١٩\٩\٢٠١٠

   کورسیه‌ک.

زمکان عەزیز

1. باڵق بوون .

لەسەر کورسیەک دڵۆپێ خوێن
پڕە لە موچڕکە و گوشین و ئاڵۆش و ختووکە
کوڕێک ھەڵیئەگرێتەوە و
لە ژوورە تاریکەکەیدا خۆی پێدائەگرسێنێ.

2. شەرم لە ناو بێدەنگیدا ئەمانکوژێ.

دڵۆپێ خوێن کچێ ئەگەییەنێ و
بە دزی خواوە خۆی ئەخوات
لەسەر کورسیەکە پیاوێکیش
بەدزیەوە خۆی ڕەحەت ئەکات.

3. کچێ لە درزی دەرگاکەوە تەماشا ئەکات.

لەسەر کورسیەکە کچێک
سەبەتەیەک شەرمی گەییوی پێیە و
باخچەکەش پڕە لە کوڕی ئاڵ.

4. پیاوێک ئەگری.

کورسیەکە گوڵێک لەسەری ووشک بووەتەوە
مێروولەیەک گەڵایەکی ئەبات و
کۆترێکیش لاسکەکەی
ھەنگێک لەبەر ھەتاوەکەدا ئەزیڕێنێ و
پیاوێکیش فرمێسکەکانی ئەسڕێت.

5. کە ڕۆژ بوویەوە شەوێکی تیا بچێنە با تامی مردن خۆش بێت.

 
لە باخچەکەدا
کورسیەک چێنراوە
ھیچ ناگرێ و گەورە نابێ و ھەروەک خۆی وایە
ڕۆژانە ماچێکی لەسەر ئەڕوێ و
ماچێکیش تێیدا ھەڵئەوەرێ
گەڵای زەرد کورسیەکەی داپۆشیوە.

6. من ئەڕۆم و جێ پێی گەڕانەوەش ئەسڕمەوە.

کورسیەک
ژەنگی ژوان گرتوویەتی و
چاوەڕوانیش کون کونی کردووە
نامەیەکی دڕاو لەسەری
نووسراوە ..
" زۆر وەستام تۆ ھەرنەھاتی ".

7. لە لوتکەی چیاکەوە بەیانی ئەڕژێتە ناو ماڵەکانەوە.

کورسیەکە
جگەرەیەک لەسەر دەستەکانی کوژاوەتەوە و
لەنجە و لاری دەزوولەیەک دووکەڵی سپی
لە باوەشیدا بەرز ئەبێتەوە
پاکەتێکی قوپاو کەوتووە و
فیلتەرەکان ھێشتر چەند مژێکیان تێدا ماوە.

8. ئەو خانووە ڕووخاوە پڕە لە دەنگ و ڕەنگ.

کورسیەک
کۆترە ماندووەکانی لەسەر ئەنیشێتەوە
باڵ و قاچیان ڕائەکێشن و دەنوک لەیەک ئەسون
تاوێکی تر بۆ ناو ئاسمان ئەفڕنەوە
لەسەر کورسیەکە ھەندێک پەڕوباڵ بەجێماوە.

9. نامەیەکی جەنگ لەسەر کورسیەکەیە.

کورسیەک
سبەی ژنێکی پیر دێت و
ڕیقنەی شان و ملی ئەتەکێنێ
لەسەر کورسیەکە دائەنیشێ و
سەگە توکنەکەشی لە باوەشیدا ئەنوێ
مراویەکانیش ووردە نانەکان ئەکرتێنن
خەو چاوەکانی ماندوو ئەکات و
ھێندە نابا گۆچانەکەی ئەیباتەوە
لەسەر کورسیەکە جانتایەکی بچکۆلەی چەرم کەوتووە
نامەیەک و دەسڕێک و موسیلەیەکی مرواری تێدایە
نامەکە ئەڵێت ..
" کورسیەکە ئەزانێت چەند دانیشتم بە دیارتەوە
من ئەگەڕێمەوە بۆ بەرەی جەنگ
ئیتر نازانم کەی دێمەوە ".

10. خەمێکی سەرخۆش.
کورسیەک
موعتادێکی لەسەر نوستووە
کزەی سەرمای بە خۆیا داوە و
پیرە خەمێکی توکنی ناوەتە ژێر سەری
ماچێکی گەرم لەسەر لێوەکانی نیشتۆتەوە و
ھێدی ھێدی لێوەکانی ئەمژێت
ئەوە خەونە .. یان
ئەو ڕۆژەی یەکەمین ماچ
موعتادی کرد.

11. پیرێک لە چاویلکەکەیدا خودا ئەبینێت.

کورسیەک
پیاوێکی سەر سپی لەسەری دانیشتووە و
چاوەکانی بە دەستەوەیە
تاو تاو ئاوی خەمەکانی ئەدات
بەسەر شانی کورسیەکەوە شۆڕ بووەتەوە
بۆ ناو مەیخانەیەکی ڕۆمانەکە
بە تەنیشت کچە سەرخۆشەکەوەیە
پێک لەسەر پێک ئەخواتەوە و
گۆرانی پاڵەوانەکە ئەڵێتەوە ..
" ھەمووتان ئەمخۆنەوە و ئەمخوێننەوە
کە من ئەبەدێتم".

12. ئەوە سەرابە لە دوورایی دەشتەکەوە سەما ئەکات.

لەو باخچەدا
کورسیەک بە تەنیا دانیشتووە و
چاویلکەیەک لەسەری بەجێماوە
لەو دیو چاویلکەکەوە دوو چاوی پیر کەوتوون
چاویان لە ھەلقەڕێزی باخچەکەیە و
گوڵەکانیش ھەڵئەوەرێن
حەوزی ماسیەکان ووشک بووەتەوە و
مراویەکانیش لە شەقەی باڵئەدەن و ئەفڕن
کەسێک چەترێکی بەسەرەوەیە و
لە باخچەکەوە ئاوا ئەبێت.

ماڵپه‌ڕی زمکان عه‌زیز