٢٨\١\٢٠١١

من له‌ موڕتەد موڕتەدترم.

       هیوا رەش   

لە سایتى ئاوێنەدا ئەم هەواڵەم خوێندەوە (سزاى شەرعیى جیابوونەوە لە عێراق کوشتنە ) (( ئەوەى هەوڵى جیابوونەوە و دابەشکردنى عێراق بدات مورتەدە چونکە بە گوێى دوژمنانى کردووە )). ئەمە وتەى نەوەکانى شیر و تیرى پاشماوەى ئەنفالچییەکانى لم و بیابان و وەچەکانى ئیسلامى عروبەى ئیسلامە .

نیگەرانى من لە حەپەى ئەوانە نیە کە وایان وتووە ، بەڵکو زیاتر لە ئیدیعاکانى هاوبیرەکانى ئەوانە کە ڕۆژانە لە کوردستاندا لە مەزڵومیەتى گەلى کورد خۆیان بە پێشەنگى داکۆکیکاران لە مافەکانى دەزانن لە ناوەوە و کەچى بۆ دەرەوەش نوزەیان لێوە نایەت ! زۆر جار دکتۆر و پرۆفیسۆر و زانا و دانا و مامۆستا و ئەمیندارى گشتى زانایانى ئیسلامى جیهانى- عەلى قەرەداغى - دەبێتە میوانى شاشەى تیڤییەکانیان و خۆیان لە سەر کۆمەڵێک مەسائیلى لاوەکى ڕادەوەشێنن و دەیانەوێت لمى جەزیرەى عەرەبى بە چاوى خەڵکى کورددا بکەن ، بەرنامەگەلێک ڕێک دەخەن کە زۆر مەسەلەى چارەنوسساز هەیە لێى بدوێن بەڵام لێى نادوێن.

 بەندە وەکو تاکێکى کورد بەشبەحاڵى خۆم هەر یەکێک لە حزبە کوردستانییەکان بە ( ئیسلامى و عەلمانى ) یشەوە بە بە بایەخەوە لێیان دەڕوانم و بە هەڵوێستى جوامێرانەیان خۆشنوود دەبم ، بۆ سەلماندنى ئەمەش پارساڵ لە سەر بابەتێک کە لە ماڵپەڕەکاندا بڵاوم کردەوە و بەراووردى هەڵوێستى جوامێرانەى یەکگرتوو لە پەرلەمانى بەغا و بە هەست کردن بە بەرپرسیارێتییەوە سیاسەت و کارنامەى خۆیان جێبەجێ دەکرد و نە لە چاوسوور کردنەوەکەى پارتى لە بادینان ترسان و نە بوغزى پەلاماردانەکەى پارتیش لە بەغا کاریگەریى لە سەر ئاییندەى کاروبارەکانیان جێهێشتبوو ، حەکیمانە و بە گیانێکى کوردانەوە ڕەفتاریان دەکرد ، هەروەها هەڵوێستى مەردانەى ئەوانم زۆر لە سەرووى هەڵوێستى خۆبەدەستەوەدەرانەى سەرانى حزبى شیوعى کوردستانى هەڵسەنگاندبوو ، لە سەروبەندى ئەم نووسینەشمدا بەرنامەیەکى هێندە جوانیان لە کەناڵى ( سپێدە ) ەوە بۆ یادى کۆمارە بە خوێن سوورەکەى مەهاباد ئامادە کردبوو بە ڕاستى زۆر سەرسامى کردم.

وەلێ ئەوەى مایەى نیگەرانى زیاترمە بێهەڵوێستى باڵ و لایەنە ئیسلامییەکانى کوردستان ( کۆمەڵ و بزووتنەوە بە یەکگرتوو ) شەوە ، هەتا بە پارەخۆرەکانى وەزارەتى ئەوقاف و یەکێتى زانایانى ئیسلام و فەقێ و مەلاکانى مزگەوتەکانى کوردستان ڕادەگات کە لە سەر وشەى جێندەر دنیایان ئاخر کرد و بێدەنگییان هەڵبژاردووە لەمەڕ ئەو فتوایەى کە لە لایەن جەماعەتى ... رسالە خالدە - وە دەرکراوە لە سەر گەلى کوردمان کە ڕەوایەتى بە بەردەوامیى - ئەنفال - ى ڕەش دەدەن ئەگەر بێت و باس لە مافى ڕەواى گەلەکەمان بکەین - جیابوونەوە - کە ئێستا بێت یان ئاییندە هەر دەبێت زەمینەى بۆ بڕەخسێت و وەکو باشورى سودانى بە عەرەب و ئیسلام کراو ، ئێمەش بە ڕاپرسییەکى دیموکرتیک بێت یان بە زەبر و زەنگى شۆڕشگێڕانە ئەو ئاواتە بهێنینە دى و لە دەوڵەتى عێراقى عەرەبى داگیرکار داببڕێین و لە خاک و وڵات و لە ژێر سایەى ئاڵاى کوردستاندا سەربەخۆیى خۆمان ڕابگەیەنین و ببین بە داَڵدەى براکانى تریشمان لە بەشە داگیرکراوەکانى دیکەى کوردستانى گەورە .

جێگەى وەبیرهێنانەوەیە کە ( حاجى ) قادرى کۆیى و ( قازى ) محەمەد و ( شێخ ) مەحمودى حەفید و ( مەلا ) مستەفاى بارزان ، ئەمانە نەک هەر ناوەڕۆکیان تەنانەت نازناوەکانیشیان هێماى پباوان و زانایانى ئیسلامى دەبەخشن ، وێڕاى شێخ سەعیدى پیران و شێخ ئەحمەدى بارزان ، کە سیمبولى تێکۆشان و بەرخودان و خەباتگێڕى نەتەوەیین ، جا دەبوایە لایەن و باڵ و گروپ و حزبە ئیسلامییەکان بۆ داکۆکى کردن لەم کەڵەپیاوە مەزنە شۆڕشگێڕە نەتەوەییانەى لەمەڕ خۆمان بهاتنایەتە دەنگ و بە وشترەوانەکانى دوڕگەى عەرەبییان بوتایە کە لە هیچ وڵاتێکى عەرەبى ئیسلامیدا بە قەد قەوارەى پڕچنگى باشورى کوردستانیش نە مزگەوتتان هەیە نە پێنج جاران لە مزگەوتەکانتانەوە بە دەنگى کاسکەر بانگى ئیسلامى دادەدەن ! خێرە کوشتنى ئێمە بە نوکە ڕمى خوێناویى تیرۆریستى ئێوە حەڵاڵە ؟؟؟ !!!

توخواى گشت ئیسلامییەکانى جیهان ناهەقمە بڵێم : نەک لە مورتەد مورتەدترم بەڵکو مولحیدێکم یان زیندوو نابمەوە یان ئەگەر زیندووش ببمەوە وەرامى قەبرم بەم شێوەیە دەدەمەوە : کوردایەتى ئایینمە ، کەرکوک قیبلەمە ، سەربەخۆیى دوایین مەنزڵگاى خەباتى ڕەواى ئینسانیمە .

ماڵپه‌ڕی هیوا ره‌ش