په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

١٣\٢\٢٠١٩

نان و ئەوین.


ئەرسەلان مەحمود  


مەترسیدارتر لەدروستكردنی كێشەی نان، گەر بوونی هەبێت، ئەوا غیابی ئەوین و خۆشەویستییە لەیەكە كۆمەڵایەتی و دامەزراوە سیاسیەكاندا، چونكە ئەمیان جەستەى مرۆڤ دەپارێزێ‌ لەداڕزان و ئەویتریان ئاكارو ئةزموونی مرۆڤ بەرەو سەر دەباو دەفراژێنێت لەواقیعدا، لەناوەوەی هەر یەكەیەك گەر تاك لەژێر هەر بڕو بیانوێكدا لەمانە بێبەشبكرێت، مانای ئەوەیە حەقیقەت لەناو ئەم یەكەیەدا لاڕێ‌ و خنكێندراوە.

ئاخر خۆ نەخاك تەوالێتەو نە یەكە جیاوازە دەستەجەمعییەكانش تەویلەن، حەقیقەت لەهەر شوێن و جێگەیەكدا، لەهەر ژینگەو پێگەیەكدا، خرایە قەفەس و كۆڵانێكەوە تەنگەبەرو غەیرە عەقڵانییەت، مرۆ بەسروشت ناتوانێ‌ تیایدا بژی و بەردەوامی بداتە هەنگاوەكانی، حەقیقەت دەبێ‌ بەكراوەیی بمێنێتەوە، ئەوسا هەمووان دەكارێن و دەتوانن تیایدا بژین، چونكە خودی ئەوەی پێیدەگوترێ‌ دادپەروەری، جگە لەنەهێشتنی بێدادی، هیچ بەهاو مانایەكی تری نییە لەواقیعدا، دزینەوەی نان و گلدانەوەی ئەوین، هەنگاوی یەكەمی تێگدانی شیرازەی ژینگە كۆمەڵایەتی و سیاسیەكەو هاوسەنگییە دەرونییە مرۆییەكانن، مرۆڤ لەدۆخێكدا وەهائی ناچار بەوە دەبێتت بكەوێتە سەرشەقام و لەدەرەوەی پێكهاتە جڤاكییەكەی خۆی بگەڕێ‌ بەشوێن نان و دۆزینەوەی ئەوین و خۆشەویستیدا، هەموو یا زۆرینەی هەرە زۆری ئەو تاك و گەنجانەی لەناو خێزان و خانەوەداو شەقام و شارو نیشتمانەكەیاندا لەوەها ماف و ئازادییەك بێبەشكران، دەركەوتنە دەرەوە، هەیانە سوتاو هەشیانە خنكا، هەیانە خۆی كوشت، هەشیانە كوژرا، هەیانە سەركەوت و هەشیانە كەوت.

ئێمە خاكێكمان هەیە داغانكراو، نەتەوەیەكمان هەیە پەرت و پەرێشانكراو، فەرهەنگێكمان هەیە هەم بەڕوی خۆی و هەم بەرامبەر بەدەرەوەی خۆی زۆر پەتی و داخراو، خێزانێكمان هەیە ئەوەی ناوی ماف و ئازادی تاكە تیایدا یاساغە، باوك نێرەكەرو تاكەكانی كاتێك دەدوێن وەك ئەوە وایە باپیرە گەورەیان بێ‌ و بیەوێ‌ قسە بكات، خوێندنگەو ناوەندەكانی خوێندنمان، خەفەتگەو خەڵوەتگەن، نوێژینگەو نۆڕینگەكانمان بەنەقڵن، شارمان هەیە شەقامەكانی لەوە تاریك و تەریك و تەنگەبەرترن تەوەقوع بكەی، ڕێكخراوەكانمان بەس ڕێكخراونین، حزبەكانمان لەفۆڕمدا شتێك و لەپراكتیك و ئەداكردندا شتێكی ترن، پاڕلمان و حكومەتمان هەیە هەتا ئێستایش كەس نەیزانی سەر بەچجۆرە ڕیتم و تەریقەت و سیستمێكن، ئەوین لەهەر هەموویاندا میحوەر نییە، میهرەبانی و هزری لێبوردەیی لەهەر هەموویاندا وجودی نییە، زۆرینەیەك دەیكاو، كەمینەیەك بەرهەمەكەی دەخوات!!

 

ماڵپه‌ڕی ئه‌رسه‌لان مه‌حمود

 

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک