|
٥\٣\٢٠١٠
کوا مافى دڵشادى
ناشادى پێشمەرگەى دێرینى شیوعى ؟!
هیوا ڕەش
لەو دەمەى دا ، بەعسییەکان پێکى سەرکەوتنە
ڕووکەشییەکان هێندە سەرمەستى کردبوون مارشى سەربازى بووبووە سەمفۆنیاى
خۆشەویستییان و ئەو ڕۆژەى پتر خوێنیان دەڕشت ئەو ڕۆژەیان بەلاوە
ڤالانتاین بوو .
لەو دەمەى دا ، یەکێتییەکان پێکى سەرکەوتنە ڕووکەشییەکان هێندە
سەرمەستى کردبوون ( پەرێزتان پاک بێت ) یوویووە گۆرانى مەرگ و گوێچکەى
شیوعییە دیلەکانى بەردەستیانى ئەلەراندەوە و خوشکە – ئەحلام – خوێنى
تێکەڵ بە خوێنى هاوڕێکانى دەبوو .
لەو دەمەى دا هێزى پێشمەرگەى شیوعى وەکو پوورەى هەنگ شێوابوون و پێکدا
دەهاتن و دەچوون خەنجەرە ژەهراوییە دوودەمەکە ووڕوکاسى کردبوون ، لایەک
یەکێتى نیشتمانى بێ ڕەحمانە کەوتبوە وێزەیان و کونى زیاترى دەخستە
جەستەیانەوە ، لە لایەکى ترەوە گیانى سازش و خۆبەدەستەوەدانى
سەرکردایەتییەکەیان جێگەى بە گیانى تۆڵە لێژ کردبوو و سەرقاڵى وەرگرتنى
دەمانچە و بەیان دەرکردن و ڕێککەوتننامەى شەرمەزارى بوون .
لەو دەمەى دا دوو بەیاننامەى پڕ خەجاڵەتى ناوزەنگ و دێوانە پێشمەرگە
شیوعییەکانى ناچارى چەک دانان دەکرد .
لەو دەمەى دا ، داڕمان و ناڕەزایەتى و بێزاریى پێگەى حیزبى شیوعى
داوەشاندبوو و پێشمەرگەکانى چى تر بەرگەى هەڵوێستە نامەبدەئییەکانى
نابەرپرسەکانى سەرکردایەتییەکەیان نەدەگرت و بە دڵى شکاوەوە ڕیزى
خەباتى چەکدارییان جێدەهێڵاو سەنگەریان چۆڵ دەکرد - - - لەو دەمەدا و
ڕێک دواى نیمچە ئاشبەتاڵى کارەساتە خوێناوییەکەى پشتاشان لاوێکى
دەموچاو بە گەندەموو کەمێک ڕەشەوە بوو ، کوڕە زەحمەتکێشێکى گەروو پڕ لە
نەعرەتە ، هەرزەکارێکى دڵگەرم و دڵڕەش بەرامبەر ستەم و ناعەدالەتى ،
دڵشادێکى دڵشاد بەوەى توێشووى غەمەکانى میللەتى نابووە سەرشان و بڕیارى
دابوو لە ڕیزەکانى هێزى پێشمەرگەى حیزبى شیوعى دا لە دنیاى پڕ لە
چەوسانەوەى چینایەتى یاخى ببێت و پەرە بە تێکۆشانێکى سوور ئەمما دوور
بدات .
لەو دەمەى دا ، ئەنفالى بەدناو چاوى بەعسى سوور کردبوو .
لەو دەمەى دا 182000 مرۆڤى بێتاوان ڕاپێچى دۆزەخى بەعسییان کرابوون .
لەو دەمەى دا 4500 گوندى کوردستان وێران و خاپوور و لەگەڵ زەوى دا تەخت
کرابوون .
لەو دەمەى دا نزیکەى 300000 جاش لە دەربارى سەدام حوسێن دا خۆیان هەڕاج
کردبوو .
لەو دەمەى دا کە حیزبە کوردستانییەکان خەونیان بە شڕە ئۆتۆنۆمییەکەوە
دەبینى .
لەو دەمەى دا لە برى پاداشت وەرگرتن خوێنى خۆت دەکردە پاداشت بۆ گەل .
لەو دەمەى دا سەرکردایەتى حیزبەکان چنگ لە سەرشان خۆیان گەیاندە
سنوورەکان .
بەڵێ ئا لەو دەمەدا هاوڕێ – دڵشاد – لە بنارى چیاى کۆسرەت دا بە
بریندارى لە بەڕەنگاربوونەوەى ئەو سەرەک جاشانەدا بوو کە ئێستا
دیوەخانانەکەیان سەد هێندەى مووچەکەى ئەوە .
بەڵێ - عەبدوڵا عەباس ئەحمەد – ناسراو بە هاوڕێ – دڵشاد – لە دایکبووى
1968 ى گوندى شاخەپیسکەیە و لە خێزانێکى هەژاردا گەورە بووە و لە
تەمەنى 16 ساڵى دا چەکى نەبەردى پێشمەرگایەتى دەکاتە شان و لە دواى
ئەنفالەکان بە پارتیزانى لە گەڵ چەندین هاوڕێى ترى دا لە قوڵایى
ناوچەکانى کۆیە و ڕانیە و قەڵادزە و دوکان و خەلەکان دا پەرە بە خەباتى
نەپساوە دەدەن و لە ساڵى 1989 دا و لە شەڕێکى نابەرامبەردا لە چیاى
کۆسرەت بریندار دەکرێت ، لە ڕاپەڕینە مەزنەکەى گەلەکەمان لە ساڵى 1991
بە هەمان هەناسەى خەباتەوە ڕۆڵێکى بەرچاو و قارەمانانە دەگێڕێت لە
پەلاماردان و تەفروتونا کردنى دامودەزگا داپڵۆسێنەرەکانى بەعس دا .
ناوبراو ئێستا لە شارى هەولێر بە عەرەبانەیەک و فرۆشتنى کێک و ساردى و
پیپسییەوە لە خەبات دایە و سەرى بەرزى وەکو جاران هێندە بڵندە دەمى
نابات بۆ هیچ دەستێ و بە شان و بازووى خۆى لە خانوویەکى تەجاوزدا لە
گەڵ هاوسەرەکەى و 4 مناڵە چاوگەشەکەى دا دەژیت و ڕۆژانە بە ڕەنجى شانى
خۆی بژێوى و گوزەرانیان دابین دەکات .
مخابن ، ئەوەى لە هەموو نەهامەتییەکانى ژیان زیاتر ماندووى دەکات
ڕەفتارى ناعەدالەت و گەندەڵکارانەى کۆمەڵەى پێشمەرگە دێرینەکانە کە
پێشمەرگەیەکى خاوەن مێژوویەکى پرشنگدارى وەکو ئەو بە بڕى 300000 دینار
خانەنشین دەکات و جاشێکى خائین و ڕووڕەش بە چەند ئەوەندەى مووچەکەى ئەو
.
مخابن ، ئەوەى زیاتر نیگەرانى دەکات بڕى مووچەکەى ئەو ناکاتە خەرجیى
هەفتەیەکى مناڵى ئەندام سەرکردایەتییەک .
مخابن ، لە جێى شێران ڕێوى دەکات گێران !
ئەى ئەوانەى خۆتان کردبوو بە دەمسپى لیستى – ئازادى و عەدالەتى
کۆمەڵایەتى _ ئەگەر ئەمە ئازادى و عەدالەتتان بێت نەفرەت لە ئازادى و
عەدالەتى وابێت ، ئەگەر ئێوە نەتوانن لە نێو حیزبێکى چەند سەد کەسى دا
ئازادى و عەدالەتى کۆمەڵایەتى ئەنجام بدەن ئەدى ئیتر ئەبێت میللەت چ
دڵێکى پێتان خۆش بێت و چۆن لە ڕووتان بێت تەکلیفى دەنگدانیان بۆ خۆتان
لێ بکەن ؟ ! تۆ بڵێى مەبەستتان لە ئازادى و عەدالەتى ئەو دنیا بێت بۆ
هاوڕێکانتان و هى ئەم دنیاش بۆ خۆتان ؟ !
دەبا بەس بێت فەتواى بێ بنەماى بەناو سەرانى شیوعى لە دامەزراندنى
دنیایەکى بێ چین و چەوسانەوە و یەکسان کە خۆیان لە نێو خودى حیزبەکەى
خۆیان دا شایەدمانى پێ ناهێنن .
دڵشادى شیوعى ئێستا زۆر ناشادە لە هەڵسوکەوتى کۆمەڵەى پێشمەرگە
دێرینەکانى شیوعى ! و دڵنیان هێندە نیگەرانە لە وونبوونى بەهاکان - - -
ئەگەر ڕەووشت بوونى هەبێت ئەوسا ویژدان دەبێت و ئەگەر ویژدانیش ببێت
ئەوسا ناعەدالەتیش یەکجار بەو شێوەیە لە جەستەى حیزبێک نادات کە خۆى بە
شیوعى بزانێت ! نازانم ئەوە چ ویژدانێکە تەمەنى لاوى مرۆڤێک بە خەبات و
پێشمەرگایەتى و لە تەمەنى بەرەو پیرى چوونیش دا بە عەرەبانە پاڵ نان
بگوزەرێت ؟ بە مەرجێک زۆرن ئەوانەى لەسەر خەباتى پێشمەرگەى دێرین ئێستا
دەخۆن و دەخۆنەوە لە سەر سفرەى زێڕین !
07701309524
Hewarash1@yahoo.com
|
