تۆ ئه‌ی خاک
له‌ زه‌مانی(ئاده‌م)و(حه‌وا)وه‌
ئازارێکیت و له‌نێوانی
ده‌ست وپه‌نجه‌ی ڕۆژگارایت
‌شه‌وانه‌‌ بۆ دڵنه‌وایی خۆت
ده‌چیته‌(ماڵ)ه‌ فاڵچییه‌کی درۆزن و
تۆی دێوانه‌ و سپی پۆش و بێ ناسنامه
له‌ ژێر لێفه‌‌ سووره‌که‌ی مێژوودا
‌ خۆت گڕمۆڵه ‌ده‌که‌یت و
به‌ده‌م خه‌مه‌کانته‌وه‌ گینگڵ ده‌ده‌یت
له‌ئێواره‌یه‌کی په‌مه‌ییداو
به‌ڕێکه‌وت خۆت خزانده‌
ناو په‌رتووکه‌که‌ی زه‌رده‌شته‌وه‌
شه‌وانه‌ له‌ ئاته‌شگه‌دا به‌گڕی ئاهورامه‌زدا
خۆت گه‌رم ده‌کرده‌وه‌
هه‌ر له‌وێ و له‌خۆرنشینا
که‌وتیته‌ نێوان
ده‌ست وپه‌نجه‌ی(عوریان)ه‌وه‌
‌ به‌ده‌م هه‌نسکی مۆم و ڕژانی پێکی شه‌رابه‌وه‌
خه‌و ده‌یبردیته‌وه‌
له‌ ژێر ڕنووی فرمێسکه‌کانتا
پرچه‌ سوتاوه‌کانت به‌ شیعر شانه‌ ده‌کردو
به‌بۆنی بوغورد خۆت داده‌پۆشی
به‌یانییه‌ک نه‌بوو ده‌ستی سڵاوێک به‌رزکه‌یته‌وه‌
بۆ نه‌وه‌کانی ژێر ساباتی ژان و برین
ئێمه‌ هه‌موومان بانگمان کردیت
ده‌ستمان به‌ سنگه‌وه‌ بۆ گرتیت
بۆ خاتری ئه‌وه‌ی
گۆچانه‌که‌ی ده‌ستت ماچ بکه‌ین و
ئێواره‌یه‌ک لامان بمێنیته‌وه‌
وه‌لێ ئه‌فسوس هه‌نگاوه‌کانت به‌ خێرایی هه‌ڵێناو
ئاوڕێکت لێ نه‌داینه‌وه
به‌ زمانی پڕله‌ حوزن و گریانه‌وه‌ هاوارمان کرد
بگه‌ڕێوه‌ ئه‌ی جاویدانی عه‌زابنۆش
‌ تو سه‌ری ئه‌ولاده‌ به‌خشنده‌کانت
وه‌ره‌ بۆ لامان
به‌ر له‌وه‌ی سه‌فه‌ر بکه‌ی
بۆ ناو تابووتی گووم بوون
بێ ماڵئاوایی مه‌ڕۆ
مشتێ هه‌نجیر و چڵێ نێرگز
له‌گه‌ڵ خۆتا ببه‌‌..
به‌ حوسن و ڕه‌زای خۆت
مه‌قامێکی سه‌فه‌ر بچره‌
له‌ دیداری دواهه‌میندا
له‌ بینینی پڕ له‌ شه‌ر‌ما‌
چاوه‌ڕوانی چیت ئه‌ی مه‌خلوقی
سروشت و شینایی
چاوه‌ڕوانی چیت !
ژیان بۆ تۆ هه‌ر چاوه‌ڕوانییه
له‌ گه‌مه‌ی فێڵبازه‌کاندا‌
له‌ سیحری فاڵچییه‌کاندا
خۆت و کتێبه‌ ڕه‌شه‌که‌ت
هه‌ر چاوه‌ڕێن و چاوه‌ڕێ ..
‌هێنده‌ لووت به‌رزیت نواند ئه‌ی خاک
هێنده‌ بێزاربویت لێمان
وه‌ڵامی مناڵه‌کانیشت نه‌دایه‌وه‌
بانگیان کردیت
به‌ خێرایی ڕایانکرد به‌ شوێنتاو
هانایان بۆ هێنایت
بۆخاتری ئه‌وه‌ی حیکایه‌تێکی تازه‌مان
له‌ نه‌وه‌مێرخاسه‌کانت
بگێڕیته‌وه‌ بۆمان
هێشتا خۆر له‌سه‌ر سفره‌ی به‌یانیمان میوان بوو
تۆ هه‌ر نه‌هاتیت..
باڵنده‌کانیش بۆیان جریوانیت
به‌ باڵه‌فڕێ سه‌ر رێگه‌یان لێگرتیت
وه‌لێ تۆ هه‌ر ناهتیت
ئیدی له‌حه‌یوه‌تا باڵنده‌کان و
پاسارییه‌کانی ته‌ریقه‌ت
تۆران له‌ ساباتی خواجه‌کان و
له‌ده‌نگی شنه‌ی بای به‌یان و له‌ ده‌مه‌قاڵێی ئێمه‌.
خۆزگه‌ ئه‌ی خاک
له‌ ئێمه‌و باڵنده‌کانت ده‌ڕوانی
له‌و ساتانه‌ی
په‌ڕو باڵی شالووره‌کان
وورد وورد
هاتنه‌ خوارێ و به‌ختیان یار نه‌بوو
له‌ هه‌نگاوه‌کانت .
ئه‌وه‌ هه‌ر ئێمه‌ین
له‌ یاداشته‌کانی یاده‌وه‌ریمانا

ناوت له‌ دێڕی یه‌که‌میندایه‌

ئه‌ڤه‌ هه‌ر ئێمه‌ین
له‌ هه‌نگاوه‌کانت دوور ناکه‌وینه‌وه‌..
هه‌ر دێین و به‌ شوێنتا
کۆڵان کۆڵان بۆت ده‌گه‌ڕێین
تا سه‌روماچی مێزه‌ره‌که‌ت بکه‌ین
مێزه‌ری تۆ ئه‌ی خاک
ڕۆژێ بۆنی داری عودو
ڕۆژێ بۆنی خوێن و
ڕۆژێ بۆنی بارووت و
ڕۆژێ بۆنی تاوانی لێدێت
ئه‌وه‌ هه‌ر ئێمه‌ین
شوکرین به‌ بینینت ئه‌ی خاک
ئه‌وه‌ هه‌ر ئێمه‌ین ئولفه‌تمان
به‌ تۆوه‌ گرتووه‌ ئه‌ی خاک
تۆی مێزه‌ر خوێناوی ..
پشتێن پان و چۆغه‌چڵکن
شه‌وێک ده‌بیته‌ میوانی ما‌ڵه‌‌ خائینێک و
ڕۆژێک له‌سه‌ر تاته‌ شۆری مزگه‌وتێک
شه‌هیدێک ده‌شۆی
ئێواره‌یه‌ک دێیت و لاره‌ لاره‌
به‌ خۆت و گاڵۆکه‌که‌ته‌وه‌
سه‌رخۆش سه‌رخۆش
هه‌نگاو ده‌نێیت و بۆنی عاره‌قت
ڕۆژه‌ ڕێیه‌ک ده‌ڕوات
هه‌ندێ جاریش
ده‌بیته‌ گیتارژه‌نێکی هه‌رزه‌کارو
ئاوازی نه‌شاز ده‌ژه‌نی
کاتژمێرێکت له‌ ده‌ستدایه‌ شکاو
مه‌گه‌ر هه‌ر خۆت بزانی کات چه‌نده‌
ناسنامه‌یه‌کت هه‌یه‌ دڕاو
سنوورێک نییه‌ بیخوێنێته‌وه‌
نیوه‌ شه‌وێک
به‌ قاچاخی و له‌لا ڕێوه‌
ده‌ڕۆیته‌ شاری فیرده‌وس و
که‌سێ نییه‌ ده‌رگات لێبکاته‌وه‌
هاوده‌مێ نییه‌ گریانی غه‌ریبیت
له‌ بیرباته‌وه‌
ئه‌ی خاک
هێنده‌ دڕکی کوڕه‌ که‌وشخواره‌کانت
چزا به‌په‌نجه‌مانا
هه‌رچی بۆنه‌ خۆشه‌کانی باغی عومرت هه‌بوو
له‌ بیریان بردینه‌وه ‌.
به‌ڵێ کوڕه‌ که‌وشخواره‌کانت و هه‌ر ئه‌وان
به‌ڕۆژی نیوه‌ڕۆ گیرفانه‌کانتیان بڕی و
بێ ماریفه‌تانه‌
بۆ گوناهه‌کانی خۆیان
واژۆی تۆیان دزی و
له‌ لاپه‌ڕه‌ مێژووییه‌کاندا
ڕویان زه‌رد کردی
که‌چی تۆ نوزه‌یه‌کت لێوه ‌نه‌هات
هه‌ر ئه‌وان و کوڕه‌ که‌شیشه‌کانت
جامۆڵه‌یان پڕله‌ ژه‌هر کرد و
ده‌رخواردیان دایت
تۆش به‌ ته‌زبێحه‌ ئه‌بڵه‌قه‌که‌ته‌وه‌
هه‌رخه‌ریکی ته‌زبێحات بوویت و
واتده‌زانی به‌ دوعاکردن
ماڵه‌که‌ت ئاوا ده‌بێته‌وه‌
ئاخر گه‌وره‌م کێ دیویه‌تی
ماڵێک پڕکه‌ن له‌ خوێن و
گه‌روویه‌ک پڕکه‌ن له‌ بارووت و
شه‌قامێک ڕه‌نگ ڕێژکه‌ن
به‌ خوێنی کچه‌کانت
یه‌که‌ یه‌که‌ی‌ په‌نجه‌ی
کوڕه‌ به‌خشنده‌کانت ببڕنه‌وه‌
سه‌رپۆشی دایکی کوڕه‌کانت
به‌ دوژمن ببه‌خشن
کراسه‌کانیان بکه‌ن
به‌ ته‌وێڵی ماشێنه‌کانیانه‌وه‌ و
سروودی سه‌رکه‌وتن بڵێنه‌وه‌!
ژیان ترووسکاییه‌که‌ بۆ هیواکان
گه‌ر ترووسکایی و هیواکان نه‌بێت
ژیان مۆمێکی کزه‌ڵه‌یه‌
به‌ فووی که‌وشخوارێک ده‌کوژێته‌وه‌
ئه‌وه‌ ئیشی نه‌وه‌ که‌شیشه‌کانت بوو
جوانییه‌کانی تۆیان هه‌ڵکڕوزان
هیواکانی تۆیان له‌ت له‌ت کردو
به‌ جوانییه‌کانی تۆ به‌هه‌شتێکیان
بۆ خۆیان ڕازانده‌وه و
تۆیان توڕدایه‌ گه‌رووی مه‌رگه‌وه‌!
 

هه‌ر تۆ ئه‌ی خاک
که‌شتی(نوح)ت له‌ شه‌پۆله‌کانی نووقم بون

قووتار کرد
وه‌لێ تائێستا نه‌تتوانی
خۆت له‌ کوڕه ‌که‌وشخواره‌کانت
ڕزگار بکه‌یت.!
کوڕێکی شانۆکارت
زام و خه‌نده‌کانت له‌سه‌ر شانۆ نمایش ده‌کات
که‌چی تۆ ناڕازیت
کوڕێکی شێوه‌کارت
هه‌رچی به‌ژنه‌ باڵای تۆ هه‌یه‌‌ له‌ تابلۆیه‌کدا
ڕه‌نگ ڕێژی ده‌کات
به‌ڵام تۆ ناڕازیت
کوڕێکی ده‌نگخۆشت
هه‌موو برینه‌کانت به‌ لایلایه ده‌لاوێنێته‌وه‌
به‌ڵام تۆ هه‌ر ناڕازیت
کوڕێکی شاعیرت
هه‌رچی داستانه‌کانی عه‌شقی دڵارانت هه‌یه‌
به‌ شیعر ده‌یخوێنێته‌وه‌
به‌ڵام ئاخ تۆ هه‌ر ناڕازیت
کوڕێکی ڕۆماننووست
سه‌راپا غه‌می باغه‌کانی تۆ ده‌نووسێته‌وه‌
که‌چی تۆ هه‌ر ناڕازیت
کوڕێکی که‌وشخوارت
هه‌موو ئه‌م کوڕه‌ عاشقانه‌ی
تۆ یه‌ک یه‌ک ده‌کوژێت
که‌چی تۆ بێده‌نگ و شوکریت.
له‌ ئێواره‌یه‌کی خۆرنشیناو
هێشتا مێردمنداڵ بووم
ده‌نکێ ترێی پایزانه‌ت
نایه‌ ناو ده‌ستمه‌وه‌
له‌و حه‌له‌وه‌ ئه‌و ده‌نکه‌ ترێیه‌
له‌ناو دڵمایه‌و
بۆ هه‌ر کوێ بچم له‌گه‌ڵمایه‌
شیرینتر له‌ شیعری(گۆران)
بێگه‌ردتر له‌ خێزگه‌ی تاڤگه‌کان
قه‌شه‌نگتر له‌ وه‌رزی پایزو گه‌ڵاکانی
خۆشه‌ویست تر‌ له‌ بارانی ئێوارانی شاره‌که‌م
تنۆکی ئاوی ده‌نکه‌ ترێکه‌م
هه‌موو به‌یانیه‌ک ده‌بارێته‌
سه‌ر لێوی حه‌زم و
له‌ خه‌و خه‌به‌رم ده‌کاته‌وه‌
خه‌یاڵم ده‌باته‌وه‌و
ده‌مخاته‌ ناو تامی ده‌نکه‌ ترێکه‌مه‌وه‌..
تێر تێر له‌زه‌تی خۆیم ده‌داتێ
فروم ده‌کات له‌ پرسیاری سروشت و
له‌ بۆنی لاسک و گه‌ڵاکانی
ئه‌م ووڵاتی دارمێوه‌
هه‌موو ڕۆژێک بچوک ده‌بێته‌وه‌
وه‌کو سنوقی پۆستی ماڵه‌که‌م.
کورتتر ده‌بێته‌وه‌
وه‌ک قاچه‌کانی(حیکمه‌ت)ی برام
که‌ له‌ ژێر ڕه‌حمه‌تی ئینسانی بووندا
به‌بێ پرسیار به‌ تۆبزی
کورتیان کرده‌وه‌.
‌ لێره‌ گشتمان
ڕووخسارمان زه‌رد و جه‌سته‌مان
نووقمی گه‌ڵای باغچه‌ داخراوه‌کانه‌
وێڵ بووین له‌ ناو گوناه و تاواندا
له‌نێوان خه‌ڵتانی وون بوون و
خه‌یاڵی سروشتدا
‌‌‌له‌ناو پرسیاری کورد بووندا
له‌ناو ڕۆحی خاک په‌رستندا
هه‌زاران ساڵه‌ ئه‌ی خاک
خوێنت پێ ده‌به‌خشین
ڕۆحمان ده‌که‌ین به‌ ملوانکه‌و
له‌ گه‌ردنی دارسێوه‌کانتی ده‌ده‌ین
که‌چی تۆ هه‌ر لالووت بووی لێمان
ئه‌رێ قوربان تێر نه‌بوویت
له‌تامی خوێن..
له‌ خوێنی کوڕه ‌به‌خشنده‌کانت ..
له‌ خوێنی کچه عاشقه‌کانت ؟
به‌سیه‌تی قوربان
مێزه‌ر و چۆغه‌و
پشتێن و پێڵاوه‌کانیشت
خوێنی لێ ده‌چۆڕێ
پێم بێژه‌ گه‌وره‌م
تۆ که‌ی تێر ده‌بیت
له‌ خوێنی کوڕه‌ به‌‌خشنده‌کانت
که‌ی ؟!

چمکی تارای شه‌ریعه‌تی ڕۆژی هه‌ینی
کشابووه‌ نێوان ماتی مه‌مکه‌کانم
نه‌هامه‌تیم گوزه‌ر ئه‌کرد
زه‌ماوه‌نده‌و ئه‌سپی ڕێگا
له‌ نێوانی تاوێره‌کان، سمی ئه‌برد
تا، له‌ ناکاو بۆره‌ پیاوان
له‌گه‌ڵ زنگه‌ی تیغی شمشێر
له‌سه‌ر زینی هێز سالاری
ئه‌یان زرمان ناڵه‌و هاهۆی، دڕنده‌یی
له‌م کاروانه‌ی ترپه‌ی دڵما
که‌سێ نه‌بوو، لێم بگرێ ناز
له‌به‌ر ده‌می گاشه‌به‌ردی
ڕووه‌و هه‌وراز
له‌م ڕێگایه‌ ، قه‌تاره‌ی ڕێ
دڵی بوکێنیان گوشیم
،.،.،.،.،.،.
ئیتر له‌وێ
هه‌ناسه‌کانم سه‌غڵه‌ت بوون
هه‌ستم بوو به‌ گژه‌بای خه‌م
له‌ توێی له‌شما
پارچه‌ ، پارچه‌ی کراسه‌که‌م
شه‌که‌ت وێڵی نزای کردم
له‌ ڕازی گۆی مه‌مکه‌کانم
تیکه‌ ، تیکه‌ی ئازارێک بوون
ستیانه‌که‌م
دڕندانه‌ سوێو ناسۆری، ژه‌هری تاڵیان
ڕژانه‌ سه‌ر سینه‌ی تاساوی جه‌سه‌تم
شکاندیان په‌نجه‌کانم
له‌ناو ده‌ستی کۆیله‌یه‌تیم
له‌ دامێنی هه‌م کچێنیم
،.،.،.،.،.،.

له‌ ڕۆحێکی ڕوتو قوتی ژێر خه‌نجه‌را
ئه‌قیژێنێ
به‌سه‌ر دارستانی ڕه‌شا
به‌ عه‌ر،عه‌رو سنه‌وبه‌رو
سوورو سپی به‌رز چنارا
له‌م هاوارو گڤه‌،گڤی هه‌ناسه‌یه‌م
زریکه‌ی ژ نه‌دۆستانم ناسییه‌وه‌
هه‌ر سوێی ژانه‌و جه‌سته‌یه‌کمان ئه‌تاسێنێ
هاوارم کرد
هۆۆۆۆۆ، ژنه‌ کۆیله‌ی،ڕه‌شو سپی
له‌به‌ر لرفی زاڵمانا
ئه‌شێ شیعرێ، یا شاعیرێ
له‌ شیعرێکی سیلابی، نێو دیوانه‌که‌ی
ئه‌م ناسۆره‌ مان ببینێ
.،.،.،.،.،.،
ئه‌وا ئه‌شک له‌م ڕۆشتنه‌م
حه‌زم ده‌کاته‌ دانسقه‌و
تنۆکی ڕۆح ،له‌ حه‌سره‌تا
ئاورنگ ئه‌گرن، له‌سه‌ر پێڵوی چاوه‌کانم
بۆ ئه‌و ساته‌ی ده‌روونی گڕ له‌ گه‌رمه‌سێن
ووشک ئه‌بێ
چاو فرمێسکی پێ نامێنێ
بۆ ئه‌و ده‌مه‌ی، ئه‌یانه‌وێ
ترپه‌ی دڵم لێ کپ بکه‌ن
له‌ نێو دارستانی ڕه‌شا
هۆ دۆستانم،ده‌سته‌ خوشکی
ئه‌م جه‌نگه‌ڵم، بۆ ئه‌وجه‌نگه‌ڵ
کراسه‌کان دادڕاون
له‌ نوێژی ده‌م سپیده‌یا
بوون به‌ به‌رماڵ
.،.،.،.،.،.،

په‌پوله‌کان نه‌یان وێرا
نمایشی نازی جوانیان
له‌ تویێ سامایه‌کی ناسکا
به‌سه‌ر باڵای گوڵه‌کانا، بکه‌نه‌وه‌
تا، ڕازێکی
نییازی له‌ش
له‌ ژێر سێبه‌ ری ماندوبوون
له‌ماچ گرن ،به‌ تاسه‌وه‌
له‌م هاتنه‌م چی ئه‌بینم
هۆردویه‌ک ژن
ڕوتوو،قووتی بێ ناز له‌حه‌ز
حه‌ز له‌ ئاهیان
ئاه له‌حه‌سره‌ت
حه‌سره‌ت له‌هیچ
هیچ له‌ نییازی سره‌وتی ژن
.،.،.،.،.،.،
دره‌خته‌کان،نه‌یان وێرا
تنۆکێ له‌ لیکی له‌زه‌ت
بڕژێنه‌سه‌ر مه‌مکێکه‌وه‌
له‌نمه‌ی ڕازی گه‌ڵایه‌کی
به‌ژنیانه‌وه‌
که‌وا سڕی نێوان ده‌ستی
به‌زمی نازوو
ڕازی حه‌ز بوون
ئه‌ی داد هاوار
له‌ زه‌بری گێژه‌ڵوکه‌ی ڕق
ڕیزه‌ ، ڕیزه‌ خونچه‌ی هیوای
نازی جوانیان
له‌ گوڵزارا، چۆن گوڵه‌گۆی
مه‌مکه‌کانیان، هه‌ڵئه‌وران
.،.،.،.،.،.،