١٤\٥\٢٠١٣

لە ساڵیادی کۆمەڵکوژییەکانی پشت ئاشان و هەولێر.

قادر نادر       

گەرچی لە کۆنگرەی سێی چاودێری کوردۆساید داوام لێ کردن، وەرن کار لەسەر کۆمەڵکوژییەکانی پارتە سیاسیەکانی کورد لە بەرامبەر یەکتر بکەینە بەشێکی تری بەرنامەی کارەکانمان، بە داخەوە نەیانخستە ناو بەرنامەی ئەو رێکخراوە تا منیش دەرچووم لەو ڕێکخراوە. لە کاتیکدا ئەو باس و بابەتە گرنگە هەر دەبێ کەسێک یان ریکخراوێک باسی بکات بە تایبەتی ئەو کەس و ریکخراوانەی لە بواری کۆمەڵکوژیی و جینۆساید کار دەکەن.

لە چەند ڕۆژی رابردوو یادی کۆمەڵکوژیی پشت ئاشان و قرناقە هەندێ کادیر و هەواداری شوعی بە گەرمی لە فەیسبوک بابەت و نووسینیان بلاو دەکردەوە. هاوکات ١٦ی مایش ڕۆژی کۆمەڵکوژیی هەولێرە ١٩٩٧، بۆیە لێرەدا هەندێ سەرنج دەدەم.

١. گەرچی رۆژ لەدوای ڕۆژ ، ئاستی ڕۆشنبیری دژ بە پێشێلکاری مافی مرۆڤ وتاوان و ئازادی سیاسی گەشە دەکات، چونکە وەک کۆن نماوە، کە هەر پارت و کەسایەتیەک، روبەروی کوشتار و تاوان و پێشیلکاری دەبۆوە، تەنیا ئەو لایەن و کەسایەتیانە دەنگیان بەرز دەکردەوە کە خاوەنی هەمان بیروبۆچون و ئایدیەلۆجیا بون . بەلام ئێستا ئاستی هوشیاریەکە لە دژایەتی پێشیلکاری و تاوان و تۆقان لەسنوری ئایدیەلۆجیا وا تێدەپەرێ ، هەر ئەمەشە وای کردوە کەبارەگای یەکگرتو دەسوتێ ، ئەوا کۆمنست و جەپ و لیبرال و هەموو ئازادیخوازێ دەنگیان بەرز دەکەنەوە ، لەکاتێکدا گەر نمونەی لێدانی بزوتنەوەی ئیسلامی بەدەستی یەکێتی نیشتمانی بکەین هەمومان دلخۆش بوین بەلێدانیان . بەلام هیشتا ئەو ئاستە ڕۆشنبیریە ماوە کەداکۆکی لەتاکی کورد بەپیی پێشێلی مافی مرۆڤ بێ ، نەوەک بەپێی (کەسایەتی دیار و نادیار ، یان ترس بون لەوەی کەئەمانە ئیسلامی توندرەون ، یان کەسی ماف پیشێل کراو مادام کۆن لەگەل دەسەلات بوە ، ئاسایە ئیستا دەسەلات هەرچی بەرامبەر بکات).

٢. لەم روانگەوە واباشترە هەرکادیرو هەوادارێکی شوعی و یەکێتی وپکک ، گەر دەیەوێ دژی تاوانە کۆمەڵکوژییەکانی دژ بە حزبەکەی بوەستێ ، وابۆیان بابەتی و جوانترە ، هەر باسی پشت ئاشان و قرناقە و هەکاری و هەولێر نەکەن ؟. بەڵکو دەبێ کۆی کۆمەڵکوژییەکان باس بکات ، ئەوکات شێوەیەکی بابەتی راستگۆیی لەدژایەتی تاوان وەردەگرێ و هەست دەکرێ ، نوسینەکە لەروانگەیەکی تەسکی شەرە خێل و حزبی نیە . بەلکو دژایەتی تاوانەکەیە لەهاوشیوەی داکۆکیەکانی ، ئامنستی و هۆمان رایت وۆچ و رۆژنامەنوسانی جیهان ، لەدژایەتیان بەرامبەر هەموو ئەو دام ودەزگا و ولاتانەی ، کەبەپێی جارنامەی مافەکانی مرۆڤ مامەلە لەگەل مافی هاولاتی ناکەن . بۆیە ناکرێ تۆ خۆت پێ چەپ و کەسی پێشکەوتوخواز بێ ، تەنیا لەدژایەتی کۆمەڵکوژیی حزبەکەت بی ، بەلام هاوشیوەی ئەو ئەگەر خراپتریش بکرێ بێدەنگ بیت بە نموونە:

١/ هەکاری ١٩٧٨ کەپارتی دیموکراتی کوردستان سەدان پێشمەرگەی یەکێتی نیشتمانی کوردستان شەهید کرد.
٢/ پشت ئاشان و قرناقە لە ١٩٨٣ کەیەکێتی نیشتمانی کوردستان دەیان کادیرو پێشمەرگەی شوعی بەدیلی شەهید کرد.
٣/ کۆمەڵکوژیی هەولیر ١٩٩٧ کەپارتی دیموکراتی کوردستان نزیک بە ٦٠ کادیری پکک بەدیلی و لەهیرش بردنە سەری شەهید کرد.
٤/ لە شەری ناوخۆی نێوان پارتی ویەکێتی ، جگە لەدەیان کاری دژە مرۆیان ، لەدیل کوشتن دا بەلام لیرەدا دوو نمونە دەهێنینەوە.

١/ لە ٣١ ئاب پارتی زیاتر لە ٧٠ کادیرو بەرپرسی سەربازی یەکێتی کەخۆیان رادەستی پارتی کردوە شەهید کردون.
٢/ یەکیتی لەسالی ١٩٩٧ لە رانیە زیاتر لە ٥٠ چەکداری پارتی بەکۆمەل شەهید کرد.

هاوکات ئەگەر شوعیەکان هەر باس لە و تاوانانە دەکەن کە دژیان کراوە دەبی هەول بدەن تەنیا لەنەوشیروان موستەفا چری نەکەنەوە با ئەویش سەرپەرشتی کردبێ، بەلکو ئەوە بیروبۆجون و بریاری کۆی پارتەکە بووە وەخودی نەوشیروانیش بەپێی پلەکەی و ئاستی تاوانەکەی ، بەردەکەوێ. هاوکات بۆ ئەوەی هەستیان پێ بکرێ بەهەقیقەت ئەوان دژ بەتیرۆری شەهیدو حزب و دژایەتی کۆمەڵکوژییەکانیان بکرێ واباشترە هاوشیوەی تاوانەکانی پارتیش باس بکەن، کە هەمومان دەزانین و گوێ بیست بوینە کە ١٢ کادیری شوعی بەبێ چەک بەرپرسی بالای پارتی لەبادینان (عیسا سوار) لە سالی ١٩٧٢ گوللەبارانی کردن، یان تیرۆری مامۆستا ئەمینی جوتیاران لەلایەن یەکێتیەوە لە (رانیە) و ئەبو نەسیری لەلایەن پارتیەوە لە بادینان و.....

٣/ پێم وایە دۆسیەی کۆمەڵکوژییەکانی کورد بەدەستی کورد کەخۆی زیاتر لە (پشت ئاشان و قرناقە، هەکاری ، هەولیر و شەرەکانی ناو خۆ لە ١٩٦٤/١٩٩٨ یان ١٩٧٣ بۆ ١٩٧٨ شوعی و پارتی ... کۆی ئەمانە زادەی ململانێی شەری ناوخۆن. بۆیە هەموو یەکێ لەوتاوانانە، بۆهەموو پارت و بەرپرسەکانی، پاساو و هۆکاری خۆی باس دەکەن . بەلام هەموو پاساوەکانیان لەبەرامبەر تاوانەکان هیچ سودێکی نیە . با کەمتەرخەمی و هۆکاریکیش لەلایەن پارتی قوربانیدەرەوە هەبێ، ئەمە پاساو نادات تۆ تاوانی کۆمەڵکوژیی یان دیل شەهید بکەی. بۆیە جگەلەوەی پێویستە ئەو دۆسیانە لەدادگایەکی بێلایەن یەکلا بکرێتەوە، بەلام وەک کەمترینی کار بۆ لابردنی ئەو تاوانە و ویژدان ئاسودە کردن بەرامبەر بەرپرسیارەتی میژوو، ئەوەیە بریاردەرو جێبەجێکارانی ئەو تاوانانە بەفەرمی داوای لێبوردن بکەن، گەرنا ئەو کۆمەڵکوژییانە هەرگیزلەهزری کەس ناسڕیتەوە و کاریگەری لەسەر پەیوەندی و حزبایەتیش هەردەمێنێ و کۆمەڵکوژییەکانیش بەردەوام دەبێ.

ماڵپه‌ڕی قادر نادر