٢١\٧\٢٠١٢

نابێ چەپڵە بۆ هاشمی و موتەلەگ و ئیخوانەکانی سوریا لێ بدەین.

قادر نادر         

ئێستا خەلکی سوریا و کوردانی رۆژئاوا لە هاوشێوەی سەرەتای ڕاپەرینی ٩١ی ئێمە نزیکن، کە لێرەدا ناکرێ ئاماژە بە قارەمانێتی ئەو گەلە نەکەین، کە نیشانیاندا سەرباری هەموو زەبروزەنگیک خۆرئاوای دیکتاتۆرەکان لە بەرامبەر ئیرادەی گەلان بەرەو کۆتاییە.

لە ژیاندا مرۆڤ دەبێ ئەزموون وەربگرێ، ئێمەش دوو ئەزمونی نوێمان لەبەردەستە:

ئەزموونی راپەرینی ٩١ی کوردستانی باشوور کە لە دەرەنجامدا دوو هێزی سیاسی هێنایە سەرکار بە ئاستی داگیرکەر گورزی سیاسیی و نەتەوەییان لە هەست و ئیرادەی تاکی کورد داوە

ئەزموونی دووەم رووخانی رژێمەکەی بەعس، کە کۆمەلێک هێزی نوێی سیاسی هاتونەتە مەیدان، ئیتر یان پسمام یان هەناسەی سەدامیان تێدایە بەرامبەر بە کورد.

بۆیە ئێستا ئەزموونێکی تر لە رۆژاوای نیشتمان بەڕێوەیە کە هەول دەدرێ لە ڕیگای هێزێکی داگیرکەرەوە بەهاریکاری ئیخوان موسلیمەکان، کۆنترۆلی سیاسی ناوچەیەک گرنگ لەنیشتمانی عەرەب و کوردان بکەن، هاوکات زۆرینەی پارت و کەسایەتیەکانی تری عەرەبیش لەهەناسەی بەشار ئەسەد و باوکی دەخولێنەوە، بەتایبەتی لەدوایین کۆنگرەی ئۆپزسیۆنی سوری دانیان بەهێچ مافێکی کورد نەنا گەرچی سەرۆکەکەی کوردێکی ئیخوانی بوو، بەپێجەوانەی ئۆپزسیۆنی کۆنی عێراقی لەمەسیف دا، دانیشیان بە فیدرالی زۆر مافی کورد نا بەلام ئێستا رۆژ لە دوای رۆژ دەگەرێنەوە ناو بەرگەکەی سەدام و شۆفینزمی سونەی عەرەبیەوە.

لە کوردستانیش چەند بەرەیەک ئەوە دەیان ساڵە لە گۆرەپاندا هەن بەلام دوو بەرەیان بەهێزن:

بەرەی یەکەم: هێزە کلاسیک و بێ ئیرادەکانن کەبەدۆزی رەوای خەلکی کوردستان بازرگانی سیاسی و ئابووری دەکەن و بۆ بەدەستهێنانی پلەی سیاسی و ئیداری خۆیان کاردەکەن، ئەو بەرەیە ئەمرۆ بەرونی دیارە پارتی و یەکێتی سەرپەرشتی دەکەن کەهاوشیوەی ئەوان لە هەموو بەشەکان لە هێزی ئیرادە و ریفورمی هەیە.

بەرەی دووەم: زیاتر خۆی لەپکک و لقەکانی لەهەموو بەشەکان دەبێنێتەوە، ئەم بەرەیە نوێخواز و بەئیرادەیە پێجەوانەی بەرە کلاسیکەکانی تر، هێزیکە سەرباری سەدان پیلان و دژایەتی هەمەجۆری جیهانی و دوژمنان و کەسایەتیە هەلپەرستەکانی ناوخۆ، کەچی ڕۆژ لەدوای ڕۆژ گەشەدەکات، هەرئەمەشە بۆتە هۆکاری ئەوەی ئەمرۆ لەهەرسێ بەشی کوردستان (باکوور، رۆژاوا، رۆژهەلات) ڕۆڵی ڕیبەرایەتی هەیە، دیارە ئەم بەرەیە بێکەم وکورتی نیە بەلام لەکۆی سیاسەتەکانی تاکی کورد سەرلەنوێ بنیاتدەنێتەوە بە ئیرادەیەکی شٶرشگیریەوە

لە رووداوەکانی ئێستای ڕۆژئاوادا بەرەی یەکەم نەیتوانی هیچ سەنگایەتیەکی سیاسی خۆی دیار بخات، بەپێجەوانەوە زۆر جار هێزە ئیخوان و سونە شۆفینەکان بەکاریان هێناون دژ بەپەیەدە کەبەبالی پکک ناسراون لەرۆژاوا.

پەیەدە سەرباری هەر تێبینی و سەرنجێکیان لەسەر هەبێ ، بەلام لەماوەی رابردوو وە ١٦ مانگەی راپەرینی خەلکی سوریا توانی بەکەمترین قوربانی تاکی کورد سەرجەم ناوچە کوردیەکان بپاریزێ و لەیەکەم سەرکەوتنیشدا ئەوان یەکەم شارو شارۆچکەیان ڕزگار کرد و چاوەرێ دەکڕی زۆربەی شارەکانی تریش بەکەمەترین قوربانی ئازاد بکەن.

ئەم هێزە ١٦ مانگە کج و کوری کورد ئامادە دەکات بۆ ئەوەی لەچرکەساتی ئاوادا بتوانن کوردستانی ڕۆژاوا بکەویتە ژیردەسەلاتیان، وا لە ناو بەهاری ئەو سیاسەتەشدا دەخولێنەوە.

بۆیە ئەرکی هەمومانە بەوریاوە مامەلە و هاریکاری سیاسەتەکانی هاوشیوەی بەیەدە بکەین کەهەولدەدات کوردستانی ڕۆژئاوا وەک سەرەتا بخاتە ژیر دەسەلاتی خۆی دواتر قسە لەگەل ئایندەی ئەو دەسەلاتە بکات کە دێتە سوریا .

لێرەدا دەبێ بڵێم کورد نابێ هێچی تر بەس لەدژی روخانی رژێمێکی شۆفینی بەرژێمەکی تری شۆفینی بگۆرێتەوە ، هاوکات نابێ چیتریش ئەوەی دروشـمی ''ئەڵاهو ئەکبەر''ی گوت هاوشیوەی ئیسلامیە سیاسیەکانی کوردستان چەپلەی بۆ لێبدەین. کورد دەبێ خاکی خۆی بخاتە ژیر دەسەلاتی وئەوکات گفتوگۆ بکات، ئەزمونی باشور دوبارە نەکاتەوە نەبوار بدات هێزە کلاسیکیە بێ ئیرادەکانی کورد بێنە دەسەلات، نە لەسەر گوتە و نوسین خاکەکەی بەجی بهێلێ و بیخاتە قومارێکی دۆراوی هاوشێوەی مادەی ١٤٠ و چەپلە بۆ ئیخوان و هاشمی و موتەلەگەکان لێبدەین با ئەزمون لەباشور وەربگرین.
 

ماڵپه‌ڕی قادر نادر