په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٣\٦\٢٠١٤

میرنامە: گرفتەکانی نێوان رۆشنبیر و دەسەڵات لە دیرۆکەوە هەتا ئێستا.

گەشبیر ئەحمەد     

(لێرە ڵاڵەکان قسەدەکەن و مردووەکان دەژین!) نووسراوی سەر پەرتووکخایەک لە بۆدابیست.


رۆمانی (میرنامە) وەکو درامایەک وایە کە لە بیست و سێ ئەڵقە پێکهاتووە، لە فەزایەکی سۆفی گەریدا ئاشنامان دەکات بە ڕابردووی خۆمان، بەلۆژیکەوە باسی ئەوە خەمە هەمیشەیی زانا و رۆشنبیرەکانی کورد دەکات لە بەرامبەر فەرمانڕەوا و سەرۆک دەسەڵات دارەکان، کە هەمیشە شیری ماڵەوە ڕێوی دەرەوەبوون، (جان دۆست) پێماندەڵێت کە هەر لە دێرزەمانەوە سەرۆکەکانی کورد هەمیشە لەبەرامبەر بێگانەدا ملکەچ بوون لە پێناوی کورسی و ساماندا، دەیان جار چانسی سەربەخۆ بوون هاتۆتە پێشەوە بەڵام ئەوان خۆیان لێدزیوەتەوە بە پاساوی جۆراو و جۆر لە ڕاستیدا ئەم گرفتە هەتا ئێستاش بەردەوامی هەیە. زانا و شاعیر (ئەحمەدی خانی) وەکو پاڵەوانی سەرەکی ڕۆمانەکەیە ، هەروەها (جان دۆست) پێماندەڵێت هەر لە دێرزەمانەوە سەرکردەکانی کورد دژی ئەوە بوون خەڵکی هوشیار بێت ویستوویانە هاوڵاتی وەکو کۆیلە مامەڵی لەگەڵ بکرێت و بخەسێرێن لەبەردەم میر و فەرمانڕەواکان. فەزای ڕۆمانەکە زۆر نایابە دەیان چیرۆکی بەتام دێتە ڕێت، وە هەستی بەردەوامی خوێندنەوە هەمیشە ئەتبزوێنێ چونکە بە تەکنیکێکی زۆر نایاب نوسراوە و گرێدانی ڕوداو کارەکتەرەکان زۆر بە لۆژیک کراوە، بە ئاشکرا هەست دەکەیت کە نوسەر زۆر بە سەلیقەوە ئەم بەرهەمەی خولقاندووە و بە جوانی ڕۆچۆتە ناو ناوەڕۆک و پەیامی سەرەکی ڕۆمانەکە. لەسەروو هەموو ئەمانەش توانا و لێهاتووی وەرگێر (سەباح ئیسماعیل) ئەوەندەی تر ڕۆمانەکەی ڕازاندۆتەوە، ئەم شاکارەی وا لێکردووە کە تامی خواردنەوەی ئاوی سارد دەدات لە جامی فافۆندا لە چلەی هاویندا.


لە خوێندنەوەی ئەم ڕۆمانە هیچ هەست بە ئاڵۆزی ناکەیت وێنەکان زۆر جوان دێنە پێش چاوت، فەزایەکی جوان دروست دەبێت لە خەیاڵی خۆتدا هی سەردەمی سەدی شانزدە و حەفدە. پەیامی سەرەکی ڕۆمانەکە ئەوەیە کە هەر لە دیرۆکەوە هەر کەسێک ڕەخنە لە دەسەڵات بگرێت، بە بێ بەڵگە ئەوە کەسە بە دوژمن و نەیار ناوی دەزڕێنن و بەهەر نرخێک بێت لەناوی دەبەن، هەموو میر و سەرۆکەکان هەر وەها بوون هەمیشە بەرژەوەندی خۆیان خستۆتە پێش بەرژەوەندی گەل و نیشتیمان.
بە بڕوای من هۆکاری سەرکەوتنی ئەم ڕۆمانە دەگەرێنمەوە بۆ ئەو پیامە بە هێزەیە کە لە ناوەڕۆکی ڕۆمانەکەدا هەیە، وە هەروەها ئەو زمانە شیعرییەی کە لە ڕۆمانەکەدا هەیە وەلێ نوسەر خۆدی خۆی شاعیر و چەندین کتێبی شیعری بڵاوکردۆتەوە پێشتر وە ئەم شاکارەشی هەر بە زمانێکی شیعری خولقاندووە لەگەڵ هاڕمۆنیای تەکنیکی داڕشتنەکەی.


لە کۆتایدا قسەکردن لەسەر میرنامە لە خوێندنەوەیەک زیاتر هەڵدەگرێت.. من تەنها ویستم ڕۆمانەکەتان پێبناسێنم، ئەگینا زۆری ڕۆنەچوومەتە ناو پاڵەوانەکانی ئەم ڕۆمانە و هیچم وەکو پێویست لەبارەیەوە نەوتووە. وەکو ساتیرنوسی ئەمریکی مارک توین دەڵێت: (حەقیقەت لای زۆربەی نوسەران بایەخێکی گەورەی هەیە، لەبەر ئەوە لە سەرفکردنیدا زۆر درێخی ئەکەن.).


پێشنیار ئەکەم هەرچیتان بەدەستەوەیە داینێن و دەست بکەن بە خوێندنەوەی ئەم ڕۆمانە، (جاندۆست) جارێکی تر بەم ڕۆمانە هەستی کوردایەتیمان ئاودەدات و وامان لێدەکات شانازی بە کورد بوونی خۆمانەوە بکەین.

 

ماڵپه‌ڕی گه‌شبیر ئه‌حمه‌د

 

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک