٤\٦\٢٠١٨

نەخۆشخانە خێرخوازی و نەخۆشخانەکانی پارتی و یەکیەتی جیاوازیان ئەرز و ئاسمانە.

شوانە حەسەن ئەبوبەکر 

نەخۆشخانەی خێرخوازی سەرەرای ئەوەی نەخۆشخانەکە بۆتە ناوەندێکی ھەلی کار و بەسەدان کەس لەسەر ئەو نەخۆشخانەیە دامەزراوە خزمەتگوزاریەکانیشی لە ئاستی ستانداردی عالەمیدایە و ماڵێکە بۆ ھەموو نەخۆشێک بێ جیاوازی, قورسایی و بارگرانی لەسەر ھاونیشتیمانیان سوککردووە, پاک و خاوێن, دکتۆر و پەرستاری بەڕێز, ئیدارە و بەڕێوبەر و ستافێکی سەنگین مرۆڤینی و پیشکەشکردنی دەرمان و پێداویستی پزیشکی بە ھەرزانترین نرخ.

. بلیت بڕین لە نەخۆشخانەی بەخشین تەنیا ٣٠٠٠ سێ ھەزار دینارە گەر پارەشت پێ نەبوو بەخشراوی, بلیت بڕین لە نەخۆشخانە تایبەتە زەبەلاحەکانی یەکێتی و پارتی وەک نەخۆشخانەی فاروق, پار, کوردستان و ژین سەدان دۆلارە خۆ ئەگەر بچیتە ناو نەخۆشخانەکە ئەوا تا دێیەوە دەر لایەنی کەم ٥٠٠$ پێنج سەد دۆلارت دەڕوا بابەتی بەزەیی و ھاوکاری لەو نەخۆشخانە تایبەتانە سفرە تەنانەت گەر یەک شەو و ڕۆژ بمێنیەوە لە بەشی مرکز و تایبەت ٣ سێ ملیۆنت دەڕوا...

. نەخۆشخانەی خێرخوازی ناوەندێکە دڵی ھاونیشتیمانیان ئارام دەکات و باری سەر شانیان سووک دەکات, بەڵام نەخۆشخانە تایبەتەکانی زەبەلاحەکان ناوەندێکی بازرگانی خەڵک ڕوتاندنەوە و نەخۆشن گەر گیرفانەکانت پڕ لە دۆلار نەبێت ناتوانی داخڵی نەخۆشخانەکانی بیت.

. نەخۆشخانەی خێرخوازی تەواوی خزمەتگوزاریەکانی تێدا دابین کراوەو نەخۆش بێ ئومێد ناکرێت و ھەموو جۆرە پشکنینێکی تێدا دەکرێت بەلام بە پیچەوانەوە لەبەر نەبوونی پلان و فەسادی ئیداری نەخۆشخانە حکومیەکان بەتاڵ و بێ خزمەتگوزارین دەرمانێکت پێ دەدات بۆ ئەوەی تر دەبێت لە دەرەوە بیکڕیت, بۆ پشکنینێک دەبێت مانگێک سەرە بگریت, دەبێت لەبەر کەمی پێداویستی و خراپی داو و دەرمان رۆژانە بینەری گیان لەدەستدانی دەیان کەسین.

. پێویست دەکات مانگانە چەند بەرپرسێکی ئەو دەسەڵاتە بێ بەرنامە و نەوت دزە بۆ نەخۆشخانەی خێرخوازی بانگبکرێن بەڵکو شەرم دایانگرێت و بیر لە دروستکردن و بنیادنانی چەند نەخۆشخانەیەکی وەھا بکەنەوە و چیتر نیشتیمان و ھاونیشتیمانیان بێ ھیوا نەکەن. بەداخەوە یەکیەتی و پارتی سەلامەتی گیانی ڕۆڵەکانیان فەرامۆش کردووە تەنھا بیر لە بەرژەوەندی خۆیان و بیر لە داھات و پارە و خێر و قازانج دەکەنەوە.

ماڵپەڕی شوانە حەسەن ئەبوبەکر