٢٣\٥\٢٠١٢

نەک بەشە بەنزین ، بۆیان بکرێ بەشە ئۆکسجینیشمان لێدەبڕن.

هیواڕەش         

پەتى قەنارە جەستەى سەدام حوسێنى سارد و سڕ کردەوە بەڵام نەیتوانى هزرى خامۆش بکات ، لە ماوەى 24 ساڵەى حوکمڕانى ڕاستەوخۆى دیکتاتۆریانەیدا ، سەدام توانیویەتى گەراى خۆى لە هزرى خەڵکانێکى زۆر دانێ بە تایبەتى لە هەڵوێستە قڕانییەکانى شۆفینیزمان لە بەرامبەر گەلى کوردستان ، حوسێن شەهرستانى بە نمونە .

لەو کاتەوەى شەهرستانى وەکو بەرپرسێکى باڵاى حکومەتى ناوەند ناوى کەوتۆتە ناوانەوە ، دەیان هەڵوێستى شۆفینیستانەى ئاشکراى خۆى لە بەرامبەر گەلى کوردستان ڕاگەیاندووە و دواهەڵوێستى ڕەشى ناوبراو ، هەڕەشەى ڕاگرتنى بەشەبەنزینى هەرێمى کوردستانە و وادەزانێ هەموو کارتەکانى فشار لە سەبەتەى بیرى ڕەگەزپەرستانەى ئەواندایە ، ئەمەو ئەگەر پێى بکرایە پەیامى نەگریسى ئەنفال و کیمیابارانى سەدامییەکانى دەبارە دەکردەوە و تەنانەت ئۆکسجینیشى لە گەلى کورد یاساغ دەکرد ، لە کاتێکدا ئاو کە سەرچاوەى ژیانە لە کوردستانەوە بۆ نیشتمانى لماوى حوسێن بیابانستانى شۆڕ دەبێتەوە کە گەلێک لە نەوت و بەنزینەکەى ئەوان پڕبایەخترە و کاریگەریى زیاتر دەبێت بۆ فشار خستنە سەر دەزگا دیکتاتۆریەکەیان ، هەروەها نەوتێکى زۆرى عێراقى عروبە بە خاکى کورداندا تێدەپەڕێت و هەناردەى تورکیا و وڵاتانى دەرەوە دەکرێ کە دەبوایە ( مام جەلال ) ى سەرکۆمار کارتەکانى کوردستانى بخستایەتە بەرچاوى مالیکى و شەهرستانى و لعێبى نەک لێیان بپاڕێنتەوە و دامانگیریان بێ و داواى درێژکردنەوەى جێبەجێکردنى بڕیارى قەرەقوشیى وەزیرى نەوتى عێراق لە شەهرستانى بکا تا بڕیارى ڕاگرتنى هەناردەى بەنزین لە بەغداوە بۆ هەرێم بۆ ماوەى مانگێکیتر دوا بخرێ !

ئەگەر شەهرستانى پێى وایە بە نانەوەى قەیرانى بەنزین لە هەرێمدا گەلى کوردستان ملکەچى خواستى ڕەگەزپەرستانەى ئێرانیزمى ئاغاى مالیکى دەکات ، خۆ شوکر ماشەڵا سەروڕیشى سپییە و پێویست ناکات بیرى بخەینەوە کە لە سەردەمى عێراقى خاوەن پێگەى سیاسى و ئابورى بەهێزى دوێنێى ئاغا گەورەکەى دیکەیدا کە وێڕاى ئەوەى ئاووهەواى کوردستانى پڕژەهر کرد نەتوانرا کورد ملکەچ بکرێ ، نەبادا لە ئێستاى عێراقە پینەکراوەکەیان ، خۆ دواى ڕاپەڕینە مەزنەکەى گەلەکەمان نەوت و گاز و بەنزین و خۆراک و کەلوپەل و کالا پێویستییەکانى ژیان گشتگیر لێمان قەدەغە دەکرا و نەک کاریگەریى لەسەر ورەى بەرزى گەلە نەبەردەکەمان دانەنا بەڵکو بە چاوى خۆمان بینیمان قەدەغەچییەکان چۆن فڕێدرانە سەرەنوێڵکى مێژووەوە ، بێگومان چارەنوسى ئەمانەى ئێستاش باشتر نابێ و شەهرستانیش بە قەد عەلى حەسەن مەجیدى پێناکرێ .

ئەوەى لەسەرەوە نوسیومە لێرەدا دەیبڕمەوە ، چونکە وەکو شەهرستانى هەرچییەک بکا دوژمنە و گلەیى لێناکرێ و دەمویست زیاتر ڕووى گلەیى ئاراستەى بەڕێز - مامجەلال - بکەم لەوەى کە وەکو نوێنەرێکى خاوەن پێگەى هەستەوەرى کورد لە بەغدا ڕاشکاوانە بەرەو ڕووى پیلانەکانى دوژمنە گڵاوەکانمان نابێتەوە ، بەڵام ڕاگەیاندنى دواهەڵوێستى سەرۆک - مامجەلال - ناچارى کردم زیاد لەسەر بابەتەکە نەڕۆم و لێى پاشگەز ببمەوە ، چونکە لە هەواڵى ئەمڕۆدا و لە میانەى چاوپێکەوتنى سەرۆکى حکومەتى هەرێمى کوردستان لەگەڵ ڕۆژنامەى - هاوڵاتى - کە لە ماڵپەڕى - ئێنئاڕتی - دا خوێندمەوە هاتووە : (( مامجەلال سەرکۆمارى عێراق دەستلەکارکێشانەوەى ئامادەیە و تەسلیمى سەرۆکهەرێمى کوردستانى کردووە بۆ ئەوەى لەهەر شوێنێک پێویست بوو وەک کارتى فشار بەکارى بهێنێت )) ، ئەمە جوامێرانەترین هەڵوێستە لە لایەن بەڕێز تاڵەبانییەوە ، بۆیە بڕیارم دا لە باتى ڕەخنە و گلەیى ئەوپەڕى ستاییشى دەکەم ، کە لەوە پێش هەڵوێستى یەکێتى لە زارى بەڕێز - فەرید ئەسەسەرد - ى ئەندامى سەرکردایەتى بەم شێوەیە ڕاگەیەنرابوو : (( یەکێتى نیشتمانى پەیامێکى ئاراستەى نورى مالیکى کردووە و ئاگادارى کردۆتەوە کە گرەو لەسەر ناکۆکییەکانى نێوان پارتى و یەکێتى نەکات و ئومێدیان لەسەر هەڵنەچنێت )) ، بەڵام بەمە دڵم ئاوى نەدەخواردەوە و هەڵوێستى بەڕێز - مامجەلال - م بە سەنگى مەحەک دەزانى و بەم هەڵوێستەى شاگەشکە بووم ، ئومێدم وایە ئەم شێوەهەڵوێستانە شۆڕ ببێتەوە بۆ بنکە و پێگەى تەواوى حیزب و لایەنەکان بە دەسەڵاتدار و ئۆپۆزیسیۆنەوە ، بە کەسایەتییە سەربەخۆکان و میدیا حکومى و ئەهلى و سێبەرەکانیشەوە ، با بەڕێزان ( فەیسەڵ دەباغ و ئاڵا تاڵەبانى ) و هاوشێوەکانیان و تەواوى بەرپرس و کاربەدەستانى کورد خۆیان سەرقاڵى کێشە لاوەکییەکانى نێوانیان نەکەن و هەموو بە یەکڕیزى و یەکهەڵوێستى و یەکگگرتوویى وەڵامى گورچکبڕى دوژمنانى گەلەکەمان بدەنەوە ، دڵنیام ئەوسا سەربەخۆیى کوردستان دێت و لە دەرگامان دەدات و دەبێتە میوانى هەمیشەیى ئاوات و ئەندێشەکانمان و ئەوساش نەک ڕەخنە ، بەڵکو تێکۆشانى چەکداریش بۆ بنبڕکردنى گەندەڵى و نادادپەروەرى و قۆرخکردنى دەسەڵات و پاوانکردنى بازاڕ و کۆنترۆلکردنى بازرگانى و ئابورى بە ڕەوا دەبینم، بەڵام هەنوکە لە پێناوى سەربەخۆییدا مەرحەبایەکى شەیتان لە هەزار دۆستایەتى شۆفینیزمان پەسەندترە ، بێگومان هەنگاوى یەکەمى سەربەخۆییشمان لە یەکڕیزى ماڵى خۆمانەوە دەست پێدەکات.

ماڵپه‌ڕی هیوا ره‌ش