|
٦\١٠\٢٠١٠
له گفتار و له
ره‌فتار.
سەلام عەبدوڵا
١-
بۆ کەناڵی KNN:
ئەوانە هاوڵاتی کوردستانیین، نەک پەنابەر!
ئیمڕۆ کەناڵی(knn) راپۆرتێکی لەبارەی ئەو کوردستانییانە بڵاوکردەوە کە
لە رۆژئاوای کوردستانەوە بەهۆی زوڵم و ستەمی رژێمی حکومەتی بەعسی سوریا،
روویان لە هەرێمی کوردستان کردووە.
ئەوەی لە میدیا حزبییەکانەوە دەیبیستین و دەیخوێنین ئەمەیە: (ئێمە
نەتەوەیەکین بۆ 4بەش دابەشکراوین....کوردستان وڵاتێکە). ئەمە راستە،
بەڵام کاتێ باسی هاوڵاتییەکی کوردستانی لە بەشێکی کوردستان روو لە
هەرێمی دەکەن، هەمان ئەو کەناڵانە بە حکومەت و پەرلەمان و حزبەکانەوە،
پێیان دەڵێن(پەنابەر).
لەڕاستیدا ئەو مرۆڤانە هاوڵاتی کوردستانین و هەرێم ماڵی باوکیانەو
هەموو مافی هاوڵاتییەکی هەرێم بە باشترین شێوە بۆیان دەستەبەر بکرێت،
نەک وەک پەنابەر مامەڵەیان لەگەلدا بکرێت. ئەوە چ شەرمەزارییەکە
کوردستانییەک بێت و بیەوێ لە هەرێم کار بکات، دەبێ یەکێک ببێت بە
کەفیلی؟!
ئەمە فاولێکە وەک ئەو فاولە کە لەبارەی ناوچە دابڕێنراوەکانەوە
دەوترێ(ناوچە جێ ناکۆکەکان).
ئایا ئەمەش ئەقڵ و زمانی عەرەبە شۆفێنیستەکانە یان عەقڵی کول و
خواروخێچى سیاسەتمەدارە کوردەکانە؟!
خۆزگا زمانتان راست بکەنەوەو لەم جۆرە دەربڕینە نابەجێیانە وازبهێنن.
----------------------------------------------------------------------------------------------------------
٢-
فیستیڤاڵی عەبدولمەجید لوتفی لە خانەقین.
لە 27/10/2010بنکەی رۆشنبیری لە خانەقین هەڵدەستێ بە بەرزراگرتنی یادی
لەدایکبوونی 104ساڵەی رۆشنبیرو بیرمەندی کوردستان(عەبدولمەجید لوتفی).
عەبدولمەجید نووسەری کۆچکردوو یەکێکە لە چیرۆکنووس بەناوبانگەکانی
کوردستان و عێراق. وەزارەتی رۆشنبیری هەرێمی کوردستان ئەرکی
فیستیڤاڵەکەی لەئەستۆ گرتووەو لە هۆڵی کلتووری خانەقین بەڕێوەدەچێت.
لەم بارەیەوە وەلی شەریف ئەندامی کۆمسیونی باڵای فیستیڤاڵەکە بە ئاسۆی
وت: دوێنێ کۆمسیونەکەمان کۆبووەوەو وەک رێزنانێک لە عەبدولمەجید لوتفی
و یادکردنی و لەچاپدانی بەرهەمەکانی سەرقاڵی رێکخستنی فیستیڤاڵەکەین و
خەریکی مێوانداری رۆشنبیرو نووسەر و کەسایەتییەکانین تا لە رۆژی
دیاریکراو ئامادە ببن و تا ئێستا کارەکانمان بە باشی و رێکوپێکی
بەڕێوەچووە. هەر وا لە درێژەی قسەکانی وتی: ئێمە بانگەوازی هەموو ئەو
نووسەران و رۆشنبیرانە دەکەین کە هەر نووسین و لێکۆڵینەوەو یادوەریان
لەگەل گەورە نووسەرەکەمان هەیە، بەم ئەدرەسە ئەلکترۆنیە (walisherifhussein@yahoo.com)
یان ژمارەی تەلەفۆنی(07708627280) پەیوەندیمان پێوە بکەن.
----------------------------------------------------------------------------------------------------------
٣-
خانەقین شاری ئاشتی و تەباییە.
هەواڵ: 4/10/2010
لە کۆبوونەوەی ئیمرۆ لە قائیمقامییەتی قەزای خانەقین، قائیمقام و
رێکخراوە مەدەنییەکانی شاری خانەقین هەموویان یەک بۆچوون بوون لەبارەی
ئەوەی بە فەرمی داوا لە حکومەتی هەرێمی کوردستان و حکومەتی ناوەند بکرێ،
خانەقین وەک شاری ئاشتی و تەبایی بناسرێت.
لەم بارەیەوە فەیروز عەبدولحەمید(لێپرسراوی ماڵی رووناکبیری سەلام)و
پەخشان محەمەد عەلی(رێکخراوی حەونی منداڵان) وتیان: زۆرم پێخۆشە
شارەکەمان بە سمبۆلی ئاشتی بناسرێت.
قائیمقامی شارەکە وتی: ئێمە پێشنیارەکە وەک ئیدارەی خانەقین ئەو
پێشنیارە پەسەند دەکەین کە خانەقین بکرێت بە شاری ئاشتی و تەبایی.
ساڵهای ساڵە لەم شارەکەمان هەموو نایفە و ئاین و مەزهەب ونەتەوە پێکەوە
دەژێن و تا ئێستا هیچ گیروگرفتیان لەنێوان درووست نەبووە. داواکارم لە
هەموو لایەک پشگیری لەم پێشنیارە بکەن، چونکە بەڕاستی خانەقین شاری
ئاشتی و تەباییە.
هەر هەموو رێکخراوەکانی کۆمەڵگەی مەدەنی - خالد باجەڵان(رێکخراوی
کارکردن لەپێناو ئاشتی)، زاهر تاهەر(رێکخراوە دیموکراتییەکان)، گۆران
جەبار(رێکخراوی گەشەپێدانی ئەرتەمیتا)، رێکخراوی کەڵات، رێکخراوی ئاشتی،
مەها عەلی حەداد پسپۆڕی کۆمەڵایەتی و دەروونناسی و سەرپەرشتیاری
پەروەردەیی لە بواری کۆمەڵایەتی، هیوا ئیسماعیل(کۆمەڵەی خاوەن
پێداویستییە تایبەتییەکان، نەبیل موسی پەیمانگای وەرزش)، خەلیل
حوسین(رێکخراوی ئاشتی مرۆیی) لەسەر ئەم داواکارییە کۆک بوون.
ماڵپه‌ڕی سه‌‌لام عه‌بدوڵا
|
