کوردستان لە ماڵى میللەتەوە بۆ ماڵى حیزب
(ئەو حیزبەى دوێنێ بۆ نیشتیمان تێدەکۆشا، ئەمڕۆ کاولی دەکات).

پێشڕەو حەمید   

بەهۆى سیاسەتى چەواشەکارى و دەسەڵاتخوازى سیاسییەکانى ئێمەوەلە ماوەى حەڤدەساڵى ڕابردواد و بەهۆى دوبارەکردنەوەى چەندین هەڵەى سیاسى و ئیدارى پارتى و یەکێتەیەوە ، کاردانەوەیەکى نێگەتیڤى لاى مرۆڤى کوردى دروستکردو گیانى نیشتمان پەروەرییانى بەرەو هەڵدێربرد و نەمانى ئەوڕۆحیەتەش هۆکارێک بو خاوبونەوەى قوربانى دان لەپێناوى نیشتماندا و لەبرى نەتەوەیەک بۆقوربانى دان تەنها چەند کەسێک ئامادەبون لەپێناو نیشتمان بمرن ؟چونکەکوردستان لەماڵى میللەتەوە بووەماڵى حیزب و ئێستاش ( حیزب ) خاوەنى یەکەمى نیشتمانە ؟! ئەوە نەک لەبەرئەوەى کەخەڵکى کوردستان هەر لە ئەزەلەوە هەستى نیشتمان پەروەرى لەڕۆحیاندانەبوەو بێباکانە لەسەر خاکەکەى ژیاون ، بەڵکوئەو خەڵکەى کەهەمیشە قوربانى دەستى سیاسەتە چەوتەکانى حیزبى کوردى بوون لەدواى ڕاپەڕین و شەڕى نەگریسى ناوخۆوە ، بەوەیان دەزانى کە کوردستانى ئەوان بوەتە نیشتمانى حیزبەکان و نیشتمانى گەندەڵکاران کوردستانى پڕلــەناعەدالەتى کۆمەڵایەتى و سایسى و دیوەخانى بازرگانەکانى شەڕو چەتەو لەیاسا گەورەترەکان و تد .

لاوازبونى هەستى نیشتمان پەروەرى لاى خەڵک ، نوقسان بونى خەیاڵى نەتەوەیە و نەتەوەش بەرپرسیارى یەکەمى ناهۆشیاریەکانى خۆیەتى و تموحاتە نامۆراڵیەکانى دەسەڵاتى کوردیش هەمیشە هۆکارى نـائامادەگەى ئەوخەیاڵەبووەو هەرگیز نەهێشتوە بۆتەنها جارێکیش بەرژەوەندییەباڵاکانى میللەت بخاتە پێش بەرژەوەندیە بچوکەکانى خۆیەوە .

هەستى نیشتمان پەروەرى بەرلەڕاپەڕین وپێش شەڕى ناوخۆ مانایەکى گەورەى هەبو ، بەڵام لەدواى ڕاپەڕین و گەمەى ناو سەنگەرەکانى شەڕى حیزبەکان و بەپرۆژەکردنى گەندەڵى و بچوککردنەوەى ( یاسا ) لەبەردەم بەرپرسەگرگنەکاندا مانایەکى ترى بەخشیە ئەو هەستەو شوناسێکى ترى بۆدیارى کرد ؟ چونکە لەوەى یەکەمیاندا ( کوردستان ) بەدەستى سیاسەتى عارەبە شۆڤینزمەکانەوە ئەتک ئەکراو بەناوى پارستنى سەروەرى عێراقى عروبەو بەکافر ئەژمارکردنمان هەزارانیان لێى ئەنفال کردین و بەناوى دەستێکەڵاوکردنمان لەگەڵ بیگانەدا شارەکانیان کیمیابارن دەکردین و بەناوى لەخۆگرتن و خزمەتکردنى ( تێکدەرەکان ) بە پێناسەى خۆیان ، گوندەکانیان دەسوتاندین و شەرەف و موقدەساتەکانمانى ئیغتیساب دەکرد !! بەڵام لەمەى دوهەمیاندا ( کوردستان ) بەدەستى ئەو کەس و تاقمانەوە کاول دەکرا کە پێشتر ئامادەبون لەپێناوەیدا بمرن ؟! بەرلە ڕاپەڕین سیاسەتەدوژمونکاریەکانى بەعس و هەوڵەنەزۆکەکانى بۆ قرکردنى تەواوى خەڵکى کوردستان ، چەکى بەرگرى کردنى پێهەڵدەگرتین و دەچوینە چیاکان بۆ پاراستنى شەرەف و پیرۆزییەکانمان ، بەڵام لەدواى ڕاپەڕین سیاسەتى حیزبى کوردى و پەروەردەناتەندروستەکانى حیزبى کوردى وتموحاتە نائەخلاقییەکانى دەسەڵاتى کوردى ناهۆشیارى سیاسى و مەعریفەى میللەتیان ئیستیغلال کردو فێرى دوبارە چەک پێهەڵگرتنەوەى کردینەوە ، بەڵام ئەمجارەیان بۆگیانى خۆمان وبۆ سوتاندنى هەولێرو سلێمانى شارەکانى ترى کوردستان.

ئەگەر بەهێزبونى گیانى نیشتمان پەروەرى و پچێەوانەکەى لەو دووقۆناغەى دا کەباسکران و بەوشێوەیە خۆى بەرجەستەکردبێت کەچەند ئاماژەیەکى کورتى پێدرا ، ئەوادەبێت ئەوڕۆحییەتە تۆراوەى ( نیشتمان پەروەرى ) لەم قۆناغەدا لاى مرۆڤى کوردى چۆن بێت کە قۆناغێکى تەواو جیاوازە لە هەردو سەردەمەکەى پێشخۆى ؟ دیارە جیاوازبونى ئەم قۆناغەش بەماناى ئەوەنا کە پارتى و یەکێتى وازیان لەعەنتەریاتى خۆیان هێنابێت و بەتەواوەتى تێکەڵاوى خەڵک بونەتەوە و پەیوەندەى یەکى تەندروستیان لەتەک تەواوى کۆمەڵگاى کوردیدا دروستکردو وەتەوە ، بەڵکو جیاوازى ئەم قۆناغە بۆمیللەت لەوەدایە کە هۆشیاریى یەکى سیاسیانەى هەیە و لە تەواوى گەمەکانى دەسەڵاتى کوردى بەئاگاهاتووەتەوە و بەئاسانى مژدەو گوتارە سۆز ئامێزەکانى دەسەڵات فریویان نادات .

نەتەوەى کورد لەباشورى کوردستان دواى ئەو هەمو ماڵوێرانیەى کە لە ئەنجامى جەنگەکاندا بەسەرى هات و دواى وەدەستخستنى هۆشیارى سیاسى و کولتورى لەسەر گۆڕانکاریە خێرایەکان لە ناوخۆ و بەئاگابونى لە پێشهاتە سیاسیەکانى ناوچەی و نێودەڵەتى ، لەهەوڵى ئەوەدایە کە لەڕێگەى بایەکۆتکردنى هەڵبژاردن و هاتنەدەرەوەى تاکەکانى لەناوکایەجیاجیاکانى حیزب و سزادانى ( یەکێتى و پارتیى ) وە ، جارێکى تر نیشتمان پڕبکاتەوە لە ئەخلاق و خەیاڵ و ئەقڵیەتى سیاسیانەى تەندروست .

ئێستا نیشتمان لەنێوان حیزب و نەتەوەدا لەبازنەى ململانیدایەو حیزب دەیەوێت بۆهەمیشە کوردستان بۆخۆى بێت ، کە دەسەڵاتى کوردى تائەم ساتەش نایەوێت لەنێوان خۆى و خەڵکدا پەیوەندیى یەکى مۆراڵى و سیاسانەى دورلە فریو دان دروستبکات و بۆ هەربڕیارێک میللەت بکاتە تاکە مەرجەعى بڕیاردانى ، تەنها ئەوکاتانە نەبێت کە دەکەونە هەڵەى سیاسى و بۆڕاستکردنەوەى هەڵەکانیان پەنادەبەنەبەر سۆزى میللەت و دەخوازن لە نێوان شەڕى بەرژەوەندى ناو باڵەجیاجیاکانى ناوخۆیاندا سەرلەنوێ گیانى شۆڕشگێرى بەرەو پوکانەوە ببەن و مودیلێک بەناوى ( تڕۆکردن ) ەوە ، وەک گەمەیەکى ترى بێتامى حیزبى ئاوێزانى شەقامى سیاسى کوردیى بکەن و ئەدەنگەدەنگە نوساوەیش کە دەیەوێت لەناو بازنە داخراوەکانى حیزبدا شتێک بڵێت کە حیزب ناوى لێناوە ( بڤە ) بخنکێنن و بەشێوەیەکى تر مەوداکانى ئازادى بەرتەسک بکەنەوە ، بەڵام میللەت دەیەوێت ( نیشتمان ) بەتەواوەتى لەحیزبەکان وەربگرێتەوەو حیبزبەکان بکاتەوە بەحیزبى نیشتمانى و نەتەوایەتى تەواوى پانتایى کوردستان پاکبکاتەوە لە خیانەتکردن و گەندەڵى و نــا عەدالەتى کۆمەڵایەتى و سیاسى و کولتورى و فەرهەنگى و ...تد، سەرەڕاى فریاد ڕەسى میللەت هێشتا حیزبەگەورەکانى کوردستان دەیانەوێت هەستى نیشتیمان پەروەرى گیانى شۆڕشگیڕى تاک بەتاکى کوردى تەنها لەنێو دێرەشیعرەکاندابێت و بەهەڵکردنى ( ئاڵا ) تەعیبرى لێبکات !؟ بەڵام میللەت دەیەوەێت شەقامى سیاسى و ئەخلاقیمان پڕبێت لەو هەستەو پێکەوە ئامادەبین بۆ قوربانى دان لەپێناوى پاراستنى ئەو دەسکەوتانەى کە بەخوێنى ڕۆڵەکانى بەدى هاتو وەو ئیستا حیزبەکان موزایەدەى پێوەدکەن .