|
مالکى و درێژەدان
بەسیاسەتەکانى سەدام.
بەهرەوەر مەرزانى
گەلى کورد بەدرێژایى مێژووى لکاندنى باشوورى کوردستان بەعێراقەوە تا
بەئەمڕۆ دەگات لەلایەن رژێمە یەک لەدواى یەکەکانییەوە بەدڕندانەترین
شێوە چەوسێنراوەتەوەو هەوڵى سڕینەوەى ناسنامە نەتەوەییەکەى دراوە ،
لەبەرامبەر ئەو هەموو زوڵم و ستەمەشدا گەلەکەمان لەخەبات و بەرخودان
سڵى نەکردۆتەوەو روو بەرووى پێشکەوتووترین چەکى سەردەم و سوپاى
پێشکەوتوو بۆتەوە لەپێناو پاراستنى کولتورو فەرهەنگ و پارێزگاریکردن
لەناسنامە نەتەوەەییەکەى .
لەسەرەتاى سەدەى بیستەمەوە پشکى کورد لەعێراق دەیان کارەساتى وەک
ئەنفال و کوشتنى بەکۆمەڵ و راگوێزانى دانیشتوانەکەى و رووخانى زیاتر
لەچوار هەزار گوندى کوردستان و کیمیا بارانکردنى چەندین شارو شارۆچکەى
بووە ، لەگەڵ هەموو ئەمانەشدا هیچ کام لەرژێمەکانى ئەو وڵاتە
نەیانتوانیوە چۆک بە ئیرادەى بەهێزى خەڵکى کوردستان دابدەن و لەشۆِش و
بەرخودان لەپێناو رزگارى و سەربەخۆییدا ساردیان بکەنەوە .
لەدواى هاتنە سەردەسەڵاتى رژێمى بەعس لەعێراق ئەو رژێمە بەپێى بەرنامەو
پیلانێکى نەخشە بۆ دارێژراو هەوڵى سڕینەوەى ناسنامەى نەتەوەیى
گەلەکەمان و کوردستانى بوونى بەشێکى زۆرى خاکى نیشتمانەکەمانى دا بۆ
ئەمەش لەشوێنى هەر ماڵە کوردێک دەیان ماڵە عەرەبى دەهێنایە ناوچە کورد
نشینەکان و خەڵکى رەسەنى ئەو شوێنانەشى لەسەر زێدى باب و باپیرانى
دەربەدەر کرد.
ئەمڕۆش دواى رووخانى ئەو رژێمەو هەڵبژاردنى پەرلەمان و حکومەت و
پێکهێنانى قەوارەیەکى سیاسى دیموکراتى فیدرالى لەو وڵاتەدا مالکى هەمان
رێچکەى سەدامى گرتووە سیاسەتەکانى ئەو پەیڕەو دەکات هەر لە لەمپەر
خستنە پێش جێبەجێکردنى مادەە دەستووریەکان بەتایبەتیش مادەى 140 و
یاساى نەوتو غاز و لەنوێترین کاردانەوەشى دەستى کردووە بە دەرکردنى
ئەفسەرە کوردەکان و دوور خستەنەوەیان بۆ باشوورو ناوەڕاستى عێراق و
اعتراف نەکردن بەبڕوانامەى ئەو ئەفسەرانەى لەکوردستان کۆلێژى
سەربازییان تەواو کردووە ، بۆیە پیچویستە سەرکردایەتى سیاسى کوردستان
هەرچى زووە بەتووندترین شێوە بەرپەرچى بەرپەرچى ئەو رەفتارانەى مالکى و
حکومەتەکەى بداتەوە ئەگەر بەکشانەوە لەحکومەتیش بێ و هەڵوێست
لەبەرامبەر ئەو رەفتارانەى مالکى وەربگرێت بۆ ئەوەى چیتر دەسکەوتەکانى
گەلەکەمان و مافە نیشتمانى و نەتەوەییەکانمان نەبنە قوربانى سیاسەتى
مالکى و شۆڤێنیەتى عەرەب و چیتریش لەبەرامبەر بەڵێنەکانى مالکى و
حکومەتەکەى کات بەفیڕۆ نەدەین .
Bahrawar_s@yahoo.com
|
