٢٠\١٢\٢٠٢١

لە یادی ١٠٠ دەوڵەتی عێراقدا،

تەنیا یادوەریی جینۆساییدمان لەگەڵیدا ھەیە.

دامەزراوە فەرمیەکانی دەوڵەتی عێراق، لەسەر ئاستە جیاوازەکان، بە چالاکی جۆراوجۆری سیاسی و ڕۆشنبیری و کۆمەڵایەتی وسەربازی و ... ھتد، یادی ١٠٠ ساڵەی دامەزراندنی دەوڵەتی عێراق دەکەن وەک یوبیلی زێڕین.

لە ماوەی ١٠٠ ساڵەی تەمەنی ئەم دەوڵەتە، گەلی کوردستان بەردەوام رووبەرووی کۆمەڵکوژی و لە ناوبردن و سڕینەوە و راگواستن بۆتەوە. دەوڵەتێک لە ماوەی (١٠٠) تەمەنیدا ھەموو جۆرە پێشلکارییەکی مافی مرۆڤ و تاوانی زەقی نێودەوڵەتی لە بەرانبەر گەلی کوردستان و کەمیاتییە ئاینی و نەتەوەیی و مەزھەبییەکان پەیڕەو و پیادە کردووە.. و بە ئێستاشەوە ھەمان ئاراستە لە بەرانبەر گەلی کوردستان و مەزھەبی جیا بوونی ھەیە و بەردەوامە و بنبڕ نەکراوە.

دەوڵەتی عێراق، لەکاتێکدا یادی (١٠٠) ساڵەی دەکاتەوە، ھێشتا نەیتوانیووە برینەکانی سەر جەستەی گەلی کوردستان بە تایبەتی و کەمینەکانی تر سارێژبکاتەوە و لە بەرانبەر ئەو تاوانانەی بەرانبەرییان ئەنجامیداوە، داوای لێبوردنی فەرمی بکات.

جیاواز لەوەش.. تائێستا دەوڵەتی عێراق پابەند نەبووە بە بڕیارەکانی دادگای باڵای تاوانەکانی عێراق، بۆ قەرەبوکردنەوەی مادی و مەعنەوی کەسوکاری قوربانیانی شاڵاوەکانی ئەنفال و کیمیاباران و تەواوی دۆسیەکانی تر، کە لە دادگای ئاماژە بۆکراوە، حوکمی کۆتاییان وەرگرتووە, لە ھەمووشی گرنگتر ئامادە نییە ببێتە ئەندامی دادگای تاوانی نێو دەوڵەتی وەک دڵنەواییە بۆ دووبارە نەبوونەوەی جینۆساید و تاوانی جەنگ و تاوانی دژ بە مرۆڤایەتی لە ئایندەدا لەم ولاتەدا.

بۆیە وەک بەشێک لە رێکخراوەکانی بواری جینۆسایدی گەلی کوردستان و خەمخۆرانی ئەم بوارە، نارەزایەتی لە بەرامبەر ئەم یادکردنەوەیە دەردەبڕین تا ئەو کاتەی قەرەبووی مادی و مەعنەوەی قوربانیان دەکرێتەوە و عێراق پەیوەست دەبێت بە دادگای تاوانی نێودەوڵەتییەوە و دڵنەوایی تەواو بە ھەمووان دەدرێت عێراقی داھاتوو جیا دەبێت لە عێراقی رابردوو.

ناوەکان:
١- رێکخراوی کوردستان بێ جینۆساید
٢- رێکخراوی چیرۆکەکانی ئەنفال
٣- تۆڕی رێکخراوە کوردستانییەکان بۆ دادگای تاوانی نێو دەوڵەتی
٤- رێکخراوی گەشەپێدانی مافی مرۆڤ
٥- گۆڤاری تۆبزاوا
٦- رۆژنامەی نگرە سەلمان
٧- ھەڵمەتی ژیان دژ بە سێدارە لە کوردستان
٨- رێکخراوی ھەڵمەتی دادپەروەریی