ئەوڕۆ دە ساڵی رێک و بێ پسانەوە وەسەر دەستبەکاربوونی
ماڵپەڕی ئەمڕۆ*
تێپەڕی؛ دە ساڵ تەرخانکردنی کات و کاری خۆبەش.. دە ساڵ
کاری پڕ لە شەونخونیی و وزەپڕووکێن، دە ساڵ
بەڕێوەبردنی خەرجیی ماڵپەڕەکە لەسەر گیرفانی تایبەتی
خۆمان کە تا ئێستا پتر لە ١٠
هەزار دۆلاری تێچووە بێ ئەوەی یەک دۆلارمان لە هیچ کەس
و لایەنێک وەرگرتبی... ئەوانەش هەمووی لە پێناو ئەوەی؛
خزمەتێک وە پەیڤ و فەرهەنگی پێشکەوتنخوازانەی کوردی
بکەین.. خزمەتێک وە خوێنەران و نووسەران و خاوەنی
بەرهەمە رۆشنیرییەکان بکەین.. پێگەیەکی سەربەخۆ و
ئازاد و پێچەوانەی میدیای لەخشتەبەری حیزبیی و سێبەر و
میدیای (ئەهلی)ی
پیشەکار و پارەپەرست دابمەزرێنین.. خزمەتێک وە نووسەرە
گەنجە ئازادییخواز و پێشکەوتنخوازەکان بکەین کە جێی
ئاماژەپێدانە تا ئێستا وە دەیانی تێدا پەروەردە بووه،
سەرەنجام پێگەیەک بی لە خزمەتی چینە چەوساوەکان و
یەکسانیی نێوان ژنان و
پیاوان و سەرجەم ماف و ئازادییەکانی خەڵکی کوردستان و
لە پێشەوەی هەمووانیش مافە نەتەوەیی و
نیشتیمانییەکانیان کە تەنیا و تەنیا سەربەخۆیی
کوردستانە. ئیدی ئەو
خۆخستنەڕووەمان لەو یادەدا رامان و
بۆچوونی (دەستەی بەڕێوەبەریی ماڵپەڕی ئەمڕۆ)یە.. ئەوە
تەنیا خوێنەران دەتوانن بڕیار بدەن کە ئایە تا چەند
رۆڵ و نەخشمان هەبووە لە وەدیهێنانی ئەو ئامانجانە؟
___________________________
*
ماڵپەڕی ئەمڕۆ درێژەپێدەری (رۆژنامەی ئەمڕۆ)یە کە لە
١٥\٨\١٩٩٤
لە کوردستان و لە شاری هەولێر دامەزرا، پاشان لە لایەن حیزبە ستەمگەر و
دژە ئازادییەکانی دەسەڵاتدارانی کوردستان وە شێوازی جوراوجۆر هێرشی
کرایە سەر کە دەیانویست رۆژنامەکە بکەنە دەرباری خۆیان ئەگەر نا ئەوە
کارمەندەکانی لەنێودەبەن.. سەرەنجام رۆژنامەکەیان داخست و لاپەڕەیەکی
رەشیان لە بەرانبەر ئازادیی رۆژنامەگەریی تۆمارکرد!
