په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

١٥\١\٢٠١٢

کچان و ژنان له‌ په‌ندی پێشینانی گه‌لاندا.


ره‌زا ساڵح      


له‌ به‌شی یه‌که‌می په‌نده‌کاندا، له‌ ژێر ناوی (کچان و ژنان له‌ په‌ندی پێشینانی کوردیدا) گوڵبژێرێکی کۆمه‌ڵێک په‌ندی پێشینانی کوردیمان بۆ کردبوون که‌ ده‌رباره‌ی کچان و ژنان وتراون..له‌ هه‌فته‌ی رابردوو له‌ چه‌ند سایتێکی کوردیدا بڵاومان کردوونه‌ته‌وه‌ه‌..له‌ دوای بڵاوکردنه‌وه‌یان.. ئه‌وسا به‌ بیرم هاته‌وه‌، که‌ سێ ساڵ به‌ر له‌ ئێستا، له‌ یه‌کێک له‌ که‌ناڵه‌ ئاسمانییه‌ کوردییه‌کاندا ، دیمانه‌یه‌ک له‌گه‌ڵ نووسه‌ر و که‌له‌پوورناسی گه‌له‌که‌مان ، کاک (هه‌رده‌وێڵ کاکه‌یی)دا کرا، که‌ کتێبێکی چاپکراوی تازه‌ی خۆی پێشاندا به‌ ناونیشانی ( په‌ندی پێشینانی کوردی له‌ ناوچه‌ی که‌رکوک ) دا..وه‌ک خۆی وتی له‌سه‌ر زاری خه‌ڵکی ناوچه‌ی که‌رکوکه‌وه‌ وه‌ری گرتوون..ده‌بوایه‌ ناوی کاک هه‌رده‌وێڵ و ناوی کتێبه‌که‌یشمان بخستایه‌ته‌ ریزبه‌ندی ناوی ئه‌و کتێب و نووسه‌رانه‌ی که‌ له‌ به‌شی یه‌که‌مدا ناوم هێناون. به‌ داخه‌وه‌ له‌ بیرم چووبوو.. داوای لێبووردنیش له‌ کاک هه‌رده‌وێڵ کاکه‌یی ده‌که‌ین.. له‌ راستیشدا له‌ کتێبخانه‌کانی کوردستاندا زۆر بۆ ئه‌م کتێبه‌ گه‌ڕام ، به‌ڵام ده‌ستم نه‌که‌وت.. به‌ په‌رۆشه‌وه‌م‌ که‌ بزانم ئه‌و په‌نده‌ کوردیه‌ تایبه‌تمه‌ندییانه‌ی ناوچه‌ی که‌رکوک کامانه‌ن.

به‌شی دووه‌می په‌نده‌کان ، له‌ ژێر ناوی (کچان و ژنان له‌ په‌ندی پێشینانی گه‌لاندا)یه‌.


گوڵبژێرێکه‌ له‌ په‌ندی گه‌لان که‌ ده‌ره‌باره‌ی کچان و ژنان وتراون .. به‌ به‌راورد له‌گه‌ڵ په‌ندی پێشینانی گه‌لاندا ، ده‌توانن ئه‌وه‌ بزانن که‌ ئه‌و په‌نده‌ کوردییانه‌ی بۆ هه‌مان مه‌به‌ست وتراون ، له‌ چ ئاستێکدان و تا چ راده‌یه‌ک له‌یه‌ک ده‌چن یا له‌یه‌که‌وه‌ نزیکن.. به‌ لاشتانه‌وه‌ سه‌یر نه‌بێت ، که‌ کۆمه‌ڵێک په‌ندی پێشینانی کوردی له‌ په‌ندی پێشینانی گه‌لانی تریشدا، به‌ هه‌مان ناوه‌ڕۆک و فۆرم ، یا به‌ جیاوازیه‌کی که‌مه‌وه‌ هه‌یه‌.. وه‌کو له‌ به‌شی یه‌که‌مدا باسمان کرد ، کۆمه‌ڵێک په‌ند هه‌یه‌ ده‌توانین ناویان لێبنێن گوڵوباڵلیزم په‌ند .
چونکه‌ هه‌ر گه‌لێک خۆی به‌ خاوه‌نی ئه‌م په‌ندانه‌ ده‌زانێ.

ده‌مه‌وێ ئه‌وه‌ش بڵێم ، کۆمه‌ڵێک په‌ندی زه‌ق و ره‌ق و ناشیرین و ناشایسته‌م ده‌رباره‌ی ژنان پشتگۆی خست، که‌ زۆر نابه‌جێ و ناڕه‌وان..ته‌نها گوزارشت له‌ لێڕوانینی په‌ندبێژ ده‌که‌ن ، نه‌ من و نه‌ ئێوه‌ش له‌گه‌ڵ ئه‌و بۆچوونانه‌دا نین .. ئافره‌تان گه‌لێ له‌وه‌ مه‌زنتر و رێزدارترن که‌ به‌ کۆمه‌ڵێک په‌ندی ناشیرینی له‌و شێوانه‌ ، ناشیرین ببن .. ئافره‌ت و پیاو ته‌واوکه‌ری یه‌کترین.. پیاو ، چی بێ و ، چی بڵێ ، هه‌ر له‌ ئافره‌ت له‌ دایک بووه‌.. نکووڵی له‌وه‌ش ناکه‌ین ، که‌ له‌م سه‌ره‌مه‌شدا، ژنی خراپ و پیاوی خراپیش هه‌ن.

به‌شی دووه‌م ــــ ( کچان و ژنان له‌ په‌ندی پێشینانی گه‌لاندا )

(*) میوه‌ له‌ داری باش و، کچ له‌ دایکی باش هه‌ڵبژێره‌ .
چینی
(*) دایک ببینه‌ و دوێته‌ بخوازه‌ .
کوردی
(*) ئه‌وه‌ی به‌ ته‌مای کچه‌ بێت ، ده‌بێت قسه‌ی خۆش بۆ دایکی بکات .
نه‌رویجی
(*) بڕوانه‌ دایک ، پێش خوازبێنی کردنی کچه‌که‌ی .
ئه‌مه‌ریکی
(*) هه‌موو کچێک جوانه‌ ، ئه‌ی ئه‌و ژنه‌ خراپانه‌ له‌ کوێوه‌ دێن .
ئوسکۆتله‌ندی
(*) دایک چۆن بێت ، کچیش وا ده‌بێت .
نه‌رویجی
(*)کچ میوانی باوانه‌ .
کوردی
(*) کچ خاڵ له‌ ده‌موچاویدا نه‌بێ ، وه‌ک ئاسمانێکی بێ ئه‌ستێره‌یه‌ .
سویدی
(*) کچی جوان ، جیازه‌که‌ی ده‌موچاوێتی .
ئه‌ڵمانی
(*) چاودێری کردنی کچی گه‌نج ، ئاسان نییه‌ .
دانیمارکی
(*) کچان وه‌کو په‌روانه‌ وان ، به‌ ده‌وری رووناکیدا هه‌ڵده‌په‌ڕن .
نه‌رویجی
(*) جوانی کچ له‌ قژه‌که‌ی دایه‌ .
کوردی
(*) ئه‌گه‌ر کچێکت لێ هه‌ڵکه‌وت و، زانیت شۆربای خۆش لێده‌نێت، لێی مه‌وه‌سته‌ و خوازبێنی بکه‌ .
فه‌ره‌نسی
(*) کچێک له‌ هه‌ڕه‌تی شووکردندا شووی نه‌کردووبێ ، باڵێکی شکاوه‌ .
چینی
(*) مه‌رج نییه‌ هه‌رده‌م جوانترین کچ ، باشترین ژنی لێده‌رچێت .
سویدی
(*) کچێکی باش ، ژنێکی باشی لێده‌رده‌چێت .
نه‌رویجی
(*) بووکی جوان، به‌روبوخچه‌ی که‌متری ده‌وێ .
فینله‌ندی
(*) بووکێ نازت ، به‌قه‌ی جیازت .
کوردی
(*) هه‌مووان کچی باشیان هه‌یه‌ ، به‌ڵام که‌سیان بووکی باشیان نییه‌ .
نه‌رویجی
(*) کج قه‌ڵایه‌ ناگیرێ .
کوردی
(*) مردنی کچان ، پۆشینه‌ .
عه‌ره‌بی
(*) ئافره‌تیش ئاده‌میزاده‌ ، ته‌نها جوانتره‌ .
سویدی
(*) پیاو به‌بێ ژن ، وه‌کو ئینجانه‌یه‌ به‌بێ گوڵ .
پورتوگالی
(*) ژن کۆڵه‌گه‌ی ماڵه‌ .
کوردی
(*) ژن به‌بێ پیاو ، باخچه‌یه‌که‌ به‌بێ شووره‌ .
ئه‌ڵمانی
(*) پیاو به‌بێ ژن ، وه‌کو ماسی یه‌ به‌بێ کلک .
دانیمارکی
(*) ژنی باش ، نه‌ک هه‌ر هاوسه‌رێکی باشه‌ ، به‌ڵکو کێوێکی زێڕیشه‌ .
ئیسپانی
(*) نیشتمانی ژن ، پیاوه‌که‌یه‌تی .
رووسی
(*) ئافره‌ت ژیانێکی پێویسته‌ .
فه‌ره‌نسی
(*) ئه‌وه‌ی ژنی هه‌بێ ، گه‌وره‌یه‌کی هه‌یه‌ .
ئوسکۆتله‌ندی
(*) ژن نه‌بێت ، ماڵیش نابێت .
یۆگسلافی
(*) ژن و ماڵیان وتووه‌ .
کوردی
(*) باشترین سامانی پیاو ، ژنی باش و ته‌ندروستی یه‌ .
ئینگلیزی
(*) پیاو خانوو ده‌کات ، ژنیش هێلانه‌ .
فارسی
(*) پشیله‌ مشکی ده‌ست بکه‌وێ ده‌میاوێنێ، ژن خانووی ده‌ست بکه‌وێ هه‌ڵهه‌ڵه‌ لێده‌دا.
دانیمارکی
(*) ماڵ به‌بێ ژن ، بیری ئاوه‌ به‌بێ ده‌ولکه‌ .
ئوسکۆتله‌ندی
(*) سواڵکه‌ر به‌ ژنه‌که‌ی ناڵێ له‌ کوێ بووی ، پێی ده‌ڵێ چیت هێناوه‌ .
عه‌ره‌بی
(*) پیاو پاره‌ په‌یدا ده‌کا ، ژنیش پارێزگاری لێده‌کا .
ئیتالی
(*) ده‌وارێک به‌بێ ژن ، وه‌کو که‌مانێکه‌ به‌بێ تار .
رۆمانی
(*) ژن به‌بێ مێرد ، ئه‌سپێکه‌ به‌بێ لغاو .
یۆنانی
(*) ئافره‌ت و پیاوی ئیشکه‌ر ، سه‌وداکردنیان زه‌حمه‌ته‌ .
ژاپۆنی
(*) زێڕ به‌ ئاگر ، ژن به‌ زێڕ ، پیاویش به‌ ژن ، تاقی ده‌کرێنه‌وه‌ .
ئه‌مه‌ریکی
(*) ژن به‌ گوێگرتن و ، پیاویش به‌ سه‌یرکردن ، سه‌رسام ده‌بن .
فینله‌ندی
(*) که‌ خوا ئافره‌تی دروست کرد ، یه‌که‌مین پرۆژه‌ی خۆی پێشکه‌ش کرد .
سویدی
(*) هه‌رده‌م ژنان ، به‌ قژه‌وه‌ جوانن .
دانیمارکی
(*) ئه‌سپ له‌ ماڵه‌ ده‌وڵه‌مه‌ند بکڕه‌ ، ژنیش له‌ ماڵه‌ هه‌ژار بخوازه‌ .
ئیتالی
(*) خانمی راسته‌قینه‌ی ماڵ له‌ هه‌مان کاتدا ، کۆیله‌یه‌ و خانمیشه‌ .
بۆسنی
(*) پێڵاوی پاژنه‌به‌رز ئافره‌ت دروستی کرد ، نه‌یویست له‌ ناوچه‌وانه‌وه‌ ماچ بکرێ.
ئه‌فریقی
(*) خواردنه‌وه‌ و ژن ، پیاو له‌ڕێ ده‌رده‌که‌ن .
دانیمارکی
(*) ئافره‌ت و پاره‌ ، پیاو ون ده‌که‌ن .
فه‌ره‌نسی
(*) ئه‌وه‌ی ژنێکی باش و شۆربایه‌کی خۆشی هه‌بێ ، له‌وه‌ زیاتر چیتری ناوێ .
رووسی
(*) ئه‌گه‌ر به‌ ژن بوترێت له‌ ئاسمان شاییه، هه‌ڵده‌سێ و په‌یژه‌ی بۆ به‌رزده‌کاته‌وه ‌.‌
عه‌ره‌بی
(*) سه‌رمایه‌ی ژیان ، ژن و ددانه‌ .
کوردی
(*) مێردی باش ، ژنی باش دروست ده‌کا .
ئوسکۆتله‌ندی
(*) ئافره‌ت له‌ زمان و فرمێسکه‌کانی زیاتر ، هیچ چه‌کێکی تری نییه‌ .
ئینگلیزی
(*) ئافره‌ت که‌ نه‌توانێت تۆڵه‌ بستێنێته‌وه‌ ، ده‌ست به‌ گریان ده‌کا .
پۆڵۆنی
(*) ئافره‌ت له‌ یه‌ک کاتدا، حه‌فتاوحه‌وت زمانی هه‌یه‌ .
ئیسپانی
(*) ژنهێنان هیوای هه‌موو پیاوێکه‌ .
نه‌رویجی
(*) زوو ژنهێنان و زوو له‌ خه‌و هه‌ستان ، پیاو لێیان په‌شیمان نابێته‌وه‌ .
فینله‌ندی
(*) ژن هاوردووه‌کان خه‌میان زۆره‌ ، به‌ڵام گه‌نجان خه‌میان زیاتره‌ .
ژاپۆنی
(*) هه‌موو گه‌نجینه‌ی جیهان ، ناگاته‌ ، ئافره‌تێکی داوین پاک .
عه‌ره‌بی
(*) سێ چین نابێت تووڕه‌ بکرێن : کاربه‌ده‌ستی ده‌وڵه‌ت ، کرێکار ، بێوه‌ژن .
چینی
(*) ژن ده‌وڵه‌مه‌ندیش بێ ، پیاوی پێویسته‌ .
ئه‌لبانی
(*) هێزی ژن له‌ زماندایه‌ .
زنجی
(*) ده‌می ژن ، هه‌رگیز پشوودانی نییه‌ .
ئه‌مه‌ریکی
(*) زمانی ژن سێ گرێ یه‌ ، به‌ڵام ده‌توانێت پیاوێک بکوژێت که‌ شه‌ش پێ درێژ بێ .
ژاپۆنی
(*) دڕک تیژه‌ ، زمانی ئافره‌ت تیژتره‌ .
ئه‌ڵمانی
(*) زمانی ئافره‌ت ، چه‌قۆی دوو ده‌مه‌ .
رۆمانی
(*) ئافره‌ت قژی درێژه‌ ، به‌ڵام زمانی درێژتره‌ .
رووسی
(*) زمانی ژن خه‌نجه‌ره‌ ، هه‌رگیز ژه‌نگ ناکات .
سۆمالی
(*) وت وته‌ی ژنان ، کوژ کوژه‌ی پیاوان .
کوردی
(*) دوا ئه‌ندام که‌ له‌ پیاودا ده‌مرێ دڵێتی ، له‌ ژندا زمانێتی .
چینی
(*) ژن چوار چه‌کی هه‌یه‌ : زمان ، نینۆک ، فرمێسک ، بوورانه‌وه‌ .
ئیتالی
(*) سێ شت تیژن ، دڕک ، توتڕک ، زمانی ژنی ده‌مه‌وه‌ر .
دانیمارکی
(*) ژنان شمشێره‌کانیان له‌ ده‌میان دایه‌ .
ئه‌ڵمانی
(*) ئافره‌ت به‌ ره‌وشتی ، نه‌ک به‌ جلوبه‌رگی .
عه‌ره‌بی
(*) ئه‌وه‌ی ژنێکی پاره‌دار بخوازێ ، گوێ به‌ ته‌مه‌نی نادات .
نه‌رویجی
(*) دنیا له‌سێ شتدا کۆبۆته‌وه‌ : ئاو ، ئاگر ، ئافره‌ت . ئاو ده‌خنکێنێ ، ئاگر ده‌سووتێنێ ، ئافره‌تیش شێتت ده‌کات .
تورکی
(*) سێ شت پیاو له‌ ماڵ ده‌رده‌په‌ڕێنن ، جگه‌ره‌کێشان ، باران ، ژنی خراپ .
لاتینی
(*) که‌ چرا لاببرێت ، هه‌موو ژنان له‌یه‌ک ده‌چن .
یۆنانی
(*) له‌ رۆژی رووناکدا ، زێڕ و کووتاڵ و ژن هه‌ڵبژێره‌ .
ئیسپانی
(*) ئه‌گه‌ر رازت به‌ ژنێکی لاڵیش بسپێری ، ئاشکرای ده‌کا .
ئینگلیزی
(*) پیاو به‌بێ ژن ، وه‌کو ئه‌و پیاوه‌ وایه‌ که‌ بۆ زستان کڵاوی فه‌رووداری نه‌بێت .
رووسی
(*) پیاو به‌بێ ژن ، سه‌رگه‌ردان ده‌بێ .
کوردی
(*) پیاو که‌ ژنی نه‌هێنابێ ، گله‌یی له‌ چی کا .
دانیمارکی
(*) سێبه‌ری پیاوێک ، نه‌ک سێبه‌ری دیوارێک .
عه‌ره‌بی
(*) بۆ هه‌ر جێگایه‌ک بڕۆی ، ژن له‌گه‌ڵ خۆتدا به‌ره‌ .
ئیڕله‌ندی
(*) پیاو به‌بێ ژن ، وه‌کو خانوویه‌کی سه‌رنه‌گیراوه وایه‌ .‌
فینله‌ندی
(*) گوێگرتن له‌ گریانی ژنێکی باش ، باشتره‌ له‌ پێکه‌نینی ژنێکی خراپ .
نه‌رویجی
(*) ژن سابوونی پیاوه‌ .
فه‌ره‌نسی
(*) ژن هه‌سانی پیاوه‌ .
کوردی
(*) له‌ هه‌ڵبژاردنی ژندا پله‌یه‌ک خوارتر هه‌ڵبژێره‌ ، له‌ هاوڕێتیدا ‌پله‌یه‌ک به‌رزتر .
چینی
(*) له‌ پێش ژنهێنان چاوه‌کانت باش بکه‌ره‌وه‌ ، له‌ دوای ژنهێنان با نیوه‌ کراوه‌ بن .
ئه‌مه‌ریکی
(*) له‌ پێش ژنهێنان چاوه‌کانت بکه‌ره‌وه‌ ، له‌ دوای ژنهێنان چاوه‌کانت بنووقێنه‌ .
عه‌ره‌بی
(*) سکی دایک باخچه‌یه‌که‌ ، هه‌موو میوه‌یه‌ک ده‌گرێت .
ئوسکۆتله‌ندی
(*) پیاو به‌بێ ژن سه‌رێکی بێ له‌شه‌ ، ژنیش به‌بێ پیاو له‌شێکی بێ سه‌ره .
ئه‌ڵمانی
(*)‌ ژن به‌بێ پیاو هاره‌بێ ، پیاو بێ ژن هه‌ژاره‌ بێ .
کوردی
(*) بڕوات به‌ هه‌تاوی زستان و ، به‌ دڵی ئافره‌ت نه‌بێ .
بولگاری
(*) جوانترین چاو و درۆزنترین چاو ، چاوی ئافره‌ته‌ .
به‌رازیلی
(*) دڵی ئافره‌ت ، له‌ چاوه‌کانی ده‌ پیاو زیاتر ده‌بینێ .
سویدی
(*) ژنخوازێکی دڵ لاواز ، ژنێکی جوانی ده‌س ناکه‌وێ .
ئوسترالی
(*) ژنان و شووشه‌ ، هه‌رده‌م له‌ مه‌ترسیدان .
ئیسپانی
(*) ژنان پیاوان ده‌ناسن ، به‌ڵام ته‌نها ژنانن که‌ ژنان ده‌ناسن .
ژاپۆنی
(*) پیاو به‌ فێڵ ، ژن به‌ مه‌کر .
عه‌ره‌بی
(*) پیاوانن خانوو دروست ده‌که‌ن ، ژنانن ماڵداری ده‌که‌ن .
دانیمارکی
(*) ژن و شووتی ، به‌ ڕێکه‌وت باش ده‌رده‌چن .
تورکی
(*) مایین به‌ سواره‌که‌ی ، ژنیش به‌ مێرده‌که‌ی .
عه‌ره‌بی
(*) ژن هه‌رگیز دانی خێر به‌ ژندا نانێ .
چینی
(*) هه‌موو ژنێک ، ژن نییه‌ .
ژاپۆنی
(*) ژن هه‌یه‌ ژیانه‌ ، ژنیش هه‌یه‌ ژانه‌ .
کوردی
(*) ژن قژی درێژه‌ ، به‌ڵام بیری کورته‌ .
رووسی
(*) هه‌ر کاتێک سێ ئافره‌ت هاوڕابن، ئه‌ستێره‌کان به‌ رۆژی رووناک ده‌دره‌وشێنه‌وه‌.
هیندی
(*) پیاو جیهان به‌ڕێوه‌ ده‌با ، ژنیش پیاو به‌ڕێوه‌ ده‌با .
ئیسپانی
(*) ئه‌و پیاوه‌ی ژنێکی منداڵکار بخوازێ ، شه‌یتان پێ پێ ده‌که‌نێ .
ئه‌ڵمانی
(*) ئه‌گه‌ر شه‌یتان نه‌توانێ بچێته‌ جێگایه‌ک ، ژن ده‌نێرێ .
چینی
(*) شه‌یتان ژنی قووت دا ، به‌ڵام پێی هه‌رس نه‌کرا .
پۆڵه‌ندی
(*) شه‌یتان مامۆستای پیاوه‌ ، به‌ڵام قوتابی ئافره‌ته‌ .
ژاپۆنی
(*) ژن له‌ شه‌یتان ، شه‌یتانتره‌ .
کوردی
(*) ئه‌وه‌ی به‌ شه‌یتان ناکرێ ، به‌ ژن ده‌کرێ .
ئه‌ڵمانی
(*) پیاو ئاگره‌ ، ئافره‌ت داره‌ ، شه‌یتانیش هه‌وایه‌ .
فه‌ره‌نسی
(*) شه‌یتان نازانێ ، ژنان له‌ کوێ چه‌قۆ تیژ ده‌که‌ن .
لاتینی
(*) ژن له‌ شه‌یتان فێڵبازتره‌ .
هیندی
(*) ئافره‌ت له‌ شه‌یتان زۆرتر ده‌زاێ .
ئیتالی
(*) شه‌یتان ده‌ کاتژمێری ده‌وێ تا پیاوێک بخه‌ڵه‌تێنێت ، به‌ڵام ژنێک یه‌ک کاتژمێری به‌سه‌ بۆ ئه‌وه‌ی ده‌ پیاو له‌ رێ ده‌ربکات .
ژاپۆنی
(*) له‌ مار دڵنیابه‌ ، به‌ڵام له‌ ژن دڵنیا مه‌به‌ .
عه‌ره‌بی
(*) ئه‌و ئافره‌ته‌ی دوو پیاوی خۆش بوێ ، درۆ له‌گه‌ڵ هه‌ردووکیاندا ده‌کا .
پورتوگالی
(*) ئه‌و ژنه‌ی حه‌زی له‌ جل شۆرینه‌ ، له‌ هیچی که‌م نییه‌ ، ته‌نها ئاو نه‌بێ .
سویسری
(*) پاره‌ت هه‌بێ ، ده‌توانی کچی سوڵتانیش بخوازی .
عه‌ره‌بی
(*) من خانم تۆ خانم ، کێ مانگاکانمان بۆ بدۆشێ .
سربی
(*) مریشک و ژن ، له‌ ماڵه‌وه‌ دوورکه‌ونه‌وه‌ ون ده‌بن .
ئیسپانی
(*) ئه‌گه‌ر یارت یار نییه‌ ، وازلێهێنانی شووره‌یی نییه‌ .
فارسی
(*) که‌ ژنه‌که‌ له‌سه‌ر په‌یژه‌دا خل بۆوه‌، پیاوه‌که‌ی وتی: گه‌شتێکی خۆشت بۆ ده‌خوازم .
سویدی
(*) بۆ ئه‌وه‌ی هاوسه‌رگیری سه‌رکه‌وتووبێ ، ده‌بێ پیاوه‌ که‌ڕ و ژنه‌ کوێر بێ .
دانیمارکی
(*) له‌ پێناوی پاره‌دا ژن مه‌خوازه‌ ، قه‌رزکردنی ئاسانتره‌ .
ئوسکۆتله‌ندی
(*) له‌ دوو که‌س نزیک مه‌به‌ره‌وه‌ ، ئافره‌تێک هه‌موو سامانه‌که‌ی جوانییه‌که‌ی بێ ، پیاوێکیش هه‌موو جوانییه‌که‌ی سامانه‌که‌ی بێ .
هیندی
(*) ژنی سه‌رباز ، نه‌ ژنه‌ و نه‌ بێوه‌ژنه‌ .
رووسی
(*) نه‌ پشت به‌ دیواری لار و ، نه‌ به‌ ئافره‌ت ببه‌سته‌ .
چیکی
(*) سواڵکه‌ره‌ و ناوی خاتوو به‌ناز ه‌ .
عه‌ره‌بی
(*) سه‌گ بۆ پیاو ، پشیله‌ بۆ ژن .
ئینگلیزی
(*) پێویسته‌ سوپاسی کچان و ژنان بکرێن ، ئه‌مه‌ راست بێ یا ناڕاست .
ئه‌ڵمانی
(*) ئه‌وه‌ی به‌ خراپی ناوی ژنان ده‌هێنێ ، هیچ له‌ باره‌ی دایکییه‌وه‌ نازانێ .
نه‌رویجی
(*) ئه‌گه‌ر دوو ئافره‌ت به‌یه‌ک گه‌یشتن ، ئه‌وا قسه‌یان نابڕێته‌وه‌ ، ئه‌گه‌ر بوون به‌ سێ شه‌ڕیان نابڕێته‌وه‌ .
چینی
(*) له‌ ته‌نگانه‌دا ، ژنان له‌ پیاوان ژیرترن .
عه‌ره‌بی
(*) ره‌گی ناکۆکییه‌کان سێ شت : زێڕ ، زه‌وی ، ژن .
هیندی
(*) دایک و کچ شه‌ڕیان کرد ، گه‌وج بڕوای پێیان کرد .
کوردی
(*) هه‌ردم ژنان به‌ قژه‌وه‌ جوانن .
دانیمارکی
(*) هاوسه‌رگیری، جارێک پێویستییه‌ ، دووه‌مین جار گه‌مژه‌ییه‌ ، سێیه‌مین جار شێتییه‌.
هۆڵه‌ندی
(*) ئه‌گه‌ر ژن تووشی گوناه بێت .. پیاویش بێ گوناه نییه‌ .
ئیتالی
(*) پیاو رووباره‌ ، ژن ده‌ریایه‌ .
کوردی
(*) خشڵی پیاو ئه‌ده‌به‌ ، خشڵی ژن زێڕه .
عه‌ره‌بی
(*) بازنگی زێڕی له‌ ده‌سته‌ ، سکیشی له‌ برسا ده‌قۆڕێنێ .
هیندی
(*) به‌سزمان ئه‌و ئافره‌ته‌یه‌ که‌ زمان له‌ ده‌میدا نییه‌ ، به‌خته‌وه‌ریش ئه‌و پیاوه‌یه‌ که‌ ده‌یهێنێ .
ئوسکۆتله‌ندی
(*) چاوه‌کانی ژن ده‌ریاچه‌یه‌کی وشکن، به‌ڵام ده‌توانن مه‌زنترین مه‌له‌وان زان بخنکێنن.
سووری
(*) ئافره‌ت ئه‌گه‌ر بۆ له‌ سێداره‌دانیش ببرێت ، داوای ئه‌وه‌ ده‌کات ، که‌ مۆڵه‌تێکی بده‌نێ تاکو خۆی بڕازێنێته‌وه‌ .
ئینگلیزی
(*) پیاوه‌یان ده‌برد بۆ له‌ سێداره‌دان ، ژنه‌ وتی له‌ بیرت نه‌چێ کل و کلدان .
کوردی
(*) وریابه له‌و ژنه‌ی له‌ چاکه‌ی خۆی ده‌دوێ، له‌و پیاوه‌ش له‌ راستگۆیی خۆی ده‌دوێ.
فه‌ره‌نسی
(*) خۆشه‌ویستیت به‌ ژنه‌که‌ت ببه‌خشه‌ ، رازیشت به‌ دایکت بسپێره‌ .
ئیڕله‌ندی
(*)‌ لای دایکی گڕ بوو ، لای ژنه‌که‌ی کڕ بوو .
عه‌ره‌بی
(*) ئه‌وه‌ی ژنێکی جوانی هه‌بێت ، پێویستی به‌ دوو چاو زیاتره‌ .
ئۆسکۆتله‌ندی
(*) ده‌کرێ دێو ماڵی بکرێ ، به‌ڵام ژنی تووڕه‌ ماڵی ناکرێ .
نه‌رویجی
(*) پیاو دیاری ی خوایه‌ بۆ ژن .
سویدی
(*) ئه‌وه‌ی دایکی خۆش نه‌وێ ، ناچاره‌بێت که‌ خه‌سووی خۆش بوێ .
فینله‌ندی
(*) ژن سێبه‌ری پیاوه‌ ، پێویسته‌ دوای بکه‌وێت ، نه‌ک به‌ڕێوه‌ی به‌رێت .
ئه‌مه‌ریکی
(*) ئه‌وه‌ی هه‌موو شتێک بۆ ژنه‌که‌ی ده‌گێڕێته‌وه‌ ، تازه‌ زاوایه‌ .
ئوسکۆتله‌ندی
(*) هاوسه‌رگیری قه‌ڵایه‌کی گه‌ماروو دراوه‌، ئه‌وانه‌ی له‌ ناو قه‌ڵاکه‌دا، ده‌یانه‌وێ بێنه‌ ده‌ره‌وه‌ ، ئه‌وانه‌ی له‌ ده‌ره‌وه‌شدان ، ده‌یانه‌وێ بچنه‌ ناو قه‌ڵاکه‌وه‌ .
چینی
(*) ژنهێنان ، شه‌ڕێکه‌ ده‌بێ بکرێ .
عه‌ره‌بی
(*) ئه‌گه‌ر به‌ دوای ئافره‌تێکی بێ هه‌ڵه‌دا بگه‌ڕێی ، ئه‌وه‌ هه‌ر به‌ ره‌به‌نی ده‌مێنیته‌وه‌ .
تورکی
(*) ئافره‌ت ئابڕووی پیاوه‌ .
سویدی
(*) دوو ژن له‌ ماڵێکدا ، وه‌ک دوو پشیله‌ وان که‌ مشکێکیان ده‌ست که‌وتووبێ .
دانیمارکی
(*) ژن ئازارێکی هه‌میشه‌یه‌ .
یۆنانی
(*) ژن وه‌کو مانگ وایه‌ ، رووناکی وه‌رده‌گرێ .
ئینگلیزی
(*) ژن له‌ هه‌فته‌یه‌کدا ، رۆژێک گوێ له‌ ئامۆژگاری ده‌گرێت ، به‌ڵام نازانرێت کام رۆژه.
نه‌رویجی
(*) ته‌نها هه‌ر چل ساڵ جارێک ، ژنه‌که‌ت چی وت به‌ قسه‌ی بکه‌ .
تورکی
(*) ئه‌گه‌ر ژنه‌که‌م له‌گه‌ڵمدا بێ ، جیهان به‌ په‌نجه‌یه‌ک ده‌سوڕێنمه‌وه‌ .
عه‌ره‌بی
(*) بۆ تێگه‌یشتن له‌ پیاو ، ژن بخوێنه‌وه‌ .
فه‌ره‌نسی
(*) باشترین شت که‌ پیاو هه‌یبێت ژنێکی باشه‌ ، خراپترین شتیش که‌ پیاو ‌ تووشی بێت ژنیکی خراپه‌ .
ئه‌ڵمانی
(*) ژن دوو جار به‌ لای پیاوه‌وه‌ خۆشه‌ویسته‌ ، ئه‌و رۆژه‌ی ماره‌ی ده‌کا ، ئه‌و رۆژه‌ش که‌ له‌ گۆڕی ده‌نێ .
رووسی
(*) ماڵ به‌ بوونی زه‌وی بنیات نانرێ ، به‌ڵکو به‌ بوونی ژن .
ئیسپانی
(*) پیاو به‌بێ ژن ، ژنیش به‌بێ پیاو ، هه‌ڵناکه‌ن .
کوردی
(*) پیاو کوڕی ژنه‌ .
رووسی
(*) ژن یا ده‌بێت ده‌سه‌ڵاتدار بێ .. یا خزمه‌تکار بێ .
یۆنانی
(*) ژنی ژنانه‌ ، داینێ له‌ دیوه‌خانه‌ .
کوردی

١٤\١\٢٠١٢ - نه‌رویج

ماڵپه‌ڕی ره‌زا ساڵح

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک