|
١٩\٦\٢٠١٤
کورد دەڵێ:
"شەڕ بەردەرگام لێ دەگرێت، بۆیە شەڕ دەکەم"،
بەڵام با ئەوجارە بلێین: "دەرگا لە شەڕ دەگرم تا هیچ کەسێک نەتوانێ
دەرگا لە سنوورم دابخا".
شوان عوسمان
شەڕ بە درێژایی مێژووی مرۆڤایەتی رووبەرووبوونەوەیەک بووە بە ناچاری لە
پێناو مانەوەی خۆی و مانەوەی ژیانیدا، شەڕ هەمیشە دوا رێگاچارەیەکە بۆ
زمان کاتێک قسە رۆڵی نامێنێت هێز دەکەوێتە گفتوگۆ ، دیارە کوردیش
گەلێکجار شەڕ بەردەرگەی گرتووە نەک ئەو خۆی ئەوە خوازیاری بێت، هەموو
شەڕێک ئاسەوارێکی تایبەت بە خۆی بەجێدێلێت، ئێمە هەر لە شەڕی (چاڵدێرانەوە)
بەدەم بەرکەوتەکانی شەڕەوە دووچاری کارەساتی گەورە وحالەتی دەروونی
ناجێگیر بووینەتەوە ، تەنانەت تا ئەمڕۆکەش ئەو کاریگەریە بەسەرمانەوە
دیارە، هەروەها هەمیشە کارەساتەکان کارەساتی گەورەتر دووبارە دەکەنەوە
، هاوشانی ماڵوێرانی و بەد چارەنووسیش ئەوەی تەنیا لە کۆتایی
زۆرانبازیەکەشدا دەستکەوتی گەورەی بەدەست هێناوە هەر نەیارەکانمان
بوون نەک خۆمان...
کورد لە مێژووی خەباتی رابردوویدا لە بواری ساغ کردنەوەی حیساباتی خۆی
لەگەل دۆژمنەکانیدا ، بواری ئەوەی نەبووە پارسەنگی بارەکان بەلای خۆی
راست بکاتەوە، هەروەها هێزێکی ئەوتۆی پۆزەتیفیش نەبووە تا هاوکێشەی
هێزەکانی ناوچەکە لە پێناو گۆڕینی داهاتووی خۆی رێکبخات، لە دواجاریشدا
شەڕ هەر لە پارچە کردنی قەوارەکەی زیاتر هیچ تەفسیرێکی دیکەی نەبووە ،
کورد لەبەرامبەر شەڕی کەرامەتی نەتەوەییدا بێ هەڵوێست نەبووە، بەڵام
هەرگیز بە گوێرەی پێویستی بەرژەوەندیە نەتەوەییەکانی خۆی خاوەن ستراتیژ
وپلانێکی خۆماڵی لە خزمەت نەتەوەکەی خۆی نەبووە ، بەڵکو هەمیشە
بەرەئەنجامەکان لە خزمەت بەرژەوەندی نەیارەکانیدا بە ئاکام گەیشتوون...
ئەمڕۆکە دوابەدوای هاتنە پێشەوەی دیاردەی (داعش)، بۆ یەکەم جار کورد
لەو هەرێمەدا شەڕ بۆ بەرژەوەندی تایبەت و رەسمی ئایندەی نەتەوەیی خۆی
دەکات و خۆی لە نێوان ئەگەری مان ونەمانەوەدا وەکو فاکتەرێکی بەهێز بۆ
پتەو کردنی جوگرافیا داگیرکراوەکەی بازێک هەڵدەدات ، هەرچەندە شەڕی
ئەوجارە جاڕی شەڕێکی چەند جەمسەریە کە لە نێوان سەرجەم نەتەوەکانی ئەو
هەرێمە بە (عارەب و تورک و فارس) تا دەگاتە (ئەمریکیە)کانیش کە
هەریەکەیان بە شێوەی تایبەتی خۆی لە هەولی کێشانی رەسمی
بەرژەوەندیەکانی خۆیانن لە ناوچەکەدا ، هەروەها بە گوێرەی هەبوونی
قەوارەی خۆیان مامەلە لەگەل هاوکێشەکە دەکەن..
هاوکات پێشبینی وا دەکرێت کە بەرئەنجامی شەڕەکە زیاتر لە بەرژەوەندی
کورد بشکێتەوە زیاتر لە لایەنەکانی دیکەی ناو هاوکێشەکە، هاوکات کوردیش
ئەوجارە بە گوێرەی قەوارەی خۆی و هاوشانی نەیارەکانی لە رابردوودا بە
هاتنی گۆڕانکاریەکان هەول بۆ بەرقەرار کردنی بەرژەوەندیە نەتەوەییەکانی
خۆی دەدات، ئەوەی شایەنی ئەوەشە باس بکرێت بۆ یەکەمجار کورد بە چاوی
بەر فرەوان کردنی جوگرافیای نەتەوەکەی شەڕێکی خوازراو دەکات نەک وەکو
جاران بەسەریدا سەپا بێت ، ئنجا وەکو رەگەزێکی بەهێزیش چاوی لە
بردنەوەیە نەک دۆڕان لەهەمان کاتیشدا کورد ئەوجارە لەناو هاوکێشەکەدا
وەکو دیاردەیەکی تازە بە تەنیا و بێ هاوپەیمان و بێ دۆست شەری خۆی
دەکات..
کورد و سەرکرادیەتی سیاسی ئێستاکە ، دەبێت ئەمڕۆکە لە هەموو وەختێک
زیاتر بە حوکمی عەقڵ و بە بنەمای ئاوڕدانەوە لە ئەزموونی کۆنیان شەڕ
بکەن نەک سۆز و قازانجی تایبەتی و حزبایەتی خۆیان بکەنە پێوەرێک بۆ
بەردەوام بوونی شەڕەکە و دوای شەڕەکەش ، هەروەها دەبێت سوود لە
هەڵەکانی رابردووی خۆمان وەرگرن وهەولیش بدەن تا بکرێت راستەوخۆ نەبنە
لایەنگیرێک یاخود سوتەمەنیەک بۆ سوتانی رق و رکابەرایەتی نێوان (شیعە و
سونی)یەکان تا بتوانین بەرئەنجامەکان وەکو دەستکەوت و قازانج و
ستراتیژێکی دڵنیایی بوون بۆ خۆمان و ئایندەی نەتەوەکەمان مسۆگەر بکەین
نەک دیسان بچێتە خانەی قازانجی نەیار و گەنجینەی بەرپرس و چەند
کەسانێکی دیاریکراو..
٢٠١٤ - هۆلەندە
ماڵپه‌ڕی
شوان عوسمان
_________________________________
هەموو بابەتەکان دەربارەی
''داعش'' لێرە ببینە:
www.emrro.com/dosyeydahish.htm
|
