١١\١١\٢٠١٨
تەنزی خۆشەویستیی:
لە ژێر
(موبەڕیدە)دا.

جەلال قادر
ئەو کاتەی خوێندکار بووم لە زانکۆی بەغدا. یەکێ لە خوێندکارەکان کچێکی
بچکۆلانە و قشت و جوان بوو. بەلام وەک کۆترە کێو دەستەمۆ نەدەکرا.
چەندین قوتابی قۆز و جوان و زەنگین و قسەخۆش داویان بۆ دادەنا دەستگیر
نەدەبوو.
ڕۆژێکیان پۆلێک قوتابی بەدەم پێکەنین و شۆخییەوە مەرجیان لەگەل کردم
ئەگەر دڵی ئەو کچە بدزم خەلاتم بکەن. مامۆستای زانکۆش بەڵێنیدا
هاوکاریم بکات ئەگەر توانیم ماچێکی بکەم.
منیش وتم: ئێوە بەو جوانی و کراس و قاتە لەبەرە گرانبەهایە نەتان
توانی، من بەم جڵە شڕوهەژارییەم چیم پێدەکرێت!.
قوتابییەک وتی: دڵ وەک مێش وایە بەسەر گووش دەنیشێ...
بەهەربار بەڵێنمدا هەوڵی خۆم بدەم.
لە زانکۆ لەپشتی موبەڕیدەکان قوتابییەکان یەکتریان ماچ دەکرد. منیش
لەگەڵ یەکەم دیدار، پیاسەیەکم لەگەل کرد بەرەو لای موبەڕیدەکان.
پێمووت: دەزانیت من حەز بە گۆرانیەکی خاڵقی دەکەم کە دەڵیت ؛ گۆزەی
سووری سەرشانی...یارم هاتوە لە کانی...بە چارۆگە دایپۆشێ لەرە لەری
مەمکانی؟
وتی: جا تووخوا ....کەی ئەمە ڕاستە کچ بچێت ئاو بێنێت و پیاو بیخوات...
- من مەبەستم لە جوانی دیمەنەکەیەتی...
+ پیاو وەک گورگە...هەردەیانەوێت قەپ لەژن بگرن!.
لە دڵ خۆم وتم: ئەی باوكە ڕۆ ئەمە بەچی ماڵی دەکرێ؟
لە پاش چەند ڕۆژێک هاوپۆڵەکانم لێیانپرسیم: ها شێر بووی یان ڕێوی؟
وتم: ئەمە دڵی دەڵێی بەردە...بەچی نەرمی کەم..
مامۆستاکەم وتی : کوڕی خۆم...ئەسپی کێوییش زین دەکرێت....بڕۆ سواری
بە...
هەموومان دامان لە پێکەنین...پاش چەند ڕۆژێک وتم: بۆچی ڕاستییەکەی
پێنەڵێم...بەڵکو پێکەوە کلاو بکەین سەر مامۆستا و قوتابییەکان.
لە ڕێگە تووشم بە تووشی کچێکی قسەخۆشی بەغایی.بوو(سەنا)..یەکسەر
پێیوتم: ''ها بەختیار...ش صار؟''.
وتم : بۆ تۆش بە مەسەلەکە دەزانیت..؟
-گشت جامعە دەزانێت و چاوەڕوانی چاڵاکی تۆن؟
+ وەلا ...زەحەمەتە...
وتی: من یارەمەتیت دەدەم..
+ چۆن چۆنی؟
وتی: با پێکەوە پیاسە بکەین، هەر کە ئەوت بینی، پێکەوە دەیکەین بە
گاڵتەوگەپ و پاشان من خۆم کارێک دەکەم ئەو دڵەی بڵەرزێنم.
کچە دڵڕەقەکە بەرەو ڕوومان هات...من وسەنا کردمان بە پێکەنین
وشۆخی...ئینجا سەنا پێنووسێکی پەڵکە زێڕیینەی لە جانتاکەی دەرکرد و وتی
: ئەمەش پێشکەش بە تۆ!
+ بەلام ئەم پێنووسە گران بەهایە...
بە پێکەنینەوە وتی: خەمت نەبێت ڕۆژی سەد گەنج کەر دەکەم و دیارییم بۆ
دەهێنن!
خەریکبوو بپسێم لە پێکەنین...کچە دڵڕەقەکە بە مۆنییەوە هاتە لام و وتی:
ئەوە بەچی پێدەکەنن..؟
+ (سەنا) ئەم پێنووسە جوانەی پێبەخشیم.
- بەچ موناسبەتێک...
+ ئێرە زانکۆیە...برادەری کچ و کوڕ ئاساییە..
بە تووڕيییەوە وتی : بەڵی ...بەڵێ...
لە موبەڕیدەکە نزیک کەوتینەوە...وتم : دەزانیت تۆ زۆر جوانیت؟ تەڵێک
مووی تۆ بە كچی دونیا نادەم.
وتی: ئەوە تۆ باسی چیدەکەیت...
+ من خەریکە دڵم بتەقێ...ئەگەر تۆ بەڵێنم بدەیتێ دەتوانم لە خوێندنش
سەرکەوتووبم.
وتی : منیش تۆم خۆشدەوێت...بەلام بەو شێوەیە نییە...
+پێویست ناکات شێروپلنگت بۆ بهێنمەوە...ئەم ساڵ کۆتایی
زانکۆیە...دەمەوێت ئەو دەرفەتە لەدەست خۆمان نەدەین.
- بیرێکی لێدەکەمەوە...
تا سبەی چاوەڕوانت دەبم....
بۆ سبەینێ قوتابیەکان بۆ موحازەرش نەچوونە ژوور بەدزییەوە هەموو
چاودێری من و ئەو کچە دڵڕەقەیان دەکرد.
کچەکەم بردە پشت موبەڕیدەکە و بە پێکەنینەوە خێرا ماچێکم کرد... ئەویش
ئەوەندە بەتووندی باوەشی پێماکرد خەریکبوو بخنکێم.
لەپڕ (سەنا) کچە بەغاییەکە هەڵهەڵەی لێداو... وتی : پیرۆزە...
قوتابییەکانش پێکڕا چەپڵەڕێزانیان کرد... مامۆستاکەشم دەستی هەڵبڕی وبە
ئیشارەت دە دەرەجەی پێشکەش کردم.
کچە دڵڕەقەکەش سەری سووڕمابوو...لە نیگەرانی و شەرما خۆی گرمۆڵەکە کردە
ژێر موبەڵیدەکەوە!*
________________________________________
* وشەی
موبەڵیدەم لا جوانتر بوو بۆ تەنزەکەم.
ماڵپهڕی جهلال قادر
|