نووسهرگەلێک
هەن : ئاشق بە پارە و دەسەڵاتن....!
حەمەى ئەحمەد رەسوڵ
دیاردەیەکى زۆر ترسناک ، کە ئەمڕۆ نێو ژینگە و مەجلسی نووسهرانى
کوردستانى ئازادى تەنیووەتەوە ، ئەوەیە کە نووسهرانێکى زۆرى
هەندەراننشین پاش ئەو هەموو سالانە لە فێربوون و لە کرانەوە ، لە
زمانێکى زیاتر فێربوون و لە فەرهەنگ و کەلتوورێکى دەوڵەمەندتر
وەرگرتنەوە .. لە دیدگاى فرە ڕەنگتر و ڕەهەندى زۆرتر و بەرفراوانترەوە
... لە دونیاى جوانتر و سروشتى کردگارترەوە ،لە پەیوەندى پڕ خۆشەویستى
و عاشقانەترەوە ..لە چاوێکى گەشترەوە بۆ ژیان و ماناکانییەوە ... لە
عیزەتى نەفسێکى بەرزترەوە ..... لە دەروون و ناخێکى تەندروستترەوە ..لە
کەسێتییەکى دروستترەوە .... ئەفسووس و مەخابن ، کەسانێکى نووسهر و
رووناکبیر و وەرگێڕ و پسپۆڕ و زانا کە چەندەها ساڵە لە خزمەتى زمان و
فەرهەنگى کوردیدابوون .. هاتنەوە بۆ نیشتمان و خەڵکانێکى زۆریش بەوە
خۆشنوود و بەختەوەر بوون کە ئیدى بەڵکو ئەم نووسهرانە بتوانن ،
گۆڕانێکى نوێ ، هەنگاوێکى نوێ ، دیدگایەکى نوێ ، پڕۆژەیەکى نوێ ،تەکانێکى
نوێ ،خزمەتگوزارییەکى نوێ پێشکەش بە خەڵکى هەناسەسارد و ستەمدیدەى ئەم
خاکە خێرنەدیووە بکەن .....!
بەڵام ئەوەى جێی داخە و نیگەرانییە ئەوەیە کە ئەم نووسهرانە زۆربەى
زۆریان هاتوونەتەوە بۆ ئەوەى بچنە پاڵ ( حەجەکە ) و بۆئەوەى کە ڤێلا و
سەیارە و مووچەى خەیاڵى و.....تاد. وەکو ئیمتیازات و خەڵات لەلایەن
دەسەڵاتى کوردییەوە وەربگرن ..!! نووسهرى هێژا و بەڕێز : ئێمە ناڵێین
حیزبى مەبن و لەگەڵ دەسەڵاتى کوردیدا مەبن ..هیچ شورەیی و نەنگى نییە
تۆیەکى نووسهر حیزبى یان هەوادارى ئەم حیزبانەى ئێمە بیت .. هیچ نەنگ
نییە تۆ لە هەندەرانەوە بۆ باوەشی ئەم حکومەت و حیزبە دەوڵەمەندانە
بگەڕێیتەوە .. هەر هیچ نەنگ نییە و تۆ ئازادیت کە نەتوانیت لە خانووى
کرێدا بژیت و تازە بە تازە کرێچی بیت ........!
بە هیچ شێوەیەک شورەیی نییە و تۆ ئازادیت کە نەتوانیت سوارى پاسی
کۆستەر ( 21 نەفەرى) ببیت کە لە پاسەکانى سودان و سۆماڵ دەچێت ... تۆ
ئازادیت و هەقتە کە نەتوانیت برنجى باییعى بخۆیت .. بەڵێ هەقتە کە
نەتوانیت بە چەندەها کاژێر بێکارەبا و بێ ئاو و بێ سووتەمەنى و بێ
هاتوهاوار و قیژەقیژی هەژارانى کۆڵانە میللییەکان بژیت ......!
بەڵام نووسەران و هونەرمەندانى برا و خوشکە جوانەکانى بەندە ، تەنها
یەک پرسیارى لاسار و بزێو و بێچاوو ڕووم لێتان هەیە و بەس ، ئایا ئێوە
لەم ڕەوشە ناهەوار و بێسەروبەرەییە ڕازین ؟ ئایا ئێوەش بوونەتە کەڕەى
شەربەت ؟ ئایا گوێتان لەو هەموو سکاڵایانە نییە ، گوێتان لە گرییە و
زارى : مناڵ لاو و ئافرەت و پیاو و پیر و نەخۆش و خێزانى ئەنفالکراو و
شەهیدان و پێشمەرگەى دێرینى هێژا و گوندنشینان و شارنشینان و تەلەبە و
قوتابی و خوێندکاران و مامۆستایان و کارمەندان و بێکاران و نووسهرانى
بێ پشتو پەنا و هونەرمەندانى ناحیزبیى - هەژار و ڕێزلێنان بڕاوان و
مووچە بڕاوان و جوتیاران و شۆفێران و .....و.....و .....تاد.
ئێوە لە تەنیشتى حەجەکەوەن بە بەڵگەش زۆربەى جاران ، لە تەلەفزیۆن و
موناسەباتدا دەتانبینین ...بابەت و نوسین و کێبەکانتان زۆر بە ئاسانى و
بێ زەحمەتکێشان و هاتووچوون بۆ چاپ و بڵاو دەکرێتەوە ... پارەی زۆر و
خەڵاتى زۆر و ئینتیازاتى زۆرتریش وەردەگرن ...!!
بەڵام ئایا ئێوە لەوە ناترسن و پرسیارێکى ویژدانیی لەخۆتان ناکەن ،
کەئایا بۆ ورتەیەک ، ئاخاوتنێک ،قسەیەک ، نوسینێک ، بەیاننامەیەک ،
پڕۆژەیەک ، هەڵوێستێک ، ڕێکخراوێک ، لانەیەک ، ماڵێک ، مەجلیسێک ،
دیوانخانەیەک ، فەرهەنگخانەیەک ، لیژنەیەک ، بەدواداچوونێک ، بۆچی هیچ
هەلوێستێکى جارانى سەردەمى بوێریتان نەماوە دەرهەق بەو ژیانە ناخۆشەى
خەڵکان و زۆربەى دانیشتوانى کوردستانى ئازاد بەسەریدەبەن !
زۆرێک لەو نووسهرانە چەندین ساڵ لە هەندەران و لە ئەوروپاى ئازادو
مەعریفە و زانست و دیمۆکراسیدا ، وانەى فێربوونیان خوێند : سەبارەت بە
پەروەردەى تاکى سەربەخۆ و ئازادى و مافە مرۆڤــ و یەکسانى و دادوەرى
کۆمەلایەتى و سەروەرى یاسا و بەهێزى و سەربەستى ڕەهاى پەرلەمان و فرە
حیزبى و فرە ڕەنگى و شەفافییەت و شەفافییەتى بودجە و نەسرییە
تەرخانکردن و خەرجییەکانى حکومەت و وەزارەتەکان ، چەند وانەیان بینى و
بیست سەبارەت بە سزادانى سرپێچیکاران لە وەزیر و گزیرانى ئەوروپا و
دادگاییکردنییان لەبەرچاوى خەڵکییەوە و لەسەر تەلەفزیۆنەکان و
ڕیسواکردنییان بۆ یەکجاریی و نەفرەتکردنییان بۆ هەتاهەتایی..!
زۆرێک لەم دلێرانە ، چییان هێنایەوە بۆ کوردستانى دواکەوتووى بێ خاوەن
..؟ چ هەڵوێستێکیان نواند کە کەللە تەزێن بێت و بوغراکانى نێو دەسەڵات
و حیزبەکان بتەزێنن !
(( بێجگە لە هەڵــــوێستى ئازا و بوێر و ناوازانەى هەریەک لە
مامۆستایان رێبوار سیوەیلـــــــــــــــــــی و دکتۆر فەرهاد
پیربـــــــــــــــــــــــاڵ نەبێت کە ژیان و پلە و پایەى خۆیان و
خێزانیان خستە مەترسییەوە و بە نێو خەڵکیدا کەلتوور و رۆشنبیرییەکیان
پیادەکرد و فەرزکرد بەسەر کۆنەخوازاندا کە نزیکببوەوە لە هەڵوێستى
هەریەک لە ڕۆسۆ و ڤۆڵتێر و سارتەر و ماندێلا و گاندى و حورمەتیان بۆ
قەڵەم و دەنگ و ڕەنگى نووسهر و رووناکبیر و مامۆستاى زانکۆ گەڕاندەوە
....!))
ئەو نووسهرانە کە ئەمڕۆ لە حکومەت و لە حیزبەکانى کوردستاندا پۆستییان
هەیە بە ئاشکراو بە نهێنى ..زۆرێک لەو کادێر و دکتۆر و ماستەرانەى لە
هەندەرانەوە گەڕاونەتەوە .. زۆر لەو کادێرە حیزبییانە خراپتر و بودەڵتر
و گرگنتر و گەندەڵترن کە لە مێژە لە کوردستانن و لە دواى راپەڕینەوە
پۆست و کورسی و مێزیان هەیە زۆر لەم ئەزموونکارانەى هەندەران خاکیتر و
بەخزمەتتر و نەجیبترن ....هەندیچکى زۆریان هەن کە چاوپۆشی ناکەن ،
بێدەنگى هەڵنابژێرن ، بێهەڵوێستى ناکەنە کارو خووى رۆژانەیان ،
نەبوونەتە کەڕەى شەربەت ..وەڵامى تەلەفۆنى ناسیاو و برادەرانیان
دەدەنەوە .. سەردانى هەژاران و نەداران و نەخۆش و کەسوکارانى پرسەدار
دەکەن .. لە پشت جامى رەشی سەیارەکانیانەوە جارجار سڵاوێک لە ئەحباب و
دۆستى پیادەى سەر شەقامە بێبەزەییەکانى کوردستانیان دەکەن ...!
زۆرێک لەم نووسەر و کادێر و ئەزموونکارانەى گەڕاونەتەوە هێندەى ئەو
لاوانەشیان پێناکرێت ، کە لەم رۆژنامە یان ئەو رۆژنامە سکاڵاى خەڵکى
خێرنەدیووى ئەم نیشتمانە دزراوە بە دەسەڵات و بە حکومەت دەگەیەنن و
لێرەو لەوێ هەڕەشیان لێدەکرێت و چاویان لێسووردەکەنەوە و دەم و
کاکیلەیان دەهاڕن ....!رۆژانە بە لێشاو ژن و ئافرەتى کورد ، لەم
کوردستانە ئازاد و زەنگینەدا دەکوژرێن و دەسووتێن و زیندەبەچاڵ دەکرێن
و ون و بێسەروشوێن دەکرێن .. ژنکوژ و ئافرەت سووتێن و جەلادى رۆحى
کچەجوان و بێگەردەکانیشمان وەکو بەرزەکى بانان بۆى دەردەچن و نە یاساى
سەروەر دەتوانێت سزایان بدات ، نە بەرپرسەکانمان نە زەبرى دەسەڵاتیان
ڕاپێچی لاى دادگایان دەکەن ، نە کەسێک و لایەن و کۆمەڵە و ڕێکخراوێک و
زانکۆ و پیاوانێک ، دەرهەق بەم جەهلستان و نەزانى و وەحشییەتگەرایە ،
یاداشتێک یاخود بەیاننامەیەک یان ئیدانەکردنێک لەم ئەوروپییە ئازادیخوا
و نوێخوازانەوە دەبیستین و دەبینین ....!
زۆربەى زۆری ئەم نووسهر و کادێرانە ئەمێستا لە کوردستاندا مامۆستا و
ڕاوێژکار و وەزیر و وەکیل وەزیر و بەڕێوەبەر و سەرپەرشتیکار و
کاربەدەستى گەورەى حیزب و حکومەتن ، باشە کوا ، کامەیە ، چییە قسە و
تیۆری و پڕۆژە و بەرنامە و ڕەخنە و گازەندە و گلەیی و هەڵوێست و یاداشت
و نامەى دەست لەکارکێشانەوە و ڕەفزکردن و قبووڵنەکردنتان و ناڕەزاییتان
؟
رۆژ لە دواى رۆژ بارى ئابوورى و کۆمەلایەتى و سیاسی و دەروونە تاک و
کۆمەڵى کوردستانمان بەرەو خراپ و خراپتر و چەواشە و چەواشەتر و گەندەڵ
و گەندەڵتر و گەندەڵترین و بەرەو هەڵـــــدێر و بەرەو هەرەس و
لێکدابڕان و لێکترازان و تەکەتوول و تەکەتولکاریتر دەچێت .....!
ئێوە لە ئەوروپا وانەتان سەبارەت بە گەندەڵى و دزى و واسیتە و خزم
خزمێنە و مەحسوبییەت خوێندووە ، وا ئێوەش هاتوونەتەوە سەر هەمان سفرە و
بەلاتانەوە ئەم کەشوهەوا و ئاتمۆسفییرە ، غەریب و نامۆ نییە ....!؟
لە ئێوە ئەپرسم و لە ئێوەوە دەست پێدەکەم ، چونکە ئێوە بە دیوێک زۆر
هەستیار و حەساس و دڵناسک و شاعیرین و زۆربەشتان شاعیرن و تێگەیشتوون و
خوێنەر و نووسهرن ، هەروەها بە دیوێکى دیکەش زۆر نزیکن لە دەسەڵاتەوە
و حیزب و حکومەت متمانەتان پێدەکات ، توو ئەو خوایەى ئەیپەرستن و توو
ئەو بڕوایەى بڕواتان پێیەتى ، وو سەرى ئازیزتان ، ئایا لەم زەمەنە
ناخۆشترتان بەچاوى خۆتان بینیووە ..؟
ئایا ئێوە لە هەندەران و لە وڵاتانى ئەوروپی بەچاوى خۆتان نەتانبینى کە
حیزب و حکومەت و دەوڵەت بۆ خزمەتکردنى خەڵکى لەسەر کورسی دانیشتووە ،
نەک خەڵک خزمەتى ئەوان بکات ، من بە چاوى خۆم لە هۆڵەندا بینیم کە شاژن
بیاتریکس / چەندە گریا و خۆى پێڕانەگیرا لەبەردەم کامێرادا ، بۆ ئەو
شارەى کە کارگەى فیشەکە شێتەى تیا تەقییەوە .. ( شاری ئەنیشخەدەى لە
هۆڵاند ) یان وەکو لاى ئێمە دەبێت خەڵکى لەخزمەتى حیزب و حکومەتدا
ژیانى نەهامەتى بژی..... !!؟؟ دەبێت لێرە کارەبا و ئاو و نەوت ببنە
ئەستێرەى سیوەیل و ببنە داخى دڵ و دەردەدڵى خەڵکى زۆرینەى کوردستان ،ببنە
جەڵتەى دڵ و دەماخى هەزاران هەزار خەڵکى ڕەسەنى کورد ...!
ئەوا بۆ چوار ساڵ دەچێت لە هۆڵەندا گەڕاومەتەوە و بە چاوى خۆم دەیبینم
و تەماشایان دەکەم ، زۆرێک لەوانەى کە دەگەڕێنەوە هەفتەى یەکەم لە
چایخانەى سەهۆڵەکە دەیانبینم و پاشان یان دەچنە نێو سەیارەى جام ڕەشەوە
و ئیدى هەر ئەو ئێمەى لاتوپات دەبینێت یان لە پشت سپلیتى ئەم یان ئەو
دەزگاى حیزبى یا حکومى یان رۆشنبیرى یاخود رێکخراوى لەژێرەوە سەر بە
حیزبى و بەناو ئەهلى دەیانبینمەوە ... ئیدی بە قودرەتى قادر و بە کوون
فەیەکونێک دەبنە خاوەنى سەیارەى مۆدێل بەرز و خانووى مەڕمەرى و پۆشاکى
فاسۆنى ئینگلیزى بریقەدار لەبەردا و نوسینەکانیشیان زۆر بچووک دەبێتەوە
و بەڵام بە بۆڵدى گەورە و بە وێنەى زۆر گەرەوە و لە لاپەڕەى تایبەت و
لەگەڵ پیاوماقووڵان و مەجلسی ڕیش سپییەکاندا و لە رۆژنامە گۆڤارى بەگ و
ئاغاکاندا بۆیان بڵاویاندەکەنەوە و پاداشت و موکافەئاتیشیان بە سەیارە
بۆ دەبەنەوە بەدەرکى ماڵیان .....!
***
خوشک و برایانى نووسهر و هونەرمەند و کادێرى گەڕاوە لە هەندەرانەوە ..ئەمەوێت
زۆر بە کورتى و بێ سەرئێشاندنتان ، چیرۆکى گەڕانەوەو خەون و پڕۆژەى
بەندەتان بۆ بگێڕمەوە ، وەکو ئەزموون لەگەڵ دەسەڵاتى کوردیدا ، و
هەوڵدان بۆ ئیشکردن و جێگەگرتنەوەى گەندەڵ و بوودەڵێک لە شویچنى
ناشیاوى خۆیدا ..!
بەندە کاتێک کە لە هۆڵەنداوە گەڕامەوە ، یەکەم کارو کردەوەیەک کردبێتم
ئەوەبوو کە خاکى کوردستانم خستە نێو زارمەوە و تانەمکرد بە قووڕ و
نەمجوو ، هەڵنەستامەوە سەرپێ .. بەڵام لەولاوە براکانم پێم پێدەکەنین و
دەیانووت سبەینێ ڕاى خۆت دەگۆڕیت ..سبەینێ تفى لێدەکەیت و بێز لەم خاکە
دەکەیتەوە .....!وەلى من لەبەر گریان و چاو بە فرمێسک بوونم : نە گوێم
لەوان بوو ، نە لەبەر قەتیسی چاوم بە ڕۆندک ، بە تەواوەتى دەشمبینین
..!! زۆرم هەوڵدا و پاش نزیکەى دوانزدە ساڵ لە نووسینى دوو فەرهەنگ و
تەواو کردنییان هێنامنەوە بۆ چاپکردن ، یەکێکیان کە ئیسپانى – کوردى
بوو لە دەزگایەکى رۆشنبیریدا / کە هەر برادەر و هاوڕێ و مامۆستاکانى
خۆم دەیانبرد بەڕێوە نزیکەى سێ ساڵ و نیوى بچکۆلانە لە ڕیز و نۆرەدا
بوون بۆ چاپکردن .. هەتا زۆر لێیان نەپاڕامەوە ، چاپ نەبوو ، ئەوەکەى
دیکەش بە نێوى فەرهەنگى هۆڵاندەوە ( ماڵى کاک فەتاح زاخۆیی ) ئاوەدان
بێت یارمەتى لەچاپدانى دام و ئێستاکەش چوار گەڵام تیادا زەرەر و
زیانبوو ، بە (نێوى هۆڵاندەوە ) کە فەرهەنگى زمانى هۆڵەندى – کوردى بوو
.... هەتا ئێستاش هیچ دەزگایەک ، هیچ لایەنێک ، هیچ کەسێک لە ناخ و لە
دڵێکى سافەوە دەستخۆشی لێنەکردووم و لە کوولەکەى تەڕیشدا نە باسیانکردن
و نە سوپاسیشیان کردووم.. !
***
لە لایەکى دیکەوە زۆرمان هەوڵدا ، من و برا و خوشکە نووسهرەکانم ، کە
بتوانین یارمەتى تەلەفزیۆن و ڕادیۆیەکى یەکێ لەم دوو حیزبە زلهێزە و
دەسەلاتدارەى کوردستانى ئازاد و ئازادیخواز بدەین ، بە خستنە ڕووى
ڕاستییەکان و وتنى هەق و ڕەخنە گرتن لەو ڕەوشە بێسەرو بەرە نایاساییەى
لە کوردستانە هەتیوەکەماندا خەمڵیوە ..!
بە شێواز و میتۆدى زانستى و ئاکادیمییانەوە نووسهر و رووناکبیر و
سیاسەتمەدارمان بۆ ستۆدیۆى ئەو دەزگایە ڕاکێشا و لەگەڵ بوونى زۆرێک لە
ئاستەنگ و بەرەبەست و بەربەرەکانێشدا بەڵام هەر ماوەیەک بەردەوام بووین
و دواجار بەرەى کۆنەپەرست و ترسنۆک و بوودەڵان سەرکەوتنى وەدەستهێنا و
بەرنامە و پڕۆژەکانمان وەستێنرا .... داوامانکرد بچینە لاى سەرۆکى
هەرێم و دواى دوو ساڵى ڕەبەق ، ئەوەبوو بە ئارەقەى ناوچەوانى خۆمان و
لەبەردەمى حەشاماتێکى زۆر لە نووسهران و هونەرمەندانى کوردستان لە
قەڵاچوالان ساڵى 2006، داوامان لە خوودى سەرۆکى هەرێم کرد بچینە لاى و
دەرفەتمان بداتێ پڕۆژەکەى خۆمان بگەیەنینە لاى ..!
ئەوەبوو من و خوشکەکەم و خێزانەکەم چووینە لاى و ئەو زۆرى ڕێز لە خۆمان
و لە ڕەخنە و پڕۆژەکەمان گرت ..زۆر خۆشنوود و کەیفساز بوو بەو پڕۆژەو
پرۆپۆزەڵەى کە بەندە خستییە بەردەستییان ، پڕۆژەکە بریتى بوو لە :
دەربارەى بەسەرکردنەوەى مناڵە هەژار و خێزانە ئەنفالکراو و شەهیدەکان و
کردنەوەى دەزگا بۆ پاراستنى ماف و ژیانیان و دوورخستنەوەیان لە شەقام و
نەهێشتنى دیاردەى ئیشکردنیان لە تەمەنى مناڵى و مێردمناڵیدا ..
کردنەوەى سەنتەر بۆ فێرکرن و خوێندنیان لەو پیشە و خولیایانەى کە
داخوازن و لەبەر نەداریان ناتوانن ئەنجامییان بدەن ...!
شایانى باسە ، ئەو پڕۆژە پەسەندکراوەى جەنایى سەرۆکى هەرێم ، چووە لاى
زۆرێک لە بەرپرس و کارمەندى بەرز و وەزیر و گزیرى کوردستانى لێگرد بۆوە
و( شیردا بۆداپیر دا ) ساڵێکى دوورو درێژ و هاوینێکى مەنجەنیقمان
بەڕێگاى پایتەختەوە بردەسەر و دواى سەراب و دواى هیچ کەوتین و دراوێکى
زۆرمان لەو ڕێگایەدا خەرجکرد و هیچمان بەهیچ نەکرد ..! مەخا بن و سەد
هەزارجار حەیف و خەسار کەوا ، کەس یارمەتى و هاریکارمان نەبوو ..
کەس ڕێگاى دوورى بۆ نزیک نەکردینەوە ..کەس تەلەفۆنێکى بۆ نەکردین ، کەس
نەهات بەرەو پیرمانەوە ، لەبەرئەوەى ئێمە مرۆڤێکى بێ پشتوپەنابووین ،
لەبەرئەوەى کە حیزبی نەبووین ، لەبەرئەوەى کە هەقمان گووت و ڕەخنەمان
لەو دەزگا و میدیایە گرت کە دەمانوویست پێشتری بخەین ، کراوەتر و
ئازادتر و ئازاترى بکەین ......!
لەبەرئەوەى دەستى کەسمان ماچ نەکرد ، لەبەرئەوەى سەرمان بۆ کەس
دانەنەواند ، لەبەرئەوەى وەکو حەللاج هەقبێژیمان گووت ، لەبهرئەوەى
ئێمە بوودەڵى و گەندەڵیمان قبوڵنەکرد ، هیوا و ئاواتمان ، خەون و
خولیامان ، پڕۆژە و بیرۆکە و نووسین وبیردۆزە و داهێنانى نوێمان ، چووە
ژێر گڵەوە ، زیندەبەچاڵ بوو ، ئیدى هیلاک و ماندوو بووین ،ئیدى
ئیتمامان کاڵ و کاڵتر دەبێتەوە ، ئیدى هەوڵەکانمان کیسەڵ ئاسا دەبن ،
ئیدى ڕەشبینیمان بەسەر ڕوونبینى و ئومێد دا باڵدەکێشێت .... ئیدى خۆمان
بە هاووڵاتى پلە یەک و دوو و سێ و .....تاد. نازانین ...ئیدى ئێمە نامۆ
و غەریبین بەم نیشتمانە .. ئیدی ئەم نیشتمان و خاکە پیرۆزە ، ئێمە
خاوەنى نین و ئێمە خاوەنى بستێک زەوى نین ، ئێمە وەکو هەزاران و دەیان
هەزاران و زۆرینەى ئەم کوردستانە ، کرێچین و لەژێر زەبرى ساحێب
خانووداین ، نیوەو زیاترى مووچەکانمان بۆ کرێە و بۆ کرێ پاسە ....!
***
خوشک و براى هێژام نووسهر و هونەرمەند و کادێرى زانکۆیی گەڕاوە لە
هەندەرانەوە .... لەم بەشەدا ، یاداشت و نامە و مانیفێست و هەڵوێستێَکى
چکۆلانەى خۆم بۆ ئەم برا نووسهر و کادێر و هونەرمەند و ئەدیب و
رووناکبیرانە دەخەمە بەرچاو کە خزمەتکردنى ئەم دەسەڵاتە بوغرایە بەفیڕۆ
دەچێت و کەسانى بێوەفا و بوغرا و گەندەڵ و گرگن لە شوێنى حەساس و
هەستیارى ئەوتۆدا دانراون و هیچ کارێکى مەدەنى و سکولارییانە ى مۆدێرن
، هیچ پڕۆژەیەکى ئینسانى و خزمەتگوزار ، هیچ بیرۆکەیەکى تازەگەر و
نوێخواز ،هیچ لیژنەیەکى پتەو بۆ ڕاستى دەرخستن و (تەقەسی حەقایق)و
شەفافییەت و هەقبێژى گووتن ، هیچ پاکتاوى و چاکسازى بۆ نەهێشتنى
گەندەڵى و دزى و درۆزنى و داوێن پیسى و ئەوانەى هاندەدەن ژمارەى بکوژ و
ژنکوژ و رۆژنامەنووسی ئازادیخواز کوژ زیاد بێت .. ئەوانەى پارەیان
دەدەنێ ، ئەوانەى لە یاسا دەیانشارنەوە ، ئەوانەى بەخێویان دەدەن و
مووچەى تایبەتیان دەدەنێ .......!
لەگەڵ ئەم دۆخە و ئەم دەستەبژێرە و ئەم حیزبانەى ئێمەدا سوودى نییە ..
چونکە چۆن سەدامى دیکتاتۆر و خوێنمژ ، ئەگەر شەڕى بوەستانایە دەکەوت و
دەڕووخا هەر ئاوەهاش ئەم دەسەڵات و ئەم حکومەتەى ئێمە ، گەندەڵیی بوەتە
سیما و خەسڵەتێکى سەرەکى ئەم بەرپرس و وەزیر و بەڕێوەبەرانەى ئێمەى
کورد ، ئەگەر گەندەڵ و دز و درۆزن و داوێن پیس و گڵاو موحاسەبە بکات و
بەسەری سفرەوە بیانخاتە سەر تەلەفزیۆن و بە ئاشکرا دادگاییان بکات و
یاسا بەبێ دەستێوەردان دادگاییان بکات و ئیدى گەندەڵى و دیاردەى فەساد
بەڕێوەبردن سنوورى بۆ دادەنرێت و لێپرسینەوە و زیندانیکردنى دز و
گەندەڵ و ئازادکوژ بەرەو کۆتاییهاتن دەچێت ..!
ڕاستە زۆرێک لەم بەرپرسانەى ئێمە خەبات و شۆڕشێکى زۆر پیرۆز و بێکۆتا و
نەبڕاوەیان لە سەروەخت و سەردەمى خۆیاندا بەرپاکرد و ئێمەیان لە
ستەمدیدەیی و فەوتان و قڕکردنی حەتمى قووتارکرد و بوونە فریادڕەس و
ڕزگارکەر ، بەڵام ئەوانە چەند کەسایەتییەکى دیارن و ئاشکران و
هەندێکیان وازیان هێناوە هەندێکیان ئەوەندە دوورەدەست و دوورن لە خەڵک
و لە چاوانەوە وەکو نەبن وایە ، بڕیارەکانیان ناگاتە شوێنى مەبەست ،
نموونەیان زۆر کەم بۆتەوە .. سیفات و خەسڵەتى جیڤارا ئاسا و ماندێلا
ئاسا و مەلا مستەفا ئاسا و شەهید قازى محەمەد ئاسا و ........تاد.یان
تیادا کەم بۆتەوە ..!
کەسانى وەکو جیڤارا و ماندێلا پاش ئەوەى شۆرش و تێکۆشانى بێوێنەیان
سەرکەوت و بوونە نموونەى باڵا بۆ هەموو جیهان و مرۆڤایەتى ، بوونە
وانەیەکى مەزن و نەمر بۆ هەر کەسێک ماناى مرۆڤایەتى و ئینسانییەت و
ویژدان و یەکسانى و دادوەرى و دیمۆکراسی و ئازادى و نرخ و بەهاى بەرزى
مرۆڤـــــــ و ژیان دەزانێت و هاوپەیمان و هاوبیرە لەگەڵیاندا تا مردن
........!
ئەو نموونانە لە ئینسانى گەورە و مەزن لەمڕۆدا زۆر کەم بوونەتەوە و
مەخابن کەسانى لەو نموونانە دەگمەنن و لەوە دەچێت بووبنە دانسقە لەم
کۆمەڵگا هەشبەسەرەى ئێمەدا کە بتوانێت لە کاتى تەنگانە و ناخۆشی
مرۆڤەکانى براى خۆیدا بەشدار و هاریکار و هاوخەم و هاودەنگ و هاو
هەڵوێست بن .....!
|