که‌س‌په‌رستن گەورەترین ڕێگرە لەبەردەم پێشکەوتنى کۆمەڵگا.

   
ئیسماعیل عه‌بدولڕەحمان

که‌س‌پەرستن ماناى خۆشویستنى لەڕادەبەدەرى کەسێکە لەلایه‌ن میللەتەوە، دیار و ئاشکرایە خۆشویستن بۆ هەرکەسێک ڕەوایە بەو مەرجەى ئەم کەسە شایستەى ئەو خۆشویستنە بەرزە بێت ، دیارە لە گۆمەڵگاى مرۆڤایەتى چەندین جۆر کەس هەن بەهۆى خزمەتێکەوە خۆشەویستى میللەتەکەیان بەدەست دێنن، وەک ئەوکەسانەى، دەبنە شۆڕشگێڕ، یان زاناى بوارێک، یان ، شاعیر ، گۆرانى بێژ ، هونەرمەند، مێژوونووس ، .......هتد لەو جۆرەکەسانە کەسى شۆڕشگێڕو سەرکردەى شۆڕشگێڕ لەهەموویان زیاتر خۆشەویستى میللەت بەدەست دێنن، چونکە کاریگەرى شعرو سروود و گۆرانى و میژونوسین و.....هتد ، هەمووى بەندە بە شۆڕشى ڕزگارىخوازى گەلەوە ، بۆیە بۆ میللەتیش ڕەوایە سەرکردەى شۆڕشگێڕى خۆى خۆشبوێت تاکو ئەوکاتەى گیانى شۆڕشگێڕى تیا دەمینێ نەک تاکو مردن چونکە مەرج نییە سەرکردەى شۆڕشگێڕ لەسەرەتاى شۆڕش و لەناو گەرمەى شۆڕش و لەسەرکەوتنى شۆڕشدا لەیەک ئاست بمینێ ، چونکە جارهەبووە لەدواى سەرکەوتنى شۆڕش سەرکردەى شۆڕشگێڕ نەیتوانیوە گیانى شۆڕشگێڕى خۆى بپارێزیت بۆیە دواى سەرکەوتنى شۆڕش بۆتە ناپاکى گەل و نیشتیمان و دوایش هەر ئەو گەلەى خۆشیان ویستوە هەر ئەو گەلەش تف و نەفرەتیان لێکردوە ، بۆیە زۆر گرنگە میللەت بەئاگابێت لە گوتارو کردارى سەرکردەى تابزانى ئایا سەرکردەکەى گیانى شۆڕشگێڕى تیاماوە یان نا؟

گەر سەرکردە گیانى شۆڕشگێڕى تیا نەمینێت و میللەتیش هەست نەکات و بەردەوام بێت لەگوێڕایەڵى و خۆشویستنى سەرکردە ئەوە گەورەترین کارەساتە بۆ گەڕانەوە بەرەو دواوە و خاوبونەوەى ڕیسەکەى شۆڕش ، بۆیە گرنگ و پێویستە لەسەر هەموو تاکێکى میللەت بەگشتى و خەڵکانى بەئاگاو خوێندەوارو ڕۆشنبیران بەتایبەتى هەست بەخاوبونەوەى شۆڕش بکەن و بزانن بۆ لەدواى قوربانیەکى زۆرو زەوەندا دەسکەوتەکانى شۆڕش ڕۆژ بەڕۆژ بەرەو نادیارى و نایەکسانى و ناعەدالەتى دەچێت و بۆ بۆهەندێک خەڵکى نزیک سەرکردە تەڕەى وەرزى بەهارەو بۆ هەندێکیش کە لە دوورى سەرکردەن وەرزى پایزى گەڵا ڕێزانە ، ئایا ئەوپەڕى دەبەنگى نییە هەست بەبوونى دوو وەرزى لەیەک کاتى وڵات نەکەین ، ئەى هەر قسەى دوو وەرزى پایز و بەهارى سەرکردە نییە ڕۆژێک دەڵێت بیانکوژن و دەریان کەن ئەوانە بابەلباب ناپاکى گەل و نیشتیمانن و ڕۆژێکیش ستایشی دوازدە پشتى شۆڕشگێڕیان دەکات.

ئایا کاتى ئەوە نەهاتوە بەخۆشەویستیمان بۆ سەرکردەکان دابچینەوەو بزانین ئایا سەرکردەکانمان گیانى شۆڕشگێڕیان تیاماوە یان نا؟ گەر ماوە کەى خەسڵەتى سەرکردەى شۆڕشگێڕە ناعەدالەتى و گەندەڵى و جیاکارى قه‌بوڵ بکات؟ گەر سەرکردەش ئەم خەسڵەتەى تیابێت لەناو زه‌لکاوى خیانەت و ناعەدالەتى وڵاتدا بێباکانە پاڵداتەوە و بەتەنگ مەینەتیەکانى گەلەوە نەبێت ، ئەى پێویست نییە میللەتیش بەئاگابێتەوە و بزانێت ئەم خۆشەویستیەى بۆ سەرکردەکەى هەیەتى ئێستا کاتى بەسەرچووە ، بۆیە پێویستە گەل بزانێت خۆشەویستنی سەرکردە لەگەڵ گیانى شۆڕشگێڕیەکەیەتى نەک لەگەڵ لاشە و ڕوخسارى میکیاجکراو و دەنگى دوو وەرزى سەرکردە ، چونکە مەینەتیەکانى میللەت بەو جۆرە سەرکردانەوە بەندە .

ary_esmail@yahoo.com