1
کانیلەیەک لە هەورەوە تا باخەکەی نێو ژوورەکەم،
دێت و لەگەڵ هاتنی دا
وەرزێک دەچێتەوە پیاسە و
قەفەزێک نامێنێتەوە،
بۆ خۆم و بۆ منداڵەکەم، تەنیاییمان و ژنەکەم.
وەختێک ئەو دێ،
سەفەر ناکەین بۆ هیچ کوێیەک،
وەخاتێک شنە پاڵتۆی کەسک دەخاتە بەر
پاییزی لێوار پەنجەرە،
بەرخی نێو قاڵییەکەی دایکم دەباعێنێ،
دەباعێنێ و
لە پەنا هەر قولانجە نیگایەکی برسیی،
ناوەکیی دا،
لەنگەرگرتنی خوڕڕەکە، کەم و کەمتر دەبێتەوە.
ئەز دەمگەلێکە دەزانم،
ئەم ئاوە دێ،
بە تام و بۆی جوایەزەوە،
بەڵام ئەوە تازە بزانم،
زانین تەنها ئەوە نییە،
ئەمەیشە کە دەریببڕی، وەک زانینکار.

2
ئەمشەو سبەی دەنووم لە پاڵ،
تەرمی زەمەنی مردوودا،
لەوێ بۆ خۆم تاریکیی کۆدەکەمەوە و
هەڵوەرینم دەستووتێنم.
قل قل باڵم دەردەهێنم،
هەموویشیان دەکەم بە سیگار،
دوو دوویش بە دیار ئەوینەوە دەیانکێشم،
ئاهەکانم.
گیرفانی ئاو تژیی دەکەم،
لە خەیاڵی خەونی نەبینراوم،
سەوڵی دەستە شکاوەکانم،
دەنێمە نێو زەریای خەم و
دێم و دەڕۆم، تا نێوەندی تۆ و من و خۆم.
لە کێدا نیشتەجێ ببم، ئەی بێکەسیی؟
     - لە تۆ یان زەمەن، یان لە تەم؟
     - لە با یان هەور، یان لە چیی؟
     - لە شوێن یان مانا، یان سەبر؟
     - دە پێم بڵێ؟
     - لە هیچ کوێیەک.

سێبەرم وەکوو تارماییی کەوشەکانم، لەگەڵم دێت،

شەقامەکان هەر لەوێدا دەمێننەوە،
وشەکانیش بەفرئاسا دەتوێنەوە و
سنگێک نییە، سەری من بناسێتەوە.
لە باخچەی قاڵییەکانم،
خونچەگوڵەکان پەشمووردەن،
ئەدی بۆچی پەپوولەکان هەڵنافڕن،
لە سەر گومەزی پیتەکان؟
     - تومەز لەوێ هێللانەیان چێ کردووە،
     بۆ نامە نەخوێندراوەکان،
     + بۆ منیش ئەی وەهمی دنیا،
ئەی کەسێک کە قەت ناتناسم...
دە کەواتە، با دەست پێ بکەین و بخۆینەوە.

3
دڵی وشە دەدەینەوە، بە نووسینەوە،
کاغەز ئاودەدەین بە پیت،
پاڵ بە درەختی ساڵەوە دەنێین و
دەڵێین: ماڵئاوا ئەی چاوەنۆڕیی.

4
هەموومان بە دیار مارشەکانی ونبوونەوە،
ڕا وەستابووین،
گۆرانیمان بۆ ئاو دەگوت،
لەوێ،
لە ژوورە ساردەکەی بەفردا،
هەوا فلووتی دەژەنی،
پیاوێک، پەڕەکانی باڵی کۆتری پاکنووس دەکرد،
ئاگر بە تەنها دانیشتبوو،
لە ژێر نێڵەی پشکۆیەک،
ئێمە لە بەفر ڕۆچووبووین،
وەختێک وشەکان لاربوونەوە، لە ژێر هەتاوی
نووسینەوەیاندا.

5
خۆم بە سێبەری قەوزەکانی
گۆمی وەرزا هەڵًناواسم،
بە گسکی یادەوەرییم
هەناسە لەترگرتووەکان کۆدەکەمەوە،
لە هەر پەرتبوونێکدا، حوزن لە ڕەهێڵەکان دەئافرێنم،
ئاهێک لە دوامەوە دێت؛
نازانێ کە لە نائومێدیی تێ پەڕیوم.

بێـــدەنــگ مـەبـە
دیومە گــەلـێ جــار
ڕۆڵــە لـەحـەژمەت مەرگی دایکا
دوورگەی نێـو دەریـاو بیابـان و
دەشتـی نێـو هـەوران تـەی کـا
دیومـە بلەرزآ دڵ لە تاو ئازار
خوێــنی چاو سەرکا و
بڕژێــتە سەر خاک، دوا تنۆکەی هێــز
نەمدی بۆ تــــــاوآ، لانەی هیوایەک
گیانێــکی تەزییو... بگرێــتە ئامێــــز
بەڵـــێ من دیومە
دڵـــۆپآ شەونم
کڵــپەی سووتانی
سەرتاپا شـارآ
بکوژێــنێـــتەوە
نــــەمدی بۆ تـــاوآ
سێــبــــەری خەونی وونی:
نێــــو سەراب ، بدرەوشێــــتەوە
دیومە گێــــژەن، سەری ڕووتی بنارێــکی
لە مێــــخەوە هەڵگرتووە..
دیومە ئاگر وەک ئەهریمەن
بە نێــــو شادەماری درەختا ڕۆچووە
نە من نە تۆ ..
نەماندیووە ، ماری برسی
پاسی ڕێـبوارێـکی نووستووی ژێــر دارآ بـێ
تۆش وەکو من کە نەتدیووە.. بۆ ناپرسی !؟

شــــــــــــە و
چاوی ماندووی شەوآ بانگی کردم :
" دەمآ سا ڵە بینایی چاوانم کوێرە و
ئاوی هەنگوینم لا تا ڵــە
لێ ئاخ !
خۆزگە ئەمزانی دڵی هەوری ئاسمانی
شۆخ وچاوی مانگ و ئەستێرەی شیرین
بۆچی هەردەم بە کــوڵ ئەگـریـن ؟

سووتان

هەوری ئاســــمانــێ نووستــووە
دوکـــەڵ لـە ئــاگر تۆراوە ،
دایکی شـــارێ کۆست کــەوتـــــووە
دار چنارێ، لــەخــۆوە ڕا بـەلایا دێ
چـــرای شیــعرێ ، کـــــز ئــەسووتـــــێ

نــەمـــــریـــی

گوڵیش هەر پیر ئەبێ و
..... ئەمرێ
وەلێ پێش مردنیان ،
لەسەر لەپی دەستەکانما
جێ ئەمێــــــنێ بۆنیان !

گەشبینم کە هێشتاکە ئەژیم

چەندی تر لە تۆز و قەهر و ژاوەژاوی
چەپگەردی وا ڕەزاگرانا لێوانلێو بم
لە تووڕەیی .. لە ڕەشایی ..
هێدی هێدی ڕەنگەکانی ئۆمێدم
لێ کاڵبنەوە ..
هێشتاکە ئێرە بۆ من :
باخچەی سبەینێیەکی شێدارە
ئەو باخچە کەسکانەی بە سانایی
ئەمگەڕێننەوە نێو باوەشی مناڵیم
مناڵیی : ئەو دەمەی جانتای پڕ کتێبم
لە پاڵ شیشەکانی" باخچەی گشتی "یەوە
فڕێئەدا و سەری چکۆلەم پێش خۆم
ئەبردە ئەودیوی بارەگای گوڵ دزینەوە ..
لە نێو باخچەدا ،تێر ..تێر خۆم ئەگەوزاند
دوو ..سێ ..چوار گوڵی تەمەنم ئەقرتاند
ئەمخستنە نێو جانتای سەفەرەوە و
بەرەو سەراب .. بەرەو ژیان هەنگاومئەنا !