|
٢٥\٣\٢٠١١
لە نێوان رۆشنبیر
و حیزب و بزووتنەوە راستڕەوەکان و بەرەی چەپ.
سەلام عەبدوڵا
کارو بازاڕ چارەنووسسازترین ناوەندی ژیانی مرۆڤە لە گشت سات و سەردەمێک
و حکومەت بە روونی کەرتی تایبەت بەهێزدەکات(قووڵکردنی گەندەڵی،
فەرهودکردنی سەروەت و سامانی خەڵک، بەهەرزان کڕینی هێزی بازوو، گرانی،
هەژاری و درووستکردنی مافیای خانوبەرە) و ئۆپۆزیتسیونی ناو پەرلەمانیش
هەمان سیاسەتی ناوبراو دەپارێزێ و کار بۆ بەجێهێنانی ستراتیژی سەرۆکی
عولەمای ئیسلامی جیهان پ.د عەلی قەراخی دەکەن(ئینشەڵڵا ئابووری
کوردستان بەرەو بازاڕی ئازاد هەنگاودەنێت!). هەردوو لایەن هاوڕان،
بەڵام بۆ گاڵتەکردن بە ئەقڵی"مێگەل"، لافوگەزافی عەدالەتی کۆمەڵایەتی
لێدەدەن کە تا ئەم چرکەیە تەنها قووڵکردنی جیاوازی چینایەتی و دەریایەک
لە ئازار و بەدبەختی بۆ هەژاران لێکەوتووە. من لێرە هەوڵدەدەم وەهم و
پلانەکانی دەوروبەری کارو بازاڕ دەربخەم و بە سەرڕاستی درێژە بە پەیام
و ئەرکە رەزاقورس و بێزارکەرەکەم دەدەم.
فرەڕەنگی.
لە سەرای"ئازادی"، مەلاکان بەدەم بانگەشەی جیهاد و نوێژەکانی
هەینی"بەرگری...رەوا..."، فاروق رەفیق هاوار دەکات...
دەیگۆڕین....دەیگۆڕین... دەیگۆڕین...بژی ئازادی... بژی ئازادی... بژی
ئازادی و لەگەلیاندا بەختیار عەلی وەک رۆشنبیرێکی"سەربەخۆ"باسی مەترسی
شۆڕشی مارکسییەکان و دووپاتی ئیرادەی نیتشەوی بزووتنەوەکە دەکات و
دەڵێ(مارکسیەکان کێشەیان لەگەل ئەدەب و هونەر هەیە). ئەی ساراماگۆ،
ماکسیم گۆرگی، داریو فو، گولسورخی، عەبدولمەجید لوتفی، گۆران، نازم
حیکمەت، بریخت، نیرۆدا، گارا، لۆرکا و سەدان ئەدیب و هونەرمەندی جیهانی
بەری کامە قوتابخانەن؟!)؛ئەم بەڕێزە لە لێدوانێکى تایبەت بەماڵپەری NRT
وتی"هەستدەکەم لە ئاستێکى دیاریکراودا ئەو وشیاریەى کە ئێستا لەناو
کۆمەڵگادا هەیە، من و چەند نوسەرى تر لە رێگەى کارو نوسینەکانمانەوە
کاریگەریمان لەسەر ئەم وشیارکردنەوە هەیە، چونکە هەمیشە نوسەر پیاوى
وشەیە و کەرەستەى سەرەکیش بۆ گۆڕینى دونیا وشەیە)
لەتەنیشتیەوە"رۆشنبیرێکی"بێلایەن"دەڵێ(دوای روخاندنی
مارکسیزم...!)و"سەرۆک" د. کەمال میراودەلی لەسایەی دەسەڵاتی بنەماڵەی
پاشاکانی بریتانیاوە هاتووەو دژ بە"مێردەزمەی"کۆمونیزم دەدوێ و لەگەل
دەسەڵاتی بنەماڵەیی بەراوردی دەکات و چۆن هەردووکیان بەسەرچوون و
باویان نەماوەو تازە ناتوانن سەرهەڵبدنەوە. پاشان نەوشیروان موستەفا"
کارێزمای فرەڕەنگی"وەک یەکەم سەرۆک لە رۆژی نەورۆز((لەناو جەماوەر وون
دەبێت))، ئەمیش لەبیری ناچێت بەبۆنەی نەورۆزەوە بڵێ: (ئەم راپەڕینە بۆ
رێکخستنی ماڵی کوردە لەسەر ئەساسی عەدالەتی کۆمەڵایەتی).
وتەبێژی ئەنجومەنی سەرای"ئازادی"دەفەرمێ: ئه‌نجومه‌نی کاتی مه‌یدانی
ئازادیش پشتیوانی له قسه‌کانی مامۆستا عه‌لی باپیر ده‌کات و به قسه‌ی
جه‌ماوه‌ری ده‌زانێت.
له لێدوانێکیدا بۆ کۆمه‌ڵنیووز ناسک قادر وته‌بێژی ئه‌نجومه‌نی کاتی
مه‌یدانی ئازادی ڕایگه‌یاند: ئێمه پشتیوانی له قسه‌کانی مامۆستا
عه‌لی باپیر ده‌که‌ین، قسه‌کانی به‌ڕێزی قسه‌ی جه‌ماوه‌ری خۆپیشانده‌ر
بوون و له خزمه‌تی ئه‌م بزووتنه‌وه جه‌ماوه‌ریه‌دان. وته‌بێژی
ئه‌نجومه‌نی کاتی مه‌یدانی ئازادی وتیشی: به داخه‌وه ده‌سه‌ڵات فێر
بووه که دژی ئۆپۆزسیۆن بن و هیوادارین که مامۆستا عه‌لی باپیر و
به‌ڕێزانیتریش پشتیوانی زیاترى ئه‌م بزووتنه‌وه جه‌ماوه‌رییه بن.).
دوا هەواڵەکان وایان راگەیاند کە عەشرەتی(سورچی) هاتووەتە پێشەوەو
یەکڕیزی لەگەل فەتواو مەعریفەتی پرۆفیسۆر و دکتۆر عەلی قەراغی
وتەوای"سەربەخۆکان" دووپاتدەکەنەوەو دەبن بە زەمانەت بۆ ئەوەی بە
شەرعییەتی ناشۆڕشگێڕ، مەترسی ترسناکتر(شەرعییەتی شۆڕشگێر)
دووربخەنەوە....!
مەریوان وریا قانع بەو دیمەنە راستڕەوە کە شوێنەکەی سەرای"مێگەل"ەکانە
دەڵێ: (سەرای ئازادی شوێنێک بۆ خەون و ئازادی)!
فرەڕەنگی راستڕەوەکان!
نە سەرۆکی هەرێم، نە سەرۆکی حکومەت و نە زۆرینەی پەرلەمانی کوردستان
مارکسین و نە حیزبێکی شوعی بەهێزو نە بەرەیەکی چەپ لە گۆڕەپانەکە هەیە
و نە مارکسیزم بووە بە هۆی ناعەدالەتی و گەندەڵی و ستەمکاری، کەچی
دەبینن چۆن ئەو"رۆشنبیر و بزووتنەوەو مەلا و دکتۆر و زانای ئاینی و
پرۆفیسۆر و عەشرەتە"سەربەخۆ"یانە بەشێوەیەکی زۆر حەقیر و جاهیلانە سەری
رمەکەیان ئاراستەی بزووتنەوەیەک دەکەن لە لاوازترین ئاست و ئەدای
سیاسییە.
ئایا ئەو قسەکەر، نوێنەر و رۆشنبیرانە دڕندە و ناپاک و تاوانبار نین؟!
جاهیل نین؟ ئەرکی رۆشنبیر بە پێوەرە جیهانییەکەی ئەنجام دەدەن؟! ئایا
قسەو باس و هەڵویستەکانیان بەمەبەستی لەخشتەبردنی هەژاران نییە؟
ئەجندای دژ بە هەژاران پەیڕەو ناکەن؟ لەداوییشدا: بۆچی ئەو جۆقە
کەرامەتشکێنە"مردووکە"ی دوێنێ لە قەبر دەردەهێنن و بە سیحرو جادوو
زیندووی دەکەنەوە تا سوکایەتی و جوێنی پێبدەن و دووبارە لە گۆڕی بنێن؟!
چەندین جار شوانەکانی ئەو بەرەیە، گەل و جەماوەریان
بە"مێگەل"ناوبردووەو ئێستا هەر بەو شێوەیەش رەفتاریان لەگەل دەکەن و
ئوستادانە داوا رەواکانیان و خوێنی بەناهەق رژاوی گەنج و لاوەکان بۆ
مەبەستێکی ترسناک بەکاردەهێنن...
وریابن، وریا، لەم سات و کاتە کە وەحشیگەری لیبڕالیزمی نوێ بەسەر لاشەی
مرۆڤ دەروات، هیزەکانی بەر دەرگای سەرای ئازادی لیبڕاڵ و ئیسلامییەکان
تاقە رەخنەیەک ئاراستەی سیستێمی باڵای سەرمایەداری و کەرتی تایبەتی
ناکەن. ئەوانە مومکین نییە بتوانن ببن بە خاوەنی پرۆژەی عەدالەتی
کۆمەڵایەتی و ئازادی هەژارو ژێردەستەکان.
ئایا ئەو ئازادییە، ئازادی و عەداڵەتە کۆمەڵایەتییەکەی بەعس نین بە
زمانی کوردی؟
فرەڕەنگی و عەدالەتی کۆمەڵایەتی!
ئەو هەموو زانا و بیرمەندە بلیمەتانە پێمان ناڵێن بۆچی لەسایەی حکومەتە
حیزبییە فرەڕەنگەکانی ولاتانی ئۆروپا، پاش ئەزموونێکی سەدان ساڵی،
هێشتا کێشەی( گەندەڵی، رەگەزپەرەستی، سێکسیزم، چەوساندنەوەی
کۆمەڵایەتی، بێکاری، کۆلاپسی ئابووری، جەنگ)بەرهەمدەهێنن.
عەدالەتی کۆمەڵایەتی واتە(کار و بەرهەمهێنان و ژیانی هەرەوەزی)کە
ئەڵتەرناتیڤی بازاڕی ئازادو کەرتە تایبەتە فەرمانڕەواکانە کە
پرۆفیسۆر(یان تسیگلەر) لەبارەیانەوە دەڵێ: (چیتر دوژمنەکەمان قەیسەر
یان پاشایەکی تۆتالیتێر نییە، بەڵکو دوژمنێکی زۆر ترسناکە، دیکتاتۆری
دڕندەیی سەرمایەداری دارایی جیهانگیرە.).
لەم بارەیەوە نموونەی شەهرستانی(وەزیری نەوتی عیراق)دەهێنمەوە: کاتێ
خەڵک لە گرانی بانزین وەڕس ببوون و رەخنە و گازندەی خۆیان ئاراستەی
وەزیری نەوت دەکرد، شەهرستانی وتی: (نرخی بانزین بەدەستی من نییەو
سەندووقی دراوی جیهانی نرخەکەی دیاری دەکات.).
دەڵێن رۆشنبیر ویژدانی مرۆڤایەتییە، بەڵام کام رۆشنبیر؟ ئەو
رۆشنبیرە"بێلایەنانە"، بێلایەن نین و خزمەتکاری فرەبێژی خاوەن بازاڕ و
ئاینەکانیانن و وەک دەزگایەکی ئەمنی داپڵۆسێن لە بواری راگەیاندن تیرۆر
و تۆقاندن بەکاردەهێنن کە لەدواییدا رێگری دەکەن لە بەرەوپێشبردنی
پرۆسەی ئازادی و دادپەروەری لەلایەن خاوەنە راستەقینەکانی و وەک زۆرێک
لە رۆشنبیرەکانی دەسەڵات پشکی شێریان بەردەکەوێت لە گێلکردنی خەڵک.
ئەی پێگەی چەپ؟!
هێشتا ئەو رەوتانە کە لە بەرەی چەپ راوەستاون لەوپەڕی لاوازیدان و
هوشیاری و ئیرادەی کاری هاوبەشیان نییە. حیزبی شوعی کوردستان دەستی بە
دوا فارگۆنی حکومەت گرتووە و هیچ دەستپێشخەرییەکی نەکردووە، بەڵام پاش
ئەوەی سەرۆکی هەرێم داوای لە حیزبەکان کرد پڕۆژەی چاکسازی پێشکەش بکەن،
حیزبیش پرۆژەیەکی بڵاوکردەوە.
چەپ هێشتا سەرەڕای ئەوەی لە دەیان داخوازی و بۆچوون هاوڕان و دەتوانن
بە یەکگرتوویی لەسەر داخوازییە هاوبەشەکانی لایەنی کەم بێنە مەیدان کە
هیچ نەبێت ببن بە ئەڵتەرناتیڤ بۆ بەرەی لیبڕاڵ، ئیسلام و ناسیونالیست و
هەڵپەرەستەکان و، بەرە و پڕۆژەی روونتر و ئینسانیتر پێشکەش بکەن،
بەداخەوە هێشتا پێی نەکراوە ئەو ئەرکە بچووکە ئەنجام بدا، هێشتا
لەلایەکەوە بەشێوەیەکی منداڵانە هەڵویست بە یەکتری دەفرۆشن بەبێ ئەوەی
پێویستیان پێ هەبێت و لەولاوە لایەنیتر درێژە بە پشتگوێخستنی ئەرکە
مێژووییەکەی؛ هەیشە بە هیچ وخۆڕایی ناکۆکی وەهمی درووستکردووەو پێی
باشترە بە پەرتەوازی و ملکەچی لەگەل بەرەی ناڕاستەوخۆی
ئیسلامی-گۆڕان-لیبراڵ کار بکەن کە لەدواییدا دەخرێنە ژێرپێ. هێزە
ئیسلامییەکان دەرگای سەراشیان لێکردووین بە مزگەوت، کەچی هەندێ کەس
پێیانوایە ئەم"شۆڕشە"دژ بە ئیسلامییەکانە!
رەفتارێکی بۆرژوایی!
هەموو حیزب و لایەنەکان بۆ کۆبوونەوەی14مانگی سێ کۆبوونەوە(بێجگە لە
حشک)و بە گیانی بەرپرسیارییەتی هاوڕێیانە گوێ لەبیروبۆچوونی یەکتر
گیراو بوو بە ئومێدێک بۆ هەنگاونان بۆ پێشەوە. لیژنەی هەڵبژێردرا بۆ
داڕشتنی پلاتفۆرمێک. چەند رۆژێک پاش کۆبوونەوەکە، لیژنەی ناوبراو
پلاتفۆرمیان گەڵاڵە نەکردبوو، بەڵام بەیاننامەیەک بەناوی(کۆبوونەوەی
چەپ و پێشکەتنخوازان و کۆمونیستەکان)بڵاوکراویەوە کە هەمان به‌رواری
گردبوونەکەی هەموومان لەسەرە(14/3/2011)!
هێشتا هیچ نەبووە، چەند کەسێک کە وەک هاوڕێ بەرێزو حورمەتەوە گوێیان
لێگیراو بۆچوونەکانیان بە هەند وەرگیرا، بەبێ ئەوەی پێویستیان پێ بێت،
دەستیان بە پاشقولدان و پیلانگێڕی دژ بەیەکتری کرد و ئەمەش هیچ
پەیوەندی بە فکرو هەڵویستی شوعیەت(کۆمونیستی)یەوە نییە، بەڵام بۆ ئەوەی
ئەو برادەرانە تێبگەن کە جیاوازییەکانمان زۆر نین و پەرتەوازیمان
شەرمەزارییەو ئیمڕۆ هاودەنگی و یەکگرتوویی چەپەکان لەگشت شتێکی تر
گرنگترە، ئیمزای ئەو بەیاننامەیە بە کەموکوڕییەکانیەوە کردو چاوەڕێ
بووم تەواوی خاڵ و داخوازییەکانی کۆبوونەوەکە یەکبخرێن و پێکەوە بە
یەکدەنگ روو لە گۆڕەپانەکە بکەین. خۆش ئەوەیە 10خاڵەکە لەناو 18خاڵەکەی
لیژنەی هەڵبژێردراو بوو و خەریکی رەخنەگرتنی بنیاتنەرانە بووین لەیەک
بەیەکی خاڵەکانی و پێشنیاری تازە هاتە ئاراوە بۆ ئەوەی پلاتفۆرمێکی
هاوبەش گەڵاڵە بکەین.
ئایا ئەو برادەرانە رەخنە لەخۆیان دەگرن؟! ئایا ئەو کارە نەفامانە و
بەری ئەقڵی سیکتاریستی نەبوو؟! ئایا پشتکردنی حیزبی شوعی کوردستان لە
هێزو لایەنە چەپەکان پاساوی عەقلانی بۆ بزووتنەوەکەمان هەیە؟!
چی بکەین؟
ئێمە دەبێ بەر بەو بەرە کۆنەپەرەست و راستڕەوە بگرین کە سواری ملی داوا
رەواکانی جەماوەر بوون. لەم پێناوە هیچ پاساوێک بۆ پەرتەوازی و خۆ
بەزلزانی و خۆ بە"پێشڕەو"زانین نییەو تەواوی بوونمان لە ئێستا و چەند
ساڵی داهاتوو، بە یەکگرتنەوەمان بەستراوەتەوە...دەبێ لەنێو خۆمان
ئامادەیی رێککەوتنمان هەبێت، چونکە ئەمیان هەزار جار لەو سازشکارییە کە
لێرەو لەوێ لەگەل نەیاران و دوژمنانمان ئەنجام دەدرێ، مرۆییتر،
سەڕاستترەو پێشکەتنخوزاترو بەرچاو روونکەرترە، واتە خراپترین رێککەوتنی
چەپەکان لە باشترین رێککەوتن لەگەل دوژمنەکانمان، باشترە.
دەکرێ بە هەمان روح و هەڵویستی هەردوو گردبوونەوەکەمان، دەستبەجێ
بەناوی هەموومانەوە، هەموو خاڵ و پێشنیارەکان گەڵاڵەو بلاو و بانگەواز
بۆ چالاکی هاوبەش بکرێ، بەپێچەوانەوە شایانی ئەوەین ببین بە گاڵتەجاڕی
شەقام!
من زێدەڕۆیی دەکەم و دەڵێم: هاوڕێیان با بەرەو"خراپترین"بەرەی چەپ
هەنگاو بنێین...بەرەو بەدەستهێنانی(دەستووریکی علمانی کە ماف و ئەرکی
هاوڵاتیان بە یەکسانی و بەبێ جیاوازی رەگەزی دابین دەکات، بیمەی
کۆمەڵایەتی، یاسای کار، ئازادی چالاکی و رێکخستنی سیاسی بێقەید وشەرت،
جێبەجێکردنی داخوازییە جەماوەرییەکان، سڕینەوەی گشت دیاردە
ملیتاریستەکان، بەهێزکردنی کەرتی گشتی، ئاشکراکردنی سەروەت و سامانی
بەرپرسان، دادگاییکردنی گەندڵکاران، دادگاییکردنی هەموو ئەوانەی
دەستیان لە کوشتنی خەڵک هەیە).
هەڵویست و ئەرک و رۆڵی چەپ لە کوردستان وەک هاو چین و حیزبە چەپەکانی
جیهانە و پرسیاری(دەتانەوێ بە پشتیوانیتان لە داخوازیەکانی خەڵک و
رەخنەکانتان، کۆمەڵگا بەرەو کوێ ببەن؟!)دەکەین، بۆیە دامەزراندنی
بەرەکەمان و بە درووشم و داخوازییەکانمان بچینە مەیدان، تاقە وڵامی
عەمەلی و مومکینە بۆ بارودۆخی ئیمڕۆ کە مێژوو، کەرامەت، هاوڕێ
خۆبەختکەرانمان دەپارێزێ وئیعتبارو توانای گەشەکردنمان لەدەستنادەین و
بە کردەوە متمانەی هەزاران خەباتگێر دەستدەکەێتەوەو رێگری لە هێزە
راسترەو کۆنەپەرەست و سەوداکارییەکانیان بە داخوازی جەماوەری ستەمدیدە،
دەگرین...
لەنێوان ئۆپۆزیتسیونی ناو پەرلەمان و حکومەت، رێگای ئۆپۆزیتسیونی چەپ
دەگرینەبەر!
23\3\2011
ماڵپه‌ڕی سه‌‌لام عه‌بدوڵا
|
