|
|
|
١\٤\٢٠١٧ کەرکوک پێویستی بە ریفراندۆمە نەک شەڕە ئاڵا.
بەڵام یەکێتی و پارتی لە ١٤ ساڵی ڕابردودا نەک هیچ بەرنامەیەکی جدیان بۆ بەرپاکردنی ئەم ڕیفراندۆمە نەکردوە کە حکومەتی عێراقی ڕێگری لێکردوە و پێش دەستور و دوای دەستوری عێراق. بەتایبەت لە ٢٠١٤ەوە کە دەسەڵاتی ئەو شارە ڕاستەوخۆ بەدەست یەکێتی وپارتیە بیانوی ئەو ڕێگریانەش نەماوە کە ڕیفراندۆمێکی ئازاد بەرپابکەن.
ئێستا لە جیاتی ڕیفراندۆم نوێنەرانی ئەم حیزبانە دەیانەوێ بێ گوێدان بە ڕای خەڵکی کەرکوک بە کورد و تورکمان و عەرەبەوە لە ڕێگەی شەڕی ئاڵاوە دۆخێکی نائارام و ترس و دڵە ڕاوکێ لەنێو خەڵکی ئەم شارەدا دروست بکەن. خەڵکی عەرەب و تورکمانی کەرکوک ئەم هەنگاوە بۆ سەپاندنی ڕەمزی حکومەتی هەرێم بەسەر کەرکوکدا بە ئیفتیزازێک دەزانن کە نیشانی دەدا حیزبە کوردیەکان هیچ حسابێک بۆ ڕێگاچارەی سیاسی بۆ یەکلاکردنەوەی چارەنوسی سیاسی کەرکوک ناکەن و لەپێناو شاردنەوەی ڕوخساری گەندەڵی و پاوانکردنی داهاتی کەرکوک ئەم هەنگاوەیان ناوە.
هەر بۆیە ئەم شێواز و ڕێگایە کێشەو ئاڵۆزی سیاسی و شەڕی قەومی بۆ خەڵکی کەرکوک دروست دەکا. ڕێگا بۆ هەڵگیرسانی شەڕێک لەگەڵ حیزبە سونی و شیعەکانی عێراق و فرسەت بە ئێران و تورکیا دەدا بۆ دەستێوەردان و بیانوگرتن و پیلانگێڕی لە هەرێمی کوردستان. هەربۆیە دەبێ ئەم هەنگاوە هەڵوەشێتەوە و لە جێگای ئەوە خەڵکی کەرکوک داوای بەرپاکردنی ڕیفراندۆم بکەن بۆ یەکلاکردنەوەی چارەنوسی کوردستان بەوەی بچێتە سەر هەرێمی کوردستان یا خود لەعێراقدا بمێنێتەوە. ڕێگرتن لەم هەنگاوە یەکلایەنانە ڕێگە بۆ ئەوە خۆش دەکا هاوڵاتیانی کەرکوک لە کەشێکی دوور لە کینەوکێشەی قەومی و بە شێوەیەکی ئازادانە بڕیاری دروست سەبارەت بە چارەنوسی شارەکەیان بدەن و ئاکامی ریفراندۆمەکە لە ئاستی شارەکە و ئاستی نێودەوڵەتیدا قبوڵ بکرێ.
|
|
|
