|
٢\١٠\٢٠١٢
لیۆنکا لە
دەریاچەی مالویە.
ک. پاوستۆڤسکی لە فارسیەوە: ئازاد نەجم
ئێمە ، بەهۆی نەخشەیەکەوە - کە لەساڵانی حەفتاکانی سەدەی ڕابردودا
کێشرابوو - بەڕێدا دەڕۆیشتین. لەگۆشەیەکی نەخشەکەدا
نوسرابوو: ( ئەم
نەخشەیە ، لەسەر بنەمای پرس و ڕاوێژ کردن بە خەڵکی ناوچەکە دروست کراوە).
ئەم ڕاستگۆییە شتێکی دڵٍخۆشکەر
نەبوو بۆمان. ئێمەش پرسیارمان لەخەڵکی
ناوچەکە دەکرد. بەڵام زۆربەی جاران ڕێنماییەکانیان نادروست
بوون.
(خەڵکی ناوچەکە) ، ماوەیەکی زۆر ، بەگەرمی دەیانکردە هات و هاوار ،
قسەی نەشیاویان بەیەکتر دەگوت و ناوی زۆر شوێنیان دەبرد.
ڕێنماییەکانیان هەمیشە بەم شێوەیە
بوو: ( هەرکە گەیشتنە جۆگاکە ، بەرەو
لای جەنگەڵەکە بسوڕێنەوە و لەوێ لەتەنیشت جادەکە ، لەسەرەتای بنارە
سوتاوەکەی جەنگەڵەکە ، تا کەندەڵانەکە بچنەپێش ، دوای ئەوەی
لەکەندەڵانەکە تێپەڕین ، دەبێ ڕاستەوخۆ بچنە سەر گردەکە ، گردەکە
لەوێوە دیارە ، دواتر ڕێگایەکی سادەیە ، لەوێڕا بڕۆن تا دەگەنە
دەریاچەکە).
ئێمەش بەدروستی بەپێی ئەو ڕێَنوێنیەی ئەوان ، دەڕۆیشتین. کەچی هێشتا
دەریاچەکەمان لێوە دیار
نەبوو.
ئێستا ئیدی بەپێی نەخشەکە دەڕۆیشتین ، بەڵام لەگەڵ ئەوەشدا ، لەنێو
قوڕی وشکەوەبووی زەلکاوەکەدا - کە ئیدی بۆ خۆی ببووە جەنگەڵێکی پڕ لەداری
گچکە و بێَهێز - ڕێگامان هەڵە کرد و ون
بووین.
ڕۆژێکی وەرزی پایز
بوو. دەنگی خشە خشی گەڵا وشک و وەریوەکان ، دەهات.
دواتریش بارانێکی بەخوڕ باری ، کەش و هەوایەکی ساردی
هەبوو.
دەوروبەری کاتژمێر سێی پاشنیوەڕۆ ، لەنێو زەلگاوەکەوە بەسەر
گردۆڵکەیەکی بەرداویدا ، کە گیا سورخسێکی زۆری لێ
ڕوابوو ، سەرکەوتین.
ڕۆژیش بەخێرایی
خەریکبوو ئاوا دەبوو و تا دەهات دنیای تاریکتر دەکرد.
لەژێر ئەو ئاسمانە گرژ و توڕەیەدا ، وردە وردە تادەهات دنیا تاریکتر
دەبوو. شەو نزیک بۆوە ، شەوێکی تاریکی نێو زەلکاوی پڕ لە خشەخشی گەڵای
وەریوی درەختەکان و چکە چکی دڵۆپە باران و هەستی تەنیایی و کەشێکی
لەتوانای دان بەخۆداگرتن بەدەر .
هاوارمان دەکرد و پاشان گوێمان ڕادەگرت. لەوەڵامدا: ڕەشەبا ، لەشوێنێکی
دورە دەستی نێو جەنگەڵەکەوە ، گڤەگڤی دەکرد و قیڕقیڕی قەلەڕەشەکانی
لەگەڵ خۆیدا دەهێنا.
دواتر ، لەوەڵامی ئێمەدا لەشوێنێکی ئەوسەری کۆتایی زەوی و زەلگاوەکان ،
هاوارێکی درێژ و لاوازمان کەوتەبەر گوێ.
تادەهات دەنگەکە نزیکتر دەبۆوە ، خشەخشێکی زۆریش دەبیسترا ، دواتر
لەنزیکی خۆمانەوە هەستمان بەدەنگەکە کرد.
کوڕیژگەیەک ، لەنێو دارستانە چڕەکەوە هاتەدەرێ. تەمەنی ، هەر نزیکەی
دوانزە ساڵێک
دەبوو. پێڵاوە کۆنەکانی بەدەستەوە گرتبوون و بەپێخواسی و
بەوریاییەوە بەسەر لق و گەڵا وشکەکاندا هەنگاوی دەنان. لێمان نزیک بۆوە
و بەشەرمەوە سڵاوی لێ کردین. پێکەنی و گوتی: گوێم
لێبوو یەکێک بەردەوام
هاواری دەکرد ، زۆر ترسام ، چونکە لەم کاتانەدا هیچ کەسێک ڕێی ناکەوێتە
ئێرە ، تەنیا وەرزی هاوین نەبێ کە ژنان بۆ چنینی میوەی جەنگەڵ دێنەئێرە.
بەڵام ئێستا لەم کاتانەدا هیچ میوەیەکی لێنیە ، چیە؟ ڕێگاتان هەڵە
کردوە؟
ئێمەش وەڵاممان دایەوە: بەڵێ ون
بووین.
کوڕیژگە گوتی: بەڵێ ئەگەر مرۆڤ لێرە زۆر وریا نەبێت بزربوون شتێکی
ئاساییە. پار هاوین ، ژنێک بۆ کۆکردنەوەی میوە هاتبووە نێو ئەم جەنگەڵە
و بزر بوو ، ئیدی ئەوەندەی بەدوایدا گەڕان نەیاندۆزیەوە ، ئیدی
ئەوەبوو
بەهارێ ئەمجار دیتیانەوە ، تەنیا ئێسک و پروسکەکانی مابوونەوە.
: ئەی تۆ لێرە چ دەکەی؟
کوڕیژگە ، وەڵامی دایەوە: لێرە دەژین ، لەدەریاچەی مالویە. بەدوای
گۆلکێکدا دەگەڕێم.
کوڕیژگە ئێمەی گەیاندە دەریاچەی مالویە. کاتێ بەنێو زەلکاوەکاندا
تێپەڕین و گەیشتینە زەویەکی سفت و پتەو ، بەترێکی شەو
تێپەڕیبوو ، بەنێو
ڕێگایەکی پڕ لەگژوگیادا دەچوینە پێش.
با ، هەورەکانی بەرەو باشور ڕادەماڵی. ئەستێرەکان ، لەسەروی لق و پۆپی
دار سنەوبەرەکانەوە تروسکە تروسکیان
بوو. بەڵام وێنەیەکی ئاشنای ئاسمان
، لەپشت لقە سیس
بووەکانەوە ، نامۆ دەهاتە بەرچاوان. تەنانەت بینینی (
ورچی گەورە*) ش کارێکی ئەستەم
بوو.
کوڕیژگە ، دوای بێدەنگیەکی درێژ ، گوتی: ڕاستیەکەی من بەدوای گۆلکدا
نەدەگەڕام ، ئەم قسەیەم هەر لەخۆمەوە هەڵبەست.
: ئەدی لەنێو ئەو جەنگەڵ و زەلکاوەدا بەدوای چیدا دەگەڕای؟
کوڕیژگە ، وەڵامی دایەوە: ئەستێرەیەک داڕژا ، پێرێ شەوێ لێرە ، لەپشت
تەپۆڵکەکەوە ئەستێرەیەک کەوتە خوارەوە ، شەوێ لەناکاو لەخەو هەستام ،
دیتم مانگاکەمان - مانکا - خۆی ڕادەپسکێنی و هار
بووە و دەبۆڕێنێ و قۆچ
دەوەشێنێ ، دەتگوت گورگ چۆتە نێو هۆڵەکە. منیش خێرا چومە نێو حەوشە و
ویستم بزانم چی ڕویداوە؟ لەناکاو بینیم شتێک لەئاسمانەوە بڵێسەی دا ،
سەیرمکرد بینیم نەیزەکە ، بەنزمی بەسەر ئاسمانی جەنگەڵەکەدا دەکشا ،
لەولای جەنگەڵەکەوە کەوتە خوارێ ، وەک فڕۆکە دەنگی دەهات.
: ئەگەر دۆزیباتەوە چیت لەو نەیزەکە دەکرد؟
کوڕیژگە ، وەڵامی دایەوە: دەمبردە قوتابخانە ، دەبێ تاوتوێ بکرێ ، ئەرێ
ئێوە نازانن ئەستێرە لەچی دروست
بووە؟
ئیدی بەڕێگاوە گفتوگۆیەکی باشمان لەبارەی ئەستێرەکان و کەرت
بوون و
دابەش بوونی ڕەنگەکانی پەلکەزێڕینەوە ، کرد.
لای نیوەشەوێ ، گەیشتینە سەر دەریاچەکە. ئەستێرەکانی ئاسمانی ئەو شەوە
پایزیە ، خۆیان لەنێو ئاوی دەریاچەکەدا نمایش دەکرد و ورینجەیان
دەدایەوە. چەند کوختێکی چکۆلە ، لەکەناری دەریاچەکە
بوون. جگە
لەیەکێکیان - کە ئاگری چرایەکی کزی تێدا دایسا - ئەوانی تر هەمویان
تاریک بوون.
کوڕیژگە لەدەرگایدا.
ژنێک ، بەتوڕەییەوە لەژورێڕا گوتی: هەی شەیتان ، تا ئێستا لەکوێ
دەگەڕای؟ تەنیا لەهیچ و خۆڕایی پێڵاوەکانی خۆت دەدڕێنی.
کوڕیژگە ، وەڵامی دایەوە: نا دایە گیان پێڵاوەکانم دانابوون.
دەنگی ترقە ترقێک ، لەکڵۆمی دەرگاکەوە هات و دەرگاکە کرایەوە ، ئێمەش
بەکوێرە کوێر خۆمان بەژورێدا کرد.
بۆنی پوش و پەڵاش و شیری تازە لەژورێ دەهات.
ئیدی ئەوشەوە لەماڵی کوڕیژگەدا - کەناوی لیۆنکا زۆێف
بوو - ماینەوە و
لەگەڵ باوکیدا ، کە پیرەمێردێکی کەم قسە
بوو و چاویلکەیەکی لەچاودا
بوو ،
جگەرەمان کێشا و بەتەنیشت سۆبەکەوە لەسەر پوش و پەڵاشەکە ڕاکشاین.
دەنگی سیسرکە و لەنێو حەوشەکەش دەنگی قرخە قرخی خەوتنی مریشکەکان دەهات.
لای نیوەشەوێ لەخەو هەستام گوێم لە دەنگێکی ژنانەی بەهێز و توند و
لەهەمان کاتیشدا غەمگین
بوو کە کۆپڵەیەکی ئاشنای ئۆپێرای ( بی بی پیک) ی
دەچڕی ، نەوای سەدان تاری ئۆرکێسترا ، دەنگی دەدایەوە.
ئەستێرەکان ، لەودیو شوشەی تەم گرتوی پەنجەرەکەوە ، دەلەرزین.
سیسرکەکەش بەبیستنی ئەم ئاوازە ، وازی لە سیڕە سیڕ هێنا و بێدەنگ
بوو.
دایکی لیۆنکا ، لەسەر سەکۆی نێو ژورەکەوە ، گوتی: دەنگی ئەم ڕادێویە
هەراسانت ناکا؟ ئەمە لیۆنکا خۆی دروستی کردوە ، پێموایە ناهێڵێ بنوی؟
من نازانم چۆن دەکوژێتەوە! ناچارم لیۆنکا هەستێنم.
: نا پێویست ناکا ، لێی گەڕێ بابنوێ.
ژنە گوتی: بەڵام ئێمە بۆخۆمان حەزمان لێیە - لێرەدا بڕێک دەنگی ئارامتر
بۆوە - زۆر حەزمان لێیە بزانین ئاخۆ گۆرانیەکانی مۆسکۆ چۆنن؟ هەم لێڵ و
ناڕۆشنن هەم غەمگین و شادی بەخشیشن ، هەرچەندە بەدرێژایی ڕۆژێ حەجمینم
نیە ، بەڵام جاری وایە تا کەڵەبابی بەیانی دەقوقێنێ ، چاو لێک نانێم.
ئیدی بێدەنگ
بوو.
پێدەچو کە لەو کاتەدا زەردەخەنەیەک هاتبێتە سەر لێوی - گوتی: هەمو
ئەمانە کاری لیۆنکان ، هێند بزێوە دەیەوێ هەمو شتێک بزانێ ، چۆتەوە سەر
باوکی.
لەژنەکەم پرسی بۆ باوکی چۆنە؟
ژنە پرسیارەکەمی دوبارە کردەوە: سیمۆن چۆنە؟ سیمۆن لەساڵی
١٩١٨ وە
ئەندامی حیزبە. هەمو شتێکی هەر بۆَ خەڵکە ... ئامادەیە پاروی دەمی خۆی
بکاتە دەمی خەڵکەوە و بۆخۆیشی خۆی بەکتێبان تێر بکا.
لای بەربەیان لە سەربردەی ژیانی سیمۆن زۆێف ، ئاگادار
بووین. لەسەردەمی
لاویەتیدا لەکارخانەی ڕستن و چنینی (لیسۆف) ، لەشاری (ڕیازان) ، کاری
کردوە و کە لەو سەردەمەدا بەباشترین کارخانەی شار ئەژمار دەکرا. جل و
بەرگی بۆ پارێزگار و ئەفسەران و نوێنەران و پارێزەران دەدوری.
پارێزەرەکان جل و بەرگی تایبەت بە خۆیان دەویست و زۆێفیش شریتێکی
ئاوریشمی بەپانتۆڵەکانیانەوە دەدوری. سەرەنجام بەهۆی ئەو کارەوە
چاوەکانی توشی گرفت
بوون ، ئەو کارە حەوسەلە و توانا و وردبینیەکی زۆری
دەویست.
لیسۆف ، پیرەمێردێکی خواناس
بوو ، ڕوخسارێکی مەیلەو سەوزی - کەدەتگوت
ڕۆنی چرایە -
هەبوو. ڕۆژ تا ئێوارێ سەرگەرمی خوێندنەوەی کتێبی ئاینی یان
کتێبی ( مێژوی وڵاتی ڕوسیا) ی (کارامزین)
بوو. هەزار ڕۆبڵی بۆ نوسین
لەسەر چەندین پارچە تابلۆی چەدەنی تەرخان کرد ، کورتەیەک لە (مێژوو) ە
کەی کارامزینی لەسەر تابلۆیان دەنوسی و پاشان بەدیواری ماڵەکانی نێو
گەڕەکە پڕ لە تۆز و خۆڵەکانی شاردا هەڵیدەواسی. لەژێر هەموشیاندا
نوسرابوو: بڕوانە کتێبی (مێژوو) ی کارامزین ، بەرگی ئەوەندە ، لاپەڕەی
ئەوەندە.
سیمۆن گوتی: من لە کتێەکانی کارامزینەوە دەستم پێکرد و لەکۆتاییشدا
کەوتمە خوێندنەوەی وتارەکانی (لینین). دەکرێ بڵێی کە بانگەوازی لینین ،
تەنانەت لەدورەدەست ترین شوێنی تەریک کەوتو ولاچەپەکدا بەهێز و
کاریگەیەکی گەورەوە خۆی دەچەسپێنێ. ئەگەر مرۆڤ شەوێ بەرهەمێکی
بخوێنێتەوە ، ئەوا بەیانی بێ دودڵی ، ناڕازیە و دێتە سەر شەقام. تۆز و
خۆڵ ، قازەکان بەرەو لای جۆگە ئاوەکان دەچن ، دیواری دوکانی مەشروب
فرۆشیەکە بە (لاک*) سوور
بووە ، دەنگی ناقوس لەکلیساکەوە دێتە بەرگوێ ،
سواڵکەرەکان بەوپەڕی خۆ بەهەق زانینەوە لەسەر کۆبیکێک دەیکەنە هەرا و
یەکتر دەدەنە بەر گۆچان. بەکورتی ئیدی ئەمە ڕوسیای سەردەمی دەقنانوس
بوو
، بەڵام وتەگەلێکی تازە ، بەوێنەی بڵێسەیەکی نور ، لەبارەی ئایندەیەکی
هاوشێوەی خۆی لە مێشک دایە.
سمیۆن ، دوای سەرکەوتنی شۆڕش ، هاتبووە ئەم گوندە کەناریە و لەکەناری
دەریاچەکە کوختێکی بۆخۆی دروست
کردبوو. کەوتبووە ئاوەدان کردنەوە و پاک
کردنەوەی بەشێکی زەویە جەنگەڵیەکە ، ئیدی ئێستا پێنج خێزان لەکەناری
ئەم دەریاچەیەدا دەژین.
سبەی بەیانی ، لیۆنکا تا سەر جادەیەکی گەورە ڕێنمایی کردین.
خۆری سپی بەسەر جەنگەڵەوە - کە سەرتاپا ڕوت ببۆوە و گەڵای دارەکانی
هەڵوەریبوون - دەدرەوشایەوە. بەهۆی ڕوناکیە ساردەکەیەوە ، گەڵا
هەڵوەریوەکان و سپیدارە کەوتوەکان ، دەبینران. هەرکاتێ بایەکیش
هەڵیکردبا ، گەڵای دارەکان چەشنی بارانێکی بەخوڕ بەسەرماندا دەبارین.
دوای چەند ڕۆژێک ، لیۆنکا بە هانکە هانک و بەپەلە خۆی گەیاندەوە
ئاواییە چکۆلانەکە و پارچەیەکی بچوکی تیژ و سوتاو و دوکەڵاوی (ئەستێرە
کەوتوەکە) ی بەدەستەوە
بوو. ئەو پارچەیەی لەوسەری تەپۆڵکەکەوە
هێنابوو.
ئیدی لەوکاتەوە لەگەڵ لیۆنکادا
بوومە ئاشنا ، حەزمدەکرد لەگەڵیدا بەنێو
جەنگەڵەکەدا بگەڕێم. ئەو ، تەواوی کون و قوژبن و کوێرەڕێگاکانی نێو ئەو
جەنگەڵە چۆڵە ،
شارەزابوو و هەمو جۆرە گیایەک و بنەبنچک و ئاشنە و خارچک
و گوڵەکان و دەنگی هەمو باڵندە و دڕندەکانی دەناسی.
لیۆنکا ، یەکەمین کەس
بوو - لەنێو ئەو سەدان کەسەی کە دەمناسین - کەپێی
گوتم : ماسی چۆن و لەکوێ دەخەوێ؟ دار کاژە کۆنەساڵەکان چۆن گوڵ دەکەن و
جاڵجاڵۆکە بچوکەکان چۆن هاوکات لەگەڵ باڵندە کۆچەریەکاندا لەوەرزی
پایزدا کۆچ دەکەن؟. ئەو پێی گوتم کە جاڵجاڵۆکەکان خۆیان لە تەونی
خۆیانەوە دەپێچن و کاتێکیش بایەکی بەهێز بەرەو باشور هەڵدەکا ، خۆیان
دەدەنە دەم ئەو بایە و سەدان کیلۆ مەتر دەیانبات.
لیۆنکا ، دو بەرگی لە کتێبێکی ( کایگۆردۆف) ی نوسەر
هەبوو ، لەئەنجامی
خوێندنەوەدا پەڕپوت ببوون ، بێهودە هەوڵی دەدا لەنێویاندا لە نهێنی کۆچی
ساڵانەی جاڵجاڵۆکەکان تێبگا.
لیۆنکا دەیگوت: (تەنیا لەشتێک تێناگەم ، جاڵجاڵۆکە خۆی بچوکە ، بەڵام
ئەگەر ئەو تەونەی کە دروستی دەکات ، کۆبکرێتەوە چل بەقەد قەبارەی خۆی
دەبێت.
لیۆنکا ، بۆئەوەی هەمو ڕۆژێ بگاتە قوتابخانە ، دەبووایە دە کیلۆمەتر
ڕێگا ببڕێ. لەتەواوەی ئەو زستانەشدا تەنیا دو ڕۆژ
نەیتوانیبوو بچێتە
قوتابخانە ، ئەویش لەئەنجامی ئەو بەفر و زریانەدا
بوو کەهەتا ئاستی
سوانەی خانوەکە باری. بۆخۆی هیچ کات حەزی نەدەکرد ئەمەی وەبیرکەوێتەوە
، شەرمی دەکرد.
لە وەرزی زستاندا کاتێ لیۆنکا لەماڵێ وەدەر دەکەوت ، دنیا تاریک
بوو ،
ئەستێرەکان لەسەرمان دەلەرزین. گەڵای دارکاژەکان خشەخشیان دەهات. بەفر
لەژێر پێیدا کرتەکرتی دەکرد و دڵی توند
دەبوو: نەکا گورگەکان گوێیان لێ
بێت. گورگەکان لەگەڵ هاتنی وەرزی زستاندا دەهاتنە کەناری دەریاچەکە و
لەژێر کۆمای گژ و گیاکاندا دەژیان.
لەهەموشی ناخۆشتر کۆتاییەکانی وەرزی پایز
بوو ، ئەوکاتانەی بەفر
لەئەنجامی بارینی بارانێکی زۆردا نەرم و شل دەبۆوە و سەرجادەکانی
دادەپۆشی و بایەکی بەهێز هەڵیدەکرد و سەرما جەستەی مرۆڤی دەبەست.
لیۆنکا ، هاوینانیش لەگەڵ دایکیدا زەوی دەکێڵا و بێستانی دەکرد و گیای
دەدورییەوە.
سمیۆن کاری پێنەدەکرا ، لێدانی دڵی ساڵ بە ساڵ زیاتر
دەبوو ، ڕەنگی
دەگۆڕا و کۆخەیەکی وشک و درێژخایەن ، پڕزەی لێَ
بڕیبوو. ناولەپی دەستی
بەسینگی خۆیدا دێنا و دەیگوت: (نەژیانم هەیە ، نەئەوەشە بمرم ، ئەم
ژیانە جاڵجاڵۆکەییە کوشتمی. دەرکەوت کە درەنگ شۆڕِش کرا ، هەرچیەک بێت
گرینگ نیە ، لیۆنکا هەر کارێک بێت لەبری من دەیانکات).
* *
*
لەگەڵ لیۆنکادا پەیمانی دۆستایەتیمان بەست ، زۆر کتێبم لەمۆسکۆوە بۆ
دەنارد. هەمو ساڵێکیش لەوەرزی پایزدا گەشتێکم بۆ ئەو لادێ بچوکە
کەناریە ، دەکرد ، ئیدی خوم بەم گەشتە ساڵانەیەوە
گرتبوو.
هەمیشە بەشێوەیەکی چاوەڕوان نەکراو خۆم بەماڵیاندا دەکرد ، لەنێو ئەو
بێدەنگیەی جەنگەڵدا دەڕۆیشتم ، جگە لەباڵندەی نێو جەنگەڵ ، لەگەڵ هیچ
شتێکی تردا بەرەو ڕو نەدەبوومەوە ، مێرگوزارە دڵگیرەکان و پێچ و
بادانەوەکانی جادە پڕ لە گژ و گیاکە ، بەتەواوی شارەزا ببووم. هەمو دار
کاژەکانی قەراغ جەنگەڵەکەم دەناسیەوە ، لیۆنکا فێری کردبووم ئەو شتانەم
خۆش بووێت.
هەمیشە سەروەختی تاریک و ڕونی ئێوارێ ، ئەو کاتانەی ئەستێرە ڕەنگ
پەڕیوەکان ، پێشبینی شەوێکی ساردیان دەکرد و پێدەچو بۆنی دوکەڵ خۆشترین
بۆنی دونیا بێت ، خۆم بەماڵیاندا دەکرد.
بۆنی دوکەڵ ، لەنزیک دەریاچەکە و لەنێو کوختێکی گەرم و پڕ لەباس و
خواسی گەرم و شادی بەخش و گلەییە شیرنەکانی دایکی لیۆنکا و جێگا خەوێکی
لە پوش و پەڵاش سازکراو و دەنگی جیڕجیڕە و شەوانی بێ کۆتایی ، کە من
لەو شەوانەدا لەغەوغای تارەکان ، لە موزیکە دڵگیرەکانی (بتهۆڤن و (
ڤێردی) - کە لورەی لەرزۆکی گورە برسیەکانی کپ دەکرد - لەخەو هەڵدەستام.
هەرجارێ لیۆنکا لەکوختەکە دەهاتە دەرێ وپێشوازی لە من دەکرد ، شەرمی
دەکرد خۆشحاڵی خۆی دەربڕێ ، تەنیا بەتوندی دەستی دەگوشیم.
دواتریش پێکەوە ماوەیەکی باش لەبارەی ئەو کتێبانەی کە خوێندبوومانەوە و
لەبارەی بەرهەم و داهاتی ساڵانە و ئەو کەسانەی کە زستان لەجەمسەری
باکور گیریان
خواردبوو و لەبارەی خۆرگیران و ڕاوی مارماسیەوە ،
دەکەوتینە گفتوگۆ. ئێمە بابەتی زۆَرمان
هەبوو بۆ قسە کردن.
سمیۆن ، دوبارە لەبارەی گەنجێتی خۆی و ئەو خوێندکارانەی کە بڵاو کراوە
نهێنیەکانیان دەبردە ڕیازان ، دەکەوتە قسە کردن.
بەم شێوەیە دۆستایەتی ئێمە پتەو تر
دەبوو. من لەهەر شوێنێک
بووایەم ،
دەمزانی سەرەتای پایز دەبێ بەرەو ئەو سەرزەمینە جەنگەڵیە بگەڕێمەوە.
دەگەڕێمەوە و لیۆنکا و سمیۆن دەبینم و بەم شێوەیە و بەژیان کردن لەگەڵ
ئەم خەڵکانەدا زیاتر و زیاتر هەست دەکەم کە ژیان ساڵ بە ساڵ باشتر دەبێ.
هەرچی زیاتر هەست دەکەم کەڕۆژانێک بەڕێگاوەن کە تیایدا نائاگا دەبیستم
چۆن جەنگەڵ لەژێر گڤەی ڕەشەبادا دەنگی هاشە هاشی دێتە بەرگوێ ، چۆن
کانیاوە ساردەکان لەژێر چڵە ئاشنەکان دەیکەنە زەمزەمە ، لە نرخ و
بایەخی ڕاستەقینەی کتێبەکان و بیرکردنەوە و هاوڕێیەتی کوڕیژگەیەکی
دێهاتی - کە سێ ساڵە ئارەزوی لەوەیە بێتە مۆسکۆ و میترۆ و کرملین و
فیلی زیندوی نێو باخچەی گیانلەبەران ببینێ - تێدەگەم.
هەمو ساڵێک ، کاتی گەڕانەوە ، لیۆنکا بەڕێمدەکا. ئەمساڵیش هەر بەو
شێوەیە بوو. ترێنێکی باریک ، کەخەڵکی ناوچەکە ناویان لێناوە ( پیرە
بارگیر) ، بەنێو جەنگەڵەکەدا دەخشێ.
باریکەڕێیەکان و دیمەنە ڕازاوە و ئەرخەوانیەکانی جەنگەڵە چڕەکە ،
لەبەردەمماندا دەکاتەوە. لەیەکێک لەم باریکە ڕێیانەدا ، دروست بەتەنیشت
ڕێگا ئاسنەکەوە ، لیۆنکا ڕاوەستاوە و کڵاوە لێواردارەکەی باوکی
بەدەستەوەیە و ڕایدەوەشێنێ.
لۆکۆمۆتیڤ ، هاوارێکی توڕەی لێ بەرزبۆوە. بەڵام لیۆنکا پێکەنی و
هاوارێکی بۆ کردم و گوتی: چاوەڕوانت دەبم ، من لەبارەی هەموشتێکە نامەت
بۆ دەنوسم و تۆش لەبیرت نەچێ کتێبەکەی (براهام) م بۆ بنێرە.
تاماوەیەکی زۆر هەر لێمەوە
دیاربوو ، بەڕوخسارێکی جوانەوە ، بەنێو
جەنگەڵە چڕ و شێدار و (گەس) ە پایزیەکاندا ، بەدوای شەمەندەفەرەکەدا
ڕایدەکرد. ئەو ڕایدەکرد و جانتا پڕ لەکتێبەکەی ڕادەوەشاند و
زەردەخەنەیەکی بێگەرد و شەرمنانەی دەدا بەڕوی من و خۆر جەنگەڵەکان و
تەواوی دونیادا.
_________________________________________________________
*
ورچی گەورە:
یەکێک لە
وێنە فەلەکیەکانی باکوور.
*
لاک:
شلەیەکی ڕەنگ سورە ، لە هیندستان لە هەندێک دارەوە دەستیان
دەکەوێ.
سەرچاوە / نامە
/ نولهای معاسر شوروی
/ ترجمە / گامایون
/ بنگاه نشریات
پروگرس / موسکو.
nagmkaya@yahoo.com
|
