لاپەڕەیدا بە چاپ گەشت. دەزگای ئاراس بە چاپی گەیاندوە ، لە پێشانگای پەرتووک لە هۆڵی میدیا لە هەولێر و پەرتووکخانەی ئەندێشە سلێمانی دەست دەکەوێت. چیڕۆکەکانی ناو ئەم پەرتووکە ژمارەیەکی بڵاو کراونەتەوە و ژمارەیەکیشی لە هیچ شوێنێک پێشتر بڵاو نەکراونەتەوە.

ئەم زانیاریانە سەبارەت بە نووسەر لە دوا لاپەڕەی پەرتووکەکاندا بڵاوکراونەتەوە.

پەرتووکە چاپکراوەکانی نووسەر:

١- لە هەموو شوێنێک ئاسمان شینە ، کۆمەڵێک دیدار ، دەزگای ئاراس ، هەولێر ، ٢٠١٣.
٢- ' خطیبی الطینی" کۆمەڵە چیرۆک ، دەزگی چاپ و پەخشی ' الجمل' ٢٠١٣ بەیروت - لوبنان.
٣- دەزگیرانە قوڕینەکەم ، کۆمەڵە چیرۆک ، دەزگای وەشاندنی ئاراس ، ٢٠١٢.
٤- نامەکان بەر لە مردن ناخوێندرێنەوە ، کۆمەڵە چیرۆک، دەزگای وەشاندنی ئاراس ، ٢٠٠٤.
٥- حیکمەتەکانی بە قەرەج بوونم ، کۆمەڵە چیرۆک، دەزگای زاموا چاپی یەکەم و گۆڤاری نڤار چاپی دووەمی بڵاو کردوەتەوە، ١٩٩٨.
٦- فێمنستناسی و جڤاکی کوردی ، لێکۆڵینەوە ، دەزگای وەشاندنی ئاراس، ٢٠٠٥ .
٧- ژنی کورد لە دەروازەی هەزارەی سێهەم و سەردەمی بە جیهانی بووندا ، کۆمەڵە وتار ، دەزگای وەشاندنی سەردەم ،٢٠٠٢.
٨- دوو هاوڕێ و جادووگەریەک ، چیرۆک بۆ مناڵان، دەزگای وەشاندنی ئاراس ، ٢٠٠٣.
٩- هاوناز و خاڵخاڵۆکە، چیرۆک بۆ مناڵان، دەزگای ئێم .ئەی. جی ، بە هەردوو زمانی ئنگلیزی و کوردی ( سۆرانی و بادینی) بڵاوکردوەتەوە بە سەر قوتابخانەکانی کوردستاندا ، ١٩٩٩.
١٠- باخچە ، ڕۆمان ،وەرگێران ، لە نووسینی 'مارگرێت دۆرا' لە بڵاوکراوەکانی گۆڤاری نڤارە ، ٢٠٠٠.
١١- پرۆژەیەک بۆ تێکشکاننی بێ دەنگی لە سەر پرسی ئەنفال ، ڕاو و بۆچوونەکانی نووسەرە سەبارەت بە کۆکوژی کورد ' ئەنفال ' ئەم دواندنە لە لایەن ڕۆژنامەنووس تەها سلێمانەوە ئەنجام دراوە و ڕۆژنامەی ڕیگای کوردستان ئەم پەرتووکەی چاپ کردوە ، ٢٠٠٨.
١٢- بەشداریکرسنی نووسەر لە پەرتووکی" گفتووگۆ لە سەر خوانی خوێنین" دیالۆگی کۆمەڵێک نووسەرە سەبارەت بە پرسی ئەنفال و جینۆسایدی کورد ، لە سازدانی حەمە کاکە ڕەش ، لە بڵاوکراوەکانی ڕۆژنامەی هاوڵاتی ، ٢٠٠٧.

ئەزموونی ڕۆژنامەنووسی:

١- لە ساڵی ١٩٩٨ گۆڤاری " نڤار" ی دەرکرد ، گۆڤاریەکی فکری و تیوری بوو. ئەم گۆڤارە ڕووبەڕووی دوو جۆر کێشە بوویەوە : یەکێکی یاسایی لە بەر ئەوەی یەکەم ژن بوو گۆڤارێک دەربکات لە کوردستاندا، تا ئەو کاتە وەزارەتی ڕۆشنبیری یاسایی مۆڵەتدانی بە تاک و ژن نەبوو، پێێ گوترا مۆڵەت بۆ کەسی 'مادی و مەعنەوی' ئەبێت ، بۆیە ناچار بوو پیاوێک بکات بە خاوەنی ئیمتیاز . دووەم کێشەی توندڕەوەکان کە ڕووبەڕووبونەوەی فکری و دیالۆگیان پێ پەسەند نە ئەکرا... ئەم گۆڤارە لە ژێر ئەم جۆرە فشارانەدا لە ساڵی ٢٠٠٠ داخرا.
٢- ساڵی ٢٠٠٠ گۆڤاری ' نوێکار' دەرکرد وەکو سەرنووسەر و خاوەنی ئیمتیاز ، گۆڤارێکی فکری ، تیوری و ڕاڤەیی بوو ، بایەخی بە کێشەکانی کۆمەڵی مەدەنی و بە جیهانی بوون ئەدا ، بەردەوام بوو هەتا ٢٠٠١ و بە جێهشتنی کوردستان لە لایەن نووسەرەوە.
٣- ساڵی ٢٠٠٧ بەڕێوەبەری نووسینی ڕۆژنامەی ' ئەمڕۆ ' بووە.
٤- ساڵی ٢٠٠١ یەکەم ئافرەتی کورد بووە بانگههێشت کراوەو سەفەری میسری کردوە بۆ کاری ڕۆشنبیری و پاشان لوبنان .

ئەو خەڵاتانەی نووسەر وەریگرتوون:

١- خەڵاتی یەکەمی ڤێستڤاڵی ' ئامێتا ' بۆ ئەدەب و هونەر ساڵی ٢٠٠١.
٢- خەڵاتی یەکەمی ڤێستڤاڵی ' ئامێتا ' بۆ ئەدەب و هونەر ساڵی ٢٠٠٢.
٣- خەڵاتی حزبی سۆشیالستی کوردستان بۆ ' ڕۆژنامەنووسانی چالاک' ساڵی ٢٠٠٣.

نووسەر هەڵگری بڕوانامەی:

١- بەکالۆریوس لە کەمیونیکەیشن ، زانکۆی یورک، کەنەدا.
٢- دبلۆمی باڵا لە ڕۆژنامەنووسیدا، کۆلێجی شەرەدن ، کەنەدا.
٣- بڕوانامەی باڵا لە فشار و قەیرانەکانی پەناهەندە و کۆچبەر، زانکۆی یورک ، کەنەدا.

نووسەر ئێستا خوێندکاری خوێندی باڵایە ، نیشتەجێی کەنەدا و خەڵکی باشوری کوردستانە.
 

بەرایی لە هەموو شوێنێک ئاسمان شینە.

- بە پێنووسی نووسەر خۆی -
 

ئەگەر بتەوێت پەلەکەزێڕێنە ببینت پیویستە نیگات بە ئاسماندا هەڵواسیت. ئەگەر هێزێکی ناچیزە ئاسمانی شینی پەردەپۆشی ڕەش کرد لێت ، ئەوا نیشتمان بخەرە جانتای سەفەرێکەوە و بیبە بۆ بەر هەتاو و ڕۆناکی ئاسمانێکی تر ، چوون لە هەموو شوێنێک ئاسمان هەیە و لە هەموو شوێنێکیش ئاسمان هەر شینە . تەنها جیاوازیەک لە سایەی هەندێک ئاسماندا مرۆڤی تاریکی پەرست زۆرە، بەڵام تەنها ڕوناکی پەرستەکان پەلکە زێرینە ئەبینین، وە تەنها مرۆڤ گەشبینەکان ڕوو لە ئاسمان و پشت لە تاریکی هەنگاو ئەنێن. ئەم جوتەش هاوتەریب نین و نابن ، هێز و دەسەڵات چونکە عاشقی شەمەشەمە کوێرەیە ، زیاتر لە ئامێزی ئاریکی پەرستەکانەوە باڵا ئەبێ و بە خراپی بە کاردەهێنرێت . تاریکی پەرست هەمیشە ترسی ئەوەی هەیە تۆ هەموو خەڵک فێر بکەیت ببن بە هاوڕێی ئەستێرە، بۆ ئەوەی هێزی ڕوناکی شوێن بە تاریکی لێژ نەکات ، وەدەرئەنرێیت لە ژێر ئاسمانێکدا کە ئەسێرەکانی بوون بە هاوڕێت . بەمەشیان نیگەران مەبە چونکە مرۆڤی ڕوناکی پەرست وەکو باڵندە لە دووری هەزران مایلەو جوانتر ڕاڤەی تاریکی پێ ئەکرێت. ئەکرێت ببیت بە باڵندەیەکی بریندار ، بەڵام دواجار وەکو جەلالەدینی ڕۆمی ئەفەرمویت، " برین ئەو پەنجەرەیە کە ڕوناکی دەهێنێتە ناوتەوە" و نیشتمانیش کاتێک جوانترە کە تۆ بزانیت لە چ ساتێکد و لە کوێدا و بە چ میکانیزمێک پریاسکەی غەمەکانی بکەیتەوە. خوێندنەوەی ئەم دیدارانە و بەراورد بە ساتی دەربڕینیان لە ژێر دوو ئاسمانی دوو شوێنی جیاوازدا ئەو ڕاستیانەی لە سەرەوە ئاماژەم پێ کرد ئەسلمێنێت. هەندێک هاوڕێی نزیک و دڵسۆز گلەییان لێ کردم کە نەئەبوو دەرگای زۆر فکر و کاری جدی لە دیدارەکانما بکەمەوە ، کە دەبوو ببن بە پرۆژەی لێکۆڵینەوەی جدی لە داهاتوودا . بەڵام من ئەمەم بە مەبەست کردوە ، چونک لە ئەمڕۆدا ئەژیم، گەر ئەمڕۆ ئەو کاتەم بۆ نەرەخسا و گارەنتی سبەیش ناکەم ، با ئەوەی من ئەڵێم لە جەند دێڕیکدا لای کەسێکی دی ببن بە پرۆژەی جدی بە مەرجێک ئاماژە بە سەرچاوەکەی بدات. دڵتەنگم بەوەی کەسانێک هەن ' زیاتر ڕەگەزی مێن' وەڵامی پەسیارێکم و پەرەگرافی نووسینێکم ئەلکێنن بە یەکەوە بە ناوی خۆیانەوە بە سەقەتی بڵاو ئەکەنەوە، ئەمەیە تاریکستانی ڕاستەقینە. کۆکردنەوەی ئەم دیدارانە لە بەرگی پەرتووکێکدا ڕووی ڕاستەقینەی ئەم جۆرە ' گێل' ە نووسەرە ئاسانترهەڵئەماڵێت، هەتا ئەو کاتەی خۆم هەلم بۆ ئەرەخسێ و ڕیسی چەند ساڵەیان لێ ئەکەمەوە بە خۆری. خوازیارم هێزێک و یاسایەک لە کوردستاندا دروست ببێت بۆ پاراستنی موڵکی فکری نووسەر و دژی ئەم جۆرە تریسکتانە بوەستن.

ئەوەی دەخوێننەوە سەرجەم دیدارەکان نین ، لە قەیرانی ئەرشیفکردن و ئنتەرنێت لە دنیای کوردیدا هەر ئەوەندەم پێ کۆکرایەوە. خوازیارم لە داهاتوودا ئەو ڕۆژنامەنووسانەی دیداریان لە گەڵ ئەنجام داوم خۆیان بە فایل بۆم ڕەوانە بکەن ، بۆ ئەوەی لە دووەم چاپکردندا سەرباری ئەمانەی ئێستا بکرێن . جگە لەمەش بە هۆی نەبوونی کاتەوە بۆ پێداچوونەوە ، ئەکرێت کەم و کوڕی تێ بکەوێت ، داوای بەخشین لە خوێنەرانی میهرەبان ئەکەم ، با وا بخوازین کە سبەی لە ئەمڕۆ باشتر ئەبێت و بەرگی دووەم بێ کەم و کوڕی و جێگەی هەموو دیدارە ونبووکانی ئێستا ئەبێت.

ماڵپه‌ڕی کازیوه‌ ساڵح