په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٢٠\٨\٢٠١٣

لەشفرۆشیی و (جهاد النکاح) کامیان قەحپەییە؟

هیوا رەش       


(قەحپە) وشەیەکە لە دێڕزەمانەوە لە نێو فەرهەنگی تەواوی زمانەکاندا جێگای خۆی کردۆتەوە ، بە سۆنگەی ستەمی کۆمەڵایەتی و ئاینی زیاتر بەسەر ئافرەتاندا سەپێنراوە و لە ناوگەڵی ئەواندا وێنا کراوە ، بەڵام هەندێک ئاکار و کردار لە ناو پیاواندا ئەم زاراوەیەی تێپەڕاندووە کەچی زاراوەیەکی لەمە قێزەونتری پێ نەوتراوە ، تەنانەت گوناهە (قەحپە)شیان لە بەرامبەردا بەکار ببرێ چونکە سنوری زیاتریان بەزاندووە ، بۆ نمونە پیاوێکی وەکو (سەدام حسین) کە وەفای بۆ سێبەرەکەی خۆشی نەبوو ، لە خوێنڕشتندا بێهاوتا بوو ، هەر جارەی لەسەر بەزمێ بوو ، لە شێنەییدا شێر و لە تەنگانەشدا لە قەحپە ‌قەحپەتر بوو ، لە دەیان یەخت و دەیان ئەپارتمان و کۆشک و تەلاردا و بە پشتیوانی جۆرەها چەکی وێرانکەر و سوپایەکی بێشوماری دڕندە لە کونێکدا دەسگیریان کرد مشکەکوێرە و دەعباش پێی قایل نەدەبوو ، بە هەرحاڵ زیاتر قسەمان لەسەر ئافرەتی قەحپەیە و نامەوێ خۆ لە قەرەی باسی پیاوی قەحپە بدەم چونکە ئەو باسە زۆر زیاتر هەڵدەگرێ و ئەو خەسڵەتە لە نێو (سەرکردە ، سیاسەتمەدار ، ڕۆشنبیر ، نوسەر و ڕۆژنامەوان)ی پیاودا هێندە زۆرە لە عۆیەی نایەین گەر باسیان بکەین.


ئەوەی زیاتر مەبەستمە بەراوردێکی کورتی سەرپێ یی نێوان ئەو توێژەیە کە مێژویەکی دێرینی هەیە و پێی دەڵێن ( لەشفرۆش ) لەگەڵ توێژێکی دیکەی تازە کە لە سەرەتای سەرهەڵدانی ئاینەکاندا چەکەرەی کردووە بە تایبەتی ئاینی ئیسلام و لە نێو ئیسلامیشدا لەم ساڵدا زۆر بە ڕاشکاوی بە ناوی ( جهاد النکاح ) ەوە دەرکەوتووە.


لەشفرۆشیی وەکو دیاردەیەکی کۆمەڵایەتی نەشیاو لە هەموو کۆمەڵگاکاندا بونی هەبووە و هەیە و بەو ئافرەتانەوە لکاوە بە هەر هۆیەک بووبێ پەنایان وەبەر بردووە ، یەکێک لە فاکتەرە سەرەکییەکانی سەرهەڵدانی ئەم دیاردەیە ( جەنگ ) ە کە بە سۆنگەیەوە پیاوان زۆرتر دەکوژرێن ، بریندار و کەمئەندام دەبن و بە ڕێژەیەکی هێجگار زۆر ژمارەی ئافرەتان زیاد دەکا ، ژێرخانی ئابوری دادەڕمێ ، کەمدەرامەتی باڵ بەسەر کۆمەڵگادا دەکێشێ ، ئاستی داهاتی تاک دادەبەزێ ، بێکاری و نەبونیش سەربارە ، بەم سۆنگەیەوە لەشفرۆشیی دەبێتە کار بۆ دابین کردنی بژێوی ، لە کۆمەڵگا هەژار و دواکەوتووەکانیشدا بە سۆنگەی تەوەزەلی پیاو ، ستەمی کۆمەڵایەتی سەر ژنان ، بێکاری و نەبونی سەرچاوەی بژێوی و برسێتی و نەبونی بە هەمان شێوە دەبێتە دیاردە ، بە تایبەتی وڵاتە ئیسلامییەکان چونکە ( مافی مرۆڤ ، ئازادی ، یەکسانی ) بوونیان نیە ، یاسا ژێروەرە ، گەندەڵی بەرقەرارە ، دیموکراسی فەراهەم نیە ، نێوان نێر و مێ دیواربەندە ، سێکس لە ناوگەڵی ژندایە ، فرەژنی باویەتی ، سەربەستی ژن کۆتە...... .


بۆیە ناکرێ بە لەشفرۆش بوترێ قەحپە ! هۆکاری هەڵخزانی ئافرەت بەرەو زەلکاوی لەشفرۆشیی زۆرن و هەموشیان بە سۆنگەی پیاوەوە سەرهەڵدەدەن ، بۆیە بەکارهێنانی زاراوەی ( قەحپە ) لە هەمبەریان ئەویش ستەمێکی تری کۆمەڵایەتییە دەرهەق بە ژنان ، بەڵکو دەکرێ (لەشفرۆشیی) وەکو دیاردەیەکی کۆمەڵایەتی ناشیرین و نامۆ چاو لێبکرێ بە مەبەستی چارەسەر و بنبڕ کردنی ، لێ لەناو کۆمەڵگا ئیسلامییەکاندا دیاردەگەلێکی زۆر ڕێگە پێدراون (ژن بە ژن ، گەورە بە بجوک ، شودانی کچی منداڵ بە پیاوی بە تەمەن، پرس و ڕای پرست پێ دەکەم و بە قسەت ناکەم لە هاوسەرگیریدا ، فرەژنی ، گۆشەگیر کردنی ئافرەت ، بە لاواز تەماشا کردن و بە کەم زانینی و.....)، ئەمانە هەموی فاکتەرن و دەبێتە مایەی یاخیبونیان لەو ستەمانەی لەسەریانە ، مخابن ئێستا دیاردەیەکی زۆر قێزەون کە دەتوانین بڵێین ئافرەت خۆی هۆکارە و بە گەرمی بەپیریەوە دەچن سەری هەڵداوە بە ناوی (جهاد النکاح)ەوە!


لە مێژووی مرۆڤایەتیدا دیاردەیەکی وەها سەری هەڵنەداوە کە ئافرەتان لە تەواوی خەسڵەتەکانی مرۆڤبون داماڵێ ، نەریتی کۆمەڵایەتی دی زۆر هەبون و هەن ، بۆ نمونە کاتی خۆی لە : هەندێک خێڵی چینییەکاندا ئافرەت لە تەمەنی منداڵییەوە پێڵاوی ئاسنی لە پێ کراوە تا پێی بچوک و گڕمۆڵە بێ و توانای ڕۆییشتن و چونە دەرەوەی نەبێ و لە کونجی ماڵەوەدا بۆ ماڵداری و تێر کردنی ئارەزووە سێکسییەکانی پیاو بژی ، لە هەندێک خێڵی هیندییەکاندا دوای مردنی پیاو و لە کاتی مەراسیمی سوتانی تەرمەکەیدا دەبوایە ژنەکە خۆی لە ناو نێڵەی ئاگری هەڵخراوی تەرمی پیاوەکەی بهاوێ و بە زیندوێتی خۆی بسوتێنێ ، لە هەندێک خێڵی ئەفریقییەکاندا پیاوان لە کاتی سەفەردا عەورەتی ژنەکانیان بە ئەڵقەیەک قفڵ دەدا و لە کۆمەڵگای عەرەبی پێش ئیسلامدا کچان زیندەچاڵ کراون ، دیاردەی تر زۆرن کە دەربڕی واقیعی کۆمەڵایەتین و ستەمی بێئەندازی سەر ژنان دەردەخەن.


ئێستا و دەرحاڵ لە ژێر پەردەی ئیسلامەتیدا (جهاد النکاح) لە ناو ئیسلامە توندڕۆکاندا چەکەرەی کردووە ، ئەم دیاردەیە بە مانای وشە دەکرێ پێی بوترێ ( قەحپەیی ) لەبەر ئەوەی:


١ - لە ڕۆژێکدا چەند پیاوێک بۆ دامرکاندنەوەی خۆڕایی سواری خۆیان دەکەن .
٢ - ئەو پیاوانە هان دەدەن بۆ کوشت و بڕ و قەتڵوعامی خەڵک و ناشیرین کردنی جوانییەکان .
٣ - هۆکاری ئابوری و کەمدەرامەتی نەبۆتە پاڵنەر بۆ ئەنجامدانی کارەکە .
٤ - زیانی تەنها بۆ خۆیان نیە بەڵکو دەبنە هۆی بەوێرانە کردنی ژیان .
٥ - منداڵی بێسەرپەرشت دەخەنەوە و دەبنە مایەی سەرئێشەی زۆر بۆ کۆمەڵگا .
٦ - ئافرەتانی خوار تەمەنی یاسایی و هەرزەکار توشی لادانی کۆمەڵایەتی دەکەن .
٧ - ژنان وەکو کالایەکی دامرکێنەرەوەی حەزی پیاوانیان لێ دێ .
٨ - ................ . ٩- .................. . ١٠- ......................... .
بۆیە گەر بەراوردێک بکەین لە نێوان (لەشفرۆشیی) و (جهاد النکاح) بە ڕوونی دەردەکەوێ ئەوانەی لەشفرۆشن توێژێکی کۆمەڵایەتی ژنانی یاخی لە ستەم یان بۆ بژێوی پەنای وەبەر دەبەن و چەندین لێکۆڵینەوە دەریان خستووە کە ( لەشفرۆش)ان لەبەر ئەوەی هەست بە لە دەستدانی پێگەی کۆمەڵایەتی خۆیان دەکەن لە بارێکی دەرونی ناهەمواردا دەژین و پەشیمانن لەوەی کە کردویانە و بەسەریان هاتووە ، لێ قەحپەکانی ئیسلام و لە ژێر پەردەی جیهادەوە ئارەزومەندانە ناوگەڵی خۆیان بە ناوگەڵی پیاوان دەتاسێنن ، جا پێم وایە گەردی ژێر پێی ئافرەتێکی (لەشفرۆش) هەموو قەحپەکانی جیهاد بە خۆیان دین و فەتوادەرانیانەوە دەهێنێ چونکە لەشفرۆش بە ناچاری دووچاری ئەو درمە هاتووە بەڵام قەحپەکانی جیهاد ڤایرۆسی بڵاوکردنەوەی درمەکەن.

 

ماڵپه‌ڕی هیوا ره‌ش

 

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک