٢٢\١١\٢٠١٣

لە لایەن (پارتی)یەوە تا ئێستا سیاسەتی (بانێکە و دوو هەوا)یە!

شوان عوسمان    

لە ئەزموونی خەباتی گەلاندا، نەزمی قۆرغ کردنی دونیا دەمێکە مەوسیمی تەواو بووە و دوایی هاتووە، هەروەها دەستەواژەی پێشرەو و رابەری کردنی کۆمەڵ و کۆمەڵگاکان لە لایەن یەک پارتی سیاسی و یەک ئایدیۆلۆژیادا سەردەمی بەسەرچووە، جارێکی دیکە ئەستەمە ئەو چەمک و دەستەواژانە کە لە سەردەمی پێشوو شکستیان هێنا بوو، لەو قۆناغە پێشکەوتووەی ئەمڕۆکە و کۆمەڵگایەکی شارستانیدا ، بتوانرێت خۆیان وەکو جاران بە بەرگێکی تازە دووبارە بکەنەوە..

ئەگەر ئاوڕێک لە رابردووی بزووتنەوە چەپەکانی دونیا بدەینەوە کە لە هەولی ئەوە دابوون جیهان بە ئایدیالۆژیەکانیان رەنگرێژ بکەنەوە، بەڵام بۆیان نەکرا بەردەوام بن ئێستاش زۆر بە کاڵی ئاسەواریان ماوەتەوە، ئەوە خۆی لە خۆی نموونەیەکی زیندووە ناکرێت بیریان لێ نەکەینەوە، هەروەها پێویستە ئەزموونیشیان لێ وەربگیرێت، ئەگەرنا ئاسودەیی ناگاتە بەردەم ماڵی هیچ مرۆڤێک، هیچ مرۆڤێکیش ناتوانێت بە بێ ئازادی خۆی و ئیرادەکەی بە ئازادی تام لە ژیان و ئاسودەیی بکات..

لە هەرێمی بەرتەسکی خۆشمان ئەزموونی (پ د ک) و (ی ن ک) و (ح ش ع) تا دەگاتە (پ ک ک)ش، سەرجەم ئەو بزاڤە چەپ و راستانەی هەر لە یەکەم دەرفەتی سەرهەڵدانیاندا وەکو پارتێکی پێشڕەو بەسەر ئیرادەی مرۆڤی ئێمە و کۆمەلگای ئێمەدا ببوونە واقیعێک، بەڵام هەموومان باش دەزانین لە هەلومەرجی تازەدا ئەوان ئێستاکە لە کوێی هاوکێشە سیاسیەکان دان..

ئەوە دوێنێکە بوو هەریەکە لە خەیاڵی ئەوەدا بوو واقیع لە لایەن خۆیەوە قۆرغ بکات، هەرچەندە تا ئەمڕۆکەش ئەوان لە هەولی جێبەجێ کردنی ئەو خەونەدا وازیان نەهێناوە، بەڵام دوای ئەوەی جیهان رووبەرووی ئەو هەموو گۆڕانکاریە فیکری و تەکنەلۆژیایانە بووەوە هەر هەموویان دووچاری نسکۆو هەرەسێک هاتن، کەچی هێشتا هەروەکو نە بایان دی بێت ونە باران، کورد زۆرجار دەلێت ئێمە ئەزموون لە رابردووی خۆمان وەرناگرین، ئەوە هەر کەلتوورێکی کۆن نیە بەلێ لە هەموو دەورو زەمانێکدا ئەو دەستەواژەیە دووبارە دەبێتەوە، ئەو زۆر راستە " ئێمەی کورد هەرگیز پەند لە ئەزموون و لە رابردووی خۆماندا وەرناگرین.."، هەمیشە لەو روانگەیەشەوە دووچاری نسکۆی گەورە و شکستی دیار دەبینەوە کە کار لە مەسەلە نەتەوایەتیەکانمان دەکات، هەر ئەوەش بۆتە هۆی ئەوەی هەمیشە بێ قەوارە و بێ کیان و بێ ناسنامەش بین، هەروەها لە بەرامبەر فاکتەری مێژووشدا رۆلێکی پۆزەتیفمان نەبێت...

لە رۆژهەڵاتی ئەو سەردەمەماندا زۆر گۆڕانکاری گەورەو رووداوی گرنگ هاتوونەتە پێشەوە، کەچی نە پارتە سیاسیەکانمان ونە سەرکردەکانیشمان ئەزموون لەو وەرچەرخان و گۆڕانانەدا وەرناگرن، تا ئێستا ئەوان نەگەیشتوونەتە ئەو بیرورایەی کە دەسەڵات نە مولکی کەسێکە و نە میراتی بنەماڵە و هێزێکە ئەگەر بێت و لە رابردووشدا رۆلێکی ئەوتۆیان هەبوو بێت، لە سەردەمی ئەمڕۆکەدا هیچ کەسێک ناتوانێت متمانەی خۆی بە دەسەڵاتەوە تاسەر مسۆگەر بکات، چونکە دونیا گۆڕاوە خەڵک ئازادی و فۆرمی دیمکراتی دەوێ، ئەوە هاوڵاتیانن لە رێی هەلبژاردن ودەنگ نەدانەوە چارەنووسی خۆیان دیاری دەکەن، کەوابوو قۆرغ کردنی گۆڕەپان ودەسەڵات لەوە دەرچووە وەکو میرات وکەلەپووریک بۆ رۆژگارێکی زامن کراو بمێنێتەوە..

هاوکات پارتەکانی لای خۆمان دەبێت ئەوە باش بزانن هۆشمەندی کاتی بەسەر دەچێت و لەگەل کات هەموو شتێک کاتی تەواو دەبێت و هەندێک جار خۆنوێکردنەوەش دادی نادات لە قەیرانەکانی رزگاری بکات، ئەوەی دوێنێ تەواو بوو با بیر لە بەیانیەکی تازە بکەینە، ناکرێ تاسەر لە خولیای ئەوە دابن کە یەک عەقلیەت و یەک ئایدیۆلۆژیا تەنها بەس بێت بۆ بەڕێوەبردن و دەسەڵات سەقامگیر کردن...

هەرێمی کوردستان تا ئێستا نەبووەتە بە هەرێمێک کە یاسا سەروەر و دادپەروەری و سیمای دیمکراتیش تێیدا بەرقەرار بێت، هەروەها سەرۆکی هەرێم خۆی تا ئێستا لە ناو هەرێمدا نەیتوانیوە ببێتە سەرۆکێک کە نیوە یان زیاتر لە رێژەی هاوڵاتیانی هەرێم بە سەرۆکی خۆیانی بزانن، هەروەها ئەوەتە ئەوان لە ناو هەرێمدا متمانەی خەڵکیان بە پلەیەکی باش بەدەست نەهێناوە و کێشەکانی ناو پارتەکەی خۆیان چارەسەر نەکردووە، چۆن دەتوانن بیر لە رۆژئاوا و باکووری کوردستان بکەنەوە تا لەوێ بتوانن بە گوێرەی عەقلیەتی خۆیان هۆشمەندی و دەسەڵاتی ئەوێ قۆرغ بکەن...

(پ د ک) بەر لەوەی بیر لە دەست تێوەردان لە ماڵ و سیاسەتی پارچەکانی دیکە بکاتەوە با ماڵەکەی خۆی دەست لێ بدات ورێکی بخاتەوە، هەق وایە پەند لە رابردوو و مێژووی خۆی وەرگرێت، ئەوان راستە سەرکردەی هەموو کورد بوون، هەروەها سەرۆکایەتی شۆڕشێکی گەوەری کوردیان لە باشوور دەکرد و جێی متمانەی سەرجەم خەڵک بوون، بەڵام ئەوە کاتێک بوو کە هێشتا هەڵەیان نەکرد بوو و متمانەی خەڵکیان لە دەست نەدا بوو، هەر ئەوەش بوو دووچاری هەرەسێکی گەورە کردنەوە کە هەرگیز جارێکی دیکە ئەو دەرفەتە زێڕینەیان بۆ نارەخسێتەوە هەروەها گورزێکی گەورەش بە چارەنووسی نەتەوایەتی گەلی کورد کەوت، بۆیە خەلکیش متمانەی پێیان نەماو بیری لە ئیرادەی تر کردەوە..

ئیتر ئەو رۆژە رۆیشت مێژوو جارێکی دیکە بە هەمان شێوە و رەنگەوە خۆی دووبارە بکاتەوە، لەوانەیە لە قۆناغێکدا یان دەفەتێکدا دروست بێت، هەلومەرجێک بڕەخسێت جومگەکانی ئەوساکە بکەونەوە بزاوتن وباڵ بگرن بۆ ماوەیەکی دیاریکراو ئەو خەونە ببێتە واقیع، بەڵام زۆر سەختە وەکو جاران هەموو شتێک بگەڕێتەوە سەر ئەسلی خۆی ، چونکە ژیان گۆڕاوەو خەڵک گۆڕاوە وهۆشمەندی وبیرمەندیش وەکو خۆیان لە شوێنی خۆیان نەماونەتەوە..

ئەوان بەر لە چەند ساڵێک گلەییان لە (پ ک ک) دەکرد کە دەیەوێت دەست لە کاروباری سیستم و دەسەڵات و سیاسەتی باشووری کوردستان وەربدات لە سۆنگەی ئەوەشەوە چەند جارێک شەڕیان لەدژ بەرپا کردن، کەوابوو ئەدی ئەوان بە چ بۆنە و هۆکارێکەوە دەست لە کاروباری رۆژئاواو باکوور وەر دەدەن، ئایا ئەو سیاسەتە هەمان سیاسەتی (بانێکە و دوو هەوا)یە دەیگرنە بەر، بۆ ئەوان حەرام و بۆ خۆیان حەلال، پێشوازی نەکردنی زۆرینەی خەڵکی (ئاماد) لە سەرۆکی هەرێم خۆی لە خۆی نامەیەکی رەتکردنەوە بوو بۆ جەنابی، هەروەها وتارە مێژووییەکەی بەرێز (عوسمان بایدەمیر) وەڵامێکی راستەوخۆ بوو بۆ دەست تێوەرنەدان لە کاروباری ناوەخۆی (ئامەد) و کوردستانی باکوور..

پێویستە سەرۆکی هەرێم بەر لەوەی بیر لە قۆرغ کردن و جوان کردنی ماڵی برا کوردەکانمان بدات کە خۆیان بەوە رازی نین و خۆیان بە خۆیان لە هەولی جوان کردندان، ماڵی خۆی لە سلێمانی و هەولێر و کەرکوک و بادینان و بەشە کوردیەکانی دەرەوەی هەرێم جوان بکاتەوە کە هێشتا نەهاتوونەتەوە سەر هەرێم و خۆمان ئامادە بکەین تا لەگەل یەکتر چۆن رووبەرووی داهاتووی ترسەکانی ناو هەرێم و دەرەوەی هەرێم بکەینەوە...

٢٠\١١\٢٠١٣ - هۆڵەندا

ماڵپه‌ڕی شوان عوسمان