ماچی کۆتایی.

کەژاڵ ئیبراهیم خدر

1

ئەمشەو دڵم بۆنی نێرگزی لێدێ و
دنیای بەختەوەریم شەپۆلێکی وێرانەیەو
بێ دەنگی بەسەر دەریای تەمەنمدا دەڕژێ و،،
باڵای چنارم
بۆنی ماڵئاوایی دەکا و
خەیاڵی رۆحم پێم دەڵێ:
ئەمشەو دوا ماچی کۆتاییە و
وەرزی بەهار، گوڵی باخت تێر ئاو ناکا.

 
2
ئەمشەو خەونی مەرگ دەبینم
مردن تێکەڵ بەمن دەبێ و
نایەوێت تامی رۆژگاری رانەبردووی
ژیانم بکەم.

 
3
ئەمشەو دڵۆپێک باران
نابارێ بەسەر خونچەی روخسارمدا و
تەنهایی باوەشێک گەڵای زەردی بۆهێناوم
لێوەکانم بوونەتە شەوانی غوربەت و
غەریبی بۆتە هاوڕێی چارەنووسم.

 
4
ئەمشەو نهێنیەکانم، لەگەڵ خۆمدا
دەکەمە تاسەی دووری و
زەنگی مردن دەکەمە دەزگیرانم.

 
5
من دەمەوێت لەخۆم زیاتر
جوانی گوڵە کێویلە و
دەنگی نەغمەی بولبول و
هاژەی رووباری سەرشێت و
زەردی گەڵای پایز و
برینی جەستەی هەژاران و
هیوای دووری کەس نەبیستم !
من دەمەوێت لەخۆم زیاتر
چێژ لە روخساری کەس وەرنەگرم
دەمەوێ دەنگت پێم بڵێ
بێنە روخساری ژاکاوت
تاکو جوانییه‌کانی
تێدا حەشار بدەم و هەڵیکێشم.

6
ئەوە منم بەچاوی پڕ لە فرمێسکەوە
بە روخساری پەشۆکاو
بە جەستەیەکی شەکەتەوە
لە ئاوێنەی تەمەنمەوە دوور دەڕوانم و
هێمنتر لەجاران
بە هیلاکی و ماندووبوونەوە
لەژێر سێبەری بێ دەنگیدا
بە هیوام ژیان میهرەبانیم بداتێ
کە لەمێژە خەونی پێوە دەبینم.

 
7
من دەترسم کاتێک مەرگ
سۆراخی من دەبات بۆخۆی
پەڕەی شعر و ووشەکانم
گوڵێکی تر نەکاتە تریفە و
پانتای دەشتێکی بەرین ؟

8
ئەمشەو مردن پەیکەرێکە
وەکو میوان، باوەش بەتەنهایمدا دەکا و
لێوی ووشک بووم تەڕ ناکا
بەڵام چی بکەم ، دڵەی شێتم
پێم دەڵێت ،خۆشم دەوێت.

 
8
من دەزانم چارەنوسم چی بەسەر دێ
ئێستاکە دەمەوێت بڕۆم و
بەڵام نازانم
کەی بیر لە تۆ دەکەمەوە.

 
9
ئەمشەو دەبم بە خۆم،
گڕی عەشق لە دەرونمایە و
دەبم بە گڕ بە ناخی خۆمدا دەتوێمەوە.

10
ئەمشەو دەبمە ئەستێرە و مانگ
دەبمە پەپولەیەکی بێ باڵ
دەبمە شەونمی سەردرەخت
دەبمە کانیلەیەکی جوان
دەبمە پرچی کیژۆڵەیەک
شانەی دەستی بۆم دابێنێ.

 
11
دەمەوێت بڕۆم و
واز لەخۆشەویستی و مەرگ بێنم
دەمەوێت
بگەڕێمەوە تەمەنی منداڵی و
بۆ بووکەشوویەک تێر بگریم
تاکو رۆحی منداڵیمی
تێدا زیندوو بکەمەوە..!

 sannet01@yahoo.com