٧\٦\٢٠١٥

نامەیەکی کراوە بۆ سەرۆکایەتی پەرلەمانی کوردستان و گشت فراکسێۆنەکان.

شەماڵ عادل سەلیم  

بەڕێزان لە سەرۆکایەتی پەرلەمانی کوردستان و گشت فراکسێۆنەکان.

باش دەزانم ئێوەی بەڕێز لەم کات و سات و سەردەمە ئاڵۆز و نالەبارەدا زۆر سەرقاڵن ،بەتایبەتی کە ماوەیەکە عیراق وهەرێمی کوردستان وناوچەکە بەگشتی ڕووبەڕووی شەرێکی نەخوازراو وھێرشێکی دڕندانەی داعش بووەتەوە ، بەڵام بەهۆی ئەوەی ئێوە نوێنەری خەڵکی کوردستانن‌، لوتف بفەرموون و ڕوخسەت بدەن زۆر بەکوردی وبەکورتی وەکو پێشمەرگەیەکی دێرین و زیندانیەکی سیاسی سەردەمی بەعسی گۆڕبەگۆڕ لە رێگەی ئەم نامەوە رووی قسەکانم بکەمە جەنابتان بڵێم :

بەڕێزان ماوەیەکە مەلا عەلی کەڵەک کە هاوڵاتیەکی هەرێمی کوردستانە ،بەکارە قێزەون و جادووگەریانەی زۆر بەئاشکرا خەڵک چەواشە دەکات و هزرو هۆش و ئەقڵییان کۆنترۆڵ دەکات و سوکایەتییان پێ دەکات...

بۆ ئەوەی زۆر لەکاتتان نەگرم یەکسەر دێمە سەر ئەسلی باسەکەم:

 
بەرێزان ، لێرەدا دوو کورتە وتاری ناوبراوتان بەنموونە بۆ دەهێنمەوە، کە بەئاشکرا سوکایەتی بە تاکی کورد دەکات ، وێرای ئەوەی هەردوو بابەتەکە پرن لە هەڵەی زمانەوانی ، هەروەها لە رووی داڕشتن و میتۆدەوە پێویستی بە دەستکاری هەبوو ، بەڵام لەبەر ئەوەی کورتە وتارەکان ( کەلەک )نووسیویەتی و خۆیشی بەزاناو داناو دکتۆرێکی کەم وێنە دادەنێت ، رێگەم بەخۆم نەدا دەستکاری نووسراوکەی ناوبراو بکەم کە لە پەیجی تایبەتی خۆی لە فەیس بوک بڵاوی کردۆتەوە و دەڵێ:

١- داوا له هه مووخه لكى كوردستان ده كه م حوشتر به خيوبكه ن زۆربه به ركه ته و شيفاشه هه ركاتێ نه خۆش كه وتن ميزو شيره كه ى تيكه لاو بكه ن بخۆن هيچ نه خۆشیه ك له جه سته تان نامينێ به ئيزنى خواى لێ كۆلینه وه م زۆرله سه ركردووه سه ركه وتوبومه به ئیزنی خوای به لام شیره كه دووئه وه نده ی میزه كه بێ واته (یەک په ردخیك شیر + یه ك په رداخ میز) پاش نان بخوات . به نده ی خوای عه لی مه حمود.

٢- به پیی زانیاری جنۆكه كان كه له سه رزمانی نه خۆشه كان قسه یان بۆكردووم خه لكیكی زۆر له و ماوه ی تیك ئه چن جنۆكه و شه یاتینكی زۆر دابه زیته سه رعیراق و كوردستان جنوكه كان ئه چنه له شیان و شیتیان ده كه ن وایان لێ ده كه ن خۆیان بكوژن . ئیوه ش خۆشه وستانم هیچ مه ترسین منی به نده له خزمه تان دامه بێ به رامبه ر چاره سه رتان ده كه م به لام ئیوه ته قوای خوای بكه ن نویژه كانتان به جوانی ئه نجام بده ن هیچ نابێ ان شاء الله ئه و دوعايه بخوينن به هيج شيوە يه ك جنوكه ناويرى نزيك ببيتەوە ليتان ( اعوذ بكلمات الله التامات من غضبه وعقابه وشر عباده ومن همزات الشياطين وان يحضرون. به نده ی خوای عه لی مه حمود.

بەرێزان:

لەبەرانبەر ئەو چارەسەرانەی كە مەلاعەلی كەڵەك دایناوە بۆ نەخۆشەكانی ، کە لە فرت و فێڵ و جادووگەری زیاتر هیچ بنەمایەکی زانستی و پزیشکی نی یە ، من وەک هاوڵاتییەکی دڵسۆزو خەمخۆری ئەم هەرێمە ،بە گرنگی دەزانم داوا لە بەرێزتان و لەرێگەی ئێوەشەوە لە سەرجەم لایەنە پەیوەندیدارەکانی حکومەتی هەرێمی کوردستان بکەم ، کە بەزووترین کات چارەسەرێکی زۆر خێراو ڕیشەیی وڕاستەقینە بۆ ئەم بەناو ( مەلا) یە بدوزنەوەو ڕێ و شوێنی پێویست بگرنەبەر بۆ ڕاگرتنی ئەوکارە قێزەون و جادووگەریانەی ناوبراو و ( نەخۆشخانە ) کەشی دابخەن ، چونکە ئەم بەرێزە خۆی نەخۆشەو پێویستی بە چارەسەکردنێکی دەروونی بنەڕەتی هەیە ، وهەموو بەڵگەو کارو کردەوە وچارەسەرەکانی کە بریتیە لە فرت و فێڵ و جادووگەری ئەو راستییە دەسەلمێنن...

ئەو واتە ( کەلەک ) هەقی خۆیەتی بەرگری لە راوبۆچوونی خۆی بکات و بەئازادی ڕای خۆی دەڕبڕێت ، هەقی خۆیەتی باس لە خەون خەیاڵی خۆیشی بکات، مافی خۆیەتی زیكر و تەهلیلە بکات ، بەڵام مافی ئەوەی نییە سوکایەتی بە وەزارەتی تەندروستی و دەزگا پەیوەندیدارەکانی حكومەتی هەرێمی كوردستان بکات ،بەڵێ ناوبراو مافی ئەوەی نییە سوکایەتی بە نەخۆشەکانی بکات ومیزیان دەرخوارد بدات ،و لیترێک کۆکتێلی میزو شیری حوشتریان بە ١٠٠ هەزار دینار پێ بفرۆشێت و یاساکان پێشێڵ بکات.

بەرێزان ،گەر ئێوە نوێنەری راستەقینەی خەڵکی کوردستانن دەبێ بەرگری لە خەڵک بکەن و نەهێلن (کەلەک و کەلەکەکان) لەوە زیاتر سوکایەتی بە ماف و یاساو خەڵکی بێ نازای هەرێمی کوردستان بکەن.

لە کۆتایدا هەرئەوەندە ماوە بڵێم:

تەنیا خۆشەویستیم بۆ خەڵکی بەشەرەفی کوردستان و نیشتمانە لەخاچ دراوەکەم و ویژدانم ڕێنمایی ئەو نوسین و بۆچونانەن.

_____________________________
● بۆ بینین وخوێندنەوەی هەواڵی سەیرو سەمەرەو گرتەی ڤیدیۆیی مەلا عەلی کەلەک ، کلیک لەسەر ئەم لینکە بکەن:
www.facebook.com/malaali.kurdi
 

ماڵپەڕی شەماڵ عادل سەلیم