په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٢٤\١٢\٢٠١١

ته‌وه‌ری ''ئایه‌ په‌رله‌مانی کوردستان سه‌رسه‌خت و لامله‌ یان کارتۆنییه‌ یان ئاسایی و له‌باره‌؟''.

 

نەهرۆ:
پەرلەمانی کوردستان سازشکار و ریفۆررمخوازە، پەرلەمانیکی رادیکال نییه‌ تەنانەت شێوەی ئیشکردنی لەسەر مادەی ١٤٠ ئه‌و راستییه‌ دەسەلمێنێ.

سازدانی: ئه‌مڕۆ

 

ئەنجامدانی راپرسی دەربارەی مافی چارەی خۆنووسین و هەڵویستی پەرلەمان! دەتوانم بڵیم پەرلەمانی کوردستان کەمتەرخەمە لەبەر ئەوەی وەڵامی واژۆی ٧٦٦ کەسی نەداوەتەوە. وەک خودی خۆم بڕوای تەواوم بە مافی چارەی خۆنووسینی گەلی کوردە، ئاواتەخوازم رۆژیک زووتر ئەم مافە بێتە دی تەنانەت جاڕنامەی مافی مرۆڤ کە لە ساڵی ١٩٤٨ دەرچووە لە ١٩٦٤ دانی بەو مافە داناوە بۆ گەلانی چەوساوە.

 

سەرەتا ئەگەر بگەڕێینه‌وە بۆ هەڵویستی رابەرانی ئەمرۆی کورد ئەوە تالەبانی دەڵی خەونی شاعیرانە! لە دوا چاوپێکەوتنیدا دەڵی داخوازی هەندێ گەنجی هەڵچووی توندڕەوە، ده‌شێ بیست ساڵیتر یان پەنجا ساڵیتر جێبەجێ بکرێ، هەروا مەسعود بارزانیش دەڵی ئەگەر میللەتی کورد ساڵێک برسیەتی بچێژێ ئەوە من جاڕی مافی چارەی خۆنووسین ده‌دەم! ئەوان پێیان وایە چوار دەورمان بە رژێمی داگیرکەر تەنراوە، لە رووی واقعی ئابوورییه‌وە لەبواری هاوردە و ناردە ئابلۆقەمان لەسەر توند دەکەن و پڕۆژەکەمان لەبار دەبەن، بەڵام ئەگەر بەوردیی سروشتی چینایەتی پیکهاتەی پەرلەمان روون بکەینەوە، ئەوە زۆربەی ئەندامانی خوردە بۆرژوا و بۆرژوان، ئێستا بوونەتە چینیکی مشەخۆر قازانجیان لەوەدایە چارەنووسیان بە بازاڕی عێراقی ببەستنەوە لەوەی بیر لە ناوەندیکی ئابووریی کوردستانی بکەنەوە. بۆ نموونە هەرێمی کوردستان مانگانە لە١٧٪ بودجە لە حکومەتی عێراقەوە وەردەگرێ، ئەوان چاویان لەو بودجە جێگیر و بەردەوامەیە تاوەکو سەرچاوەیەکی ئابووریی نادیار!

 

بە رای من مەسەلەی مافی چارەی خۆنووسین کێشه‌یەکی ئابوری کۆمەڵایەتییه‌ تاوەکو کێشه‌یەکی سیاسی حەماسی بێ! بڕوانە باشووری سودان تا ئێستاش لەگەڵ حکومەتی ناوه‌ندیی ساغ نەبوونەتەوە لەسەر ئەو ناوچانەی نەوتیان تێدایه‌! وێرای ئه‌وه‌ش دەبێ لەسەر ئاستی پەرلەمانی عێراق و وڵاتانی ناوچه‌که‌ و جیهان ئیش بۆ وەدەستهینانی مافی چارەی خۆنووسین بکرێ.

 

من پێم وایە پەرلەمانی کوردستان سازشکار و ریفۆررمخوازە، پەرلەمانیکی رادیکال نییه‌ تەنانەت شێوەی ئیشکردنی لەسەر مادەی ١٤٠ ئه‌و راستییه‌ دەسەلمێنێ، هەروا مەسەلەی نەتەوایەتی و مافی چارەی خۆنووسین ناوەرۆکیکی دیموکراسییانەی هەیە، جێگای داخە ئه‌و گیانه‌ دیموکراسییه‌ لە لایەنی بەرامبەر بەدی ناکرێ، پیکهاتەی ئەمڕۆی پەرلەمانی عێراق لە کۆنە بەعسی و کۆنەپەرستانی شیعه‌ پیکهاتووە، ئه‌وانیش لە لایەن وڵاته‌‌ دراوسێکانه‌وه‌ پشتگیریی دەکرێن وەک ئێران و سعودییە، ئەجندای ئەوان لە عێراق جێبه‌جێ دەکەن.

 

بە رای من مەسەلەی مافی چارەی خۆنووسین لە کوردستانی باشوور هەڕەشەی لەسەرە، لە دوو لاوە،پان ئیسلامیزمی ئێرانی و شۆڤینیزمی عەرەبی، هێزەکانی ناوخۆی سەر بە ئەوان پەیڕەوی سیاسەتی (المماطلة و التسویف) دەکەن، سیاسەتی خۆگنخاندن بە مەبەستی وەدەستهینانی کات و دوارۆژیکی بەهێز تاوەکو جارێکیتر مافە رەواکانی گەلی کورد پایماڵ بکەن! بە بروای من لە ئێستادا مافی چارەی خۆنووسین گرێ دراوە بە پارچەکانی دیکەی کوردستانەوە، ئەگەر بڕوانین بۆ ئایندەیەکی نزیک ئەوا هەردوو رژێمی کۆنەپەرستی سوریا و ئێران لە بەردەم گۆڕانکاریی دان، رژێمی تورکیاش لە بەرامبەر داخوازیی پەرلەمانی ئەوروپا مۆلەق راوەستاوە! کەواتە گۆڕانکاریی و پەرەسەندنی کێشه‌ی کورد لە ئاستی وڵاتانی ئێران و سوریا و تورکیا بەڕێوەیە! ئەم گۆڕانە چاوەڕوانکراوە زیاتر خزمەت بە کێشه‌ی رەوای گەلی کورد دەکا.


ئەگەر ئەو پرسیارە بکەین ئاخۆ کێشەی کورد لە یەک مەسەلە پێکهاتووە یان چەند مەسەلەیەک، بە رای من چەند مەسەلەیەک، خەباتی پارچەکانی کوردستان پێکه‌وە گرێ دراوە، هەر پەرەسەندنێک لە پارچەکانیتر کاریگەریی هەیە بۆ سەر ئەزموونی هەرێمی کوردستان، لێرەدا مەبەست ئەوە نییه‌ راپرسی مافی چارەی خۆنووسین دوابخرێ بەڵکو دەبێ لەسەر ئاستی تاک و کۆمەڵگا، ناوەندی فەرمی و نافەرمی ئیشی بۆ بکرێ.


لە میانەی وەڵامدانەوەم هەندێک پێناسەم بۆ پەرلەمانی کوردستان و عێراق روونکردەوە زیاتر لەوەش پەرلەمانی کوردستان مۆرکی سیاسی حیزبەکانی دەسەڵاتی پێوەیە، ئەوانیش وەک دوو حیزبی ناو رژێمێکی تۆتالیتاریی بیردەکەنەوە، زیاتر لە روانگەی بەرژەوەندیی تەسکی حیزییه‌وە هەڵویست وەردەگرن و تێڕوانینی خۆیان ده‌خه‌نه‌ڕوو، ئەگەر سەیری رابردوویان بکەین بەرژەوەندیی تەسکی حیزبییان نەکردۆتە قوربانی بەرژەوەندیی بەرز و باڵای نیشتمان.


مەسەلەی مافی چارەی خۆنووسینیش یەکێکە لە ئامانج و ئاواتە بەرز و باڵاکانی میللەتی کورد، بۆیە کێشه‌کە ئەوەندە خەمی بنکەی جەماوەری خەڵکی کوردستانە نیو ئەوەندە کێشەی دیبلۆماسیی و پشت پەردە و نێو هۆڵی پەرلەمان نییه‌!!

 

نەرویج
ماڵپەڕی نەهرۆ

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک