په‌یوه‌ندیپه‌رتووکخانه‌ئێمهلینکئه‌رشیفنووسه‌رانده‌سپێک

 

ئەمڕۆ ٢٢\١\٢٠١٣ نوێکرایەوە.

 

ئەم نووسینەی بەڕێز (حەمەی ئەحمەدی رەسوڵ) پێش چوار ساڵ پتر بەر لە مەرگی (ئەحلام مەنسوور)ی هەمیشە زیندوو - نووسراوە و لێرە لە ئەمڕۆ بڵاوکرایەوە، هەر لێرەوە دەستخۆشیی لە ژیاندۆستیی و سەرناسییەکەی دەکەین کە لەو کاتدا بەو نووسینە جوان و پوختە رێزی لەو خانمە چیڕۆکنووس و نووسەرە گرت و بە بێ هیچ بەرژەوەندییەک و بە شێوەیەکی زۆر دڵسۆزانە و خەمخۆرانە ستایشی تێکۆشان و هەڵوێستی بوێرانە و کارە بە نرخ و مرۆڤپەروەرییەکانی دەکا، هیوادارین ئیدی هەموو نووسەرانی کورد ئەو رێچکە جوانە بگرنەبەر واتە پێش ئەوەی مرۆڤە مەزن و تێکۆشەرەکان - ئەوانەی وەک مۆم بۆ خەڵک دەسوتێن - لەدەست بچن بە هانایانەوە بچن و رێزیان لێبگرن و کارە بە نرخەکانیان هەڵبسەنگێنن نەک تەنیا پاش مەرگیان.

 

- ئەمڕۆ -

______________________________________________________________________________

 

 

نامەى کراوە بۆ ئەحلام مەنسوورى بەڕێز:


تۆ لەئێمەى پیاو ئازاتر و ئازادتریت.

   
حەمەى ئەحمەد رەسوڵ

(1)


شایانى وتنە ، لەوەتەى بیرم بێت حەزم بە ستایشکردن و پیاهەڵدان نەبووە ، هەرگیز نەبووم بە هەوادار و موریدى هیچ کەسێک ، هیچ رێبازێک هیچ حیزب و گروپ و دەستە و لایەنێک ، بەڵام هەتاکو سەر ئێسقان رەخنەم خۆشویستووە و هیچ کەسێک ،هیچ بابەتێک ، هیچ دیاردەیەک ،هیچ دەقێک یان فیلمێک یان گۆرانییەک ، یان حیزبێک یان نەتەوەیەک نەبووە ، بەپێی رانان و هەڵسەنگاندنى خاکەڕایانەى بچوکى بەندە ، رەخنە و پلار و توانجم تێنەگرتبێ ، وەک بڵێی داخوازبووم و هەوڵمداوە رچەشکێن و سنووربەزێن و دژەباو و رەخنەگربم و یاخى و سەرچڵ و کەمتازۆر هەقبێژ و راستگۆیانە رووبەڕووى ژیان و ئاریشەى کۆمەڵگاکەم ببمەوە ...!!


بەڵام بەنیسبەت خانمى بەڕێز ،دادە ئەحلام مەنسوورى چیرۆکنوس و نوسەرەوە ، جارێکى دیکە دەبێت دژەباو ببمەوە و، دژى عادەت و خووى باوى خۆم بووەستمەوە و قەڵەمەکەم بۆ ستایشکردن بەکاربێنم .! بێگومان ستایشى هەڵوێستى مەردانەى مرۆڤێک لەم رۆژگارە نامەردەدا ، بەڵام ژیان و ئەزموون و مێژووى تاکەکەسی هەر مرۆڤێک لە ڕابردوو یان لە ئەمێستادا ، ئەوە بۆ خود و زاتى تاکەکەسیی خۆى دەگەڕێتەوە و بەندە دادوەر و ئیزراییل نیم و ناشبم .. مەسەلەکە ئازادیی شەخسییە و ڕێزم بۆ ئازادیی خود هەیە....!!


لەو دەمەوەى رۆژنامەى هاوڵاتى وەکو ئاوێنە- بڕیاریدا هیچکە وتار و نووسینم بۆ بڵاونەکاتەوە چونکە بەندە لەگەڵ کاکە تەها ئەحمەد رەسوڵى نووسەر و شێوەکار و رۆماننوسدا رەخنەمان لەکاک (بەختیار عەلى)ى نووسەر گرت ، ئیدى دەرگا و پەنجەرەى بڵاوکردنەوەیان لێداخستین و وەکو بڵێی کابە کەچ بووبێت  و خیانەتى هەرە مەزنى بێوێنەمان لە نیشتمان و نەتەوە کردبێت بە دوژمنى باوەکوشتەى خۆیان ناوزەدمان دەکەن .. بۆیە منیش بڕیارمدا ئەو دوو رۆژنامەیە نەکڕم و نەخوێنمەوە !!


وەلى لە جێگەیەک ، لەگەڵ هاوڕێیەکدا باسی نووسینێکى خاتوو (ئەحلام) ى بۆ کردم و دووربا ئەوەشی باس کرد کە ماوەیەک لەمەوبەر گوایە دوچارى نۆبەتەى مێشک و ناساغییەک بووەتەوە ، کە پڕ بە دڵ پێم ناخۆش بوو ... ئیدى بڕیارمدا بەپێی ویژدان و پێ بەپێی باوەڕ و هزرى سیاسیم ئاوڕێکى زۆر دڵسۆزانە (هەر چەندە بەنووسینێکى کورتیش بێت) لە هەڵوێستى ئەم کەڵە ژنە بێوێنەیە بدەمەوە کە شایانى پیاهەڵدان و ستایشە و ئەم رۆژگارەش هێندە رەزاقوورس و قێزەون و سپڵەیە ، ژیان هێندە دژوار و بێهەدادانە ، کەس بیر لە کەس ناکاتەوە و ، کەسێک نییە ئاوڕێکى برایانە و دڵسۆزانە لە کەسێکى دیکە بداتەوە .. ئێستا دیاردەیەک بەرکەماڵ و باوە ، فێربووین نامەى یەکتر بە سەرە ونخوونى دەخوێنینەوە یان هەتا نووسەرێک نەمرێت و نەبێت بە کۆچکردوو یان خوالێخۆشبوو کەس نامەیەک یان وتارێکى کەللەتەزێنى لەسەر نانووسێت !


وتنى راستى و هەقبێژى سەبارەت هەر کەسێک یان دیاردەیەک یان هەڵوێستێک ، بەستایشکردن و پیاهەڵدان لە قەڵەم نادرێت ، بەتایبەت لەم رەوش و دۆخەى مندا کە لە نزیکەوە بۆتەنها جارێکیش بەخزمەتى ئەم خاتوونە هێژایە نەگەیشتووم و بەڕێزیشیان من ناناسێت (مەگەر لە رێگەی نووسینەوە !) هەتاکو تەکلیف لەبەندە بکات دوو سەرە قەڵەم بۆ مەبەستى پیاهەڵدان و ستایشکردنى بنووسم ... یان ئەم خانمە بەڕێزە پلە و پایە و کورسی دەسەڵاتى گرتبێتە دەست و منى بەندە و هەژاریش بۆ مەبەستى وەدەستهێنانى دەفتەر و بلۆکە دۆلار ، سێ لاپەڕەى لەسەر بنووسم و خۆم لە دەسەڵاتیش نزیک بکەمەوە .! دیارە خۆشبەختانە هیچ کام لەو هۆکار و بەرژەوەندییانە لەئارادانییە و ئەم نووسینە تەنها سەرسام بوونى بەندەیە بە هەڵوێست و نوسینەکانى دادە ئەحلام و وتنى راستى و هەقبێژییە لە زەمەنێکدا کە بۆرە پیاوان دیارن و بەڕێوەبەر و سەردارمانن و کەسانى بەهەڵوێست و بوێریش لە بن ساپیتە و لە هەیوانى ماڵە هەژارەکاندا بێنەواو بێکەس دەژین ..ئەمڕۆ مرۆڤى نەفس بەرز لە ژیان و لە نیشتیمان و لەمێژووى خۆى و نەتەوەکەى تۆراوە ژونکە دەبینێ بۆرەپیاو و ناکەسبەچە وەکو پادشا لە ژینى هایلایڤدا دەژین و شەق لە چەورى و دۆلار و نانى ڕووت هەڵدەدەن .. شەق لە بڕوا و زانست و مەعریفە و شکۆمەندى و زێد دەدەن و خاوەنى هەموو شتێکن ..مرۆڤى مەزن و گەورەش خاوەنى بستێک زەوى نین ... بۆیە بێگومان و بێ دڕدۆنگم لەوەى کە ئەم نووسینە هاکەزایی و خاکەڕایە بچێتە خانەى ستایش و پیاهەڵدانەوە ...!


(2)


زۆر گرنگە ئێمەش وەکو فەڕەنسییەکان خاوەنى ژان دارک بین ، یان وەکو میسرییە هاوچەرخەکان خاوەنى دکتۆرە نەوال سەعداوى بین ، وەکو فارسەکان خاوەنى فەروخى فەرخزادبین ، وەکو رووسەکان خاوەنى ئانا ئاخماتۆفابین ، وەکو جیهان خاوەنى سیمۆن دى بۆڤوار و رۆزا لۆکسمبۆرگ و ئەنجێلا دیفیس بین ! ئەوانە ژنى تێکۆشەر و روناکبیر و خاوەن هەڵوێست بوون ، لەگەڵ پیاودا پیاو بوون و لەگەڵ ژندا ، رێبەر و پێشەنگى ژنان بوون .. یەکەمین هەنگا و بۆچوونە پێش و بۆ ئازادبوون و بۆ وەدەستهێنانى مافەکانى ژنان ... شکاندنى تەلیسمى ژەنگاوى و دژوارى داب و نەریتى کۆمەڵایەتیین- سوونەتییە ، هەڵگەڕانەوە و یاخیبوونە لەکۆمەڵگاى نێرسالاریی دواکەوتوو ، رچە شکاندنى عورف و نۆرمى زاڵى تاقەت پڕووکێنە ، کەعەقڵییەتێکى دەرەبەگى کۆنەخوازى چەقبەستوو لەپشتییەوە رەق راوەستاوە ..!!


ئازادى چۆن دێتە بەرهەم کەهەمیشە ملکەچ و زەلیل و بێدەنگ و زیندانیی نێو قەفەسی ژوورەوە و ماڵێک بین کە پیاوى سمێڵ بابڕى دار بەدەستى زاڵم و جاهیل خاوەنى کلیل و قفڵەکەى بێت !!


ئەگەر ژنى کورد وەکو دادە ئەحلام مەنسوور ئازا و ئازاد بێت ، بوێر و دژەباو نەبێت ، رچەشکێن و یاخى نەبێت لەچنگى دڕکاوى و زبرى ژنکوژان و ژن سووتێنەران و دڕندە و هووڤى .. ئەگەر ئێمە سەدان و هەزاران ئەحلام مەنسوورمان نەبێت ، کە رەخنە لەپیاو و کار و کردەوەى پیاوى جاهیل و کاڵفام دەگرێت .. کە لەم رۆژگارە قێزەونەدا ئەنتى و دژى دەسەڵاتێکە کە کونج و کەلەبەرى دونیا و قیامەتى پڕ کردووە لەگەندەڵى و لە درۆ و لەمردن و لەنەخۆشى دەروونى و ئەخلاقى .!


دادە ئەحلام بەتاقى تەنیا ئەنتى دەسەڵاتێکى زل و زەبەلاحە .. دژەباوە و بەرژەوەندى خەڵکى زۆرینە و هەژارى کوردستان لەبەرچاو دەگرێت ، کوشتەى پارە و ڤێلا و مۆنیکاى جام ڕەش نییە ، ناتوانێت خیانەت لەبیر و هزرى لیبراڵ و ئازادانەى خۆى بکات و ببێت بەکۆیلەى دینار و دۆلار .. عیزەتى نەفسى زۆر بەرزە و وەکو حەللاج (هەق) دەبێژێت .. ناتوانێت ناڕاستى و درۆ و ناشرینى و نادادوەرى کۆمەڵایەتى و نایەکسانى و ناتەبایى قبوڵ بکات .. ناتوانێت بەگەندەڵ بڵێت ئافەرین و دەستخۆش و ناتوانێت چاوداخات و مس بخاتە گوێى خۆى و قوڕوقەپى لێ بکات ، وەکو چۆن سەدان نوسەرى پیاو وەکو نەعامە ، مل و سەرى خۆیان لە ئاست گەندەڵى و دزى و تاڵانى و بێ خزمەتگوزاریدا خستۆتە ژێر گڵەوە و سبەینان لەپشتى مێزى هایلایڤ و سپلیتى دوا مۆدیل و نیوەڕوان لەنێو مۆنیکاى جام ڕەشەوە تەماشاى زۆرینەى هەناسەسارد دەکەن و ئێوارانیش ، ویسکى و شەمپانیا هەڵدەدەن و شەوانیش ، سەماو لەرەى مەمک و سمتى سپى لەشفرۆشان ، کوردستانە هەتیوەکەیان بیردەباتەوە ! ئەحلام مەنسوور ، وەکو لەیلا زاناى مەزن خاوەنى ویژدانێکى پاکى مرۆڤانەیە .. هەست و سۆزى زۆر ناسکە و هەتاکو سەر ئێسقان بەزەیى و میهرى دایکانەى تێدایە و کانیلەیەکە ، زۆر بەهێمنى بەسەرماندا دەڕژێ و حەنان و میهربانیمان لەم زەمەنە شوومەدا پێدە بەخشێ کە تەنها داریوش لەگۆرانى ( ساڵى 2000 )دا توانیووییەتى بیچڕێت ..!


(3)


دادە ئەحلامى زۆر بەڕێز ، هەڵوێستى تۆ سنوور بەزێن  و رچەشکێنە  و لە هەڵوێستى پیاوى کورد بوێرتر و ئازادتر و ئازاتریت .. هەڵوێستى تۆ لە هەڵوێستى یلا زانا دەچێت ، بۆیە مرۆڤێکى زۆر بەرزیت .. چونکە رێز لە نووسین و قەڵەم و مرۆڤ و هەڵوێستى مرۆڤانە دەگریت ....!!
بڕوات بێت ئەگەر دەوڵەمەندبوومایە ، مەدالیاى زێڕینم پێدەبەخشیت !!


تکایە بەردەوام بەو لەسەر ئەو رێبازە مەزنەت لانەدەیت .. تۆ لە بەرەى میللەتدابە ، لە نموونەى تۆ زۆر کەمە و دانسقەیە ... بڕوام بە هەڵوێستى زۆرێک لە نووسەرانى نیشتمانەکەم نەماوە ... چونکە زۆربەیان چەندان مووچە وەردەگرن و چەندان شوناس و پێناسی حیزبی و گروپ و دەزگا و رێکخراوى پابەند و پەیوەست بە دەسەڵاتیان لەگیرفاندایە .. لەولاشەوە کادێر و نوسەرانێک و هونەرمەندانێکى بێشوومار لە هەندەرانەوە دێنەوە و خۆیان بەرە و باوەشی دەسەڵاتى کوردى راپێچ دەکەن و بێ هەڵوێستن ، بۆیە تۆ لە زۆرینەى پیاوى ئەم نیشتمانە ئازادتر و ئازاتر و رچەشکێنتر و مرۆڤدۆستتریت و رێز و نەوازشت بۆ قەڵەمەکەت ... سڵاوى گەرمى پڕ لەرێز و حورمەتى برایانەم بۆ کەسێتى سەرکەوتووتان .سڵاوى گەرمت ئاراستەبێت ... دادە ئەحلام مەنسوورى بەڕێز ...!
 

 

24.10.2008

hemea.rasoeL961@yahoo.com