*

بەرزان هەستیار

" هەر " با "یەک تەنوورەکەی هەڵدایتەوە "....
داوای پێناسەکەی لێ بکە
نەوەک پیاوێکی دەبەنگ بێ و
کە خۆی بەتاڵ کردەوە ،
بڵێت ، ئەرێ خەوت نایەت ؟
*******
" بەر لەوەی خۆت بخزێنیتە بن هیچ بەتانییەک "
دەستێکی لێ وەردە ، بزانە ....
وەکو ئیحساسی خۆت نەرمە !
*******
"پیاوێک توند گوێچکەت ئەگەزێت "
بەڵام ڕەنگە ، سەد جار دابێتی بە ڕۆحی خۆیەوە
پێش ئەوەی بیر لە لەزەتی گوێچکەکانت بکاتەوە
*******
قەت بیرت بۆ ئەوە چووە ...
" ئەو پارووە نانەی ئەیجوویت " ،
دڵی پیاوێکە ، هەتا ئێستاش نەیوێراوە
لەجارێک زیاتر خۆشەویستیی بکات ؟!
*******
" " ئەو " ت خۆش ویست
وەک ئەوەی شیعرێک بنووسیت
ڕەنگە " ئەو " وەک ئارد بڵاو بکەیتەوە ،
بەڵام شیعرەکە ، نا "
*******
" ڕوومەت بە کڵاوە خوورییەکەت دامەپۆشە "،
پیاو و ڕەشەبا وەک یەک هەڵئەکەن
*******
" چاکەت و بوتڵە ئاوەکەت جێ ئەمێنێت "
تا دێیتەوە ، چاکەتەکەت لە باوەشی پیاوێکدایە و
بوتڵە ئاوەکەشت خاڵیی ، بە لێویەوە
*******
" کە ئەزانێ لێی تووڕەیت
ڕەنگی مردووی لێ ئەنیشێت "
چونکە تێ ئەگات ، ئەو شووشەی عیشقەی.....
بە کاڵ فامیی خۆی شکاندی
مەحاڵە لەگەڵیا کۆی بکەیتەوە
*******
" تۆ ، کیسە گەنمەشامییەکەت لێ ئەڕژێت
کە زەنگێکی ئەوت بۆ دێت " ،
بەڵام نازانیت ئەو ساتە ، چی ئەڕژێتە ڕۆحی ئەو
*******
" یەخەی کراسەکەت بۆن ئەکا " و
ئەوەت بیر ئەکەوێتەوە
کە تۆ ژنێکی لە بخوورد ،
ئەویش پیاوێک لە داگیرسان
*******
" کە باوەش ئاوەڵا ئەکەیت
چ شتێکی بیر ناچێتەوە "
یەک پارچە ئەبێتە دارستانێک لە وتن ،
نزارێکی بەرین لە بێ دەنگیی !
*******
" کە دڵت کردە خێر" ،
کەسێکت بیر نەچێت ؛ دراوسێی دەستە چەپ و
دەستە ڕاستی شیعرەکانت !
*******
" ئەویش درەختەکانی
بە ناوی تۆ ناو ناوە " و
گەڵا وەریوەکانیش ، خۆی !
*******
" ژێر کراسە مۆرەکەت دائەماڵی و
ژیان لەبەر ئەکەیتەوە " ؛
بەڵام ئەفسووس ، کەس پێ ڕاناگا بۆت بدوێ
تا خۆت بۆ دەنگیی وەرخەیت
*******
" ئافرەتێک وەک ڕستە کلیل بە کەمەری پیاوێکەوە "،
چ قیامەتێکی جوانە !!!
*******
" گەر عاشق بای ، ئەتزانی بۆ
هەر کاتێ کە ئەیبینیت ، .....
ناوی خۆت بیر ئەچێتەوە ؛
شەپۆلی چاوەکانی زەینت ڕانادەن "
عیشق خۆی ، ئەفیوونێکی شیرینە
*******
" بۆنی دێتە بەر کەپووت و
لە هیچ شوێنێکیش نایبینیتەوە " ،
من دڵنیام جێیەک هەیە نەگەڕاویت ، ..ژێر ستیانەکەت !
*******
" هەموو شتەکانت بژمێرە "
پارە و نامە و چی و چی ،
ئەو لەگەڵ هیچ شت و ژمارەیەک تێکەڵ نابێت
*******
" لە پاش ئەوەی تێر سەرنج لە چاوەکانی ئەدەیت
بە دەست خۆت نییە .....
ماچەکانت بەلاش بکەیت یان نا ! "
*******
" چەند حەزی لێیەتی بتخاتە بن چاکەتەکەی " و
تاڵ بە تاڵی تووکی سنگی بژمێریت و
دڵۆپ .. دڵۆپ ، هەموو شەونمی ئاهەکانت بخواتەوە
*******
"پەنجەکانی ئەو نین تێکستێکت بۆ ئەنووسن "
ئەوە خۆتیت حەرفەکان دەستەمۆ ئەکەیت و
ئەویش لە ژێر ئەفیوونی عیشقا ؛ بێ بڕست
*******
" وەک ئەوەی بچێتە بەر ئاوێنە دێتە بەر تۆ و
یەخەی کراسەکەی ڕاست ئەکاتەوە و
بۆینباخەکەی چاک ئەکا و
ئینجا دڵی نایەت ، بچێتە دەرەوە ، ئەوڕۆش "
*******
" بەو کراسە سنگ داچەقاوەتەوە "
منیش ئەتخەمە زەینی شیعرەوە
*******
" لە هەر شوێنێک بتبینن ، پیتەکانی ناوی ،....
بیست ئاوڕت لێ ئەدەنەوە " و
بیست جاران تۆش ، لە خۆشییان سەرسم ئەدەیت
*******
گوارە یاقووتییەکانی تۆش.....
" لە ملپێچە ژەنگییەکەی ئەو زاڵمترن "
بێ ئەوەی گوێ بدەنە ئەو ،
نەرمە گاز لە پەڕەی گوێت ئەگرن
*******
منەت مەکە ،
" ئەو ، هەموو ژیانی گڵۆپی سەوزی بۆ تۆ و
سووری بۆ هەموو کەون پێ کردووە "
*******
" کراسە گوڵ زەردەکەت ، کورت بێتەوە و
تا سەر چۆکت بێت یان نا "
پیاوە چاو زەردەکە ،.....
شەرم لەوە ناکات تا خوار چۆکت بێت ؛ خوار چۆکت
*******
"پێیەکت لە نێو دنیایەو
پێیەکەی ترت لە نێو ئەو " ،
زۆر دەبەنگیت ، بۆ دنیا دەست لەو هەڵگریت
*******

" باران تاو نا تاوە دەستەکی دەگەیەنێتە بەلەکت "و
کەچی تۆ نەفامانە بۆ ئەو ئەگەڕێیت
من ئەڵێم تۆ ، نە ، بۆنی باران ئەناسی و
نە، بەرامەی شەیدایی ئەو
*******
" لەسەر پشتی ڕا دنیا دیارە " ؛
کافرباب ، تۆ سەر پشتی خۆت نابینیت
پڕە لە هەسارەی تازە ؟!
*******
" هەورێک لەسەر سەرتە زۆرت کەیف پێ دێت و
حەز ناکەیت ئاوا بێت " ؛
لێت ناگرم ، ئەتو لە ڕەش داگەڕانی ئەو تێ ناگەیت
*******
" ئەوڕۆ کراسێکی فستقیی لەبەر ئەکەیت و
سەر لە ژیان ئەشێوێنیت " ،
زۆرزان ، ئەزانیت "ژیان" خۆی نێرە و
زوو دێت بە چۆکا
*******
" ئەوە ، کەی زرنگییە ، بزانیت
هەموو ڕۆژێ دڵی ئەو چەند جار لێ دەدا و
چەند جار دەپژمێ و ......
چەند جغارە دەکێشێ " ؛
ئەگەر ئازایت ، بزانە دڵی پیاو
جێگەی چەند ژنی تیا ئەبێتەوە !!

تێبینی :
* لە دوا لاپەڕەی ژمارە "148 "ی هەفتەنامەی " ڕەخنەی چاودێر " و لە 5/1/2009 دا خاتوو " نیگار نادر " چەند بەشێکی لە قەسیدەی " بۆ ئەوەی هەرچی هەتە و نیتە بە من بچێ " بڵاو کردەوە و ئەم شیعرەی منیش ئیش کردنە لەسەر چەند کۆپلەیەک لەو چەند بەشەی قەسیدەکەی ئەو و وێنەی تازەیان لێ دروست کراوە و هەوڵیشم داوە کەم تا زۆر بۆنی قەسیدەکەی خاتوو "نیگار "ی پێوە بمێنێت.
* ئەو دێڕ و کۆپلانەی لە ناو کەوانەدان یان وەک خۆی لە شیعرەکەی خاتوو" نیگار نادر " وەرگیراون ، یان دەستکاریی کراون و ئیشیان تیا کراوەتەوە .

کانونی دووەم و مارتی ‏2009‏‏
کۆلن / ئەڵمانیا
bhastiar@yahoo.de