|
موستەشار، بەختیار
و خزمانی ئالانی، کوردستانپۆست و گۆڕان.
سەلام عەبدوڵا
ئیمڕۆ(19/7/2009)دوو مەسەلەی تر لابەلابووەوە:خزمانی ئالانی
شارباژێڕو"رۆشنبیرەکانی"هەفتەنامەی چاودێر( بەختیار عەلی و مریوان
قانع)بەیعەتی خۆیان بۆ لیستی گۆڕان راگەیاندو تەنانەت خۆیان بە باوکی "فکری"
بزووتنەوەکە دەزانن و کاک(نەوشیروان)یش دووبارە وتی: (پشتیوان بە خوا،
دەیگۆڕین)، بەلام هێشتا لەئاستی هەواڵ داڕشتن، نەگۆڕاون. بۆ
بەراوردکردن بڕوانن بۆ ئەم هەواڵە کە لە سایتی(پ.یو.کەی
میدا)بلاوکراوەتەوە: 19/7، پێشنیوەڕۆی ئەمڕۆ مام جەلال...لەگەل خزمانی
عەشرەتی کەڵهوڕدا کۆبووەوە. چەندین ساڵە ئەم سۆسیالدیموکراتە
عەیار24رانە دەیان و سەدان هەواڵ لە میدیاکانیانەوە، بەو شێوە عەشارییە
داڕشتووە!
بەبێ گوێدان بە زمان و خیتابی سیاسەتی دیموکراسیانە، شێوازی زمان و
خیتابی دەرەبەگایەتی لە راگەیاندنەکانیان بەکاردەهێنن و"رۆشنبیرەکانیان"
کە بەوپەڕی بێویژدانی و نەزانییەکی ئاشکرا، مەرگی شیوعییەتیان راگەیاند،
ناو و بوون و رۆڵی ئیمڕۆیشیان بە بەرەی(چەپ)یشەوە، دەسڕنەوەو بە
موجامەلەش بێت، لای لێ ناکەنەوە، تەنانەت یەکێک وەک مەریوان قانع ئەگەر
قسەیەکی درووستی(لینین)یش بەکاربهێنێت، بەگرنگی دەزانێت پێشتر بڵێ(من
لینینم خۆشناوێ)!
باڵێک لە سەرۆک عەشرەت، شێخ، موستەشار، بەعسی و پیاوماقوڵ و رێژەیەکی
لەبەرچاو لە ئەندامانی یەکێتی کە دیارە بەباشی خزمەت نەکراون و
موچەکانیان بەشی بژێویان ناکات، لە مامیان عاجزبوون و چوونەتە بەرەی
جێگرەکەی کە هەموو دەسەڵاتێکی بەدەستەوە بووەو بەختیار
عەلی"موسەقەفەکەیانە"، بەڵام ئەمەیان بەدڵی سایتە"ئازاد و
بێلایەن"ەکەیان، واتە کوردستانپۆست، نییە کە زۆری نەخایەند، دەرکەوت
بێلایەنییەکەی و زانیارییە نهێنییەکان کە بەناوی نهێنی بڵاودەکردەوە،
درۆیەکی شاخدار بوو. ئێستا بەم شێوەوەی خوارەوە، گلەیی لە
کۆمپانییەکەیان دەکەن(نوسەرمان هەیە لەدوای راپەڕینەوە هەشت نۆ کتێبی
نوسیوە، کەچی هەشت نۆ دێری بۆ چاپ نەکراوە، بەختیار هێشتا دێرێکی
نەنوسیوە چەندین رۆژ و هەفتە ئاهەنگی ریکلامکردنی بۆ دەگێڕن، ئەوەی
هەژدە ساڵە یەکێتی بۆ بەختیار و هاوەڵەکانی دەکات، وا خەریکە کۆمپانیای
وشە بەڵێنی هەژدە ساڵی تریان بۆ تازە دەکاتەوە، ئەمە غەدرێکی گەورەیە...)ئەوەی
لەئێستاوە دیارە: کۆمپانیای وشە رەنج و ماندووبوونی کوردستانپۆست دەکات
بە قوربانی"بلیمەتەکانی"! ... بەختیار عەلی تەنها بەرهەمی پشتیوانی
راگەیاندنی یەکێتی و پارتی نییە، بەڵکو بەرهەمی هاوپەیمانییەکی
ناموقەدەس و ناشرینە لەگەل ئەو راگەیاندنەش کە خۆی بە سەربەخۆ دەزانێ:
چەندین ساڵە لەبەر هۆ وبیانوی گاڵتەجاڕانە کە هیچ پەیوەندی بە کارو
رەوشتی رۆژنامەگەرییەوە نەبوو، تاقە یەک وتاری رەخنەگرانەی بەندە کە
پڕاوپڕن لە بەڵگە لەبارەی"موهرجەکەیان"بڵاونەکردەوە(لەم خاڵە چ
جیاوازییەکیان لەگەل بەدترین راگەیاندن هەیە؟) و بەو شێوەیە پیشەسازی
رۆشبیری گەمژەییان درووستکرد. سوپاس بۆ سایتەکانی ئینتەرنێت کە ئەو
مۆنۆپڵکردنە. من بەبێ دوو دڵی بەو رۆژنامانە دەڵێم: مافی گەیاندنی
راستییەکانتان شکاندو بڵاونەکردنی دەیان وتار لەبارەی سەدان هەڵەی
کوشندەو نەزانی بێوێنەو قسەی قۆڵ و بێماناکانی بەختیار و جەماعەتەکەی،
هیچ جیاوازییەکی نەبوو لەگەل سەرکەوتکردنی بەعسییەکان بۆ بیروڕاکانی
ترو تازە پاش ئەو ئەزموونە تاڵە، هیچ پاساوێک لە هیچ یەکێکتان قبووڵ
ناکەم.
ئێستا"بیرمەندەکانی تاونکاری سەرمایە، شانبەشانی موستەشارو ئامر
سرییەکان، وەک(رەئوف زەڕایەنی، شەهاب حاجی ئەحمەد لە کفری، محەمەد عەلی
چوکانی لە قەڵادزێ، سەردار سالار، عومەر حەمە حوسین لە دەربەندیخان،
خالد خولە سوور، شێخ برایم شێخ نەسە لە شارەزوور و شێخ تەیب و زۆری
تر)و بە ماچکردنی قورئان و بەرماڵ وەک هێماو چاوەڕوانییەکیش بۆ
هاوپەیمانی لەگەل"برا موسڵمانەکانی تەیب رەجەب ئەردۆگان)تا تەقڵە لە
براکانی دوێنێیان بدەن، بەڵام کەسانی خاوەن مروەت و بەڕێز
وەک(د.هەژار)یشیان لەگەلدایە. دیارە ئەو کادرە کۆنەکانی یەکگرتووی
ئیسلامی لەناو گۆڕان، بەجەختکردن لەسەر وەرەقەی ئاینی، رۆڵێ خۆیان
دەگێڕن و دووبارە دەیڵێمەوە: لەپێناو گەیشتن بە دەسەڵات،
بەرپرسەکانی(گۆڕان)، هەموو ئامرازێکی دیماگۆگیانە بەکاردەهێنن بۆ
هەڵخەڵەتاندنی جەماوەرە پشتگوێخراوەکان لەلایەن هاودەسەڵات وخەبات و
پارەوپول و گردو تەلارنشینەکانیان، کار بۆ بەدیهێنانی"گۆڕان"دەکەن!
کاک نەوشیروان بەخۆی وتی(با پەڕەکانی رابردوو هەڵنەدەینەوە)، کەچی
بەخۆی لە20/7/2009 وەک لە سایتی سبەی بلاوکرایەوە، لەپێشوازی شاندێک لە
هەولێرەوە، وتی(من ئەو کەسە نەبووم، کە دەبابەم هێنایە سەر هەولێر)،
قسەکەی خۆیی شکاند. کەس نەما ئیدانەی هێنانی ئەو دەبابانە نەکات، بەڵام
زیندووکردنی هەڵە و تاوان و کردارە نامرۆییەکان، خزمەت بە پرۆسەی
هەڵبژاردن ناکات.
هەروا ئیمڕۆ باس (لە نیازی چاککردن و خۆشکردنی خۆشگوزەرانی خەڵک)کرد،
بەڵام لەبری ئەو قسە گشتیانە، دەبێ کۆنکریت پێمان بڵێ: ئەگەر دەنگی
هێنا، چی بە کەرتە تایبەتەکان و بازاڕی ئازاد دەکات و چ سیاسەتێکی
ئابووری هەڵدەبژێرێ؟ 18ساڵە پارتی و یەکێتی بەزمانی لوس و بەڵێنی گەورە
گەورە باسی دابینکردنی خۆشگوزەرانی بۆ خەڵک کرد، بەڵام ئەوەی دەیبینین
54کەی عەزیز وەیسی و فەقیانەکەیەتی و بەرنامەکەی نەوشیروان تەماوییەو
هیچ لەم بارەیەوە نەدرکاندووە!
ئایا سیاسەتی لیبڕاڵی و دامەزراندنی کەرتە تایبەتەکانی نەخۆشخانە،
زانکۆ، بانق، دۆزینەوەو بەرهەمهێنانی نەوت و گاز و بیناسازی...هتد چ
رۆڵێکیان بینیوە لە بێزارکردن و رەنگ زەردکردنی خەڵک و گرانی و هەژاری
و گەندەڵی ئیداری و لەپڕ دەوڵەمەندبوونی چەند سەد کەسێک؟
"رۆشنبیرو فەیلەسوف"ە کاسەلێسەکانی دەزگاکانی راگەیاندنی یەکێتی، بە
سەفسەتەو فکرە(غیبییەکان)ی ناو مێشکیان وەک بەختیار لە
گفتوگۆکەی(کەی.ئێن. ئێن)، وتی، بۆ جارێکیش ئاماژەیان بۆ ناوو هۆو
ناوەڕۆکی ئەم قەیرانە، نەکرد! وەک چۆن سەدام مەدالیای ئازایەتی بەسەر
سنگی ئەفسەرە پلەدارەکانی هەڵدەواسی، بەهەمان شێوە ناسنامەی رووناکبیرو
رۆشنبیر لەلایەن ئەم رۆژنامەو ئەو دەزگا، بەم و بەو دەبەخشرێ.
رۆشنبیرێک بە روونی هەڵویست لەو واقیعە وەرنەگرێ و بەشداری جددی لە
پیشاندانی ئەڵتەرناتیڤی ممکن نەکات، وا باشە خەریکی گوڵەبەڕۆژە خواردن
ببێ؛ هەندێ هەن جارێک رۆڵی رۆشنبیر لە سیاسەت دووردەخەن، گوایە رۆشنبیر
دەبێ سەربەخۆ بێت، ئەوی تر بەرنامەی کار لە ئیدۆلۆژیا جیادەکاتەوە یان
لەخۆیانەوە دەنووسن(دیموکراسی هیچ ئیدۆلۆژیاو بیروڕایەکی سیاسی قەدەغە
ناکات)، ئەی ئەوە نییە بۆ نموونە لە ئەڵمانیا حزبی ناسیونال سۆسیالیستی
ئەڵمانیا بە گوێ،رەی یاسا، قەدەغەیە؟ ئەوە نییە هەر کەسێک، ئاوسیشڤیتس
بە درۆبخاتەوە، بە گوێرەی یاسا سزادەدرێ؟
لەولاوە شۆڕەسوارێکی رەهەند(فاروق رەفیق)یش لە گفتوگۆکەیدا لە رۆژنامەی
هاوڵاتی لەم رۆژانە، دەڵێ: (چاوه‌ڕوانکردنی ئێمه له‌رۆشنبیر ئه‌مه‌یه
له‌م حاڵه‌ته‌دا وای ده‌بینم رۆشبیر له‌ده‌ره‌وه‌ی حیزبدایه)، بەڵام
راستییەکەی ئەوەیە، نە گابرریل گارسیا مارکیز و نە لۆرکا و نە مەکسیم
گۆرکی و نە گرامشی، سارتەر و نە ئەحسان تەبەری و نە گولسورخ و نە
موزەفەر نەواب و غەسان کەنەفانی و نە بلڵەند حەیدەری و نە بەدر شاکر
سەیاب و عەبدولرەحمان مونیف و حەیدەر حەیدەر و نە هایدەگەر وەک
رۆشنبیرانی شیوعی یان چەپ یان ناسیونالیست و نازی لەدەرەوەی حزبەکانیان
نەبوون. فاروق رەفیق لەدەرەوەی حزبە، بەڵام لە بۆچوونەکانیدا لەناو
بۆگەنی ئەقڵ و فکری لیبڕالیزم بە هەموو تاوان و کردەوە خوێناوییەکانی
لە حزبی حزبیترەو لەم پێناوەدا وەک"هەڤاڵەکانی"سەری رمەکەی ئاراستەی
مارکسیست لینینیست(دوژمن سەرسەختەکەی)و بزووتنەوەی شیوعی دەکات. ئەمە
پەیامی ئەو بەڕێزانەیە.
گەرچی بەخۆم لە ماوەی 20ساڵ ژیانم لە ئەڵمانیا، چەند جارێک بەشداری
هەڵبژاردن کردووە، بەڵام هێشتا هەر هەڵبژاردن بەهەلێک دەزانم و
لەوانەیە وەک ئەزموونی وەڵاتانی ئەمریکای لاتین، چەپەکان بتوانن
دەسەڵات بەدەستەوە بگرن، بۆیە لەبەرژەوەندی ژێردەستەکانە، بەشداری
تێدابکەن و دەنگنەدان بە خزمەت کردن بە دەسەڵاتداران دەزانم. لەم
بارەیەوە هەڵویستی مارکس/ئەنگلس و لینین ئاشکرایە!
ئێستا ترسی ئەوە هەیە، لە غیابی هێزو بەرەی چەپڕەو خاوەن جەماوەری
بەرفراوان، و پێشەنگی ئەو ئەقڵییەتە کۆنەپەرەست و راستڕەوە لەپێشەوەی
ئەو جەماوەرە حەقدارو پشتگوێخراوانە کە چیتر بە کەس کۆنتڕۆڵ ناکرێ و
نوێنەری راستەقینەی خۆی نەناسیوەو، ترس و شەڵەژانی دەسەڵاتدارەکان، ئەم
بارودۆخە کە گرژە بەرەو توندوتیژی ببات و
لەدواییدا بیرو رەفتاری فاشیستانە باڵادەست ببێت.
گۆڕان و موستەشار
و بەختیار عەلی و قورئان و شێخەکانی؟!
هەزارجار بۆ گۆڕان، بەڵام بە چ ئاراستەیەک؟ گۆڕان بەرەو چەپ، راست،
فاشییەت یان تیوکراتی؟ ئەمە ئەو پرسیارەیە کە دەبێ لە خۆمانی بکەین و
وەڵامی بدەینەوە.
کۆمپانیای"وشە"لە راگەیاندنەکانیان درێژە دەدەن بە بڵاوکردنی ئەم جۆرە
هەواڵانە: عەشرەتی هەورامییەکان یان برادۆستەکان یان فیسارە شێخ یان
دانشتیوانی"گوندەکان"پشتیوانیان لێدەکەن وپاشان
بەرپرسی"کۆمپانیا"لەبەردەم کەناڵە تەلەفزیونەکەیەوە، قورئان دەخاتە سەر
سەری و وەک سیحربازێکی بێوێنەش، لەیەک کاتدا"عەدالەتی کۆمەڵایەتی و
بازاڕی ئازاد"یان دەوێت(ئەمە بە مەرجێک پەیڕەوانی تەریقەتی بازاڕی
ئازاد بە قەت دەریایەک خوێن لە خوازیارانی"خزمانی"عەدالەتی کۆمەڵایەتی
رشتووە)و لە دواییدا سوورەتێکی قورئان بە مانای گۆڕان
بڵاودەکەنەوە((ئاین هەر ئەمەی مابوو!))و بەهاوکاری موستەشار(خالد خولە
سور کە خاوەن 7ژنە)و موستەشار شێخ برایم شێخ نەسەو موستەشار شێخ تەیب
لە سلیمانی و رۆشنبیرەکەیان(بەختیار عەلی)و هەندێ ئەفسەری دزو جەردەز
ئەمانە بە دەنگی فەرهاد سەنگاوی
هاواردەکەن(دەیگۆڕین...دەیگۆڕین...دەیگۆڕین...مردن لە ئێوە دەترسێ) یان
دەنوسن و دەڵێن"پەنا بە خوای گەورە"کارەکانیان بۆ پێشەوە دەبەن. ئەم
دەنگ زوڵاڵە لە سەردانێکیدا بۆ ماڵەکەم پێی وتم(ئێمە بە نهێنی خەریکی
دامەزراندنی حزبی لیبڕاڵ دیموکراتین و ئەمریکییەکانیش پشتیوانیمان
لێدەکەن). بەدەم ئەو وێنەو رەفتارو بۆچوونانەوە، دووپاتی ئەم هەڵویستە
دەکەنەوە:"ئێمە خۆمان بە خاوەنی یەکێتی نیشتمانی کوردستان دەزانین"، لێ
نە کۆمپانیاکەو نە بزووتنەوەکەی(گۆڕان) خۆیان بە حزب دەزانن، بۆیە
دەتوانین بڵێن: ئێمە لەبەرامبەر بزووتنەوەیەکین سوود لەگشت شتێک
وەردەگرێ، واتە لەگەل ئیسلام، ئیسلامە، لەگەل چەپ، چەپە، لەگەل
کۆنەپەرەست، کۆنەپەرەستە، لەگەل لیبڕال، لیبڕالە و لەگەل
سۆسیالدیموکرات، سۆسیالدیموکراتە...هتد. هەمو ئەم یارییە بەکۆپیکردنی
بانگەشەکەی کوڕی بۆرێەی نیویورگ ئۆباما(گۆڕان...بەڵێ دەتوانین)بەڕێوە
دەچێ، بەڵام:
1- بەکارهێنانی ئەو هەموو(کان)ە، واتە گشتگیرکردنی گروپێکی کۆمەڵایەتی
و نیشانەی ئەوەیە، ئەو برادەرانە هەرگیز لە واتاو بەهای دەنگدان وەک
مافێکی تاک، تێنەگەیشتوون و جۆرێکە لە سڕینەوەی. بێجگە لەوەش درۆیەگەلی
شاخدارن. هەروا نەک لەم بوارە، بەڵکو لەبوارەکانی تریشدا بەبەرچاوی
هەموانەوە پەڕە چڵکنە گەندەڵ و مافییاییەکانی خۆیان دەردەخەن لە
قبووڵکردن لە زانکۆ، دامەزراندن، پلەوپایە، دەربازکردنی دزو جەردەو زۆر
شتی تریش.
2- نەوشیروان بە بەرزکردنی قورئان بۆ سەر سەری یان ماچکردنی
بەرماڵی"حەزرەتی شێخ"وەک هەر هەوڵێکی کۆنەپەرەستانەی دژ بە گۆڕانکاری
پێشکەوتنخوازانە بۆ هەڵخەڵەتاندن، کۆمیدیا و یارییەکی پێکەنیناوی
تۆمارکرد!
ئایا بە ئەقڵ و لۆژیکی دیماگۆگیانە، گۆڕانێکی ئینسانیترو جوانتر و
دادوەرانە لە ئەزمونەکەمان بەدیدێت؟
لەدەوری سەرۆکێکی روحی و بزووتنەوەیەکی"ناحزبی"و توڕەو عەفەوی، چەند
رۆشنبیرێکی ساختە، کۆبوونەتەوە، بۆ نموونە، بەختیار عەلی. ئەم بلیمەتە
لە گفتوگۆیەکەی هاوڵاتی لە10/7/2009 کە لە بەر"گرنگی تیوری"بۆچوونەکانی
دووبارە لە سایتی سبەی بڵاوکراوەتەوە، دەڵێ: (مێژوو لەکەس قبوڵ ناکات
لەژێر پەردەی دیموکراسییەتدا، دیکتاتۆر بیت)
ئەی ئەوە نییە لەژێر پەردەی دیموکراسی، دیکتاتۆرییەتی سەرمایە حوکمڕانی
دەکات؟!. بەختیار ئەوەند لەناو سیاسەت قووڵبووەتەوە، زاراوەیەکی
نوێی"داڕشتووە"و ناوی لێ ناوە: فاشیزمی سیاسی! خۆزگا نەختێ
باسی(فاشیزمی ناسیاسی)شمان بۆ بکات. ئەمەش بوو بە بەزمی
بەکارهێنانی"ئیسلامی سیاسی"و دوور نییە سبەی زاراوەی"شیوعی
سیاسی"بەکاربهێنێ!
خەڵات وەرگرەکەی فیستیڤاڵی گەلاوێژ ئێستا لەگەڵ باڵی"گۆڕان"راوەستاوەو
بەڕوونی هەڵویست وەردەگرێ و دەڵێ: کێشه‌که له‌وه‌دایه که ئه‌و
باڵه‌ی که مه‌یلی به‌لای فاشیزمی سیاسیدایه، مه‌یلی به‌لای
ده‌مکوتکردن‌و سڕینه‌وه‌‌و لوتبه‌رزی ئه‌رستۆکراتیانه‌دایه، هه‌مو
ده‌زگا عه‌سکه‌ری‌و ئابورییه‌کانی به‌ده‌سته‌وه‌یه. ئه‌م گه‌مه‌یه
له‌سه‌ره‌تاوه به بڕینی موچه ده‌ستیپێکرد که «جۆره کوشتنێکی
ره‌مزییه«، ئه‌وه‌ی سه‌ره‌تا به «کوشتنی ره‌مزی« ده‌ستپێبکات به
«کوشتنی فیعلی« کۆتایی به شانۆگه‌رییه‌که ده‌هێنێت)وهەر لەم
سونگەیشەوە بۆ ئاشتبوونەوەی پارتی و یەکێتی دەڕوانی و
دەڵێ:(خورافه‌تێکی گه‌وره‌یه واتێبگه‌ین که ئه‌وه پارتی‌و یه‌کێتین
وه‌ک دو حیزب ئاشتبونه‌ته‌وه، به‌ڵکو ئه‌وه‌ی که ئاشتبوه‌ته‌وه دو
باڵی ناو یه‌ک نوخبه‌ن که قازانجی ئابوری به‌یه‌که‌وه گرێیان
ده‌دات.). لێرە دەتوانین بڵێن کە ئەو ئاشتبوونەوەیە، وەک ئاشتبوونەوەی
نێوان هەر دوو حزبی ترە لە جیهان وئاساییە کە بەرژەوەندی ئابووریش
کۆیانیکردووە. ئاخر بەختیار دەزانێ کە شێوەو مەرجەکانی ئەو
ئاشتبوونەوەیە بەدڵی باڵەکەی خۆی نییەو هەروا !
بەختیار بە پشتئەستوری بە میتۆدو ئیدۆلۆژیای دژە شیوعییەتی"بەڕێز"
نیتشە، هایدەگەرو سلۆتەردایک و هاوشێوەکانیان، وەک(... هار) لەبیری
ناچێت بەبۆنەو بە بێ بۆنە دریخی ناکات لە هەوڵی ناشرینکردنی ئەزموونی
پڕ سەروەری مێژووی بەلشەفییەکان لەسەر ئاستی جیهان و مێژوو. هیچ کەس
وەک ئەم فرەبێژە لە شیوعییەت و شیوعییەکان نەتۆقیوەو بە دوژمنی سەرەکی
دەزانێ، بۆیە بەو شێوەیە هانی خەڵک دەداو کار لەسەر زەمینەخۆشکردن
دەکات بۆ دووبارەکردنی قرناقاو پشتئاشانێکی ترو دەڵێ: (حیزبی کوردی
تاسه‌ر ئێسقان حیزبێکی به‌لشه‌فییه)، هەروا لە درێژەی گفتوگۆکەیدا،
نوخبەی کوردی بە(حزبە کۆمۆنیستەکان و حزبی بەعس)دەشوبهێنێ.
دیارە گشتگیرکردن لە دەربڕینی(حزبی کوردی) هیچ نابەخشێ، چونکە ئەحزابی
کوردی هەن. ئەوە تەنها ئەحمەقێکی دڵ پڕ لەقینە کە بەو شێوە رەمەکییە،
دۆو دۆشاو تێکەڵ دەکات و هیچ پەیوەندی بە زانست و لۆژیکەوە نییە. ئایا
ئەوە بەشێک نییە لە پرۆسەی بەگێلکردنی خەڵک بە مەبەستی بەکارهێنانیان
بۆ توندونیژی دژ بە چەپ؟!
بەختیارو هاو رێبازەکەی لەپڕ هەڵویستیان وەرگرت و بوون بە بەشێک لە
باڵێکی یەکێتی و ئەمە"نموونەترین"بەرهەم و داهێنانیانە، باڵێک کە نیوەی
دەسەڵاتی خودی یەکێتی پێکهێنابوو پێگەَی خۆی هەبوو لەسەرجەم
ئەزموونەکە، بۆیە هەموو بەرپرسیارییەکی لە ئەستۆدایە لە ماوەی18 ساڵ
لە: گرانی، ئاودیوکردن، تەلارسازی، گەندەڵی، هەژاری، بیروکراسی، بازاڕی
ئازاد، بەهێزکردنی کەرتی تایبەت، بڕینی موچەی 30هەزار دینار بۆ
کەمئەندامان، 90هەزار بۆ خانەنشینان و125-165هەزار بۆ پێشمەرگەی
خانەنشین، پشتگوێ خستنی گوندەکان، جیاکاری لەنێوان شەهیدان، بە
نایەکسانی مامەڵەکردنی ئەوانەی لە دەرەوەوە دەگەڕێنەوە(بۆ حزبییەکانیی
خۆیان بە خزمەت دەژمێردرێت و ناحزبییەکان خوا بەهانایان بکەوێت) و خۆ
بە زلزانی و بەنزم تەماشاکردنی هێزو کەسایەتی خاوەن مێژوو و فکر،
دواخستنی پرۆسەی یەکگرتنی ئیدارەکان...هتد.
بەڵێ بۆ گۆڕان، بەڵام نەک بە ماچکردنی بەرماڵ و قورئان و دیماگۆگی و
دژایەتی شیوعییەت، بەڵکو بە ئاراستەی سیاسەت و ئابووری و پەروەردەو
کلتوورو شێوازی بەرهەمهێنانی کۆمەڵگای عەدالەتی کۆمەڵایەتی...گوڵەکە
لێرەیە، وەرن با لێرە هەڵپەڕکێ بکەین!
07701929872
dwaroj@yahoo.de
|
