لە ڕاوێژکارێکى خۆڕسکى بێ ناونیشانەوە بۆ دکتۆر بەرهەم ئەحمەد ساڵح.

هیوا ڕەش    

هیچ ووڵاتێک بێ کێشە نابێت جاچ گە ورە یا بچووک ، حیکمەت لەوەدا نیە چۆن دەست لە سەر کێشەکان دابنرێت بە قەد ئەوەى چۆن ڕێگا چارەى بۆ بدۆزرێتەوە ! ئەمڕۆ زۆربەمان بە تاسوقەوە لە دانیشتنى پەرلەمانى تورکیامان ڕوانى ، بابەتى باسى ئەم دانیشتنە و هەڵوێستى نەترسانەى ئەردۆگان ناچارى کردین بە دڵ و گوێچکە و چاوەوە بچینە قوڵایى ووت و ێژەکانەوە ، کێشەیەک هەبوو تا ئەهات ژیان و گیانى ووڵاتى تورکیاى دائەهێزران و بەرە و داخوران ئەیبرد ، بەڵام ئەردۆگان لە پەرۆشیى بۆ ووڵاتەکەى نەترسانە نەخۆشییەکەى دیارى کرد و ڕەچەتەشى بۆ نووسى ئەگەر دەرمانەکان لە دەرمانخانەى شۆفینیستیى تورکیا چنگ بکەون ئەوا ئەبێت بە یەکێک لە دەوڵەتەکانى بازاڕى هاوبەشى ئەوروپا ، تۆ بڵێى سەرۆکى حکومەتى هەرێمى کوردستان هێندە پەرۆشى نیشتمانەکەى خۆى نەبێت و نەیەوێت کێرڤى ووڵاتەکەى سەر بخات ؟ !

گەندەڵى بووە بە ناومان ، گەندەڵى بووە بە ناونیشانمان ، گەندەڵى بووە بە بەرگ و نان و ئاومان ، گەندەڵى بۆتە چقڵ و ڕاچۆتە چاومان ، گەندەڵى جەستەى نیشتمان و هاووڵاتییانى ئێمەى داوەشاندووە ، ژیانى لێ تاڵ کردووین ، مێشکى سڕ کردووین ، گەندەڵى دەستى ناوەتە بیناقاقاى کەرتى پیشەسازى و تاساندوویەتى ، گەندەڵى ئاوى لە کەرتى کشت و کاڵ بڕیوە و ووشکى کردووە ، گەندەڵى سەراپاى کایەکانى ژیانمانى جاڕس کردووە ، گەندەڵى هەموو شتێکمانى لە بەر یەک ترازاندووە ، ئەگەر نکوڵى لە مافى کورد لە تورکیا کەسایەتى مەعنەوى بۆ براکانمان لە باکور دروست کردبێ ئەوا گەندەڵى سوکایەتى بە کەسایەتى ئێمە ئەکات لە باشور ، جا کەى دێت تۆى سەرۆکى حکومەتى ئێمە بە بێ دڵنەوایى حیزب ڕوو ئەکەیتە پەرلەمان و ڕاشکاوانە دان بەو نەهامەتییانەدا ئەنێیت کە لە ئاکامى گەندەڵى پایەکانى کۆمەڵگاکەمان کرمۆڵ بووە ، بەندە هێندەى بتناسم تا ئێستا بێ پرسى حیزب پەنجە لە ئاو ناخەیت ، دوو جار وەکو کۆمەڵەى زیندانییانى سیاسى حیزبى شیوعى کوردستان بە دیدارت گەییشتووم ، ئەو کاتە باسى ناعەدالەتى و بێمافى و جیاوازى ئەو زیندانییانەمان بۆ کردیت کە جەللادەکانى بەعس فەرق و جودایى یان نەئەکردین بەڵام ئێستا بە پلە دووشمان دانانێن ، ئەو کاتە وورد وورد گوێت بۆ ڕادێراین و هاوسۆزمان بوویت و بەڵێنى زۆر شتت پێداین وەلێ حیزب لێت نەگەڕا ، ئەو کاتە حیزب نەک زیندانییەکانى کردبووە دوو بەشەوە بەڵکو نیشتمانەکەمانیشى دوو لەت کردبوو ، نیشتمانى بە خوێن سووریان کردبوو بە زەرد و بە سەوز ، ئەو کاتە دۆخەکە لە بار نەبوو هێڵى سوور ببەزێنى لە ترسى چاوى سوورى حیزب ، ئەو کاتە سەرۆکى حکومەتى دەڤەرێکى بچووک بوویت بۆیە ئاستى بەرپرسیارییەکەتیش بچووکتر بوو ، وەلێ ئێستا وێڕاى ئەوەى دەسەڵاتەکەت گۆڕانى بە سەر دا هاتووە و گەورە تر بووە لە هەمان کاتیش دا بە پێى ئیدیعاکان بێت دۆخەکەش گۆڕاوە و دەم لەوە ئەکوترێ دەسەڵاتى حیزب لە حکومەت داماڵدرێ ، ئەمانە هەمووى وا ئەخوازن تۆش گۆڕان بە سەر سیستمى حوکمەکەت بهێنى ، لە بیناى قەتیس کراوى فەرمانبەرێکى حیزبى بێیتە دەر و بەرژەوەندى گشت بخەیتە سەرووى بەرژەوەندى حیزبەوە ، چى تر نەهێڵى پیاوانى حیزب گەمە بە موقەدەراتى ووڵاتەکەمانەوە بکەن ، ڕێگە مەدە وەزیرێکى سەپێنراو بێمنەت بێت لە لێپرسینەوە ، شەرى گەل و حیزب ببەرە ناو هۆڵى پەرلەمان و تۆش وەکو ئەردۆگان هاوار بکە و بڵێ : کێشەیەک هەیە و ناوى گەندەڵى یە ، گەندەڵیش مایەى نەهامەتى یە و ئەبێت چارەسەر بکرێت ، کام فراکسیۆن هاتە بەرەى گەل و پشتیوانى لێ کردیت هەماهەنگییان لە گەڵدا بکە و پێکەوە هیممەت بکەن ، ئەوانەى هۆڵى پەرلەمانیشیان جێهێشت پێیان بڵێ : خواتان لە گەڵ و ڕێگەتان ڕۆشن ، با چى تر لە بن دەمامکەوە خەڵک نەکەنە ئۆغرى حیزبەوە ، ئەمە گەورەترین هەنگاوە بۆ لەقاندنى یەکەم پایەى تۆکمەى گەندەڵى کە حیزب چاندوویەتى ، دڵنیابە لەم هەنگاوە دەرچیت بۆ ئاییندە بە بێ حیزب ئەبیتەوە سەرۆکى حکومەت ، دڵنیابە حیزبەکەشت بە جەماوەرى تر ئەکەیتەوە .

ئەوەى من لە تۆى ئەخوازم ، ئاواتى پیرۆزى گەلە ، ئاواتى گەلیش ئەمڕۆ نەبێت سبەینێ هەر دێتە دى ، بەڵام ئێمە پەلەمانە و حەز ئەکەین بەر لەوەى شۆڕشێکى تر بەڕێ بکەین و بمرین بە چاوى خۆمان بیبینین .

07701309524
Hewarash1@yahoo.com